Kristohanong Pagkamaabiabihon Diha sa Nabahin nga Kalibotan
“Busa, kita ilalom sa obligasyon nga dawaton sa kamatinagdanon ang maong mga tawo, aron kita mahimong mga isigkamagbubuhat diha sa kamatuoran.”—3 JUAN 8.
1. Unsang labing tilinguhaong mga gasa ang gihatag sa Maglalalang sa katawhan?
ANG tawo wala nay mas maayo nga butang ilalom sa adlaw kay sa pagkaon ug pag-inom ug pagkalipay, ug kini magaduyog gayod kanila sa ilang pagbudlay sulod sa mga adlaw sa ilang kinabuhi, nga gihatag kanila sa matuod nga Diyos ilalom sa adlaw.” (Ecclesiastes 8:15) Pinaagi nianang mga pulonga gisultihan kita sa karaang Hebreohanong magtitigom nga gitinguha ni Jehova nga Diyos dili lamang nga ang iyang tawhanong mga linalang magmangayaon ug magmalipayon kondili gitagana usab niya ang paagi aron maangkon nila kana. Sa tibuok kasaysayan sa tawo ang paglipaylipay ug paglingawlingaw daw samang gitinguha sa mga tawo bisan diin.
2. (a) Sa unsang paagi ang katawhan nag-abusar sa kon unsay katuyoan ni Jehova alang kanila? (b) Unsa ang resulta?
2 Karong adlawa kita nagkinabuhi sa matinguhaon-ug-kalingawan nga katilingban diin ang mga tawo napuliki sa pagpangagpas sa kalingawan ug paglipaylipay. Ang kadaghanang tawo nahimong “mahigugmaon sa kaugalingon, . . . mga mahigugmaon sa kalipayan inay nga mga mahigugmaon sa Diyos,” sumala sa gitagna sa Bibliya. (2 Timoteo 3:1-4) Siyempre, kini maoy tatawng pagtuis sa kon unsay katuyoan ni Jehova nga Diyos. Sa dihang ang pagpangagpas sa mga lingawlingaw mahimong pangunang tumong, o sa dihang ang pagtagbaw-sa-kaugalingon mahimong bugtong nga tumong, wala ing tinuod nga katagbawan, ug ‘ang tanan mahimong kakawangan ug paggukod sa hangin.’ (Ecclesiastes 1:14; 2:11) Tungod niini ang kalibotan napunog mamingawon ug pakyas nga mga tawo, nga, sa baylo, mitultol sa daghan sa mga suliran sa katilingban. (Proverbio 18:1) Ang mga tawo mahimong matahapon sa usag usa ug nabahin sa rasanhon, etniko, sosyal, ug ekonomikanhong paagi.
3. Sa unsang paagi makakaplag kitag matuod nga kangaya ug katagbawan?
3 Pagkalahi unta ang kahimtang kon ginasundog pa sa mga tawo ang paagi ni Jehova sa pagpakiglabot sa uban—nga maluloton, mahinatagon, maabiabihon! Gitin-aw niya nga ang sekreto sa matuod nga kalipay wala diha sa pagtinguha nato nga tagbawon ang atong kaugalingong mga tinguha. Hinunoa, kini mao ang sekreto: “Adunay labaw nga kalipay sa paghatag kay sa pagdawat.” (Buhat 20:35) Aron makaplagan ang matuod nga kangaya ug katagbawan, kinahanglang pukgoon nato ang mga babag ug mga pagkabahinbahin nga tingali magpugong kanato. Ug kinahanglang makigkomunikar kita niadtong nagaalagad kang Jehova nga duyog kanato. Kinahanglan nga sundon nato ang tambag: “Busa, kita ilalom sa obligasyon nga dawaton sa kamatinagdanon ang maong mga tawo, aron kita mahimong mga isigkamagbubuhat diha sa kamatuoran.” (3 Juan 8) Ang pagpasundayag sa pagkamaabiabihon ngadto sa mga takos, sa sukod nga gitugot sa atong mga kahimtang, mapuslanon sa duha ka paagi—makahatag kinig kaayohan sa mga tighatag ug sa mga tigdawat. Nan, kinsa sa mga takos ang angay natong ‘abiabihon’?
