Ang Bugtong Dalan Ngadto sa Walay-Kataposang Kinabuhi
“Ako ang dalan ug ang kamatuoran ug ang kinabuhi.”—JUAN 14:6.
1, 2. Sa unsa gitandi ni Jesus ang dalan ngadto sa walay-kataposang kinabuhi, ug unsay kahulogan sa iyang ilustrasyon?
SA IYANG bantogang Wali sa Bukid, gitandi ni Jesus ang dalan ngadto sa walay-kataposang kinabuhi sa usa ka agianan diin mosulod ang usa ka tawo pinaagi sa ganghaan. Matikdi nga gipasiugda ni Jesus nga kining maong dalan ngadto sa kinabuhi dili sayon nga dalan, nga nag-ingon: “Sulod kamo agi sa sigpit nga ganghaan; tungod kay lapad ug luag ang dalan padulong ngadto sa kalaglagan, ug daghan ang mga nanagpanulod agi niini; samtang sigpit ang ganghaan ug hagip-ot ang dalan padulong ngadto sa [walay-kataposang] kinabuhi, ug diyutay ra ang mga nakakaplag niini.”—Mateo 7:13, 14.
2 Nasabtan ba nimo ang kahulogan niining ilustrasyona? Wala ba kini magpadayag nga dunay usa lamang ka agianan, o dalan, nga motultol sa kinabuhi ug nga kini magkinahanglan ug mainampingong pagtagad sa atong bahin sa paglikay nga mahisalaag gikan nianang dalan ngadto sa kinabuhi? Nan, unsa man kining bugtong dalan ngadto sa walay-kataposang kinabuhi?
Papel ni Jesu-Kristo
3, 4. (a) Sa unsang paagi gipakita sa Bibliya ang hinungdanong papel ni Jesus diha sa atong kaluwasan? (b) Kanus-a unang gipadayag sa Diyos nga ang katawhan makabaton ug walay-kataposang kinabuhi?
3 Tataw, si Jesus dunay hinungdanong papel may kalabotan nianang dalana, sumala sa gimantala sa iyang apostol nga si Pedro: “Walay kaluwasan diha kang bisan kinsa pang lain, kay walay laing ngalan ilalom sa langit [gawas nianang kang Jesus] nga gikahatag taliwala sa mga tawo nga pinaagi niini kita gayod maluwas.” (Buhat 4:12) Sa susama, si apostol Pablo mipahayag: “Ang gasa nga ginahatag sa Diyos maoy kinabuhing walay-kataposan pinaagi ni Kristo Jesus nga atong Ginoo.” (Roma 6:23) Si Jesus mismo nagpadayag nga ang bugtong dalan ngadto sa walay-kataposang kinabuhi maoy pinaagi kaniya, kay siya mipahayag: “Ako ang dalan ug ang kamatuoran ug ang kinabuhi.”—Juan 14:6.
4 Busa, hinungdanon nga atong dawaton ang papel ni Jesus sa paghimong posible sa walay-kataposang kinabuhi. Nan, susihon nato ang iyang papel nga labi pang mainampingon. Nahibalo ka ba kon kanus-a, human makasala si Adan, gipakita ni Jehova nga Diyos nga ang katawhan makapahimulos ug walay-kataposang kinabuhi? Human gayod makasala si Adan. Susihon nato karon kon sa unsang paagi ang tagana ni Jesu-Kristo ingong Manluluwas sa tawo unang gitagna.
Ang Gisaad nga Binhi
5. Unsaon nato pag-ila ang halas nga naghaylo kang Eva?
5 Gipaila ni Jehova nga Diyos sa simbolikong pinulongan ang gisaad nga Manluluwas. Gibuhat niya kini sa dihang gipahayag niya ang hukom ngadto sa “halas” kinsa misulti kang Eva ug mitental kaniya sa pagsupak sa Diyos pinaagi sa pagkaon sa gidili nga bunga. (Genesis 3:1-5) Siyempre, kadtong maong halas dili literal nga bitin. Kadto maoy gamhanang espiritung linalang nga gipaila sa Bibliya ingong “orihinal nga halas, ang usa nga gitawag Yawa ug Satanas.” (Pinadayag 12:9) Gigamit ni Satanas kining ubos nga mananap ingong iyang tigpamaba aron sa paghaylo kang Eva. Busa, sa paghukom kang Satanas, ang Diyos miingon kaniya: “Ibutang ko ang panagkaaway tali kanimo ug sa babaye ug tali sa imong binhi ug sa iyang binhi. Siya [ang binhi sa babaye] magasamad kanimo sa ulo ug ikaw magasamad kaniya sa tikod.”—Genesis 3:15.
