Pagpakighan-ay Uban sa mga Naghupot sa Integridad Kang Jehova

“Alang kanako, ako magalakaw sa akong katarong. . . . Taliwala sa nagkatigom nga mga panon akong pagadayegon si Jehova.”​—SALMO 26:11, 12.

NIADTONG 1985, may 189,800 ka tawo nga nabawtismohan sa pagpasimbolo sa ilang pahinungod kang Jehova ingong iyang Kristohanong mga saksi. Kana maoy aberids nga 520 sa matag adlaw. Sa unsang paagi kanang tanang tawo nakahimo sa ilang desisyon sa pagpabawtismo? Mitambong ba sila sa mga tigom sa masa, namati sa usa ka emosyonal nga magwawali, ug dayon mihimog emosyonal nga desisyon dapig kang Kristo? Kana ang paagi sa pag-obra sa pila ka Protestante ug Ebanghelikal nga relihiyon. Apan kana ba ang paagi nga nabatonan ni Kristo ang mga sumusunod?

1, 2. (a) Sa unsang paagi nabatonan sa pila ka relihiyon sa Kakristiyanohan ang mga sumusunod? (b) Unsang paagi sa pagtudlo ang gigamit ni Jesus? (Mateo 11:28-30)

² Kon susihon natog maayo ang publikong pagpanudlo ni Jesus, atong hikaplagang wala niya maneobraha ang mga emosyon. Pananglitan, gidani ba niya ang iyang mamiminaw pinaagi sa mga koro ug pag-awit? O gigamit ba niya ang kleber nga sikolohiya sa pag-ugmad sa pagbati sa sala diha sa iyang mamiminaw ug dayon pakuoton sila sa ilang mga bulsa? Sa kaatbang, ang iyang paagi sa pagtudlo mao ang pagpahunahuna ug pagpapangatarongan sa mga tawo. Sanglit ang kadaghanan sa mga naminaw kaniya maoy mga Hudiyo, sila may kahibalo na sa Hebreohanong Kasulatan. Iyang gipahinabo nga sila mangatarongan pinasukad sa ilang daang kahibalo ug dayon nakaila nga siya ang Mesiyas.​—Mateo, kapitulo 5-7; Lucas 13:10-21.

3. Nganong nahibalo kita nga si Pablo wala lamang magpukaw sa mga emosyon sa iyang pagpanudlo?

³ Sa susama, si Pablo, bisan tuod giisip sa pipila nga kulang ug abilidad sa pagpahayag, midani sa katakos sa pagpangatarongan. (Buhat 20:7-9; 2 Corinto 10:10; 11:6) Siya misulat: “Ako nagahangyo kaninyo pinaagi sa mga kaluoy sa Diyos, mga igsoon, sa pagtanyag sa inyong mga lawas ingong usa ka halad nga buhi, balaan, dalawaton sa Diyos, usa ka balaang pag-alagad uban ang inyong gahom sa pangatarongan. . . . Magbag-o kamo pinaagi sa pagbag-o sa inyong hunahuna [“aron mausab ang inyong bug-os nga tinamdan sa hunahuna,” Phillips], aron kamo makapamatuod sa inyong kaugalingon sa maayo ug dalawaton ug hingpit nga kabubut-on sa Diyos.”​—Roma 12:1, 2.

