Mosalig Kang Jehova sa Bug-os sa Panahon sa Kasakitan

“Ang Diyos mao ang atong dalangpanan ug kusog, usa ka katabang nga daling hikaplagan panahon sa mga kasakitan.”—SALMO 46:1.

1, 2. (a) Unsang pananglitan ang nagpakita nga dili pa igo ang pag-ingon nga kita nagasalig sa Diyos? (b) Nganong kita kinahanglang mohimog labaw pa kay sa pag-ingon lamang nga kita nagasalig kang Jehova?

MAS dali ang pag-ingon nga kita nagasalig sa Diyos kay sa pagpakita niana sa atong mga lihok. Pananglitan, ang mga pulong nga “In God We Trust” (Sa Diyos Kami Nagasalig) dugay nang makita diha sa mga papel de bangko ug sensilyo sa T.B.a Sa 1956, ang Kongreso sa T.B. nagpasaka ug balaod nga nagdeklarar sa maong ekspresyon ingong nasodnong panultihon sa Tinipong Bansa. Sa kasukwahi, daghang tawo—dili lang nianang nasora kondili sa tibuok kalibotan—ang labaw nga nagasalig sa kuwarta ug materyal nga bahandi kay sa Diyos.—Lucas 12:16-21.

² Ingong matuod nga mga Kristohanon, kita kinahanglang mohimog labaw pa kay sa pag-ingon lamang nga kita nagasalig kang Jehova. Maingon nga “patay ang pagtuo nga walay binuhatan,” ang bisan unsang pangangkon nga kita nagasalig sa Diyos walay pulos usab gawas kon paluyohan nato kini sa atong mga buhat. (Santiago 2:26) Sa nag-unang artikulo, atong nakat-onan nga ang atong pagsalig kang Jehova makita sa dihang modangop kita kaniya diha sa pag-ampo, sa dihang magpatultol kita sa iyang Pulong, ug sa dihang magpagiya kita sa iyang organisasyon. Konsiderahon nato karon kon sa unsang paagi mahimo nato kanang tulo ka lakang sa panahon sa kasakitan.

Sa Dihang Mataktak sa Trabaho o Gamay ra ang Kita

 3. Unsang mga kalisod sa ekonomiya ang giatubang sa mga alagad ni Jehova niining ‘makuyaw nga mga panahon,’ ug giunsa nato pagkahibalo nga ang Diyos andam nga motabang kanato?

³ Niining ‘makuyaw nga mga panahon,’ kita nga mga Kristohanon nag-atubang sa mao gihapong kalisod sa ekonomiya nga giatubang sa ubang mga tawo. (2 Timoteo 3:1) Busa, kita tingali kalit lang mataktak sa trabaho. O kita tingali mapugos sa pagtrabaho ug dugay nga gamay rag suweldo. Ilalom sa maong mga sirkumstansiya, basin malisdan kita sa ‘pagtagana alang sa mga sakop sa atong panimalay.’ (1 Timoteo 5:8) Andam bang motabang kanato ang Labing Hataas nga Diyos nianang mga panahona? Andam gayod! Siyempre, dili kita panalipdan ni Jehova batok sa tanang kalisdanan sa kinabuhi niining sistemaha sa mga butang. Apan, kon kita mosalig kaniya ang giingon sa Salmo 46:1 mapadapat kanato: “Ang Diyos mao ang atong dalangpanan ug kusog, usa ka katabang nga daling hikaplagan panahon sa mga kasakitan.” Apan, sa unsang paagi ikapakita nato nga kita nagasalig kang Jehova sa bug-os sa dihang kita nagkalisodlisod?