6, 7. (a) Kinsa ang babaye nga nanganak sa “binhi”? (b) Kinsa ang gisaad nga Binhi, ug unsay iyang palamposon?
6 Kinsa kining “babaye” nga si Satanas dunay panagkaaway, o pagdumot? Maingon nga ang “orihinal nga halas” gipaila sa Pinadayag kapitulo 12, mao man usab kining maong babaye nga gidumtan ni Satanas. Matikdi sa bersikulo 1 nga siya giingon nga “gidayandayanan sa adlaw, nagbarog diha sa bulan, ug may napulog-duha ka bituon sa iyang ulo.” Kining maong babaye naghawas sa langitnong organisasyon sa Diyos sa matinumanong mga manulonda, ug ang “batang lalaki” nga iyang gipanganak naghawas sa Gingharian sa Diyos, nga si Jesu-Kristo mao ang nagamandong Hari.—Pinadayag 12:1-5, The Jerusalem Bible.
7 Busa, kinsa ang “binhi,” o anak, sa babaye, nga gihisgotan sa Genesis 3:15, nga mosamad kang Satanas “sa ulo,” sa ingon nagpatay kaniya? Mao kini ang usa nga gipadala sa Diyos gikan sa langit nga matawo sa milagrosong paagi diha sa usa ka birhen, oo, ang tawo nga si Jesus. (Mateo 1:18-23; Juan 6:38) Ang kapitulo 12 sa Pinadayag nagpadayag nga ingong binanhaw nga langitnong Magmamando, kining maong Binhi, si Jesu-Kristo, manguna sa pagparot kang Satanas ug magtukod, sumala sa giingon sa Pinadayag 12:10, sa “gingharian sa atong Diyos ug sa awtoridad sa iyang Kristo.”
8. (a) Unsang bag-ong butang ang gitagana sa Diyos may kalabotan sa iyang orihinal nga katuyoan? (b) Kinsay naglangkob sa bag-ong kagamhanan sa Diyos?
8 Kining maong Gingharian diha sa mga kamot ni Jesu-Kristo sa ingon maoy bag-ong butang nga gitagana sa Diyos may kalabotan sa iyang orihinal nga katuyoan nga ang katawhan makapahimulos ug walay-kataposang kinabuhi dinhi sa yuta. Human sa pagrebelde ni Satanas, milihok dayon si Jehova sa pagwagtang sa tanang daotang mga sangpotanan sa pagkadaotan pinaagi niining bag-ong Ginghariang kagamhanan. Sa dinhi pa sa yuta gipadayag ni Jesus nga dili siya mag-inusara niining maong kagamhanan. (Lucas 22:28-30) Ang uban pilion gikan sa katawhan, ug sila moduyog kaniya sa langit aron makig-ambit sa pagmando, ug sa ingon sila maglangkob sa ikaduhang bahin sa binhi sa babaye. (Galacia 3:16, 29) Sa Bibliya ang gidaghanon niining kaubang mga magmamando ni Jesus—ang tanan gikuha gikan sa taliwala sa makasasalang katawhan sa yuta—gihatag ingong 144,000.—Pinadayag 14:1-3.
9. (a) Nganong kinahanglang motungha si Jesus sa yuta ingong tawo? (b) Sa unsang paagi gibungkag ni Jesus ang mga buhat sa Yawa?
9 Apan, sa dili pa magsugod pagmando kanang maong Gingharian, hinungdanon nga ang pangunang bahin sa binhi, si Jesu-Kristo, motungha sa yuta. Ngano man? Tungod kay siya gitudlo ni Jehova nga Diyos ingong ang Usa nga ‘magbungkag [o, magwagtang] sa mga buhat sa Yawa.’ (1 Juan 3:8) Lakip sa mga buhat ni Satanas mao ang iyang pagdaldal kang Adan sa pagpakasala, nga nagpahinabo sa tunglo nga sala ug kamatayon diha sa tanang anak ni Adan. (Roma 5:12) Gibungkag ni Jesus kining maong buhat sa Yawa pinaagi sa paghatag sa Iyang kinabuhi ingong lukat. Sa ingon nagtagana siyag pasikaranan sa pagpahigawas sa katawhan gikan sa pagkatinunglo sa sala ug kamatayon ug nagbukas sa dalan ngadto sa walay-kataposang kinabuhi.—Mateo 20:28; Roma 3:24; Efeso 1:7.
