“Ang Maayong Balita Kinahanglang Igawali Una”

Gawas pa, ang maayong balita kinahanglang igawali una sa tanang kanasoran.”—MARCOS 13:10.

1. Unsa ang usa ka butang nga nakapalahi sa mga Saksi ni Jehova gikan sa tanang relihiyon sa Kakristiyanohan, ug ngano?

SA TANANG nagaangkong Kristohanon, mga Saksi ni Jehova lamang ang nagaisip nga ugdang sa pagwali sa maayong balita. Sila nahimong bugtong pundok diin gibati sa matag membro sa personal nga obligasyon ang pagduol sa regular sa iyang silingan aron makigsulti kaniya mahitungod sa mga katuyoan sa Diyos. Ngano man kini? Tungod kay gibati sa matag Saksi nga, ingong Kristohanon, siya kinahanglang sumusunod sa lakang ni Kristo. (1 Pedro 2:21) Unsay gipasabot niini?

2. Unsay pag-isip sa daghang tawo kang Jesu-Kristo, apan unsa ang iyang pangunang buluhaton sa yuta?

² Sa kaisipan sa kadaghanan, si Jesu-Kristo maoy usa lamang ka tawo nga nagbuhat sa maayong mga binuhatan. Giayo niya ang masakiton, gipakaon ang gigutom, ug gipakita ang gugma ug kalulot sa mga kabos. Apan labaw pa ang gibuhat ni Jesus. Siya una sa tanan usa ka madasigong magwawali sa maayong balita sa Gingharian sa Diyos. Pila ka bulan tapos sa pagbawtismo kaniya sa subang Jordan, si Jesus misugod sa pagwali sa dayag: “Paghinulsol kamo, tungod kay haduol na ang gingharian sa mga langit.” (Mateo 4:17) Ang asoy ni Marcos nagaingon: “Si Jesus miadto sa Galilea, nga nagwali sa maayong balita sa Diyos ug nag-ingon: ‘Natuman na ang tinudlong panahon, ug haduol na ang gingharian sa Diyos. Maghinulsol kamo, kamong katawhan, ug magtuo sa maayong balita.’”—Marcos 1:14, 15.

3, 4. (a) Bisan pag giayo ni Jesus ang tanang matang sa sakit, unsay iyang gipasiugda sa iyang ministeryo? (b) Nganong si Jesus gipadala man? (c) Gipanig-ingon ni Jesus sa unsa ang iyang buluhatong pagwali, ug unsay iyang giingon sa iyang mga tinun-an nga pagabuhaton?

³ Gitawag ni Jesus si Pedro, Andres, Santiago, ug Juan sa pagsunod kaniya, ug atong mabasa: “Unya iyang gilibot ang tibuok nga Galilea, nga nagtudlo sa ilang mga sinagoga ug nagwali sa maayong balita sa gingharian ug nag-ayo sa tanang matang sa sakit ug tanang matang sa kaluyahon sa mga tawo.” Sa gisulayan sa mga panon sa Galilea nga hawiran siya, siya miingon: “Kinahanglang igawali ko usab sa ubang siyudad ang maayong balita sa gingharian sa Diyos, tungod kay alang niini ako gipadala.” Dayon siya miwali sa mga sinagoga sa Judea.—Mateo 4:18-23; Lucas 4:43, 44.

⁴ Sa pagbalik na usab sa Galilea, si Jesus “mipanaw gikan sa siyudad ngadto sa siyudad ug gikan sa balangay ngadto sa balangay, nga nagwali ug nagpahayag sa maayong balita sa gingharian sa Diyos.” (Lucas 8:1) Iyang gipakasama ang iyang buluhaton sa pagwali ngadto sa pagpangani ug miingon: “Dako ang alanihon, apan diyutay ra ang mga mangangani. Busa, hangyoa ang Agalon sa alanihon sa pagpadalag mga mangangani sa iyang alanihon.” (Mateo 9:35-38) Bisan pag ang mga panon wala maghatag kaniyag pahulay, “siya midawat kanilang maluluton ug nakigsulti kanila mahitungod sa gingharian sa Diyos, ug siya nag-ayo niadtong kinahanglan nga pagaayohon.”—Lucas 9:11.