 4. Sa dihang magkalisodlisod, unsay mahimo natong iampo, ug sa unsang paagi tubagon ni Jehova ang maong mga pag-ampo?

⁴ Ang usa ka paagi sa pagpasundayag sa atong pagsalig kang Jehova mao ang pagdangop kaniya diha sa pag-ampo. Apan unsay atong iampo? Aw, kay nagkalisodlisod, kita tingali mas nagkinahanglan ug praktikal nga kaalam karon kay sukad masukad. Nan, iampo kana! Ang Pulong ni Jehova nagpasalig kanato: “Kon aduna man kaninyoy nakulangan ug kaalam, magpadayon siya sa pagpangayo sa Diyos, kay siya nagahatag nga madagayaon ngadto sa tanan ug dili mamuyboy; ug kini igahatag kaniya.” (Santiago 1:5) Oo, pangayoa kang Jehova ang kaalam—ang katakos sa pagpadapat sa kahibalo, pagsabot, ug pag-ila—aron makahimo ug maayong mga desisyon ug hustong mga pagpili. Ang atong mahigugmaon nga langitnong Amahan nagpasalig kanato nga siya mamati sa maong mga pag-ampo. Kanunay siyang andam nga motul-id sa mga alagianan niadtong nagasalig kaniya sa tibuok nilang kasingkasing.—Salmo 65:2; Proverbio 3:5, 6.

5, 6. (a) Nganong makapangayo kitag tabang sa Pulong sa Diyos sa pagsagubang sa mga kalisod sa ekonomiya? (b) Unsay mahimo natong buhaton aron mamenosan ang kabalaka sa dihang mataktak kita sa trabaho?

⁵ Ang pagpagiya sa Pulong sa Diyos maoy laing paagi sa pagpakita nga kita nagasalig kang Jehova. Ang iyang maalamong mga pahinumdom nga makita diha sa Bibliya napamatud-ang “kasaligan kaayo.” (Salmo 93:5) Bisan tuod nakompleto kini 1,900 ka tuig na kanhi, kanang maong inspirado nga basahon naundan ug kasaligang tambag ug hait nga pagsabot nga makatabang kanato nga mas makasagubang sa mga kalisod sa ekonomiya. Tagda ang pipila ka pananglitan sa kaalam sa Bibliya.

⁶ Ang maalamong Haring Solomon nakamatikod dugay na: “Matam-is ang pagkatulog sa usa nga nagaalagad, walay sapayan kon diyutay o daghan ang iyang gikaon; apan ang kadagaya sa dato dili magpakatulog kaniya.” (Ecclesiastes 5:12) Nagkinahanglag panahon ug kuwarta ang pag-ayo, paghinlo, pagmentinar, ug pagpanalipod sa atong materyal nga mga kabtangan. Busa kon mataktak sa trabaho, mahimong pahimuslan nato ang kahigayonan sa pagsusi pag-usab sa atong estilo sa pagkinabuhi, nga sulayan pagtino kon unsang mga butanga ang gikinahanglan ug kon unsa ang wala kinahanglana. Aron mamenosan ang kabalaka, maalamon tingali ang paghimog pipila ka kausaban. Pananglitan, posible bang mapayano ang atong kinabuhi, tingali mobalhin ngadto sa mas gamay nga balay o idespatsar ang wala-kinahanglanang materyal nga mga kabtangan?—Mateo 6:22.

7, 8. (a) Sa unsang paagi gipakita ni Jesus nga siya nahibalo nga ang dili-hingpit nga mga tawo dunay tendensiya nga sobrang mabalaka sa materyal nga mga butang? (Tan-awa usab ang potnot.) (b) Unsang maalamong tambag ang gihatag ni Jesus bahin sa kon unsaon paglikay sa dili-angay nga kabalaka?

⁷ Diha sa Wali sa Bukid, si Jesus nagtambag: “Hunong na sa pagkabalaka bahin sa inyong mga kalag kon unsay inyong kan-on o kon unsay inyong imnon, o bahin sa inyong mga lawas kon unsay inyong isul-ob.”b (Mateo 6:25) Nahibalo si Jesus nga ang dili-hingpit nga mga tawo natural nga mabalaka labot sa pagbaton sa paninugdang mga kinahanglanon. Apan, sa unsang paagi kita ‘mohunong sa pagkabalaka’ bahin sa maong mga butang? “Magpadayon sa pagpangita pag-una sa gingharian,” nag-ingon si Jesus. Bisan unsa pay mga problema nga atong maatubang, kita kinahanglang magpadayon sa pag-una sa pagsimba kang Jehova. Kon buhaton nato kana, nan ang tanan natong adlaw-adlaw nga mga kinahanglanon “igadugang” kanato sa atong langitnong Amahan. Sa usa ka paagi o sa lain, iyang itagana ang atong gikinahanglan.—Mateo 6:33.

