“Adunay Tinudlong Panahon Alang sa Tanang Butang”
“Adunay tinudlong panahon alang sa tanang butang, usa ka panahon alang sa matag kalihokan ilalom sa mga langit.”—ECCLESIASTES 3:1.
1. Unsay problema nga nasinati sa dili-hingpit nga mga tawo, ug sa unsa kini misangpot sa pipila ka kahimtang?
ANG mga tawo subsob moingon, “Maayo pag gihimo nako kini niadto pa.” O lagmit human mahitabo ang usa ka butang, “Maayo pag naghulat ako.” Gipakita niining mga reaksiyona ang problema nga nasinati sa dili-hingpit nga mga tawo sa pagtino kon kanus-a ang hustong panahon sa paghimo sa pipila ka butang. Kining maong limitasyon nagpahugno sa mga relasyon. Kini misangpot sa kahiubos ug kahigawad. Ug mas grabe sa tanan, kini nagpahuyang sa pagtuo sa ubang mga tawo kang Jehova ug sa iyang organisasyon.
2, 3. (a) Nganong usa ka maalamong dalan ang pagdawat sa pagtino ni Jehova sa tinudlong mga panahon? (b) Unsang timbang nga panglantaw ang angay natong batonan mahitungod sa katumanan sa tagna sa Bibliya?
2 Sanglit adunay kaalam ug hait nga panabot nga wala sa mga tawo, si Jehova makaarang sa pagkahibalong daan, kon buot niya, sa sangpotanan sa matag lihok. Mahibalo siya “sa kataposan sukad sa sinugdan.” (Isaias 46:10) Busa, siya dili masayop sa pagpili sa labing haom nga panahon sa paghimo sa bisan unsa nga buot niyang buhaton. Busa, inay kay mosalig sa atong sayopsayop nga pagpanimpo, maalamon nga dawaton nato ang pagtino ni Jehova sa tinudlong mga panahon!
3 Pananglitan, ang hamtong nga mga Kristohanon maunongong maghulat sa tinudlong panahon ni Jehova nga matuman ang pipila ka tagna sa Bibliya. Sila nagpabiling puliki sa pag-alagad, nga sa samang higayon naghupot nga tin-aw diha sa hunahuna sa prinsipyo sa Lamentaciones 3:26: “Maayo nga ang usa ka tawo maghulat, nga mahilomon gayod, alang sa kaluwasan nga iya ni Jehova.” (Itandi ang Habacuc 3:16.) Sa samang panahon, sila kombinsido nga ang gipadayag nga pagpahamtang sa paghukom ni Jehova, “bisan pa kon kini malangan, . . . matuman gayod. Kini dili maulahi.”—Habacuc 2:3.
4. Sa unsang paagi ang Amos 3:7 ug Mateo 24:45 motabang kanato nga mapailobong maghulat kang Jehova?
4 Sa laing bahin, kon mapakyas kita sa pagsabot sa bug-os sa pipila ka teksto sa Bibliya o sa mga katin-awan nga gitagana sa mga publikasyon sa Watch Tower, may katarongan ba kita nga mawad-an ug pailob? Ang paghulat sa tinudlong panahon ni Jehova sa pagpatin-aw sa mga butang mao ang maalamong dalan. “Kay ang Soberanong Ginoong Jehova dili mobuhat sa usa ka butang gawas kon iyang gikapadayag ang iyang kompidensiyal nga butang ngadto sa iyang mga alagad nga mga propeta.” (Amos 3:7) Pagkakahibulongang saad! Apan kinahanglan natong masabtan nga si Jehova nagbutyag sa iyang tinagong mga butang sa panahon nga iyang gilantaw nga nahiangay. Tungod niana gihatagan sa Diyos ug awtoridad ang “kasaligan ug mabuot nga ulipon” sa pagtagana sa iyang katawhan sa “ilang [espirituwal nga] pagkaon sa hustong panahon.” (Mateo 24:45) Busa, walay katarongan nga mahimo kitang sobra ka mabalak-on, o mapikal pa gani, kon ugaling ang pipila ka butang wala ikapatin-aw sa bug-os. Hinunoa, makasalig kita nga kon kita mapailobong maghulat kang Jehova, siya magtagana, pinaagi sa kasaligang ulipon, kon unsay gikinahanglan “sa hustong panahon.”