“Pag-atiman sa mga Ilo ug sa mga Babayeng Balo”
4. Unsang kausaban sa pamilyahanong mga relasyon ang nakita bisan taliwala sa pipila sa katawhan ni Jehova?
4 Ang lig-ong mga pamilya ug malipayong mga panagtiayon maoy talagsaon karong adlawa. Tungod sa nagsulbong nga mga proporsiyon sa diborsiyo ug nagdaghang di-kinasal nga mga inahan sa tibuok kalibotan ang tradisyonal nga pamilya nausob pag-ayo. Ingong resulta, daghan nga nahimong mga Saksi ni Jehova sa katuigang bag-o pa maoy gikan sa nagbulag nga mga pamilya. Sila tingali diborsiyado o separado gikan sa ilang mga kapikas sa kaminyoon, o nagpuyo sila sa usag-ginikanang mga pamilya. Dugang pa, sumala sa gitagna ni Jesus, ang kamatuoran nga iyang gitudlo misangpot sa mga pagkabahinbahin diha sa daghang pamilya.—Mateo 10:34-37; Lucas 12:51-53.
5. Unsay giingon ni Jesus nga mahimong usa ka tinubdan sa pagpalig-on niadtong anaa sa nabahin nga mga pamilya?
5 Makapalipay sa atong kasingkasing nga makita ang mga bag-ohan nga lig-ong mobarog dapig sa kamatuoran, ug sagad nga sila atong hupayon pinaagi sa makapalig-ong saad ni Jesus: “Sa pagkamatuod ako magaingon kaninyo, Walay usa nga nagbiya ug balay o mga igsoong lalaki o mga igsoong babaye o inahan o amahan o mga anak o kaumahan tungod ug alang kanako ug tungod ug alang sa maayong balita nga dili makabaton ug usa ka gatos ka pilo karon niining yugtoa sa panahon, mga balay ug mga igsoong lalaki ug mga igsoong babaye ug mga inahan ug mga anak ug kaumahan, nga may mga paglutos, ug sa umaabot nga sistema sa mga butang kinabuhing walay-kataposan.”—Marcos 10:29, 30.
6. Sa unsang paagi kita mamahimong ‘mga igsoong lalaki, mga igsoong babaye, mga inahan, ug mga anak’ ngadto sa “mga ilo ug sa mga babayeng balo” diha sa atong taliwala?
6 Apan, kinsa ba kining ‘mga igsoong lalaki ug mga igsoong babaye ug mga inahan ug mga anak’? Ang pagkakita lamang ug daghan kaayong tawo sa usa ka Kingdom Hall, nga sagad usa ka gatos o kapin pa, kinsa nagtawganay nga mga igsoon dili sa awtomatiko mopabati sa usa ka tawo nga sila maoy iyang mga igsoong lalaki, mga igsoong babaye, mga inahan, ug mga anak. Tagda kining puntoha: Ang disipulong si Santiago nagpahinumdom kanato nga aron dawaton ni Jehova ang atong pagsimba, kinahanglang kita ‘mag-atiman sa mga ilo ug sa mga babayeng balo diha sa ilang kasakitan ug mag-amping sa kaugalingon nga dili mabulingan sa kalibotan.’ (Santiago 1:27) Nagkahulogan kana nga kinahanglang dili nato ihikaw ang atong kahangawa sa maong “mga ilo ug sa mga babayeng balo” tungod sa kalibotanong mga tinamdan sa pagkagarboso kay dato ug anaa sa alta sosyedad. Hinunoa, kinahanglan nga kitay manguna sa pagpasundayag kanila sa atong pakig-ubanay ug pagkamaabiabihon.
7. (a) Unsa ang matuod nga katuyoan sa pagkahimong maabiabihon ngadto sa “mga ilo ug sa mga babayeng balo”? (b) Kinsa usab ang mahimong makaambit sa pagpasundayag ug Kristohanong pagkamaabiabihon?