⁸ Si Jesus naghatag niining lain pang tambag: “Ayaw gayod kamo kabalaka bahin sa sunod nga adlaw, kay ang sunod nga adlaw adunay iyang kaugalingong mga kabalaka.” (Mateo 6:34) Dili maalamon nga mobatig dili-angay nga kabalaka bahin sa kon unsay mahimong mahitabo ugma. Usa ka eskolar nag-ingon: “Ang atong mga kahadlok bahin sa umaabot panagsa rang maparehas sa tinuod nga mahitabo.” Ang mapainubsanong pagpatalinghog sa tambag sa Bibliya sa pagsentro sa atong pagtagad sa labing hinungdanong mga butang ug sa pagkabalaka lamang sa matag adlaw nga panginahanglan makatabang kanato sa paglikay sa dili-angay nga kabalaka.—1 Pedro 5:6, 7.

 9. Sa dihang magkalisodlisod, unsang tabang ang mahimong makaplagan nato diha sa mga publikasyon sa “matinumanon ug maalamong ulipon”?

⁹ Sa dihang magkalisodlisod, makapakita usab kita sa atong pagsalig kang Jehova pinaagi sa pagkuhag tabang gikan sa mga publikasyon sa “matinumanon ug maalamong ulipon.” (Mateo 24:45) Matag karon ug unya, ang magasing Pagmata! dunay mga artikulo nga naundan ug mapuslanong mga tambag ug mga sugyot sa pagsagubang sa mga suliran sa panginabuhi. Ang artikulong “Nawad-ag Trabaho—Unsay mga Kasulbaran?” sa Agosto 8, 1991, nga gula naglaraw sa walo ka praktikal nga mga lagda nga nakatabang sa daghan sa paglahutay sa pinansiyal ug emosyonal nga paagi sa dihang mawad-ag trabaho.c Siyempre, ang maong mga lagda kinahanglang timbangan sa hustong panglantaw sa tinuod nga bili sa salapi. Gihisgotan kini diha sa artikulong “Butang nga Bililhon pa Kay sa Salapi,” nga anaa usab sa maong gula.—Ecclesiastes 7:12.

Sa Dihang Gihasol sa mga Suliran sa Panglawas

10. Sa unsang paagi ang panig-ingnan ni Haring David nagpakita nga makataronganong mosalig kang Jehova sa dihang nag-antos sa grabeng sakit?

¹⁰ Makataronganon bang mosalig kang Jehova sa dihang nag-antos sa grabeng sakit? Oo! Si Jehova adunay empatiya sa mga masakiton taliwala sa iyang katawhan. Dugang pa, andam siyang motabang. Tagda, pananglitan, si Haring David. Siya mismo lagmit nga grabeng nasakit sa dihang gisulat niya ang mga pakiglabot sa Diyos sa matarong nga masakiton. Siya miingon: “Si Jehova magpalig-on kaniya sa ibabaw sa higdaanan sa balatian; ang tibuok niyang higdaanan imong bag-ohon gayod sa panahon sa iyang pagkasakit.” (Salmo 41:1, 3, 7, 8) Ang pagsalig ni David sa Diyos nagpabiling lig-on, ug sa kataposan ang hari naayo sa iyang sakit. Apan, sa unsang paagi kita makapasundayag ug pagsalig sa Diyos sa dihang kita gihasol sa mga suliran sa panglawas?