5. Dihang gipadala ni Jesus ang iyang mga apostol ug ubang tinun-an alang sa ministeryo, unsang mga instruksiyon ang iyang gihatag kanila?

⁵ Matuod, giayo ni Jesus ang mga masakiton ug may panahong gipakaon ang mga gigutom. Apan labaw sa tanan, siya puliki sa pagpahayag ngadto sa mga tawo mahitungod sa Gingharian sa Diyos. Ug buot niyang buhaton kana sa iyang mga sumusunod. Kay nabansay na ang iyang mga apostol, iyang gipadala sila nga tinagurha sa pagwali, nga nag-ingon: “Samtang kamo manglakaw, magwali kamo, nga magaingon, ‘Ang gingharian sa mga langit haduol na.’” (Mateo 10:7) Si Lucas nag-ingon: “Iyang gipadala sila sa pagwali sa gingharian sa Diyos ug sa pagpang-ayo.” (Lucas 9:2) Sa 70 ka tinun-an, gihatag usab ni Jesus ang sugo sa ‘pag-ayo sa mga masakiton ug sa pagpadayon sa pagpahayag kanila nga ang gingharian sa Diyos haduol na.’—Lucas 10:9.

6. Una mokayab sa langit, unsang mga instruksiyong maylabot sa ilang ministeryo ang gihatag ni Jesus sa iyang mga sumusunod?

⁶ Una mokayab sa langit, gisugo ni Jesus ang iyang mga sumusunod nga ipadayon ug pauswagon pa ang buluhatong pagwali. Iyang gisugo sila: “Busa panlakaw kamo ug paghimog mga tinun-an sa mga tawo sa tanang kanasoran . . . nga magatudlo kanila sa pagbantay sa tanang butang akong gisugo kaninyo.” (Mateo 28:19, 20) Dugang pa, siya miingon: “Kamo magadawat ug gahom sa dihang kamo kakunsaran sa balaang espiritu, ug kamo mahimong akong mga saksi sa Jerusalem ug sa tibuok Judea ug Samaria ug sa kinalay-ang bahin sa yuta.” (Buhat 1:8) Busa, si Jesus ug ang iyang mga apostol naghatag ug unang pagtagad sa pagwali sa maayong balita sa Gingharian sa Diyos.

Ang Gingharian Igawali sa Atong Panahon

7. Unsay giingon ni Jesus mahitungod sa buluhatong pagwali nga pagahimoon sa “konklusyon sa sistema sa mga butang”?

⁷ Sa iyang tagna bahin sa mga hitabo nga mahitabo sa “konklusyon sa sistema sa mga butang,” si Jesus miingon: “Ug kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang kanasoran; ug unya moabot ang kataposan.” (Mateo 24:3, 14) O, sumala sa gipahayag sa Marcos 13:10: “Gawas pa, ang maayong balita kinahanglang igawali una sa tanang kanasoran.”—Tan-awa usab ang Pinadayag 14:6, 7.

8. (a) Unsay naapil sa maayong balita sa panahon sa mga apostol? (b) Unsay naapil sa mensahe sa maayong balita karong adlawa?

⁸ Sa “kataposang mga adlaw,” labaw ang malangkit sa maayong balita sa Gingharian kay sa panahon nga dinhi si Jesus sa yuta. Si Jesus nagwali nga haduol na ang Gingharian, nga nagpaila sa kamatuorang siya diha taliwala sa katawhan ingong Mesiyas ug Hari. (2 Timoteo 3:1; Mateo 4:17; Lucas 17:21) Ang maayong balita nga giwali sa unang mga Kristohanon nag-apil sa pagkabanhaw ug pagkayab ni Jesus sa langit, ug kadto nagdasig sa mga maaghop sa pagtuo sa umaabot nga Gingharian. (Buhat 2:22-24, 32; 3:19-21; 17:2, 3; 26:23; 28:23, 31) Karon nga kita nakadangat sa “konklusyon sa sistema sa mga butang,” ang pagwali sa maayong balita sa Gingharian nagaapil sa talagsaong mensahe nga ang Gingharian natukod na sa mga langit.—Pinadayag 11:15-18; 12:10.