7 Ang pagpasundayag sa pagkamaabiabihon ngadto sa “mga ilo ug sa mga babayeng balo” sa kanunay wala magpasabot nga hulipan ang tingali kakulangan nila sa materyal nga paagi. Ang usag-ginikanan nga mga pamilya o mga panimalay nga nabahin sa relihiyon dili ingong naglisod kanunay sa panalapi. Hinunoa, ang maayong panag-uban, ang pamilyahanong palibot, ang pagpakig-uban sa mga tawong lainlain ug mga edad, ug ang pagpakig-ambit sa maayong espirituwal nga mga butang—kini mao ang mga bahin sa kinabuhi nga bililhon. Busa, kay nahinumdom nga, dili ang kaluhoan sa okasyon, kondili ang espiritu sa gugma ug panaghiusa maoy hinungdanon, pagkamaayo nga, usahay, bisan ang ‘mga ilo ug ang mga babayeng balo’ makaambit sa pagpasundayag sa pagkamaabiabihon ngadto sa isigka-Kristohanon!—Itandi ang 1 Hari 17:8-16.
Aduna bay mga Langyaw sa Atong Taliwala?
8. Unsang kausaban ang nakita diha sa daghang kongregasyon sa mga Saksi ni Jehova?
8 Nagkinabuhi kita sa panahon nga daghang tawo ang nagapanglalin. “Kapin sa 100 milyong tawo sa tibuok kalibotan nagpuyo diha sa mga nasod diin dili sila mga lungsoranon, ug 23 milyon napugos sa pagbiya sa ilang pinuy-anan diha sa ilang mga nasod mismo,” matod sa World Press Review. Ang direktang resulta niini mao nga sa daghang dapit, ilabina sa mas dagkong mga siyudad, ang mga kongregasyon sa katawhan ni Jehova nga sa nangagi gilangkoban sa kadaghanan mga sakop sa usa ka rasa o nasyonalidad karon dunay mga tawo gikan sa lainlaing mga bahin sa kalibotan. Tingali matuod kini sa imong dapit. Nan, unsay angay nga pag-isip nato niining maong “mga dumuloong” ug “mga langyaw,” sumala sa pagtawag tingali kanila sa kalibotan, kansang pinulongan, mga kostumbre, ug estilo sa kinabuhi mahimong lain sa atoa?
9. Unsang seryosong lit-ag ang makabitik kanato kon bahin sa atong pag-isip sa “mga dumuloong” ug “mga langyaw” nga mosulod sa Kristohanong kongregasyon?
9 Sa yanong pagkasulti, kinahanglang dili nato tugotan nga tungod sa bisan unsang mga kiling sa pagdumot sa laing rasa kita mobati nga sa usa ka paagi mas takos sa pribilehiyo nga masayod sa kamatuoran kay sa mga tawong gikan sa lain o giingong paganong nasod; ni angay nga mobati kita nga daw kining mga bag-ohan nagaabusar sa paggamit sa Kingdom Hall o sa ubang mga propiedad. Si apostol Pablo nagpahinumdom sa pipila ka Hudiyong mga Kristohanon sa unang siglo, kinsa naghambin sa maong mga tinamdan, nga sa pagkatinuod walay mausa ang takos; ang dili-takos nga kalulot sa Diyos maoy nagpahinabo nga si bisan kinsa makabaton ug kaluwasan. (Roma 3:9-12, 23, 24) Angay nga maglipay kita nga ang dili-takos nga kalulot sa Diyos karon ginapaabot sa daghan kaayong tawo nga, sa usa o laing paagi, nahikawan sa higayon nga makabati sa maayong balita. (1 Timoteo 2:4) Sa unsang paagi ikapakita nato nga tiunay ang atong kahinangop kanila?
10. Sa unsang paagi makapakita kita nga kita tinuod nga maabiabihon sa “mga langyaw” sa atong taliwala?
10 Mahimo natong sundon ang tambag ni Pablo: “Mahinangpong dawata ang usag usa, maingon nga ang Kristo usab mahinangpong midawat kanato, alang sa himaya sa Diyos.” (Roma 15:7) Kay nakaamgo nga ang katawhan gikan sa ubang kanasoran o mga kagikan sagad nga may kakulian, angay nga ipakita nato kanila ang kalulot ug kabalaka sa dihang kita makaarang sa pagpakita niana. Angay nga atong abiabihon sila sa atong taliwala, nga tagdon ang matag usa kanila nga “sama sa lumad ninyo,” ug “higugmaa siya sama sa imong kaugalingon.” (Levitico 19:34) Kini mahimong dili sayon nga buhaton, apan molampos kita kon hinumdoman nato ang tambag: “Hunong na sa pagpaumol sumala niining sistemaha sa mga butang, apan mag-usab pinaagi sa pagbag-o sa inyong kaisipan, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.”—Roma 12:2.