11. Sa dihang masakit, unsay mahimo natong ihangyo sa atong langitnong Amahan?

¹¹ Sa dihang masakit, ang usa ka paagi sa pagpakita sa atong pagsalig kang Jehova maoy pinaagi sa paghangyo kaniya diha sa pag-ampo alang sa tabang nga makalahutay. Mahimong hangyoon nato siya nga tabangan kita sa paggamit sa “praktikal nga kaalam” aron mabatonan nato ang sukod sa panglawas nga makataronganong itugot sa atong mga sirkumstansiya. (Proverbio 3:21) Mahimong hangyoon usab nato siya nga tabangan kita sa pagpasundayag ug pailob ug paglahutay aron makasagubang sa sakit. Labaw sa tanan, buot natong mohangyo nga palig-onon kita ni Jehova, nga maghatag kanatog kusog sa pagpabiling matinumanon kaniya ug dili mawad-an sa atong panimbang, bisan unsa pa tingaliy mahitabo. (Filipos 4:13) Ang paghupot sa atong integridad ngadto sa Diyos mas hinungdanon pa gani kay sa pagpreserbar sa atong presenteng kinabuhi. Kon huptan nato ang atong integridad, ang Dakong Tigganti mohatag kanato ug walay-kataposang hingpit nga kinabuhi ug panglawas.—Hebreohanon 11:6.

12. Unsang Kasulatanhong mga prinsipyo ang makatabang kanato sa paghimog maalamong mga desisyon maylabot sa medikal nga pagtambal?

¹² Ang atong pagsalig kang Jehova magtukmod usab kanato sa pagsalig sa iyang Pulong, ang Bibliya, alang sa praktikal nga giya. Ang mga prinsipyo nga makita diha sa Kasulatan makatabang kanato sa paghimog maalamong mga desisyon maylabot sa medikal nga pagtambal. Pananglitan, kay nahibalo nga gisaway sa Bibliya ang “pagbuhat sa espiritismo,” likayan nato ang bisan unsang paagi sa pagdayagnos o pagtambal nga nalangkit sa espiritismo. (Galacia 5:19-21; Deuteronomio 18:10-12) Aniay laing pananglitan sa kasaligang kaalam sa Bibliya: “Si bisan kinsa nga walay kasinatian motuo sa tagsatagsa ka pulong, apan ang usa nga maalamon magapalandong sa iyang mga lakang.” (Proverbio 14:15) Busa, sa dihang magplanong magpatambal, maalamon nga mangitag kasaligang impormasyon imbes “motuo sa tagsatagsa ka pulong.” Ang maong “maayong panghunahuna” makatabang kanato sa pagtimbangtimbang pag-ayo sa atong mga kapilian ug sa paghimog desisyon pinasukad sa kahibalo.—Tito 2:12.

13, 14. (a) Unsang matulon-anong mga artikulo bahin sa panglawas ang gipatik sa mga magasing Bantayanang Torre ug Pagmata? (Tan-awa ang kahon sa panid 17.) (b) Unsang tambag bahin sa pagsagubang sa laygay nga mga sakit ang gipresentar diha sa Pagmata! sa Enero 22, 2001?

¹³ Ikapasundayag usab nato ang atong pagsalig kang Jehova pinaagi sa pagpanukiduki sa mga publikasyon sa matinumanong ulipon. Ang mga magasing Bantayanang Torre ug Pagmata! matag karon ug unya magpatik ug matulon-anong mga artikulo bahin sa lainlaing espesipiko nga mga suliran sa panglawas ug mga sakit.d Usahay, kining mga magasina adunay mga artikulo bahin sa mga tawo nga malamposong nakasagubang sa lainlaing mga abnormalidad, balatian, ug mga depekto sa lawas. Dugang pa, ang pipila ka artikulo naghatag ug Kasulatanhong mga sugyot maingon man sa praktikal nga tambag kon unsaon pagsagubang sa laygay nga mga suliran sa panglawas.

