LEKSIYON 19
Ang mga Saksi ni Jehova Tinuod ba nga Kristohanon?
Ingong mga Saksi ni Jehova, kombinsido mi nga tinuod mi nga mga Kristohanon. Ngano? Matikdi ang basehanan sa among mga pagtulon-an, ang ngalan nga nagpalahi namo, ug ang gugma nga among gipakita sa usag usa.
1. Asa gibase sa mga Saksi ni Jehova ang ilang mga pagtulon-an?
Si Jesus miingon: ‘Ang pulong [sa Diyos] mao ang kamatuoran.’ (Juan 17:17) Sama kang Jesus, kanunayng gibase sa mga Saksi ni Jehova ang ilang mga pagtulon-an diha sa Pulong sa Diyos. Matikdi ang among modernong kasaysayan. Sa mga 1870, gisusi pag-ayo sa usa ka grupo sa mga estudyante sa Bibliya ang Pulong sa Diyos. Gibase nila ang ilang pagtulon-an sa giingon sa Bibliya, bisan pag kini nga mga pagtulon-an lahi sa mga doktrina sa simbahan. Dayon ilang gisulti ang mga kamatuoran sa Bibliya ngadto sa uban.a
2. Nganong gipili namo ang ngalang Saksi ni Jehova?
Gitawag ni Jehova ang iyang mga magsisimba ingong iyang mga saksi kay sila nagsulti sa kamatuoran bahin niya. (Hebreohanon 11:4–12:1) Pananglitan, sa karaang panahon, giingnan sa Diyos ang iyang katawhan: “Kamo ang akong mga saksi.” (Basaha ang Isaias 43:10.) Si Jesus gitawag nga “Matinumanong Saksi.” (Pinadayag 1:5) Busa niadtong 1931, among gipili ang ngalang Saksi ni Jehova. Pribilehiyo namo nga tawgon niana nga ngalan.
3. Giunsa pagsundog sa mga Saksi ni Jehova ang gugma ni Jesus?
Gihigugma pag-ayo ni Jesus ang iyang mga tinun-an mao nga giisip niya sila nga iyang pamilya. (Basaha ang Marcos 3:35.) Sa susama, ang mga Saksi ni Jehova sa tibuok kalibotan nagkahiusa nga samag pamilya. Kanay hinungdan nga gitawag namog igsoon ang usag usa. (Filemon 1, 2) Gisunod sab namo ang sugo nga ‘higugmaon ang tanang igsoon.’ (1 Pedro 2:17) Kini nga gugma gipakita sa mga Saksi ni Jehova sa daghang paagi, sama sa pagtabang sa among mga igsoon sa tibuok kalibotan panahon sa kalisdanan.
TUN-IG DUGANG
Tun-ig dugang ang kasaysayan sa mga Saksi ni Jehova, ug sayra ang dugang ebidensiya nga tinuod mi nga mga Kristohanon.
Ang tinuod nga mga Kristohanon nagbase sa ilang mga pagtulon-an diha sa Bibliya ug nagsangyaw niini ngadto sa uban
4. Among gibase sa Bibliya ang among mga pagtulon-an
Gitagna ni Jehova nga ang kamatuoran sa Bibliya ipadayag. Basaha ang Daniel 12:4, ug dayon hisgoti kini nga pangutana:
Unsay “modagaya” sa katawhan sa Diyos samtang padayon nilang ginasusi ang Bibliya?
Tan-awa kon unsay paagi sa usa ka grupo sa mga estudyante sa Bibliya, apil si Charles Russell, sa pagtuon sa Pulong sa Diyos. I-play ang VIDEO, ug dayon hisgoti ang mosunod nga pangutana:
Sa video, unsay paagi ni Charles Russell ug sa iyang kaubang mga Estudyante sa Bibliya sa pagtuon sa Pulong sa Diyos?
Nahibalo ba ka?
Usahay naa mi usbon sa among mga pagtulon-an. Ngano? Sama nga anam-anam nimong maklaro ang palibot samtang magkahayag ang adlaw, anam-anam pod nga gipadayag sa Diyos ang pagsabot sa iyang Pulong. (Basaha ang Proverbio 4:18.) Busa bisag dili mausab ang Bibliya, among usbon ang among mga pagtulon-an samtang nagkauswag ang among pagsabot sa Bibliya.