Kinsa ang Magawali sa Maayong Balita?

9. (a) Sa unsang paagi ang pipila tingali mangatarongang ang pagwali sa maayong balita dili obligasyon sa tanang Kristohanon karong adlawa? (b) Kinsay gigamit ni Jehova sa nangagi sa pagwali sa iyang pulong, ug unsay kahulogan niini alang kanato karong adlawa?

⁹ Kinsa, karong adlawa, ang kinahanglang makig-ambit sa buluhatong pagwali? Dayag, gibati sa Kakristiyanohan nga kini dili obligasyong alang sa tanan, ug tinuod nga dihang si Jesus miingon nga igawali ang maayong balita, siya wala magtino kon kinsay mobuhat sa buluhaton. Apan, kinsa pa man diay ang gamiton ni Jehova alang sa maong buluhaton kondili kadtong nagtuo sa iyang Pulong ug nagpadapat niana sa ilang mga buhi? Sa mihukom si Jehova sa mga adlaw ni Noe nga pasidan-an ang daotang kalibotan sa katawhan mahitungod sa umaabot nga kalaglagan, iyang gigamit ang usa ka tawo nga “naglakaw uban sa matuod nga Diyos.” (Genesis 6:9, 13, 14; 2 Pedro 2:5) Sa dihang buot niyang ipahayag ang matagnaong mga mensahe ngadto sa Israel, iyang gipadala ang ‘iyang mga alagad, ang mga manalagna.’ (Jeremias 7:25; Amos 3:7, 8) Ang dedikadong nasod sa Israel nahimong nasod sa iyang mga saksi. (Exodo 19:5, 6; Isaias 43:10-12) Oo, gigamit ni Jehova ang iyang dedikadong mga alagad ingong iyang mga saksi.

10. Sa unsang paagi atong masabot gikan sa pagkahan-ay sa mga pulong sa Mateo 28:19, 20 nga ang sugo sa paghimog mga tinun-an mapadapat sa tanang Kristohanon?

¹⁰ Ang pipila nag-ingon nga ang sugo sa paghimog mga tinun-an, nga gihatag sa Mateo 28:19, 20, gihatag lamang ngadto sa mga apostol ug busa dili mapadapat sa Kakristiyanohan sa katibuk-an. Apan matikdi ang giingon ni Jesus: “Busa panglakaw kamo ug paghimog mga tinun-an sa katawhan sa tanang kanasoran . . . nga magatudlo kanila sa pagbantay sa tanang butang akong gisugo kaninyo.” Ang mga sumusunod ni Jesus kinahanglang magtudlo sa bag-ong mga tinun-an sa pagbantay sa tanang butang gisugo ni Jesus. Ug usa sa mga butang iyang gisugo mao nga ‘panglakaw kamo ug paghimog mga tinun-an.’ Tino, ang tanang bag-ong tinun-an kinahanglang tudloan sa pagsunod niining linain usab nga sugo.

11. (a) Unsang obligasyon ang nahipatong sa Kristohanong kongregasyon sa unang siglo? (b) Unsay gikinahanglan aron ang usa mamaluwas, ug unsay naapil niini?

¹¹ Ang Kristohanong kongregasyon sa unang siglo gitawag ‘katawhan sa Diyos alang sa linaing pagpanag-iya aron ilang igapahayag sa bisan diin ang mga kahalangdon sa usang nagtawag kanila gikan sa kangitngitan nganha sa iyang kahibulongang kahayag.’ (1 Pedro 2:9) Ang mga membro niini madasigong nagpamatuod sa Gingharian sa Diyos. (Buhat 8:4, 12) Ang tanang “mga balaan,” ang dinihogang mga Kristohanon, sa Roma gisultihan nga “pinaagi sa baba ang usa nagapahayag sa dayag alang sa kaluwasan” ug nga “ang tanan nga magatawag sa ngalan ni Jehova mamaluwas.” (Roma 1:7; 10:9, 10, 13) Kining dayag nga pagpahayag alang sa kaluwasan, nga ipahayag sa panahon sa pagbawtismo sa usa, nagaapil usab sa dayag nga pagwali sa maayong balita sa Gingharian ni Jehova.