5. Unsay kaayohan sa pagkonsiderar sa Ecclesiastes 3:1-8?
5 Ang maalamong Haring Solomon naghisgot sa 28 ka lainlaing mga butang, nga ang matag usa niini dunay kaugalingong “tinudlong panahon.” (Ecclesiastes 3:1-8) Ang pagsabot sa kahulogan ug gipasabot sa giingon ni Solomon motabang kanato sa pagtino sa hustong panahon ug sa sayop nga panahon alang sa pipila ka kalihokan, sumala sa panglantaw sa Diyos. (Hebreohanon 5:14) Kana, sa baylo, magtugot kanato sa pagpahiuyon sa atong kinabuhi sa hustong paagi.
“Panahon sa Paghilak ug Panahon sa Pagkatawa”
6, 7. (a) Unsay mga hinungdan nga ang mabalak-ong mga tawo karon ‘naghilak’? (b) Sa unsang paagi ang kalibotan naningkamot sa pagsanta sa grabeng kahimtang nga nahimutangan niini?
6 Bisan tuod dunay “panahon sa paghilak ug panahon sa pagkatawa,” kinsay dili mopili sa naulahi kay sa nauna? (Ecclesiastes 3:4) Ikasubo, nagkinabuhi kita sa kalibotan nga sa panguna naghatag kanato ug mga hinungdan sa paghilak. Daghan ang makapaguol nga mga balita diha sa palaumagian sa balita. Kita mouk-ok sa kalisang sa dihang madungog nato ang bahin sa mga batan-on nga namusil sa kaubang mga estudyante diha sa tunghaan, sa mga ginikanan nga nag-abuso sa ilang mga anak, sa mga terorista nga nagpatay o nag-angol sa inosenteng mga biktima, ug sa gitawag nga kinaiyanhong mga katalagman nga naglaglag sa tawhanong mga kinabuhi ug propiedad. Ang gilunosan, lawom-ug-mata nga mga bata ug ang gipapahawa sa ilang nasod nga mga kagiw nga nangalagiw nag-ilogay sa pagdani sa atong pagtagad diha sa telebisyon. Ang kanhi wala-hiilhing mga termino sama sa pagpuo sa kaliwat, AIDS, mga kagaw nga gamiton ingong hinagiban sa gubat, ug El Niño nagpatungha karon ug kabalaka sa atong hunahuna ug kasingkasing—ang matag usa sa kaugalingong paagi niini.
7 Walay duhaduha, ang kalibotan karon puno sa trahedya ug kasubo. Bisan pa niana, aron mamenosan konohay ug diyutay ang grabe nga kahimtang, naandan na sa industriya sa kalingawan ang pagtanyag ug mabaw, law-ay, usahay imoral ug mapintas nga mga pasundayag, nga gituyo aron kita madala sa dili-pagpanumbaling sa kagul-anan nga ginaantos sa uban. Apan ang walay-pagpakabana nga espiritu sa binuang nga pangomedya ug walay-hinungdan nga pagkatawa nga ipatungha sa maong kalingawan dili angayng saypon nga tinuod nga kalipay. Ang kalipay nga usa ka bunga sa espiritu sa Diyos maoy usa ka pagbati nga dili gayod ikatagana sa kalibotan ni Satanas.— Galacia 5:22, 23; Efeso 5:3, 4.
8. Angay bang unahon sa mga Kristohanon karon ang paghilak o pagkatawa? Ipatin-aw.
8 Sanglit nakakita sa makaluluoy nga kahimtang sa kalibotan, masabtan nato nga dili kini ang panahon nga unahon ang pagkatawa. Dili kini panahon sa pagkinabuhi alang lamang sa lulinghayaw ug kalingawan o sa pag-una sa “paglipaylipay” kay sa pagpangagpas sa espirituwal nga mga butang. (Itandi ang Ecclesiastes 7:2-4.) “Kadtong nagagamit sa kalibotan” angayng “ingon kanilang wala magagamit niini sa bug-os,” matod ni apostol Pablo. Ngano man? Tungod kay “ang talan-awon niining kalibotana nagakausab.” (1 Corinto 7:31) Ang tinuod nga mga Kristohanon nagkinabuhi kada adlaw nga nakasabot sa bug-os sa kaseryoso sa mga panahon nga atong gikinabuhian.—Filipos 4:8.