Kon Unsay Napalampos sa Lukat
10. Sa unsang paagi managsama si Jesus ug Adan?
10 Sanglit ang kinabuhi ni Jesus gibalhin gikan sa langit ngadto sa tagoangkan sa usa ka babaye, natawo siyang hingpit nga tawo, wala mabulingi sa sala gikan kang Adan. May posibilidad siya nga mabuhi nga walay-kataposan sa yuta. Sa susama, si Adan gilalang ingong hingpit nga tawo nga dunay mga kalaoman nga makapahimulos ug walay-kataposang kinabuhi sa yuta. Si apostol Pablo naghunahuna sa kasamahan tali niining duha ka lalaki sa dihang siya misulat: “‘Ang unang tawo nga si Adan nahimong buhing kalag.’ Ang kataposang Adan [si Jesu-Kristo] nahimong nagahatag-kinabuhi nga espiritu. Ang unang tawo gikan sa yuta ug hinimo sa abog; ang ikaduhang tawo gikan sa langit.”—1 Corinto 15:45, 47.
11. (a) Unsay epekto ni Adan ug Jesus diha sa katawhan? (b) Unsaon nato paglantaw ang halad ni Jesus?
11 Ang kasamahan tali niining duha—ang duha lamang ka hingpit nga lalaki nga nabuhi sa yuta—gipasiugda sa pahayag sa Bibliya nga si Jesus “mihatag sa iyang kaugalingon nga usa ka katugbang nga lukat alang sa tanan.” (1 Timoteo 2:6) Katugbang ni kinsa si Jesus? Aw, ni Adan sa dihang siya hingpit pa nga tawo! Ang sala sa unang Adan misangpot sa pagkatinunglo sa kamatayon sa tibuok tawhanong pamilya. Ang halad sa “kataposang Adan” nagtagana ug pasikaranan alang sa kaluwasan gikan sa sala ug kamatayon, aron kita mabuhi sa walay kataposan. Pagkabililhon sa halad ni Jesus! Si apostol Pedro miingon: “Dili pinaagi sa madunotong mga butang, sa pilak o bulawan, nga kamo gipahigawas.” Hinunoa, si Pedro mipatin-aw: “Pinaagi sa bililhong dugo, sama nianang sa usa ka walay-lama ug walay-buling nga kordero, kang Kristo mismo.”—1 Pedro 1:18, 19.
12. Giunsa paghubit sa Bibliya ang pagwagtang sa atong pagkatinunglo sa kamatayon?
12 Matahom nga pagkahubit sa Bibliya ang paagi sa pagwagtang sa pagkatinunglo sa kamatayon sa tawhanong pamilya, nga nag-ingon: “Pinaagi sa usa ka paglapas [kang Adan] ang resulta nganha sa tanang matang sa tawo mao ang pagkahinusgahan, sa ingon usab pinaagi sa usa ka buhat sa pagmatarong [ang bug-os nga dalan sa integridad ni Jesus, nga misangko sa iyang kamatayon] ang resulta nganha sa tanang matang sa tawo mao ang usa ka pagpahayag kanila nga matarong alang sa kinabuhi. Kay maingon nga pinaagi sa pagkadili-masinugtanon sa usa ka tawo [si Adan] daghan ang nahimong makasasala, sa ingon usab pinaagi sa pagkamasinugtanon sa usa ka persona [si Jesus] daghan ang mahimong matarong.”—Roma 5:18, 19.
Usa ka Mahimayaong Kalaoman
13. Nganong daghan ang mibati nga dili nila gustong mabuhi sa walay kataposan?
13 Kining tagana sa Diyos kinahanglang maghimo kanatong malipayon kaayo! Wala ka ba mahinam nga ang usa ka Manluluwas gitagana? Sa dihang gipangutana, “Nadani ka ba sa kalaoman nga mabuhi sa walay kataposan?” sa usa ka surbi nga gihimo sa usa ka mantalaan sa usa ka dakong siyudad sa Amerika, ang makapahinganghang 67.4 porsiyento sa mga misanong mitubag ug, “Wala.” Nganong miingon man sila nga dili nila gustong mabuhi sa walay kataposan? Dayag tungod kay ang kinabuhi sa yuta karon nalangkit sa daghan kaayong suliran. Usa ka tawo miingon: “Dili ko malipay sa hunahuna nga 200 anyos tan-awon.”