4. Una mabawtismohan ang usa ka tawo ingong usa ka Saksi ni Jehova, unsang mga lakang ang iyang pagahimoon?

⁴ Sa susama karong adlawa, kadtong mabawtismohan maoy mga tawong nakatuon sa Kasulatan ug nakapangatarongan pag-ayo niana una mokuha sa ugdang nga lakang sa bawtismo, o bug-os nga pagtuslob sa tubig. (Buhat 17:11, 12) Ang ilaha dili kay dinalidali, emosyonal nga desisyon. Sa kaatbang, una madawat alang sa bawtismo, sila regular nga nagtambong sa Kristohanong mga tigom uban ang hunahuna sa pagbaton ug tukmang kahibalo kang Jehova nga Diyos ug sa iyang mga katuyoan pinaagi kang Kristo Jesus. (Hebreohanon 10:25) Sila regular nga nagbuhat usab sa Kristohanong ministeryo, nga nakig-ambit sa maayong balita sa Gingharian sa uban. (Buhat 5:42; 1 Corinto 9:16) Unya, sa kataposang mga semana una sa ilang bawtismo, ilang nasubli pag-ayo uban sa nagkalainlaing mga ansiano sa kongregasyon ang kapin sa 120 ka pangutana mahitungod sa Kristohanong pagtulon-an ug kagawian, ingon man nakahisgot sa ginatosgatos ka suportar nga teksto sa Bibliya​—kining tanan maoy aron sila mahimong inuyonang mga naghupot sa integridad una pa sa ilang bawtismo.​—Buhat 8:34-36.a

Ang Kalainan nga Himoon sa Bawtismo

5. Uban sa unsang dalan sa kagawian nga ang usa ka tawo mailhan pinaagi sa bawtismo?

⁵ Unsay mahimo sa usa ka tawo pinaagi sa pagpabawtismo? Una sa tanan, iyang ginapaila nga siya uban sa labing dakong tighupot sa integridad nga sukad nakalakaw sa yuta​—si Kristo Jesus. Siya mismo mihatag sa panig-ingnan pinaagi sa pagpabawtismo sa dihang siya mga 30 anyos sa edad. (Lucas 3:21-23) Sa ulahi iyang gisugo ang iyang mga sumusunod sa pagtudlo ug pagbawtismo sa tibuok kalibotan. (Mateo 28:19, 20) Apan gipasabot ba niyang ang iyang mga tinun-an magbawtismo nga walay pili, nga walay pagtagad sa ilang presenteng kagawian?

6, 7. (a) Unsa ang gikinahanglan sa usa ka matuod nga sumusunod ni Kristo? (b) Unsay ipasabot sa pagkabalaan?

⁶ Si apostol Pedro mitanyag sa hustong punto de vista sa misulat siya: “Magbalaan kamo sa tanan ninyong kagawian, tungod kay nahisulat: ‘Magbalaan kamo, tungod kay ako balaan.’” (1 Pedro 1:15, 16) Karon, alang sa usa ka dedikadong Kristohanon, unsay ipasabot nga mahimong “balaan”?

⁷ Sumala sa Expository Dictionary of New Testament Words ni W. E. Vine, ang Gregong pulong haʹgi·os (gihubad nga “balaan”) “sa panguna nagpasabot nga separado . . . ug busa, sa Kasulatan diha sa moral ug espirituwal nga kahulogan, separado o bulag sa sala ug busa konsagrado ngadto sa Diyos.” Ang laing Gregong eskolar nag-ingon nga “kini maoy pagkasama sa Diyos sa kinaiya.” Ang maong pagsabot nagapahamtang ug hataas nga sukdanan niadtong magpabawtismo ingong matuod nga mga Kristohanon. Kini ang sukdanan sa integridad, ug ang integridad maoy ‘lig-ong pagsunod sa kalagdaan sa moral nga mga prinsipyo’​—ug sa kahimtang sa Kristohanon, sa mga prinsipyo ni Kristo.​—Juan 17:17-19; 18:36, 37.

8. (a) Unsang mga sukdanan ang naglungtad sa unang Kristohanong kongregasyon mahitungod sa kagawian? (b) Gisunod ba sa Kakristiyanohan ang maong mga sukdanan? Paghatag ug mga pananglitan gikan sa lokal nga mga hitabo.

⁸ Ang matuod Kristohanong kongregasyon kanunayng moinsistir bahin sa pagkamatarong o integridad, pinaagi sa paghupot ug mahinlo nga organisasyon. Sa ingon si Pablo nagsugo sa unang mga Kristohanon nga “hunong na kamo sa pagpakig-uban kang bisan kinsa nga gitawag nga igsoon nga usa ka makihilawason o tawong dalo o tigsimbag diyosdiyos o mapanamastamason o palahubog o tikasan, nga dili gani makigsalo sa maong tawo. . . . ‘Kuhaa ang tawong daotan gikan sa inyong taliwala.’” (1 Corinto 5:9-13; 2 Juan 10, 11) Gipadapat ba sa klero kanang hataas nga sukdanan sa pagkamatarong nganha sa ilang mga panon? Ginadawat sa Kakristiyanohan​—ingon kahang pasibo o aktibong mga membro​—ang katawhang regular nagabuhat sa tanang matang sa dakong sala ug krimen. Ang mga prinsipyo sa Bibliya dili motugot sa maong pagkamatugoton.​—Itandi ang Jeremias 8:5, 6, 10.