Bisag Naghilak, Tinuod nga Malipayon Gihapon!
9. Unsang makapasubong kahimtang ang naglungtad sa mga adlaw una pa sa Lunop, ug unsay kahulogan niini alang kanato karon?
9 Ang mga tawo nga nagkinabuhi sa panahon sa tibuok-yutang Lunop kulang ug seryosong panglantaw sa kinabuhi. Nagpadayon sila sa ilang adlaw-adlawng rutina ug wala mohilak tungod sa “pagkadaotan sa tawo [nga] dagaya diha sa yuta,” nga wala manumbaling samtang “ang yuta napuno sa kapintasan.” (Genesis 6:5, 11) Si Jesus naghisgot nianang makapasubong kahimtang, ug iyang gitagna ang susamang tinamdan taliwala sa mga tawo sa atong adlaw. Siya nagpasidaan: “Ingon nga sila niadtong mga adlawa sa wala pa ang baha, nanagpangaon ug nanagpanginom, nanagpangminyo ang mga lalaki ug ang mga babaye gipanghatag diha sa kaminyoon, hangtod sa adlaw nga misulod si Noe sa arka; ug wala sila magmatikod hangtod nga ang baha miabot ug mibanlas kanilang tanan, mao man usab unya ang pagkaanaa sa Anak sa tawo.”—Mateo 24:38, 39.
10. Sa unsang paagi ang mga Israelinhon nga nagkinabuhi sa mga adlaw ni Hageo nagpakita nga kulang sila ug apresasyon sa tinudlong panahon ni Jehova?
10 Mga 1,850 ka tuig human sa Lunop, sa mga adlaw ni Hageo, daghang Israelinhon kulang ug seryosong kabalaka sa espirituwal nga mga butang. Puliki sa pagpangagpas sa personal nga intereses, wala sila makasabot nga ang panahon nga ilang gikinabuhian maoy panahon na sa pag-una sa mga intereses ni Jehova. Atong mabasa: “Kon bahin niini nga katawhan, sila miingon: ‘Ang panahon wala pa moabot, ang panahon sa balay ni Jehova, aron kini pagatukoron.’ Ug ang pulong ni Jehova nagpadayon sa pag-abot pinaagi kang Hageo nga propeta, nga nag-ingon: ‘Panahon na ba alang kaninyo nga kamo magapuyo sa inyong mga balay nga plinigohan, samtang kining balaya guba? Ug karon mao kini ang giingon ni Jehova sa mga panon, “Ibutang ang inyong kasingkasing sa inyong mga dalan.”’”—Hageo 1:1-5.
11. Unsang mga pangutana ang angayan natong isukna sa atong kaugalingon?
11 Ingong mga Saksi ni Jehova karon, uban ang mga responsibilidad ug mga pribilehiyo atubangan kang Jehova sama niadtong mga Israelinhon sa panahon ni Hageo, maayo usab nga atong seryosong hatagan ug pagtagad ang atong mga dalan, nga magbuhat niini sa katim-os. Kita ba ‘naghilak’ tungod sa mga kahimtang sa kalibotan ug sa pakaulaw nga gihatag niini diha sa ngalan sa Diyos? Kita ba nasakitan sa dihang ang mga tawo dili modawat nga naglungtad ang Diyos o dayag nga dili-manumbaling sa iyang matarong nga mga prinsipyo? Kita ba mosanong sama sa mga tawong minarkahan nga nakita ni Ezequiel sa panan-awon 2,500 ka tuig kanhi? Bahin kanila atong mabasa: “Si Jehova nagkanayon [sa lalaki nga nagdala ug tinterohan sa sekretaryo]: ‘Lakaw latas sa taliwala sa siyudad, latas sa taliwala sa Jerusalem, ug magbutang ka ug marka diha sa agtang sa mga tawo nga nagapanghupaw ug nagaagulo tungod sa tanang dulumtanang mga butang nga ginahimo sa taliwala niini.’”—Ezequiel 9:4.