14. Nganong ang pagkabuhi sa walay kataposan usa ka hingpit nga kalipay?
14 Bisan pa niana, ang Bibliya wala maghisgot bahin sa pagkinabuhi sa walay kataposan sa kalibotan diin ang mga tawo mag-antos sa sakit, pagkatigulang, ug ubang mga trahedya. Wala, kay ingong Magmamando sa Gingharian sa Diyos, si Jesus magwagtang nianang tanang suliran nga gipahinabo ni Satanas. Sumala sa Bibliya, ang Gingharian sa Diyos “magadugmok ug magaut-ot sa tanan” nga madaogdaogong mga kagamhanan niining kalibotana. (Daniel 2:44) Nianang panahona, ingong tubag sa pag-ampo nga gitudlo ni Jesus sa iyang mga sumusunod, ang “kabubut-on” sa Diyos “mamatuman sa yuta maingon man sa langit.” (Mateo 6:9, 10, Today’s English Version) Sa bag-ong kalibotan sa Diyos, human mahinloi ang yuta sa tanang pagkadaotan, ang mga kaayohan sa lukat ni Jesus mapadapat sa bug-os. Oo, ang tanan nga mokuwalipikar mapasig-uli sa hingpit nga panglawas!
15, 16. Unsang mga kahimtang ang maglungtad sa bag-ong kalibotan sa Diyos?
15 Alang sa mga tawo nga magpuyo sa bag-ong kalibotan sa Diyos, kining tekstoha sa Bibliya mapadapat: “Pabag-oha ang iyang unod labi pa kay sa bata; pabalika siya sa mga adlaw sa iyang batan-ong kusog.” (Job 33:25) Ang laing saad sa Bibliya matuman usab: “Ang mga mata sa mga buta mangabuka, ug ang mga dalunggan sa mga bungol makadungog. Nianang panahona ang bakol mokatkat sama sa lagsaw, ug ang dila sa amang mosinggit sa kalipay.”—Isaias 35:5, 6.
16 Hunahunaa ra: Bisan pa sa atong pisikal nga pangedaron nianang panahona, kita man 80, 800, o mas tigulang pa, ang atong lawas magpabilin diha sa ekselenteng panglawas. Mahisama unya kana sa gisaad sa Bibliya: “Walay molupyo nga moingon: ‘Ako masakiton.’” Nianang panahona kining saara matuman usab: “Pahiran [sa Diyos] ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.”—Isaias 33:24; Pinadayag 21:3, 4.
17. Unsang mga kalamposan ang dahomon tingali nato sa katawhan sa bag-ong kalibotan sa Diyos?
17 Nianang bag-ong kalibotan, makahimo kita sa paggamit sa atong talagsaong utok sa paagi nga gituyo sa atong Maglalalang nga atong gamiton sa dihang iyang gidisenyo kini uban ang walay-kinutobang kapasidad sa pagkat-on. Aw, handurawa ra ang kahibulongang mga butang nga ato tingaling mapalampos! Bisan ang dili-hingpit nga mga tawo nakapatungha gikan sa tipiganan sa mga elemento sa yuta sa tanan nga atong makita sa atong palibot—mga selyular nga telepono, mikropono, relo, pager, kompiyuter, ayroplano, oo, nganli ang bisan unsang butang. Walay mausa niana ang gihimo gikan sa materyales nga ilang gidala gikan sa usa ka halayong dapit sa uniberso. Nga anaa sa atong atubangan ang walay-kinutobang kinabuhi, ang posibilidad alang sa mamugnaong kalamposan sa umaabot nga yutan-ong Paraiso walay-kinutoban!—Isaias 65:21-25.
18. Nganong ang kinabuhi dili gayod malaay sa bag-ong kalibotan sa Diyos?
18 Ug dili mahimong laay ang kinabuhi. Bisan karon nagpaabot kita sa atong sunod nga pagkaon, bisan tuod nakakaon na tingali kita ug tinagpulo ka libong mga pagkaon. Sa tawhanong kahingpitan, labi pa kitang makapahimulos sa mas daghan pang lamiang mga abot sa Paraisong yuta. (Isaias 25:6) Ug mabatonan nato ang walay-kataposang kalipay sa pag-atiman sa daghang mananap sa yuta ug pagkalipay sa matahom nga mga pagsalop sa adlaw, sa kabukiran, mga suba, ug mga walog niini. Tinuod, ang kinabuhi dili gayod mahimong sum-ol sa bag-ong kalibotan sa Diyos!—Salmo 145:16.