12, 13. (a) Unsay naapil sa “dayag nga pagpahayag sa atong paglaom” nga gihisgotan sa Hebreohanon 10:23? (b) Sa unsang paagi gipakita sa Salmo 96 ang panginahanglan sa dayag nga pagmantala sa gawas sa kongregasyon, ug sa unsang paagi gipaluyohan kini sa Pinadayag 7:9, 10?

¹² Si apostol Pablo misulat ngadto sa Hebreohanong mga Kristohanon: “Atong pangusgan sa pagkupot ang dayag nga pagpahayag sa atong paglaom nga walay pagkatarog, kay matinumanon siya nga nagsaad.” (Hebreohanon 10:23) Kining dayag nga pagpahayag dili limitado sa mga tigom sa kongregasyon. (Salmo 40:9, 10) Sa Salmo 96:2, 3, 10 tin-aw natong masabtan ang usa ka matagnaong sugo sa pagwali sa gawas sa kongregasyon, ngadto sa kanasoran, niining mga pulonga: “Imantala ang maayong balita sa iyang kaluwasan sa adlaw-adlaw. Ipahayag ang iyang himaya sa taliwala sa kanasoran, sa taliwala sa tanang mga katawhan ang iyang kahibulongang mga buhat. Isugilon sa taliwala sa kanasoran: ‘Si Jehova mismo nahimong hari.’” Sa pagkamatuod, sa Mateo 28:19, 20 ug Buhat 1:8, gisugo ni Jesus ang mga Kristohanon sa pagwali sa kanasoran.

¹³ Kining publiko o dayag nga pagwali gitumong sa dugang mga pulong ni Pablo ngadto sa dinihogang Hebreohanong mga Kristohanon: “Pinaagi kaniya atong itanyag sa Diyos sa kanunay ang usa ka halad sa pagdayeg, nga mao, ang bunga sa mga ngabil nga nagahimog dayag nga pagpahayag sa iyang ngalan.” (Hebreohanon 13:15) Sa basahong Pinadayag, ang “dakong panon,” nga gitigom gikan sa tanang kanasoran, makita usab nga nagasinggit uban sa makusog nga tingog: “Nautang namo ang kaluwasan sa among Diyos, nga nagalingkod sa trono, ug sa Kordero.” (Pinadayag 7:9, 10) Busa, niining panahon sa konklusyon sa sistema sa mga butang, ang pagwali sa maayong balita gihimo sa dedikadong mga Saksi ni Jehova, ang nahibilin sa espirituwal nga mga igsoon ni Kristo ug sa ilang samag-karnerong mga kauban nga naglangkob sa “dakong panon.” Apan sa unsang paagi ilang pagabuhaton kining buluhatona?

“Sa Dayag ug sa Balay-balay”

14. Diin himoa ni Jesus ang iyang pagwali, ug unsang prinsipyoha ang atong makat-onan gikan niini?

¹⁴ Si Jesus nagwali sa laktud sa mga tawo. Pananglitan, atong mabasa nga siya nagwali sa mga sinagoga. Ngano? Tungod kay ang mga tawo nagtigom didto sa Igpapahulay ug nagpatalinghog sa pagbasa ug paghisgot sa Kasulatan. (Mateo 4:23; Lucas 4:15-21) Si Jesus nagwali usab sa mga tawo sa daplin sa dalan, sa baybayon, sa bakilid, sa usa ka atabay sa gawas sa siyudad, ug sa mga balay. Sa bisan diing may mga tawo, si Jesus nagwali ngadto kanila.—Mateo 5:1, 2; Marcos 1:29-34; 2:1-4, 13; 3:19; 4:1, 2; Lucas 5:1-3; 9:57-60; Juan 4:4-26.