12. Unsay kahulogan sa Ezequiel 9:5, 6 alang sa mga tawo karon?
12 Mahimong tin-aw ang kahulogan niining maong asoy alang kanato karon kon atong basahon ang mga instruksiyon ngadto sa unom ka lalaki nga dunay mga hinagiban alang sa paglaglag: “Lakaw kamo latas sa siyudad sunod kaniya ug panglaglag kamo. Ayaw tugoting masubo ang inyong mata, ug ayaw kamo kaluoy. Ang tigulang nga lalaki, batan-ong lalaki ug ulay ug gamayng bata ug mga babaye kinahanglan inyong patyon—sa pagkalaglag. Apan ayaw pagduol kang bisan kinsa nga anaa kaniya ang marka, ug kinahanglang sugdan ninyo sa akong santuwaryo.” (Ezequiel 9:5, 6) Ang atong kaluwasan nianang tulin-nagsingabot nga dakong kasakitan nagdepende sa atong pag-ila nga karon ilabina mao ang panahon sa paghilak.
13, 14. (a) Unsang matanga sa mga tawo ang gipahayag ni Jesus nga malipayon? (b) Ipatin-aw kon nganong imong gihunahuna nga kining maong kahubitan mohaom kaayo sa mga Saksi ni Jehova.
13 Siyempre, ang kamatuoran nga ang mga alagad ni Jehova ‘mohilak’ tungod sa makapaluya nga kahimtang sa mga kalihokan sa kalibotan dili makapugong sa ilang pagkamalipayon. Kasukwahi kaayo! Sa pagkatinuod sila ang labing malipayong grupo sa mga tawo dinhi sa yuta. Si Jesus nagtagana ug sukdanan alang sa kalipay sa dihang miingon siya: “Malipayon kadtong mahunahunaon sa ilang espirituwal nga panginahanglan, . . . kadtong nagbangotan, . . . ang mga malumog-buot, . . . kadtong gipanggutom ug gipang-uhaw sa pagkamatarong, . . . ang mga maluluy-on, . . . ang mga lunsay sa kasingkasing, . . . ang mga madaiton, . . . kadtong ginalutos tungod ug alang sa pagkamatarong.” (Mateo 5:3-10) Dunay daghang pamatuod nga nagpakita nga kining maong kahubitan mohaom sa mga Saksi ni Jehova, sa katibuk-an, kay sa bisan unsang ubang relihiyosong organisasyon.
14 Ilabina sukad nga napasig-uli ang matuod nga pagsimba sa 1919 nga ang malipayong katawhan ni Jehova dunay katarongan sa “pagkatawa.” Sa espirituwal nga paagi, sila nakig-ambit sa makapalipayng kasinatian niadtong namalik gikan sa Babilonya sa ikaunom nga siglo W.K.P.: “Sa dihang gitigom pagbalik ni Jehova ang mga binihag sa Zion, nahisama kami niadtong mga nagdamgo. Niadtong panahona ang among baba napuno sa katawa, ug ang among dila sa malipayong paghugyaw. . . . Si Jehova nagbuhat ug usa ka dakong butang sa iyang gibuhat kanamo. Kami nagmalipayon.” (Salmo 126:1-3) Sa gihapon, bisan pa sa taliwala sa espirituwal nga pagkatawa, ang mga Saksi ni Jehova maalamong nagbutang sa hunahuna sa kaseryoso sa kapanahonan. Sa dihang modangat ang bag-ong kalibotan ug ang mga molupyo sa yuta “makagunit nga hugot sa tinuod nga kinabuhi,” nan ang panahon miabot na sa dihang ang pagkatawa mopuli sa paghilak hangtod sa hangtod.—1 Timoteo 6:19; Pinadayag 21:3, 4.