Pagkab-ot sa mga Kinahanglanon sa Diyos
19. Nganong makataronganon ang pagtuo nga dunay mga kinahanglanon sa pagdawat sa gasa sa Diyos nga kinabuhi?
19 Magdahom ka ba nga makadawat sa dakong gasa sa Diyos nga walay-kataposang kinabuhi sa Paraiso nga walay bisan unsang paningkamot sa imong bahin? Dili ba makataronganon nga dunay kinahanglanon ang Diyos? Tinuod gayod. Sa pagkatinuod, ang Diyos dili moitsa lamang sa gasa nganhi kanato. Iya kining gitunol kanato, apan kinahanglang mokab-ot kita ug mokuha niana. Oo, gikinahanglan ang paningkamot. Mangutana ka tingali sa pangutana nga gisukna sa datong batan-ong magmamando kang Jesus: “Unsang maayo ang kinahanglan kong buhaton aron makaangkon ug kinabuhing walay-kataposan?” O imo tingaling balayon ang pangutana sa paagi sa pagsukna sa usa ka taga-Filipos nga tigbantay sa bilanggoan ngadto kang apostol Pablo: “Unsay kinahanglan kong buhaton aron maluwas?”—Mateo 19:16; Buhat 16:30.
20. Unsay hinungdanong kinahanglanon alang sa walay-kataposang kinabuhi?
20 Sa gabii una siya mamatay, gipakita ni Jesus ang sukaranang kinahanglanon sa dihang miingon siya sa pag-ampo ngadto sa iyang langitnong Amahan: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Dili ba makataronganong kinahanglanon nga kita mokuha ug kahibalo bahin kang Jehova, kinsa nagpaposible sa walay-kataposang kinabuhi, ug kahibalo bahin sa usa nga namatay alang kanato, si Jesu-Kristo? Bisan pa niana, labaw pa ang gikinahanglan kay sa pagkuha lamang sa maong kahibalo.
21. Unsaon nato pagpakita nga atong gikab-ot ang kinahanglanon sa pagpasundayag ug pagtuo?
21 Ang Bibliya nag-ingon usab: “Siya nga nagapasundayag ug pagtuo sa Anak adunay kinabuhing walay-kataposan.” Unya midugang kini: “Siya nga dili-mosunod sa Anak dili makakita sa kinabuhi, apan ang kapungot sa Diyos magapabilin diha kaniya.” (Juan 3:36) Ikapakita nimo nga nagpasundayag ka ug pagtuo sa Anak pinaagi sa paghimog mga kausaban sa imong kinabuhi ug pagpaharmonya niini sa kabubut-on sa Diyos. Kinahanglang isalikway nimo ang bisan unsang sayop nga dalan nga imo tingaling gisubay ug mohimog aksiyon sa pagbuhat kon unsay makapahimuot sa Diyos. Kinahanglang buhaton nimo ang gisugo ni apostol Pedro: “Busa, paghinulsol kamo, ug talikod aron mapapas ang inyong mga sala, aron ang mga panahon sa pagpalagsik moabot gikan sa persona ni Jehova.”—Buhat 3:19.