¹⁴ Pananglitan, ang Enero 22, 2001, nga gula sa Pagmata! dunay panghapin nga serye nga “Kahupayan Alang sa Masakiton.” Ang mga artikulo nagpresentar ug makatabang nga mga prinsipyo sa Bibliya maingon man sa mga impormasyon nga nakuha gikan sa pag-interbiyo sa may-kahibalong mga tawo nga nagsagubang sa makapabaldadong sakit sulod sa daghang tuig. Ang artikulong “Pagkinabuhi nga Malamposon Bisag Ikaw Masakiton—Sa Unsang Paagi?” naghatag sa mosunod nga tambag: Pagkat-on bahin sa imong sakit kutob sa imong mahimo. (Proverbio 24:5) Paghimog praktikal nga mga tumong, lakip na ang mga tumong nga motabang sa uban, apan kinahanglang makaamgo ka nga dili tingali nimo makab-ot ang susamang mga tumong nga makab-ot sa uban. (Buhat 20:35; Galacia 6:4) Likayi ang pagpalain sa imong kaugalingon. (Proverbio 18:1) Himoa ang pagbisita kanimo nga makalingawng kasinatian alang sa uban. (Proverbio 17:22) Labaw sa tanan, hupti ang suod nga relasyon uban kang Jehova ug sa kongregasyon. (Nahum 1:7; Roma 1:11, 12) Dili ba kita mapasalamaton sa kasaligang giya nga gitagana ni Jehova pinaagi sa iyang organisasyon?

Sa Dihang Magpadayon ang Kahuyangan sa Unod

15. Sa unsang paagi si apostol Pablo nagmadaogon sa iyang pagpakigbugno batok sa mga kahuyangan sa dili-hingpit nga unod, ug unsang pasalig ang atong mabatonan?

¹⁵ “Sa akong unod, walay nagpuyo nga bisan unsang maayo,” misulat si apostol Pablo. (Roma 7:18) Gikan sa iyang kasinatian nahibalo si Pablo kon unsa ka lisod ang pagpakigbisog sa mga tinguha ug mga kahuyangan sa dili-hingpit nga unod. Apan, si Pablo may pagsalig usab nga siya magmadaogon. (1 Corinto 9:26, 27) Sa unsang paagi? Pinaagi sa bug-os nga pagsalig kang Jehova. Mao nga makaingon si Pablo: “Alaot ako nga tawo! Kinsa ang magluwas kanako gikan sa lawas nga nahiagom niini nga kamatayon? Salamat sa Diyos pinaagi kang Jesu-Kristo nga atong Ginoo!” (Roma 7:24, 25) Komosta kita? Kita usab dunay pakiggubat sa mga kahuyangan sa unod. Samtang kita nakigbisog sa pagbuntog nianang maong mga kahuyangan, dali rang mawala ang pagsalig, nga magtuo nga dili gayod kita molampos. Apan si Jehova motabang kanato kon kita, sama kang Pablo, tinuod nga mosalig Kaniya ug dili lamang sa atong kaugalingong kusog.

16. Kon magpadayon ang kahuyangan sa unod, unsay angay natong iampo, ug unsay kinahanglan natong buhaton kon mobalik ang atong kahuyangan?

¹⁶ Sa dihang magpadayon ang usa ka kahuyangan sa unod, mapakita nato nga kita nagasalig kang Jehova pinaagi sa paghangyo kaniya diha sa pag-ampo. Kita kinahanglang mohangyo, mangaliyupo pa, kang Jehova alang sa tabang sa iyang balaang espiritu. (Lucas 11:9-13) Kita espesipikong makahangyo nga mabatonan ang pagpugong-sa-kaugalingon, nga maoy bahin sa bunga sa espiritu sa Diyos. (Galacia 5:22, 23) Unsay angay natong buhaton kon mobalik ang atong kahuyangan? Dili gayod kita molunga. Dili gayod kita mohunong sa pag-ampo nga mapainubsanon sa atong maluluy-ong Diyos, nga mangayog pasaylo ug tabang. Si Jehova dili gayod magsalikway sa usa ka kasingkasing nga ‘nagun-ob ug nadugmok’ tungod sa kabug-at sa gitulisok nga konsensiya. (Salmo 51:17) Kon kita mangamuyo kaniya uban ang sinsero, mahinulsolon nga kasingkasing, si Jehova motabang kanato sa pagpakigbisog sa mga tentasyon.—Filipos 4:6, 7.