“Panahon sa Paggakos ug Panahon sa Pagpugong Gikan sa Paggakos”
15. Nganong himili ang mga Kristohanon sa pagpili ug mga higala?
15 Himili ang mga Kristohanon kon kinsay ilang pilion nga higalaon. Ilang gibutang sa hunahuna ang pasidaan ni Pablo: “Ayaw pagpahisalaag. Ang daotang pakig-uban nagadaot sa mapuslanong mga batasan.” (1 Corinto 15:33) Ug ang maalamong Haring Solomon miingon: “Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga hungog masugamak sa kadaot.”—Proverbio 13:20.
16, 17. Sa unsang paagi gilantaw sa mga Saksi ni Jehova ang pakighigalaay, pagpakigdeyt, ug pagminyo, ug ngano?
16 Gipili sa mga alagad ni Jehova ingong mga higala ang mga tawo nga nahigugma usab kang Jehova ug sa iyang pagkamatarong. Bisan tuod ilang gipabilhan ug gikalipayan ang pagpakig-uban sa ilang mga higala, maalamon nilang gilikayan ang matugoton, sobra ka luag nga panglantaw sa pagpakigdeyt nga kaylap sa ubang nasod karon. Inay kay magpatuyang niini ingong dili-makadaot nga kalingawan, ilang giisip ang pagpakigdeyt ingong seryosong lakang paingon sa kaminyoon nga kinahanglang himoon lamang sa dihang ang usa andam na sa pisikal, mental, ug espirituwal—maingon man libre sumala sa Kasulatan—sa pagsulod sa dumalayong panag-ubanay.—1 Corinto 7:36.
17 Ang uban tingali naghunahuna nga kinaraan na ang ingon nianang panglantaw sa pagpakigdeyt ug pagpakigminyo. Apan dili magpaimpluwensiya ang mga Saksi ni Jehova sa pagpit-os sa isigkaingon sa ilang pagpili ug mga higala o sa ilang mga desisyon maylabot sa pagpakigdeyt ug pagpakigminyo. Sila nahibalo nga “ang kaalam mapamatud-ang matarong pinaagi sa mga buhat niini.” (Mateo 11:19) Si Jehova lamang ang nahibalo sa labing maayo, busa ilang giisip nga seryoso ang iyang tambag sa pagminyo “lamang diha sa Ginoo.” (1 Corinto 7:39; 2 Corinto 6:14) Ilang likayan ang pagdalidali ug minyo uban ang sayop nga hunahuna nga ang diborsiyo o pagbulag maoy dalawatong mga kapilian kon mapakyas ang kaminyoon. Dili sila magdalidali sa pagpangita ug angayan nga kapikas, kay nahibalo nga sa dihang makapanumpa na sa kaminyoon, ang balaod ni Jehova mapadapat: “Mao nga dili na sila duha, kondili usa ka unod. Busa, kon unsay giusag yugo sa Diyos ayaw ipabulag ni bisan kinsang tawo.”—Mateo 19:6; Marcos 10:9.
18. Unsay magsilbing sinugdanan sa usa ka malipayong kaminyoon?
18 Ang kaminyoon maoy tibuok-kinabuhing pakigsaad nga nagkinahanglag maayong pagplano. Ang usa ka lalaki makataronganong mangutana sa iyang kaugalingon, ‘Siya ba gayod ang angayang babaye para nako?’ Apan hinungdanon usab, angay siyang mangutana, ‘Ako ba gayod ang angayang lalaki para niya? Ako ba usa ka hamtong nga Kristohanon nga makaatiman sa iyang espirituwal nga mga panginahanglan?’ Ang duha ka umaabot nga mga kapikas dunay obligasyon atubangan ni Jehova nga mahimong lig-on sa espirituwal, nga makaarang sa pagtukod ug lig-ong kaminyoon nga takos sa pag-uyon sa Diyos. Linibong Kristohanong mga magtiayon ang makapamatuod nga tungod sa pagpasiugda niini sa paghatag inay sa pagdawat, ang bug-os-panahong ministeryo maoy labing maayong sinugdanan sa usa ka malipayong kaminyoon.