22. Unsang mga lihok ang nalakip sa pagsunod sa mga tunob ni Jesus?
22 Hinaot nga dili kita malimot nga pinaagi lamang sa pagpasundayag ug pagtuo kang Jesus nga makapahimulos kita ug walay-kataposang kinabuhi. (Juan 6:40; 14:6) Atong ipakita nga kita nagpasundayag ug pagtuo kang Jesus pinaagi sa ‘pagsunod pag-ayo sa iyang mga tunob.’ (1 Pedro 2:21) Unsay nalakip sa pagbuhat niana? Aw, sa pag-ampo ngadto sa Diyos, si Jesus mipatugbaw: “Tan-awa! Ako mianhi . . . aron buhaton ang imong kabubut-on, O Diyos.” (Hebreohanon 10:7) Hinungdanong sundogon si Jesus sa pag-uyon nga mobuhat sa kabubut-on sa Diyos ug sa pagpahinungod sa imong kinabuhi ngadto kang Jehova. Human niana kinahanglang simbolohan nimo kanang maong pahinungod pinaagi sa pagpabawtismo sa tubig; si Jesus usab mitanyag sa iyang kaugalingon alang sa bawtismo. (Lucas 3:21, 22) Ang paghimo nianang maong mga lakang bug-os nga makataronganon. Si apostol Pablo nag-ingon nga “ang gugma nga iya sa Kristo nagatukmod kanamo.” (2 Corinto 5:14, 15) Sa unsang paagi? Aw, ang gugma nagpalihok kang Jesus sa paghatag sa iyang kinabuhi alang kanato. Dili ba kana angayng magtukmod kanato sa pagsanong pinaagi sa pagpasundayag ug pagtuo kaniya? Oo, kinahanglang magtukmod kini kanato sa pagsunod sa iyang mahigugmaong panig-ingnan sa paghatag sa iyang kaugalingon sa pagtabang sa uban. Si Kristo nagkinabuhi alang sa pagbuhat sa kabubut-on sa Diyos; kinahanglang buhaton nato ang susama, nga dili na magkinabuhi alang sa atong kaugalingon.
23. (a) Sa unsa idugang kadtong nakadawat ug kinabuhi? (b) Unsay gikinahanglang himoon niadtong anaa sa Kristohanong kongregasyon?
23 Dili kana mao ang kataposan. Ang Bibliya nag-ingon nga sa dihang 3,000 ang nabawtismohan sa Pentekostes 33 K.P., sila “gidugang.” Gidugang sa unsa? “Sila padayong nagdeboto sa ilang kaugalingon sa ginatudlo sa mga apostol ug sa pagpaambit sa usag usa,” misaysay si Lucas. (Buhat 2:41, 42) Oo, sila nagtigom alang sa pagtuon sa Bibliya ug sa pakig-uban ug busa gidugang ngadto, o nahimong bahin, sa Kristohanong kongregasyon. Ang unang mga Kristohanon kanunayng mitambong sa mga tigom alang sa espirituwal nga instruksiyon. (Hebreohanon 10:25) Ang mga Saksi ni Jehova karon naghimo usab niini, ug buot nilang dasigon ka sa pagtambong niining mga tigoma uban kanila.
24. Unsa ang “tinuod nga kinabuhi,” ug sa unsang paagi ug kanus-a kini matuman?
24 Minilyon karon ang nagsubay sa sigpit nga agianan padulong sa kinabuhi. Ang pagpabilin niining sigpit nga agianan nagkinahanglag tinuod nga paningkamot! (Mateo 7:13, 14) Gipakita kini ni Pablo diha sa iyang mainitong hangyo: “Bugnoa ang maayong bugno sa pagtuo, panggunit nga hugot sa kinabuhing walay-kataposan nga alang niini ikaw gitawag.” Ang paglahutay niini nga pakigbugno gikinahanglan aron “makagunit nga hugot sa tinuod nga kinabuhi.” (1 Timoteo 6:12, 19) Kanang kinabuhia dili mao ang presenteng kinabuhi sa mga kaul-ol ug mga kasakit ug pag-antos nga gipahinabo sa sala ni Adan ngari kanato. Hinunoa, kana maoy kinabuhi sa bag-ong kalibotan sa Diyos, nga sa dili madugay matuman sa dihang ang halad lukat ni Kristo ipadapat alang sa tanang mahigugmaon kang Jehova nga Diyos ug sa iyang Anak human wagtangon kining sistema sa mga butang. Hinaot kitang tanan mopili sa kinabuhi—“sa tinuod nga kinabuhi”—walay-kataposang kinabuhi sa mahimayaong bag-ong kalibotan sa Diyos.
Unsaon Nimo Pagtubag?
◻ Kinsa ang halas, ang babaye, ug ang binhi sa Genesis 3:15?
◻ Sa unsang paagi si Jesus katugbang ni Adan, ug unsay gipaposible sa lukat?
◻ Unsay imong malaoman nga maghimo sa bag-ong kalibotan sa Diyos nga makapahimuot kaayo kanimo?
◻ Unsang mga kinahanglanon ang atong kinahanglang kab-oton aron makapuyo sa bag-ong kalibotan sa Diyos?
[Hulagway sa panid 10]
Alang sa mga batan-on ug tigulang, si Jesus mao ang bugtong dalan ngadto sa walay-kataposang kinabuhi
[Hulagway sa panid 11]
Sa gitakdang panahon sa Diyos, ang tigulang mahibalik sa batan-ong kusog