5. Among ginahimo kon unsay kahulogan sa among ngalan
Nganong gipili namo nga tawgong Saksi ni Jehova? I-play ang VIDEO, ug dayon hisgoti ang mosunod nga pangutana:
Nganong haom ang ngalang Saksi ni Jehova?
Nganong si Jehova nagpilig mga tawo ingong iyang mga saksi? Tungod kay ilang ipaila nga siya ang tinuod nga Diyos, kay daghan ang bakak nga ginatudlo bahin kaniya. Matikdi ang duha sa maong mga bakak.
Ang ubang relihiyon nagtudlo sa ilang mga membro nga gusto sa Diyos nga mogamit silag imahen sa ilang pagsimba. Pero basaha ang Levitico 26:1, ug dayon hisgoti kini nga mga pangutana:
Unsay giingon sa Bibliya? Unsay pagbati ni Jehova bahin sa mga imahen?
Ang ubang lider sa relihiyon nagtudlo nga si Jesus ang Diyos. Pero basaha ang Juan 20:17, ug dayon hisgoti kini nga mga pangutana:
Unsay giingon sa Bibliya? Ang Diyos ba ug si Jesus usa ra?
Unsay imong gibati sa pagkahibalo nga si Jehova nagpadala sa iyang mga Saksi aron isangyaw ang kamatuoran bahin niya ug sa iyang Anak?
6. Among gihigugma ang usag usa
Gipakasama sa Bibliya ang mga Kristohanon sa lainlaing parte sa lawas sa tawo. Basaha ang 1 Corinto 12:25, 26, ug dayon hisgoti kini nga mga pangutana:
Unsay angayng himoon sa tinuod nga mga Kristohanon dihang mag-antos ang ubang Kristohanon?
Unsay imong naobserbahan sa gugma nga gipakita sa mga Saksi ni Jehova sa usag usa?
Dihang mag-antos ang mga Saksi ni Jehova sa usa ka lugar, ang ilang kaubang mga Saksi sa tibuok kalibotan motabang dayon. Ingong pananglitan, i-play ang VIDEO. Dayon hisgoti ang mosunod nga pangutana:
Sa unsang paagi ang pagpanghatag ug hinabang sa mga Saksi ni Jehova nagpamatuod sa ilang gugma?
Ang tinuod nga mga Kristohanon nagpakitag gugma niadtong naa sa kalisdanan
ANG UBAN MOINGON: “Ang mga Saksi ni Jehova bag-o ra nga relihiyon.”
Sukad kanus-a nga gitawag ni Jehova nga mga saksi ang iyang mga magsisimba?
SUMARYO
Ang mga Saksi ni Jehova tinuod nga mga Kristohanon. Sa tibuok kalibotan, among giisip ang usag usa ingong pamilya, among gibase sa Bibliya ang among mga pagtulon-an, ug among gisangyaw sa uban ang kamatuoran bahin kang Jehova.
Review
Nganong gipili namo ang ngalang Saksi ni Jehova?
Giunsa namo pagtratar ang usag usa?
Para nimo, tinuod ba nga Kristohanon ang mga Saksi ni Jehova?
SUSIHA
Sayrag dugang ang bahin sa among kasaysayan.
Mga Saksi ni Jehova—Buhi nga Pagtuo, Bahin 1: Nakagawas na sa Kangitngit (1:00:53)
Tan-awa ang usa ka pananglitan kon giunsa sa mga Saksi ni Jehova pagyagyag ang bakak nga mga pagtulon-an.
Sayra ang tubag sa imong mga pangutana bahin sa mga Saksi ni Jehova.
“Komon nga mga Pangutana Bahin sa mga Saksi ni Jehova” (web page)
Si Stephen nakahimog mga krimen tungod sa iyang kasuko sa mga tawo nga lahig rasa. Sayra kon unsay iyang nakita sa mga Saksi ni Jehova nga nakapalihok niya sa pagbag-o.
“Nagkaanam ka Daotan ang Akong Kinabuhi” (Ang Bantayanang Torre, Hulyo 1, 2015)
a Sukad niadtong 1879, ang katawhan ni Jehova nagpatik sa magasing Ang Bantayanang Torre sa pagpatin-aw sa giingon sa Bibliya.