15. (a) Unsang mga instruksiyon ang gihatag ni Jesus sa iyang mga tinun-an dihang iyang gipadala sila aron sa pagwali? (b) Giunsa pagtin-aw kini sa pila ka komentarista sa Bibliya?

¹⁵ Sa gipadala ni Jesus ang iyang mga tinun-an sa pagwali, sa laktud iyang gipadala usab sila ngadto sa mga tawo. Kini makita diha sa iyang mga instruksiyon nga nahitala sa Mateo 10:1-15, 40-42. Sa bersikulo 11 siya mipahayag: “Sa bisan unsang siyudad o balangay nga inyong adtoan, pangitaa ninyo diha niana kon kinsa ang takos, ug puyo kamo dinha hangtod sa inyong pagpahawa.” Ang The Jerusalem Bible nagahubad niining bersikuloha: “Pangutana kamo alang sa usa nga kasaligan,” nga daw ang mga tinun-an mangutana sa usa ka inila o nahibalong tawo sa balangay sa pagsusi kon kinsa ang may maayong dungog ug sa ingon takos sa mensahe. (Tan-awa usab ang Weymouth ug King James Version.) Ug kini ang katin-awang ginahatag sa pila ka komentarista sa Bibliya sa bersikulo 11.

16. Unsang mas dili-madapigong pagpalandong sa mga pulong ni Jesus sa Mateo 10:11 ang nagapaila sa unsang paagi pangitaon sa mga apostol ang mga tawong takos?

¹⁶ Bisan pa niana, angay ibutang sa hunahuna nga sa kinadak-ang bahin, ang mga teologo sa Kakristiyanohan dili mamalaybalay, ug daghang komentarista sa Bibliya lagmit magahubad sa Kasulatan sumala sa ilang kaugalingong kasinatian. Ang mas dili-madapigong pagpalandong sa instruksiyon ni Jesus nagapailang siya naghisgot nga ang iyang mga tinun-an mangita sa mga tawo sa tinagsatagsa, sa balay-balay kaha o sa publiko o sa dayag, ug itanyag kanila ang mensahe sa Gingharian. (Mateo 10:7) Ang ilang pagsanong magpaila kon kaha sila takos o dili.—Mateo 10:12-15.

17. Unsay nagapamatuod nga ang mga tinun-an ni Jesus wala lamang magduaw sa mga tawong takos pinasukad sa sugyot o pakigsabot?

¹⁷ Kini makita sa mga pulong ni Jesus sa Mateo 10:14: “Sa dihang kamo dili pagadawaton o patalinghogan ang inyong mga pulong, itaktak ang abog sa inyong mga tiil inigpahawa ninyo sa maong balay o siyudad.” Si Jesus naghisgot bahin sa paghimo sa iyang mga tinun-an sa wala-dapitang mga pagduaw sa mga tawo aron sa pagwali kanila. Tinuod, makapuyo usab sila sa usa sa mga panimalay nga modawat sa mensahe. (Mateo 10:11) Apan ang pangunang butang mao ang buluhatong pagwali. Sa Lucas 9:6 kini gipahayag: “Unya nanglakaw sila ug nangadto sa teritoryo sa kabalangayan, nga nagpahayag sa maayong balita ug naghimog mga pagpang-ayo sa bisan diin.” (Tan-awa usab ang Lucas 10:8, 9.) Ang mga tawong takos nga nagdawat sa mga tinun-an sa ilang mga balay ingong mga manalagna, nga tingali naghatag kanilag “usa ka tasang bugnaw nga tubig” o bisan puy-anan, dili mawad-an sa ilang balos. Ilang madungog ang mensahe sa Gingharian.—Mateo 10:40-42.

18, 19. (a) Sumala sa Buhat 5:42, giunsa pagbuhat sa unang mga Kristohanon ang ilang buluhatong pagwali? (b) Sa unsang paagi ang mga pulong ni Pablo sa Buhat 20:20, 21 nagapakitang siya naghisgot sa ministeryo ngadto sa mga dili-magtutuo, dili sa internal nga buluhaton sa pagkamagbalantay?