9. Unsay magadani sa daghang tawo ngadto sa pagpahinungod ug bawtismo?

⁹ Tungod ilabina niining hataas nga sukdanan taliwala sa mga Saksi ni Jehova, kadtong nahigugma sa kamatuoran ug pagkamatarong nadani sa pagpahinungod sa ilang kaugalingon ngadto sa Soberanong Ginoo sa uniberso, si Jehova nga Diyos. (Habacuc 3:18, 19) Ilang nakita ang tin-aw nga kalainan tali sa kagawian sa kalibotanong mga relihiyon ug ang iya sa mga Saksi ni Jehova. Matuod, ang kinabag-an sa katawhan dili moangay sa maputli nga pagsimba. (1 Pedro 4:3, 4) Bisan pa niana ang mga mahigugmaon sa pagkamatarong nagadangop sa kamatuoran nga linibo. Ilang ginapakita ang ilang gugma sa Diyos ug sa iyang mga sukdanan dihang sila magpabawtismo sa tubig.​—Itandi ang Marcos 1:10; Juan 3:23; Buhat 8:36.

Integridad Gipasukad sa Gugma ug Pagkamainantoson

10. Unsay gikinahanglan aron ang Kristohanon maghupot sa iyang integridad?

¹⁰ Ang integridad dunay bili. Gitin-aw kana ni Jesus sa iyang gidapit ang katawhan nga mahimong iyang mga sumusunod. “Kon adunay buot mosunod kanako, ipalimod niya ang iyang kaugalingon [“biyaan ang kaugalingon,” The New English Bible] ug kuhaon ang iyang kahoy sa pagsakit ug mapinadayonong mosunod kanako.” (Marcos 8:34) Ang dalan sa Kristohanong integridad naglangkit sa mga pagsulay ug mga sakripisyo ug tungod sa samang katarongan nga kadto naglangkit niana alang kang Kristo​—kita dunay samang kaaway, si Satanas. (Efeso 6:11, 12) Busa gikinahanglan ang pagkamainantoson aron sa pagsunod kang Jesus “nga mapinadayonon.” Tungod niana, ang pagpahinungod naglangkit sa ugdang nga desisyon; kini angay nga dili lumalabay nga kapritso. Apan ang pipila mibiya sa kamatuoran sulod sa pila ka bulan o tuig sa ilang pagbawtismo. Sa unsang paagi atong ikapatin-aw kana?

11. Nganong ang pipila tingali wala magpadayon sa dalan sa integridad?

¹¹ Tingali ang pipila nagpabawtismo tungod sa emosyonal inay makataronganong panghunahuna. Ang uban tingali nangitag hinanali nga sangpotanan ug mihimog mahunahunaon-sa-kaugalingon, kadiyut-ug-tagal nga pahinungod. Bisan kon unsa man ang katarongan, nawad-an sila sa ilang lig-ong relasyon uban kang Jehova. Sila wala “motutok pag-ayo” sa ilang Sulundan, si Jesu-Kristo. (Hebreohanon 12:1, 2) Ingong sangpotanan, ang gugma nila sa Diyos mikunhod ug kadiyut ra ang ilang integridad. Ug nganong usa ka hinungdanong butang ang gugma? Kay kini ang bugtong lig-ong pasikaranan alang sa malungtarong pagpahinungod kang Jehova.​—Marcos 12:30, 31; 1 Juan 4:7, 8, 16; 5:3.

