Kinabuhi ug Ministeryo ni Jesus

Miduaw Pag-usab sa Templo

SI Jesus ug ang iyang mga tinun-an nagpalabay sa ilang ikatulong gabii sa Betania sukad nga miabot gikan sa Jerico. Karon sa banagbanag sa kabuntagon sa Lunes, Nisan 10, nakita sila sa dalan paingon sa Jerusalem. Si Jesus gigutom. Busa sa dihang nakakita siya sa kahoyng igira nga may mga dahon, iyang giduol kini sa pagtan-aw kon kini duna bay mga bunga.

Ang kahoy wala sa panahon nga nanahon, sanglit ang tempo sa igira dili pa man hangtod sa Hunyo, ug ulahing bahin pa man karon sa Marso. Apan, tingali nagtuo si Jesus kay sayo man nga nanahon, basin namunga usab kini ug sayo. Apan nabalo siya. Ang mga dahon nakahatag sa kahoy ug malimbongon nga hitsura. Busa gitunglo ni Jesus ang kahoy, nga nagaingon: “Sukad karon dili ka na gayod hikan-an ug bunga.” Sa sunod nga gula niining magasina, maikag kitang mahibalo sa mga gidangatan sa pagtunglo ni Jesus sa kahoyng igira ug kon unsa ang mahulagwayong kahulogan niini.

Mipadayon, si Jesus ug ang iyang mga disipulo sa ulahi miabot sa Jerusalem. Siya miadto sa templo, nga iyang nasusi sa miaging hapon. Apan, karong panahona, siya milihok, sama sa iyang gihimo sa tulo ka tuig kanhi sa dihang miabot siya sa Paskua sa 30 K.P. Giabog ni Jesus ang nanagpamaligya ug nanagpamalit diha sa templo ug gipanglintuwad ang mga lamisa sa mga tigpang-ilis sa kuwarta ug ang mga lingkoranan sa mga namaligyag mga salampati. Ug walay gitugotan niya sa pag-agi sa templo sa pagdalag bisan unsang galamiton.

Gitunglo ang nagpailis ug kuwarta ug namaligyag mga hayop sa templo, siya miingon: “Dili ba kini ang nasulat, ‘Ang akong balay pagatawgong balayng ampoanan alang sa tanang mga nasod’? Apan inyong gihimo kining langob sa mga tulisan.” Sila mga tulisan tungod kay ilang gipangayoan ug mahal nga prisyo kadtong wala kaayoy kapilian gawas sa pagpalit gikan kanila sa mga hayop nga gikinahanglan alang sa halad. Busa gilantaw ni Jesus kining mga negosyoha nga usa ka porma sa panikas o panulis.

Sa dihang nakadungog ang pangulong mga saserdote, mga eskriba, ug mga punoan sa mga tawo sa gihimo ni Jesus, nangita silag paagi sa pagpatay kaniya. Busa sila nagpakita nga sila dili na mausab. Apan, sila walay paagi kon unsaon sa pagpatay kang Jesus, sanglit ang tanang mga tawo padayon man nga nagpaduol kaniya sa pagpamati niya.

Gawas pa sa kinaiyanhon nga mga Hudiyo, ang mga Hentil usab miabot alang sa Paskua. Kini sila maoy mga proselita, nga nagkahulogan nga sila nakabig sa relihiyon sa mga Hudiyo. Ang ubang mga Grego, tingali mga proselita, karon miduol kang Felipe ug mihangyo nga makigkita kang Jesus. Si Felipe miadto kang Andres, tingali nangutana kon angay ba ang maong pakigkita. Tingali didto sa templo si Jesus, diin ang mga Grego nakakita usab kaniya.

Si Jesus nahibalo nga pipila na lamang ka adlaw ang nabilin kaniya, busa sa maayong paagi iyang giilustrar ang iyang kahimtang: “Ang takna nahiabot na nga pagahimayaon na ang Anak sa tawo. Sa pagkatinuod magaingon ako kaninyo, Gawas kon ang usa ka lugas sa trigo mahulog sa yuta ug mamatay, kini magpabilin nga usa lamang ka lugas; apan kon kini mamatay, mamunga kinig daghan.”

Ang usa ka lugas wala kaayoy bili. Apan, unsa kahay mahitabo kon kini ibutang sa yuta ug “mamatay,” nagtapos sa iyang kinabuhi ingon nga liso? Nan kini moturok ug sa ulahi motubo nga lindog nga mamunga ug daghan, daghang lugas sa trigo. Sa susama, si Jesus maoy usa lamang ka hingpit nga tawo. Apan kon siya mamatay nga matinumanon sa Diyos, siya mahimong kasangkapan sa paghatag kinabuhing dayon sa mga matinumanon kinsa adunay samang espiritu sa pagsakripisyo sa kaugalingon nga sama kaniya. Busa, si Jesus miingon: “Ang mahigugma sa iyang kalag mawad-an hinoon niini, apan ang magadumot sa iyang kalag niining kalibotana magpatunhay niini alang sa kinabuhing dayon.”

Si Jesus sa dayag wala maghunahuna sa iyang kaugalingon lamang, kay siya sunod miingon: “Kon kinsa ang moalagad kanako, kinahanglan magasunod siya kanako, ug diin gani ako, ang akong alagad atua usab didto. Kon kinsa ang moalagad kanako, ang Amahan magapasidungog kaniya.” Pagkakatingalahang ganti ang pagsunod kang Jesus ug ang pag-alagad kaniya! Kini maoy ganti sa pagkahimong pinasidunggan sa Amahan aron makig-uban kang Kristo sa Gingharian.

Nagpalandong bahin sa dakong pag-antos ug masakit nga kamatayon nga naghulat kaniya, si Jesus mipadayon: “Ug karon naguol ang akong kalag, ug unsa may akong igaingon? Amahan, luwasa ako gikan niining taknaa.” Kon malikayan pa lang unta kanang naghulat kaniya! Apan, dili, kay siya miingon: “Niining maong tuyo nahiabot ako niining taknaa.” Si Jesus nahiuyon sa bug-os nga kahikayan sa Diyos, apil ang iyang kaugalingon sinakripisyong kamatayon. Mateo 21:12, 13, 18, 19; Marcos 11:12-18; Lucas 19:45-48; Juan 12: 20-27.

◆ Nganong nagdahom si Jesus nga makakita ug bunga sa igira bisan dili pa kini tempo niini?

◆ Nganong gitawag ni Jesus kadtong nanagpamaligya sa templo nga “mga tulisan”?

◆ Sa unsang paagi sama si Jesus sa lugas sa trigo nga namatay?

◆ Unsay gibati ni Jesus bahin sa pag-antos ug kamatayon nga naghulat kaniya?