17. (a) Nganong makatabang ang pagpalandong kon unsay pagbati ni Jehova sa usa ka kahuyangan nga ato tingaling gipakigbisogan? (b) Unsang mga teksto ang mahimo natong memoryahon kon kita nakigbisog sa pagkontrolar sa atong pagkadaling masuko? sa pagbantay sa atong dila? sa pagpakigbisog sa kiling nga makigbahin sa dili-maayong kalingawan?

¹⁷ Ikapakita usab nato nga kita nagasalig kang Jehova pinaagi sa pagdukiduki sa iyang Pulong aron matabangan. Nga naggamit sa konkordansiya sa Bibliya o sa Watch Tower Publications Index, kita makapangita sa tubag sa pangutana, ‘Unsay pagbati ni Jehova niining kahuyangan nga akong gipakigbisogan?’ Ang pagpalandong kon unsay pagbati ni Jehova sa maong butang makapalig-on sa atong tinguha nga pahimut-an siya. Busa, mosugod kita sa pagbati sama sa iyang gibati, nga magdumot sa iyang gidumtan. (Salmo 97:10) Nakaplagan sa uban nga makatabang ang pagmemorya sa mga teksto sa Bibliya nga mapadapat sa espesipikong kahuyangan nga ilang gipakigbisogan. Nanglimbasog ba kita sa pagkontrolar sa atong pagkadaling masuko? Nan mahimo natong memoryahon ang mga teksto sama sa Proverbio 14:17 ug Efeso 4:31. Nalisdan ba kita sa pagbantay sa atong dila? Mahimo natong sag-ulohon ang mga teksto sama sa Proverbio 12:18 ug Efeso 4:29. Duna ba kitay kiling sa pagpakigbahin sa dili-maayong kalingawan? Mahimong sulayan nato paghinumdom ang mga bersikulo sama sa Efeso 5:3 ug Colosas 3:5.

18. Nganong dili nato tugotan ang kaulaw nga mopugong kanato sa pagpangayog tabang sa mga ansiyano nga mabuntog ang atong kahuyangan?

¹⁸ Ang pagpangayog tabang gikan sa tinudlo-sa-espiritu nga mga ansiyano sa kongregasyon maoy laing paagi sa pagpasundayag sa atong pagsalig kang Jehova. (Buhat 20:28) Kon buot hunahunaon, kining “mga gasa nga mga lalaki” maoy tagana gikan kang Jehova pinaagi kang Kristo aron sa pagpanalipod ug pag-atiman sa iyang mga karnero. (Efeso 4:7, 8, 11-14) Tinuod, dili tingali sayon ang pagpangayog tabang sa pagpakigbisog sa usa ka kahuyangan. Kita tingali maulaw, nga mahadlok nga moubos ang pagtan-aw sa mga ansiyano kanato. Apan sa walay duhaduha kining hamtong-sa-espirituwal nga mga lalaki motahod kanato tungod sa pagbaton ug kaisog nga mangayog tabang. Dugang pa, ang mga ansiyano manglimbasog sa pagbanaag sa mga hiyas ni Jehova sa pagdumala sa panon. Ang ilang makapahupay, praktikal nga tambag ug instruksiyon gikan sa Pulong sa Diyos mahimong mao gayoy atong gikinahanglan aron sa pagpalig-on sa atong determinasyon nga mabuntog ang atong kahuyangan.—Santiago 5:14-16.

19. (a) Sa unsang paagi si Satanas naningkamot sa paggamit sa pagkawalay-pulos sa kinabuhi niining sistemaha? (b) Unsay nalangkit sa pagsalig, ug angay kitang magmadeterminado sa pagbuhat sa unsa?