Pag-ihap sa Bili sa Integridad

12. Unsa ang maalamong dalan nga subayon una sa bawtismo?

¹² Si Jesus wala magdasig sa iyang mga tinun-an sa pagsunod kaniyang walay kahibalo nga dili ihapon ang bili. Mitambag siya: “Kinsa ba kaninyo ang buot motukod sa usa ka torre ang dili una molingkod ug magbanabana sa galastohan, sa pagsusi kon siya may ikahuman ba niana?” Oo, ang maalamong tawo mainampingong nagatimbangtimbang sa iyang umaabot nga kalihokan. Kinahanglang makatino siya sa iyang motibo una dawaton ang bug-os nga responsabilidad sa Kristohanong pahinungod ug bawtismo. Ug gipakita ni Jesus kon unsay kahulogan niana sa mitapos siya: “Busa, makatino kamo, walay mausa kaninyo nga dili manamilit sa tanan niyang kabtangan ang mahimong akong tinun-an.”​—Lucas 14:28-33.

13. Kon ang diwa sa pagpanudlo ni Jesus mao ang gugma, unsay iyang gipasabot sa namulong siya mahitungod sa ‘pagdumot’ sa usa sa mga sakop sa pamilya? (Mateo 22:37-40)

¹³ Ang pagpahinungod kang Jehova nagkinahanglan sa tibuok-kalag nga integridad sa pagbuhat sa balaang kabubut-on. Walay tawo o kabtangan ang katugotang mopuli sa gugma sa usa sa Diyos. Kana ang hinungdang si Jesus mipahayag: “Kon adunay tawo nga moanhi kanako ug dili siya magadumot sa iyang amahan ug inahan ug asawa ug mga anak ug mga igsoong lalaki ug mga igsoong babaye, oo, ug bisan sa iyang kaugalingong kalag, siya dili mahimong akong tinun-an.” (Lucas 14:26) Karon unsay gipasabot ni Jesus sa naghisgot siya mahitungod sa pagdumot sa mga sakop sa pamilya ug bisan sa kaugalingon? Sanglit siya nagtudlo sa iyang mga sumusunod sa paghigugma bisan sa ilang mga kaaway, sa unsang diwa iyang gigamit ang pulong pagdumot dinhi? (Lucas 6:27, 35) Ang pagdumot dinhi nagbaton sa ideya sa paghigugma nga menos.​—Itandi ang Mateo 12:46-50.

14. Unsa ang sanong sa pila ka higala ug paryente dihang ang usa mahimong saksi ni Jehova? (Juan 15:18, 19)

¹⁴ Tino nga dihang ang usa ka tawo mahimong Kristohanong saksi ni Jehova, kalit niyang hisayran kon kinsa ang tinuod niyang mga higala. Ang pipila tingali molikay o moboykot kaniya tungod kay iyang gibiyaan ang kanhi niyang relihiyon, bisan pag sila mismo wala magtuman sa husto sa usa ka relihiyon. Apan si Jesus misaad nga adunay balos ang maong kapildihan, nga miingon: “Walay mausa nga mibiya sa balay o mga igsoong lalaki o mga igsoong babaye o inahan o amahan o mga anak o mga uma tungod kanako ug tungod sa maayong balita ang dili makabaton sa usa ka gatos ka pilo karon niining yugtoa sa panahon . . . ug sa umaabot nga sistema sa mga butang sa kinabuhing walay kataposan.”​—Marcos 10:29, 30.

15. Nganong ang pipila tingali motamay sa mga Saksi ni Jehova?

¹⁵ Sa pila ka kahimtang ang dalan sa pagpahinungod ug integridad tingali magkahulogan sa kapildihan sa pagtahod sa panan-aw sa ubang tawo. (1 Corinto 4:12, 13) Nganong maingon man niana? Kay ikaw karon nagatuman sa usa ka relihiyon nga wala isipang “dungganon.” (Itandi ang Marcos 2:15, 16.) Kon buot sabton, dili dungganon ang ‘pagsamok sa ubang tawo pinaagi sa imong relihiyon gikan sa balay ug balay.’ Dili madungganon ang pagkabilanggo inay lapason ang neyutralidad sa usa kon bahin sa nasyonalismo ug patriotismo. (Juan 18:36) Dili madungganon ang pagdumili sa mga abuno sa dugo tungod sa konsensiyang binansay sa Bibliya​—bisan tuod ang hampak nga AIDS karon nagapaduhaduha sa pila ka tawo bahin niana.​—Itandi ang Buhat 15:28, 29; 17:6, 7; 24:5.

