Kinabuhi ug Ministeryo ni Jesus

Ang Sambingay sa mga Mina

SI Jesus tingali didto pa sa balay ni Zaccheo, diin siya mihapit sa pagpaingon sa Jerusalem. Nagtuo ang iyang mga tinun-an nga inigkaabot nila sa Jerusalem, igapahayag niya nga siya mao ang Mesiyas ug pagatukoron niya ang iyang Gingharian. Aron sa pagtul-id nianang ideyaha ug pagpakita nga ang Gingharian halayo pa kaayo, gihatag ni Jesus ang usa ka sambingay.

“Ang usa ka tawong hamili,” siya miasoy, “mipanaw ngadto sa halayong yuta aron sa pagdawat ug harianong gahom ug mopauli.” Si Jesus mao ang “tawong hamili,” ug ang langit mao ang “halayong yuta.” Inig-abot niya didto, siya pagahatagan sa iyang Amahan ug harianong gahom.

Hinuon, una molakaw gipatawag sa tawong hamili ang napulo ka ulipon ug gihatagan ang matag usa kanila sa usa ka mina nga salapi, nga miingon: “Ipatigayon ninyo kini hangtod sa akong paghiuli.” Ang napulo ka ulipon sa unang katumanan nagahawas sa unang mga tinun-an ni Jesus. Sa dakong pagpadapat, sila nagahulagway sa tanan nga umaabot nga mga manununod uban niya sa langitnong Gingharian.

Ang mga mina nga salapi maoy bililhong kuwarta, nga ang matag usa katumbas sa suhol sa tulo ka bulan sa usa ka magbabaol. Apan unsay gihawasan sa mga mina? Ug unsang matang sa patigayon ang himoon sa mga ulipon?

Ang mga mina nagahawas sa mga kahinguhaan nga magamit sa mga dinihogan-sa-espiritung mga tinun-an sa pagpatunghag dugang mga manununod sa langitnong Gingharian hangtod sa pag-abot ni Jesus ingong Hari diha sa gisaad nga Gingharian. Tapos sa iyang pagkabanhaw ug pagpakita ngadto sa iyang mga tinun-an, iyang gihatag kanila ang simbolikong mga mina aron mahimo ang dugang mga tinun-an ug sa ingon madugangan ang Gingharian-sa-langit nga matang.

“Apan,” mipadayon si Jesus, “ang iyang mga tagilungsod nagdumot [sa tawong hamili] ug siya ilang gipasundan ug mga tinugyanan, sa pag-ingon, ‘Dili kami buot nga maoy magahari kanamo kining tawhana.’” Ang mga tagilungsod maoy mga Israelinhon, o mga Hudiyo, nga walay labot ang iyang mga tinun-an. Tapos sa pagkayab ni Jesus sa langit, kining mga Hudiyo nagpaila nga dili nila buot nga siya mahimong ilang hari pinaagi sa paglutos sa iyang mga tinun-an. Sa maong paagi sila naglihok sama sa mga tagilungsod nga nagpadala sa mga tinugyanan.

Giunsa sa napulo ka ulipon paggamit sa ilang mga mina? Si Jesus nagpatin-aw: “Sa iya nang paghiuli tapos makadawat ug harianong gahom, gipatawag niya ang mga ulipon nga iyang gihatagan sa kuwarta, sa pagtino pilay ilang nakita sa patigayon. Dayon ang nahauna miduol, nga miingon, ‘Senyor, ang imong mina hingdugangan ug napulo ka mina.’ Busa siya miingon kaniya, ‘Mao kana, maayong ulipon! Tungod kay sa diyutay kaayo ikaw kasaligan man diay, magbaton kag pagbulot-an sa napulo ka siyudad.’ Karon ang ikaduha miduol, nga miingon, ‘Senyor, ang imong mina hingdugangan ug lima ka mina.’ Siya miingon usab kaniya, ‘Ikaw, usab, magbaton ug pagbulot-an sa lima ka siyudad.’”

Ang ulipon nga may napulo ka mina nagahulagway sa usa ka matang, o grupo, sa mga tinun-an sukad sa Pentekostes 33 K.P. hangtod karon nga nagaapil sa mga apostol. Kadtong nakadugang ug lima ka mina nagahawas usab sa usa ka grupo sa samang yugto sa panahon nga, sumala sa ilang kahigayonan ug mga katakos, nagapadako sa mga katigayonan sa ilang hari sa yuta. Ang duruha ka grupo madasigong nagawali sa maayong balita, ug ingong resulta, daghang matarong ug kasingkasing mangahimong mga Kristohanon. Siyam sa mga ulipon nagmalamposon sa patigayon ug nagpadako sa ilang mga katigayonan.

“Apan,” mipadayon si Jesus, “ang lain nga ulipon miabot, nga miingon, ‘Senyor, ania ang imong mina, nga akong gitipigan nga giputos ug panyo. Abi mo, ako nahadlok kanimo, tungod kay ikaw mapig-oton man nga tawo; ikaw nagakuha man sa dili nimo binutang ug ikaw nagaani sa dili nimo pinugas.’ Siya miingon kaniya, ‘Gikan sa imo mismong baba pagahukman ko ikaw, daotan nga ulipon. Nasayod ka diay nga ako usa ka tawo nga mapig-oton, nga nagakuha sa dili nako binutang ug nagaani sa dili nako pinugas? Busa nganong wala nimo ibutang ang akong kuwarta sa bangko? Unya sa akong pag-abot ako untang makuha kini nga may tubo.’ Niana siya miingon ngadto sa mga nagtindog sa duol, ‘Kuhaa ninyo ang mina gikan kaniya ug ihatag kana ngadto sa may napulo ka mina.’”

Ang pagkawala sa simbolikong mina nagkahulogan sa pagkawala sa usa ka dapit diha sa langitnong Gingharian alang sa daotang ulipon. Oo, siya nawad-an sa pribilehiyo sa pagmando, ingnon ta, ibabaw sa napulo ka siyudad o lima ka siyudad. Matikdi, usab, nga ang ulipon wala ipahayag nga daotan tungod sa kadaotan nga iyang ginabuhat kondili, hinunoa, sa pagkapakyas sa pagbuhat aron mouswag ang bahandi sa gingharian sa iyang agalon.

Sa dihang ang mina sa daotang ulipon gihatag ngadto sa unang ulipon, may pagtutol: “Senyor, siya may napulo na ka mina!” Apan, si Jesus nagatubag: “Siya nga adunay iya pagahatagan ug labaw pa; apan siya nga walay iya, bisan ang anaa kaniya pagakuhaon gikan kaniya. Dugang pa, kining mga kaaway nako nga dili buot nga ako magahari kanila dad-a ninyo sila dinhi ug patya ninyo sa akong atubangan.” Lucas 19:11-27; Mateo 28:19, 20.

◆ Unsay nakaagda sa sambingay ni Jesus bahin sa mga mina?

◆ Kinsa ang tawong hamili, ug unsa ang yuta nga iyang giadtoan?

◆ Kinsa ang mga tagilungsod, ug giunsa nila pagpakita ang ilang pagdumot?

◆ Kinsa ang mga ulipon, ug unsay gihawasan sa mga mina?

◆ Nganong ang usa ka ulipon gitawag daotan, ug unsay kahulogan sa pagkawala sa iyang mina?