Magpakig-ambit sa mga Balaan
11, 12. Unsang espesyal nga konsiderasyon ang gihatag ngadto sa pipila ka alagad ni Jehova sa (a) karaang Israel (b) unang siglo?
11 Nahilakip niadtong takos gayod sa atong konsiderasyon ug pagkamaabiabihon mao ang hamtong nga mga Kristohanon nga naghago alang sa atong espirituwal nga kaayohan. Si Jehova mihimog espesyal nga mga tagana alang sa mga saserdote ug sa mga Levihanon sa karaang Israel. (Numeros 18:25-29) Sa unang siglo, ang mga Kristohanon giawhag usab sa pag-atiman niadtong nag-alagad kanila diha sa linaing mga katungdanan. Ang asoy sa 3 Juan 5-8 nagpakita kanato sa suod nga bugkos sa gugma nga naglungtad taliwala sa unang mga Kristohanon.
12 Ang tigulang nga si apostol Juan nagpabili pag-ayo sa kalulot ug pagkamaabiabihon nga gipakita ni Gayo ngadto sa pipila ka nagpanawng mga igsoong lalaki nga gipadala sa pagduaw sa kongregasyon. Ang maong mga igsoong lalaki—lakip si Demetrio, lagmit mao ang tighatod sa sulat—maoy mga estranghero tanan o wala mailhi ni Gayo sa nangagi. Apan gidawat sila sa pagkamaabiabihon tungod kay “alang sa ngalan [sa Diyos] nga sila nanglakaw.” Kini ang pagpahayag niana ni Juan: “Busa, kita ilalom sa obligasyon nga dawaton sa kamatinagdanon ang maong mga tawo, aron kita mahimong mga isigkamagbubuhat diha sa kamatuoran.”—3 Juan 1, 7, 8.
13. Kinsa sa atong taliwala karong adlawa ang ilabinang takos nga ‘abiabihon’?
13 Karong adlawa, sulod sa organisasyon ni Jehova, adunay daghan nga naghago pag-ayo alang sa tibuok nga kahugpongan sa mga igsoon. Naglakip kini sa nagapanawng mga magtatan-aw, kinsa nagagugol sa ilang panahon ug kusog sa sunodsunod nga semana sa pagpalig-on sa mga kongregasyon; ang mga misyonaryo, kinsa nagabiya sa mga pamilya ug mga higala aron magwali diha sa langyawng mga nasod; kadtong nag-alagad sa mga balayng Bethel o sa mga sangang buhatan, kinsa nagboluntaryo sa ilang mga serbisyo aron suportahan ang tibuok-kalibotang buluhatong pagwali; ug kadtong nagaalagad nga mga payunir, kinsa nagagugol sa dakong bahin sa ilang panahon ug kusog sa ministeryo sa kanataran. Sa panguna, kining tanan maoy hago nga buhat, dili alang sa personal nga himaya o ganansiya, kondili tungod sa gugma sa Kristohanong mga igsoon ug kang Jehova. Sila takos nga sundogon nato tungod sa ilang tibuok-kalag nga pagkamahinalaron ug sila takos gayod nga ‘abiabihon.’
14. (a) Nganong kita mahimong mas maayong mga Kristohanon sa dihang ipakita nato ang pagkamaabiabihon ngadto sa mga matinumanon? (b) Nganong si Jesus miingon nga gipili ni Maria ang “maayong bahin”?