16. Sa unsang paagi kita makabatog tabang aron sa paghupot sa atong integridad?

¹⁶ Bisan tuod ang dalan sa Kristohanong integridad maoy mapig-ot ug masulayon, kita may tabang sa tanang panahon. (Mateo 7:13, 14) Busa si Pablo nakaingon: “Ako adunay kusog alang sa tanang butang tungod niya nga nagahatag kanako ug gahom.” (Filipos 4:13) Ug makabaton kita nianang gahoma pinaagi sa makanunayong pag-ampo, pinaagi sa pagtuon sa Pulong sa Diyos, ug pinaagi sa pagpakig-uban sa Kristohanong kongregasyon. Ingong bawtismadong mga naghupot sa integridad, kita makapabiling matinumanon ug maunongon, salamat sa gahom nga ginatagana sa Diyos.​—Efeso 4:11-13; 6:18; Salmo 119:105.

Mga Kaayohan sa Dalan nga Gihuptan ang Integridad

17. Ang bawtismo mahimong mosangpot sa unsang mga panalangin?

¹⁷ Ang lakang sa pahinungod ug bawtismo motultol sa daghang panalangin. Sa usa ka butang, kini mahimong magkahulogan sa mas dako ug mas makapatagbawng ministeryo. Anaa ang kalaoman sa umaabot nga pag-alagad ingong usa ka auxiliary payunir, nga sa pila ka kaso motultol sa regular ug espesyal payunir nga buluhaton, misyonaryong pag-alagad, sirkito ug distritong buluhaton, ug pag-alagad sa Bethel. (Tan-awa ang Kahon sa panid 26.) Alang sa bawtismadong mga igsoong lalaki ang dalan abli sa pag-alagad sa uban diha sa kongregasyon ingong ministeryal nga alagad ug, sa igong panahon, ingong ansiano. Apan alang niining tanang panalangin, anaa ang samang paninugdang kinahanglanon​—ang integridad​—1 Timoteo 3:1-10.

18. Sa unsang paagi ang atong kinabuhing gipahinungod magaapektar sa uban nga atong makontak?

¹⁸ Ang mga kaayohan sa usa ka kinabuhi sa pahinungod ug integridad mokaylap nga maapektahan ang uban. Ingong sangpotanan sa suod nga pagsunod sa panig-ingnan ni Kristo, ang usa mahimong mas maayong bana o asawa, amahan o inahan. (1 Pedro 2:21; Efeso 5:21-33; 6:4) Maugmad sa mga batan-on ang makapalig-ong relasyon uban sa ilang mga ginikanan, mga magtutudlo, ug mga ansiano sa kongregasyon. (Tito 2:6, 7) Ang matag bawtismadong Kristohanon mahimong mas maayong silingan, amo, o empliyado. (Mateo 22:39; Efeso 6:5-9; Tito 2:9, 10) Ug sama kang Kristo, ang matag Kristohanon angay mahimong makapahayahay nga kauban sa uban, sumala sa giingon ni Jesus: “Isangon ang akong yugo ug makakat-on gikan kanako, kay ako malumo ug mapaubsanon sa kasingkasing, ug inyong makaplagan ang kapahulayan sa inyong mga kalag.”​—Mateo 11:29.

19. Unsa ang uban pang dagkong kaayohan ang mosangpot sa paghimo sa lakang sa pahinungod?

¹⁹ Ang usa ka dakong kaayohan sa paghimo sa lakang sa pahinungod ug bawtismo mao ang pagbatog malinawong relasyon uban sa Maglalalang. Kini motultol sa kalinaw sa hunahuna. Sumala sa gitambag ni Pablo: “Ayaw kamo pagkabalaka sa bisan unsa, apan sa tanang butang pinaagi sa pag-ampo ug pangaliyupo uban sa pagpasalamat ipahibalo ninyo ang inyong mga hangyo sa Diyos; ug ang kalinaw sa Diyos nga molabaw sa tanang hunahuna magabantay sa inyong mga kasingkasing ug inyong mga katakos sa panghunahuna pinaagi kang Kristo Jesus.”​—Filipos 4:6, 7.