¹⁹ Ayaw gayod kalimti nga si Satanas nahibalo nga mubo na lang ang iyang panahon. (Pinadayag 12:12) Buot niyang gamiton ang pagkawalay-pulos sa kinabuhi niining kalibotana sa pagpaluya ug pagpahunong kanato. Hinaot nga mabatonan nato ang bug-os nga pagsalig sa giingon diha sa Roma 8:35-39: “Kinsa ang magabulag kanato gikan sa gugma ni Kristo? Ang kasakitan ba o kagul-anan o paglutos o kagutom o kahubo o kapeligrohan o espada? . . . Sukwahi hinuon, niining tanang butang kita bug-os nga nagmadaogon pinaagi kaniya nga nahigugma kanato. Kay kombinsido ako nga dili ang kamatayon ni kinabuhi ni mga manulonda ni mga kagamhanan ni mga butang nga ania karon ni mga butang nga moabot ni mga gahom ni gihabogon ni giladmon ni bisan unsang ubang linalang ang makabulag kanato gikan sa gugma sa Diyos nga anaa kang Kristo Jesus nga atong Ginoo.” Pagkadako nga pagsalig kang Jehova! Apan, ang maong pagsalig labaw pa kay sa pagbati lamang. Hinunoa, kana maoy pagsalig nga naglangkit sa gipasukad-sa-kahibalo nga mga desisyon nga atong gihimo sa atong adlaw-adlaw nga pagkinabuhi. Nan, magmadeterminado kita nga mosalig kang Jehova sa bug-os sa panahon sa kasakitan.

[Mga footnote]

Nahinumdom Ka Ba?

• Sa dihang nag-atubang ug mga suliran sa ekonomiya, sa unsang mga paagi ikapasundayag nato nga kita nagasalig kang Jehova?

• Sa unsang paagi makapasundayag kita ug pagsalig sa Diyos sa dihang gihasol kita sa mga suliran sa panglawas?

• Sa dihang ang kahuyangan sa unod magpadayon, sa unsang paagi ikapakita nato nga kita tinuod nga nagasalig kang Jehova?

[Kahon sa panid 17]

Nahinumdom Ka ba Niining mga Artikuloha?

Sa dihang gihasol sa dili-maayong panglawas, makapadasig ang pagbasa bahin sa ubang mga tawo nga malamposong nakasagubang sa mga abnormalidad, balatian, o mga depekto sa lawas. Ang mosunod maoy pipila ka artikulo nga gipatik sa mga magasing Bantayanang Torre ug Pagmata!

Ang “Pagbuntog sa Akong mga Kahuyangan” nasentro sa pagdumala sa negatibong panghunahuna ug depresyon.—Ang Bantayanang Torre, Mayo 1, 1990.

“Bisan ang ‘Iron Lung’ Dili Makapugong Kaniya sa Pagsangyaw.”—Pagmata!, Enero 22, 1993.

Ang “Usa ka Bala Nakausab sa Akong Kinabuhi” nagsentro sa pagtagad diha sa pagsagubang sa paralisis.—Pagmata!, Oktubre 22, 1995.

Ang “Wala Kamo Mahibalo Kon Maunsa ang Inyong Kinabuhi Ugma” naghisgot sa pagsagubang sa bipolar disorder.—Ang Bantayanang Torre, Disyembre 1, 2000.

“Ang Pagbiya ni Loida sa Pagkaamang” nagsentro sa pagtagad diha sa pagsagubang sa cerebral palsy.—Pagmata!, Mayo 8, 2000.

“Ang Akong Pagpakigbisog sa ‘Endometriosis.’”—Pagmata!, Hulyo 22, 2000.

“Ang Akong Pagsagubang sa ‘Scleroderma.’”—Pagmata!, Agosto 8, 2001.

“Nabuntog Nako ang Akong Pagpakigbisog sa ‘Postpartum Depression.’”—Pagmata!, Hulyo 22, 2002.

[Hulagway sa panid 15]

Kon mataktak sa trabaho, maalamon tingaling susihon nato pag-usab ang atong estilo sa kinabuhi

[Hulagway sa panid 16]

Ang sugilanon ni Loida nagpakita kon sa unsang paagi ang pagsalig kang Jehova motabang sa usa sa paglahutay. (Tan-awa ang kahon sa panid 17)

[Hulagway sa panid 18]

Dili kita angayng maulaw nga mangayog tabang sa pagbuntog sa atong mga kahuyangan