14 Sa dihang atong “dawaton sa kamatinagdanon ang maong mga tawo,” si apostol Juan mipunting, kita “mahimong mga isigkamagbubuhat diha sa kamatuoran.” Sa usa ka diwa kita mahimong mas maayong mga Kristohanon ingong resulta. Tungod kini kay ang Kristohanong mga buhat naglakip sa pagbuhat ug maayo ngadto sa isigkamagtutuo. (Proverbio 3:27, 28; 1 Juan 3:18) Adunay mga balos sa laing paagi usab. Sa giabiabi ni Maria ug Marta si Jesus sa ilang balay, si Marta gustong mahimong maayong tagbalay pinaagi sa pag-andam ug “daghang butang” alang kang Jesus. Si Maria nagpakitag pagkamaabiabihon sa laing paagi. Siya “milingkod sa may tiilan sa Ginoo ug nagapamati sa iyang pulong,” ug si Jesus midayeg kaniya tungod sa pagpili “sa maayong bahin.” (Lucas 10:38-42) Ang mga kabildohanay ug mga pakighisgot uban niadtong dunay daghang katuigan nga kasinatian kasagaran maoy mga hinungdanong bahin sa usa ka gabii nga gigugol nga kauban nila.—Roma 1:11, 12.
Sa Espesyal nga mga Okasyon
15. Unsang espesyal nga mga okasyon ang mamahimong malipayong mga panahon alang sa katawhan ni Jehova?
15 Bisan pag ang matuod nga mga Kristohanon dili mosunod sa popular nga mga kostumbre o mosaulog sa kalibotanong mga pangilin ug mga pista, adunay mga okasyon nga sila magkatapok aron magkalingaw sa pakig-uban sa usag usa. Pananglitan, si Jesus miatender sa usa ka kombira sa kasal sa Cana ug miamot sa kalipay sa okasyon pinaagi sa paghimo sa iyang unang milagro didto. (Juan 2:1-11) Sa susama karong adlawa, ang katawhan ni Jehova adunay malipayong mga panahon nga magkauban sa susamang espesyal nga mga okasyon, ug ang nahiangay nga selebrasyon ug kasadyaan makadugang ug dako sa maong mga okasyon. Ugaling, unsa man ang nahiangay?
16. Unsang mga latid ang atong nabatonan bahin sa tukmang panggawi bisan sa espesyal nga mga okasyon?
16 Gikan sa atong pagtuon sa Bibliya, atong nasayran kon unsay nahiangay nga panggawi alang sa mga Kristohanon, ug ato kining gisunod sa tanang panahon. (Roma 13:12-14; Galacia 5:19-21; Efeso 5:3-5) Ang sosyal nga mga tapoktapok, kon kaha maylabot sa mga kasal o tungod sa ubang hinungdan, wala maghatag kanatog kagawasan sa pagbiya sa atong Kristohanong mga sukdanan o pagbuhat sa butang nga dili nato kasagarang buhaton; ni obligado kita sa pagsunod sa tanang kostumbre sa nasod nga atong gipuy-an. Daghan niana gibase sa mga tulumanon o mga patuotuo sa bakak nga relihiyon, ug ang uban naglangkit sa panggawi nga tin-awng dili maayo alang sa mga Kristohanon.—1 Pedro 4:3, 4.
17. (a) Unsang mga butang ang nagpakitang ang kombira sa kasal sa Cana maayong pagkaorganisar ug maayong pagkadumala? (b) Unsay nagpaila nga si Jesus miuyon niadtong okasyona?
17 Sa pagbasa sa Juan 2:1-11, dili lisod nga atong hisabtan nga dako kadto nga hikay ug daghan ang bisita didto. Bisan pa niana, si Jesus ug ang iyang mga disipulo maoy “gidapit” nga mga bisita; sila wala lamang mohapit, bisan pag ang pipila gani kanila lagmit paryente sa tagbalay. Mamatikdan usab nato nga diha kadtong “nagaalagad” ingon man usa ka “tagdumala,” nga naghatag ug mga direksiyon kon unsay isilbi o himoon. Kining tanan nagpaila nga maayong pagkaorganisar ug maayong pagkadumala ang okasyon. Ang asoy gitapos sa pag-ingon nga tungod sa iyang gibuhat sa kombira, si Jesus ‘nagpadayag sa iyang himaya.’ Pilion ba kaha niya kadtong okasyona kon kadto maoy samok ug dili-kontrolado nga salosalo? Sa walay duhaduha dili.