20. (a) Sa unsa gipasukad ang “kalinaw sa Diyos”? (b) Unsang higayon ang mabuksan alang sa tawong magpabawtismo?

²⁰ “Ang kalinaw sa Diyos” gipasukad sa halalom nga pagsabot sa panig-ingnan ug sakripisyo ni Jesus. Kini nga kahibalo kang Kristo nagaagak sa daghan ngadto sa tiunay nga paghinulsol ug sa matuod nga kausaban sa kagawian, o ‘pagtalikod’ sa sala. (Buhat 3:19, 20) Ingong sangpotanan, ang mga nakapahinungod nagaingon, sama sa giingon sa salmista: “Alang kanako, ako magalakaw sa akong katarong. . . . Taliwala sa nagkatigom nga mga panon akong pagadayegon si Jehova.” (Salmo 26:11, 12) Ang tawong mabawtismohan sa tubig ingong simbolo sa iyang pagpahinungod sa Diyos nagahan-ay sa iyang kaugalingon uban sa mga naghupot sa integridad kang Jehova sa tibuok kalibotan. (1 Pedro 2:17) Siya usab “makapangupot sa tinuod nga kinabuhi,” ang kinabuhing walay kataposan, nga gisaad ni Jehova pinaagi kang Kristo Jesus.​—1 Timoteo 6:19; Tito 1:2.

[Mga footnote]

Unsay Imong Tubag?

◻ Sa unsang paagi ang unang mga Kristohanon unang nadani sa kamatuorang gitudlo ni Kristo ug sa mga apostol?

◻ Sa unsang paagi ang pagkabalaan nalangkit sa matag usa ka Kristohanon ug sa kongregasyon?

◻ Ipasukad sa unsa ang integridad o katarong?

◻ Unsay nalangkit sa pag-ihap sa bili sa integridad o katarong?

◻ Unsa ang mga kaayohan sa paghupot sa integridad?

[Kahon sa panid 26]

Mga Pribilehiyo sa Bug-os-Panahong Ministeryo

Auxiliary Payunir: Usa ka bawtismadong ministro nga nagagugol sa labing diyutay 60 ka oras sa pagsangyaw sa usa ka bulan.

Regular nga Payunir: Usa ka bawtismadong ministro nga nagagugol sa aberids nga 90 ka oras matag bulan sa pagsangyaw.

Espesyal Payunir: Usa ka bawtismadong ministro nga nagagugol ug labing menos 140 ka oras matag bulan sa ministeryo ug nagadawat sa gamayng binulang alawans alang sa hinungdanong mga galastohan. Ang maong mga payunir kasagarang itudlo sa nahilit nga mga pundok ug gagmay nga mga kongregasyon.

Gilead nga Misyonaryo: Usa ka bawtismadong ministro nga nabansay sa Watchtower Bible School of Gilead alang sa pag-alagad sa langyawng nasod ug nagagugol usab sa labing diyutay 140 ka oras matag bulan sa ministeryo.

Sirkito ug Distritong mga Magtatan-aw: Nagapanaw nga mga ansiano nga nagaduaw sa mga kongregasyon ug mga sirkito uban ang hunahuna sa paglig-on sa mga igsoon diha sa ilang ministeryo ug sa mga tigom. Sila nagagugol ug daghang oras sa pagsangyaw sa kanataran.

Bethel nga Pag-alagad: Gihimo sa bug-os-panahong mga ministro sa bisan hain sa mga sangang buhatan ug mga imprentahan sa Watch Tower Society sa tibuok kalibotan.

[Hulagway sa panid 24]

Ang bawtismo magaabli sa dalan . . .

[Hulagway sa panid 25]

. . . ngadto sa ministeryo nga nagahupot sa integridad