¹⁸ Sa pagkatukod sa Kristohanong kongregasyon, atong mabasa mahitungod sa mga apostol: “Ug sa matag adlaw sa templo ug sa balay ngadto sa balay sila nagpadayong walay hunong sa pagpanudlo ug sa pagpahayag sa maayong balita mahitungod kang Kristo, si Jesus.” (Buhat 5:42; tan-awa ang potnot sa Reference Bible.) Ang ekspresyon diha sa Gregong gihubad “sa balay ngadto sa balay” maoy kat’ oiʹkon. Dinhi ang ka·taʹ anaa sa diwang nagapanagtag o distributive sense. Busa, ikaingong ang pagwali sa mga tinun-an napanagtag sa balay ngadto sa balay. Sila wala maghimo lamang ug gihikay-daang sosyal nga mga duaw. Ang susamang paggamit sa ka·taʹ hikaplagan sa Lucas 8:1 sa ekspresyong “sa siyudad ngadto sa siyudad ug sa balangay ngadto sa balangay.”

¹⁹ Ang samang ekspresyong anaa sa plural, kat’ oiʹkous, gigamit ni apostol Pablo sa Buhat 20:20. Dinha siya nagpahayag: “Ako wala magpugong sa . . . pagpanudlo kaninyo sa dayag ug sa balay ngadto sa balay.” Ang ekspresyong “sa balay ngadto sa balay” gihubad “diha sa inyong mga balay” sa pila ka hubad. Mao nga ang pila ka komentarista sa Bibliya sa Kakristiyanohan nagaingong si Pablo nagatumong dinhi sa mga pagduaw sa magbalantay sa mga balay sa mga magtutuo. Apan ang sunod nga mga pulong ni Pablo nagapakitang siya naghisgot mahitungod sa ministeryo ngadto sa mga dili-magtutuo, kay siya nagaingon: “Apan ako bug-os nagpamatuod sa mga Hudiyo ug sa mga Grego mahitungod sa paghinulsol ngadto sa Diyos ug pagtuo sa atong Ginoong Jesus.”—Buhat 20:21.

20. (a) Sa unsang gidak-on ang mga Saksi ni Jehova nagwali sa maayong balita sa Gingharian sa atong panahon? (b) Sa unsang paagi tingali isipon sa pipila ang pagpadayon sa pagwali?

²⁰ Busa kining metodo sa pag-abot sa mga tawo angay gamiton sa atong panahon dihang ang “maayong balita sa gingharian” kinahanglang “igawali sa tibuok gipuy-ang yuta alang sa usa ka pamatuod sa tanang kanasoran.” (Mateo 24:14) Sa kapin ug 65 ka tuig, ang mga Saksi ni Jehova madasigong nagwali sa maayong balita sa natukod nga Gingharian sa Diyos sa dayag ug sa balay ngadto sa balay—karon diha sa kapin ug 210 ka kayutaan. Pagkadako sa pamatuod nga ginahatag! Ug kini bisan pa sa kamatuorang ang kadaghanang tawo karong adlawa nagapatalinghog sa mensahe nga “walay pagsanong,” nga ang pipila mapikal pa. (Mateo 13:15) Nganong ang mga Saksi ni Jehova mopadayon sa pagwali sa mga dapit diin ang mga tawo dili magpatalinghog o mosupak pa kanila? Kining pangutanaha pagahisgotan sa sunod artikulo.

Unsay Imong Tubag?

◻ Unsay ginapadayag sa Kasulatan nga maoy nagtimaan sa ministeryo ni Jesus?

◻ Unsay gihatag nga mga pahimangno ngadto sa mga apostol sa ilang ministeryo?

◻ Unsang buluhaton ang pagabuhaton sa atong panahon, ug ngano?

◻ Kinsay gamiton ni Jehova sa pagwali sa maayong balita sa atong adlaw?

◻ Diin ug sa unsang paagi pagahimoon ang buluhatong pagwali?