Ang Ipasabot sa mga Balita

Ang Pagkaadunay Bibliya Dili Igo

Ang dili pa dugay nga pagtuon nakakaplag nga tali sa mga tawo nga dunay mga Bibliya, katunga miingon nga wala gayod sila makabasa niini. Apil niini ang daghang kinsa nagpaila sa ilang kaugalingon ingong born-again nga mga Kristohanon. Duolan sa 30 porsiento sa nangangkong mga Kristohanon nga gisurbi wala mahibalo nga si Jesus natawo sa Bethlehem. Sumala pa sa The Detroit News, “disiotso porsiento mitubag ug Jerusalem, samtang 8 porsiento miingon ug Nazareth.” Si George Barna, nangulo sa grupo nga nagsurbi, miingon: “Kon sila walay kahibalo mahitungod sa paninugdang mga butang sama niini, sa unsang paagi malaoman sila nga batid nga makahisgot sa unod sa Kasulatan sa usa ka dili-magtutuo o sa pagkinabuhi sa paagi nga uyon sa biblikanhong mga prinsipyo?”

Si apostol Pablo nakamatikod ug samang kahimtang diha sa uban nga dunay “kasibot sa Diyos; apan dili sumala sa tukmang kahibalo.” Iyang gihisgotan usab nga pipila nga dunay “kinaugalingon nga porma sa pagsimba ug salingkapaw nga pagpahiubos” ug mitagna nga ang “kataposang mga adlaw” pagatiman-an sa presensiya niadtong “adunay usa ka porma sa diyosnong debosyon apan nagapanghimakak sa gahom niini.” (Roma 10:2; Colosas 2:23; 2 Timoteo 3:1-5) Ang tinuod nga mga Kristohanon, hinunoa, may hataas nga pagtamod sa Pulong sa Diyos. Sila nahibalo nga ang pagpanag-iya ug Bibliya dili igo. Apan, sila sa bug-os kasingkasing nagasunod sa mga sugo niini sa “pagtinguha sa walay sambog nga gatas nga iya sa pulong.”​—1 Pedro 2:2.

Giyanon sa Pagkadaotan

Ang usa sa mga bahin nga gilista ni Jesu-Kristo ingong bahin sa “ilhanan” sa kataposang mga adlaw niining sistema sa mga butang mao “ang pagsanay sa pagkadaotan.” (Mateo 24:3, 12) Ang pag-abuso sa droga dunay dramatikong impluwensiya sa pagdaghan sa pagkadaotan karong adlawa. Pananglitan, ang peryodikong The Sydney Morning Herald sa Australia mitaho nga pito gikan sa napulo ka krimen nga nahimo sa New South Wales nalangkit sa droga, ug duolan sa 85 porsiento sa mga armadong pagpangawat sa estado nahimo sa mga tiggamit ug heroina. Ug ang suliran sa pag-abuso sa droga nagkadako.

Ang U.S.News & World Report nag-ingon nga “walay dapit sa Uropa nga dili-madutlan gikan sa hampak.” Sa Unyong Sobyet, ang gidaghanon sa mga tig-abuso sa droga gibanabana nga minilyon. Diha sa nawad-ag paglaom nga pagsulay sa pagpukgo sa hilig sa pag-abuso sa droga, ang kagamhanang Sobyet nagbukas ug mga negosasyon uban sa mga ahensiya sa tigpatuman sa balaod maylabot sa droga sa 25 ka nasod. Apan, ang mga paglaom nga makab-ot sa mga kagamhanan ang maong mga tumong daw dili-realistiko tungod sa mga taho nga ang mga ganansiya gikan sa droga gigamit sa pagpadunot sa mga polis, sa mga magsusumbong, ug bisan sa mga huwes. Miingon ang usa ka nawad-ag paglaom nga opisyal sa kagamhanan: “Walay kuwerpo sa kapolisan sa kalibotan ang milampos sa paghunong sa suplay [sa mga droga] nga mihampak sa kadalanan.” Siya midugang: “Makaguol kini tungod kay wala gayoy mga sulosyon ang gihatag.”

Kining mga pulonga makapahinumdom sa tagna ni Jesus mahitungod sa kataposang mga adlaw. Siya mitagna nga niining panahona ang ‘mga tawo panguyapan tungod sa kalisang, walay nahibaloang kasulbaran.’​—Lucas 21:25, 26.

Si Jesus ug ang Politika

Ang ulohan sa balita sa The Star sa Johannesburg, usa ka peryodiko sa Habagatang Aprika, mabasa: “Gibutyag sa Katolikong Iglesya ang Pastoral nga Plano Alang sa HA.” Ang plano mao ang “pagpatungha sa gingharian sa Diyos” sa Habagatang Aprika pinaagi sa “usa ka hugot nga pagsulay sa iglesya sa pagwagtang sa rasanhong pagpihig.” Aron makab-ot kining tumonga, si Jude Pieterse, sekretaryo-heneral sa South African Catholic Bishops Conference, nagaingon nga ang iglesya nagapangayog pagpaluyo sa ubang mga iglesya ug sa “tanang matang sa katilingban sa Habagatang Aprika.” Apan, nagtuo ang ubang mga Katoliko nga ang plano maoy usa ka “laraw sa mga Obispo sa paghimo sa mga Katoliko nga mga aktibista sa politika,” matud pa sa obispo sa Johannesburg, si Reginald Orsmond. Samtang miadmiter si Pieterse nga ang plano dunay kalabotan sa politika, si Orsmond miingon nga dili kini “bag-o” kondili kini “sama ra katigulanga ni Jesus mismo.”

Sa pagkamatuod, si Jesu-Kristo dili gayod motultol sa iyang mga disipulo sa paghimong mga aktibista sa politika. Sa dihang gipangutana ni Poncio Pilato, si Jesus lig-ong mitubag: “Ang akong gingharian dili bahin niining kalibotana.” (Juan 18:36) Lain pa, kapin sa tulo ka milyong mga Saksi ni Jehova nagapahimulos sa panaghiusa sa rasa sa ilang taliwala tungod kay sila nagkinabuhi sumala sa kang Jesus nga ‘bag-ong sugo, nga sila maghigugmaay sa usa ug usa; sama sa paghigugma ni Jesus kanila.’​—dili lamang diha sa Habagatang Aprika, kondili sa tibuok-kalibotan!​—Juan 13:34.