18. Unsay angay nga pagaisipon bahin sa bisan unsang sosyal nga okasyon?
18 Nan, komosta ang espesyal nga mga okasyon nga ato tingaling gihikay? Gusto natong hinumdoman nga ang katuyoan sa pag-abiabi sa uban mao nga kitang tanan unta “mahimong mga isigkamagbubuhat diha sa kamatuoran.” Sa ingon, dili igo nga nganlan ang usa ka okasyon nga tapoktapok sa “Saksi.” Ang pangutana mahimong isukna, Kini ba sa tinuoray maoy pamatuod sa kon kinsa kita ug kon unsay atong gituohan? Dili gayod nato isipon ang maong mga okasyon ingong kahigayonan sa pagsuta asa kutob ang atong mahimo aron makig-indig sa kalibotan diha sa iyang mga paagi, sa pagpatuyang diha sa “tinguha sa unod ug ang tinguha sa mga mata ug ang mapagawalong pagpasundayag sa kahinguhaan sa kinabuhi sa usa.” (1 Juan 2:15, 16) Hinunoa, kining mga okasyona kinahanglang tukmang magpabanaag sa atong papel ingong mga Saksi ni Jehova, ug angay nga atong tinoon nga kon unsay atong ginabuhat mopatunghag himaya ug kadungganan kang Jehova.—Mateo 5:16; 1 Corinto 10:31-33.
‘Magmaabiabihon nga Walay Pagmulo’
19. Nganong kinahanglang kita “magmaabiabihon sa usag usa nga walay pagmulo”?
19 Samtang ang mga kahimtang sa kalibotan magpadayon sa pagkadaot ug ang katawhan mahimong mas nabahin pa, kinahanglang buhaton nato ang tanan natong maarangan sa pagpalig-on sa suod nga bugkos nga naglungtad taliwala sa matuod nga mga Kristohanon. (Colosas 3:14) Sa maong katuyoan kinahanglang kita magbaton ug “mainit nga gugma alang sa usag usa,” sumala sa giawhag kanato ni Pedro. Unya, sa praktikal nga mga pulong, siya midugang: “Magmaabiabihon sa usag usa nga walay pagmulo.” (1 Pedro 4:7-9) Andam ba kita nga manguna sa pag-abiabi sa atong mga igsoon, nga manlimbasog nga mahimong maluloton ug matinabangon? O kita ba magmulo sa dihang motungha ang maong higayon? Kon ingon kita niana, atong ginulo ang kangaya nga ato untang maangkon ug mawad-an usab sa kalipay ingong ganti tungod sa pagbuhat ug maayo.—Proverbio 3:27; Buhat 20:35.
20. Unsang mga panalangin ang nagpaabot kanato kon kita magbatasan sa pagkamaabiabihon diha sa nabahin nga kalibotan karong adlawa?
20 Ang pagbuhat nga suod sa atong kaubang mga Kristohanon, ang pagkamaluloton ug pagkamaabiabihon sa usag usa, mopatunghag di-maihap nga mga panalangin. (Mateo 10:40-42) Sa maong mga tawo si Jehova misaad nga siya “magabuklad sa iyang tolda ibabaw kanila. Sila dili na gutomon ni uhawon pa.” Ang pagkaanaa sulod sa tolda ni Jehova mao ang pagpahimulos sa iyang panalipod ug pagkamaabiabihon. (Pinadayag 7:15, 16; Isaias 25:6) Oo, anaa lang sa unahan ang kalaoman nga mapahimuslan ang pagkamaabiabihon ni Jehova hangtod sa hangtod.—Salmo 27:4; 61:3, 4.
Makapatin-aw Ka Ba?
◻ Unsay dili nato hikalimtan kon buot natong makaplagan ang matuod nga kalipay ug katagbawan?
◻ Kinsa ang ‘mga ilo ug mga babayeng balo,’ ug unsaon nato “pag-atiman” sila?
◻ Unsay angay natong pag-isip sa “mga dumuloong” ug “mga langyaw” sa atong taliwala?
◻ Kinsa ang takos sa linaing konsiderasyon karong adlawa?
◻ Sa unsang paagi ang espesyal nga mga okasyon magpabanaag sa matuod nga espiritu sa pagkamaabiabihon?
[Mga hulagway sa panid 16, 17]
Sa masadyaong mga okasyon kita mahimong maabiabihon sa mga langyaw, mga batang ilo, kadtong anaa sa bug-os-panahong pag-alagad, ug ubang mga bisita