19. Nganong ang ubang mga Kristohanon nagpabiling tagsaanon?
19 Ang pipila ka Kristohanon ‘nagpugong gikan sa paggakos’ pinaagi sa pagpabiling tagsaanon alang sa maayong balita. (Ecclesiastes 3:5) Gipalabay sa uban ang pagminyo hangtod nga ilang gibati nga sila kuwalipikado na sa espirituwal aron makadani ug angayang kapikas. Apan angay usab natong hinumdoman kadtong tagsaanong mga Kristohanon nga nangandoyg mga parayeg ug mga benepisyo sa kaminyoon apan wala makakitag kauban sa kinabuhi. Makaseguro kita nga si Jehova magmaya tungod sa ilang pagdumili sa pagkompromiso sa mga prinsipyo sa Diyos sa ilang pagtinguha nga magminyo. Maayo usab nga atong pabilhan ang ilang pagkamaunongon ug hatagan sila ug haom nga pagdasig nga angayan kanila.
20. Nganong bisan ang mga magtiayon usahay ‘magpugong gikan sa paggakos’?
20 Angay ba nga bisan ang mga magtiayon usahay ‘magpugong gikan sa paggakos’? Morag ingon niana sa usa ka diwa, kay si Pablo nag-ingon: “Moingon ako niini, mga igsoon, ang panahong nabilin mubo na. Sukad karon kadtong mga may asawa magpakaingon nga sila daw wala.” (1 Corinto 7:29) Busa, ang mga kalipay ug mga panalangin sa kaminyoon kinahanglang ikaduha lamang sa teokratikanhong mga responsibilidad. Ang timbang nga panglantaw niining butanga dili magpahuyang sa kaminyoon kondili magpalig-on niana tungod kay kini motabang sa pagpahinumdom sa magtiayon nga si Jehova kinahanglang mao ang pangunang tigpalig-on sa ilang relasyon.—Ecclesiastes 4:12.
21. Nganong dili nato angayang hukman ang mga magtiayon maylabot sa pagkaginikanan?
21 Dugang pa, ang ubang mga magtiayon naglikay sa pagpanganak aron makabaton ug mas dakong kagawasan sa pagtuman sa ilang pag-alagad sa Diyos. Nagkahulogan kini ug pagsakripisyo sa ilang bahin, ug si Jehova magaganti kanila. Apan, bisan tuod ang Bibliya nagdasig sa pagpabiling tagsaanon alang sa maayong balita, wala kiniy direktang komento bahin sa pagpabiling walay anak tungod sa mao gihapong katarongan. (Mateo 19:10-12; 1 Corinto 7:38; itandi ang Mateo 24:19 ug Lucas 23:28-30.) Busa, ang mga magtiayon kinahanglang maghimo sa ilang kaugalingong desisyon pinasikad sa personal nga mga sirkumstansiya ug sa pangagda sa ilang tanlag. Bisag unsa man ang desisyon, ang mga magtiayon kinahanglang dili sawayon.
22. Unsay hinungdanon natong tinoon?
22 Oo, “adunay tinudlong panahon alang sa tanang butang, usa ka panahon alang sa matag kalihokan ilalom sa mga langit.” Duna ganiy “panahon alang sa gubat ug panahon alang sa pakigdait.” (Ecclesiastes 3:1, 8) Ang sunod nga artikulo magpatin-aw kon nganong hinungdanon nga kita magtino kon hain sa duha nga panahon na karon.
Ikapatin-aw Mo Ba?
◻ Nganong hinungdanon nga mahibaloan nato nga “adunay tinudlong panahon alang sa tanang butang”?
◻ Nganong karon ilabina ang “panahon sa paghilak”?
◻ Nganong ang mga Kristohanon, bisan tuod ‘naghilak,’ tinuod gihapon nga malipayon?
◻ Sa unsang paagi ang ubang mga Kristohanon nagpakita nga ilang gilantaw ang presenteng panahon ingong “panahon sa pagpugong gikan sa paggakos”?
[Mga hulagway sa panid 6, 7]
Bisan tuod ang mga Kristohanon ‘naghilak’ tungod sa kahimtang sa kalibotan . . .
. . . sa pagkatinuod sila ang labing malipayong mga tawo sa kalibotan
[Hulagway sa panid 8]
Ang bug-os-panahong ministeryo maoy labing maayong pundasyon alang sa malipayong kaminyoon