Kinabuhi ug Ministeryo ni Jesus

Sinugdanan sa Usa ka Masulayon nga Panahon

SA DIHANG migikan si Jesus sa Jerusalem sa Lunes sa gabii, mibalik siya sa Betania sa sidlakang bakilid sa Bukid sa mga Olibo. Ang duha ka adlaw sa iyang kataposang ministeryo sa Jerusalem natapos na. Si Jesus sa walay duhaduha nagpalabay na usab sa gabii uban sa iyang higalang si Lazaro. Sukad nga miabot gikan sa Jericho sa Biyernes, kini maoy iyang ikaupat nga adlaw sa Betania.

Karon, sayo sa buntag sa Martes, Nisan 11, siya ug ang iyang mga tinun-an mibiyahe na usab. Usa kini ka masulayong panahon sa ministeryo ni Jesus, ang labing okupado nga panahon. Kini mao ang kataposang adlaw sa iyang pagpakita sa templo. Ug kini ang kataposang adlaw sa iyang publikong ministeryo sa wala pa ang iyang husay ug pagpatay.

Miagi sila sa mao gihapong dalan sa ibabaw sa Bukid sa mga Olibo paingon sa Jerusalem. Diha sa daplin sa dalan gikan sa Betania, nakit-an ni Pedro ang kahoy nga gitunglo ni Jesus sa miaging buntag. “Rabbi, tan-awa!” siya miingon, “ang igira nga imong gitunglo nalaya.”

Apan nganong gipatay ni Jesus ang kahoy? Iyang gipatin-aw kon ngano sa dihang siya miingon: “Sa pagkatinuod magaingon ako kaninyo, Kon kamo adunay pagtuo ug dili magduhaduha, dili lamang buhaton ninyo ang gibuhat ko sa igira, kondili magaingon niining bukid [ang Bukid sa mga Olibo nga ilang gibarogan], ‘Pahawa ug umambak ikaw sa lawod,’ kini mahitabo gayod. Ug bisan unsay inyong pangayoon pinaagi sa pag-ampo, kay nagatuo, kamo magadawat niini.”

Busa pinaagi sa pagpalaya sa kahoy, naghatag si Jesus sa iyang mga tinun-an ug leksiyon sa ilang panginahanglan sa pagbaton ug pagtuo sa Diyos. Sama sa iyang gipamulong: “Bisan unsay inyong pangayoon diha sa pag-ampo tuohi nga inyo na kining nadawat, ug kamo magadawat niini.” Pagkahinungdanong leksiyon kini alang kanila nga pagatun-an, ilabina sa dakong mga pagsulay nga umaabot! Bisan pa, dunay laing kalangkitan ang pagkalaya sa igira ug sa kalidad sa pagtuo.

Ang nasod sa Israel, sama niining igira, dunay malimbongon nga panagway. Bisan pag ang nasod may relasyon sa pakigtugon sa Diyos ug daw nakita nga nagatuman sa iyang mga kasugoan, kini napamatud-an nga walay pagtuo, walay maayong bunga. Tungod sa kakulang sa pagtuo, isalikway pa gani niini ang kaugalingong Anak sa Diyos! Busa, pinaagi sa pagpalaya sa walay-bunga nga igira, si Jesus tin-aw nga nagpasundayag kon unsay sangpotan niining walay-bunga, walay-pagtuo nga nasod.

Wala magdugay, si Jesus ug ang iyang mga tinun-an misulod sa Jerusalem, ug sumala sa ilang naandan, sila miadto sa templo, diin didto si Jesus misugod sa pagpanudlo. Ang punoan sa mga saserdote ug ang mga tigulang sa katawhan, piho nga naghunahuna sa gihimo ni Jesus sa miaging adlaw batok sa mga tigpangilis ug kuwarta, mihagit kaniya: “Pinaagi sa unsa bang kagahom gibuhat mo kining mga butanga? Ug kinsa may naghatag kanimo niini nga kagahom?”

Sa pagtubag si Jesus miingon: “Aduna akoy ipangutana usab kaninyo. Kon tubagon ako ninyo, tug-anan ko kamo pinaagi sa unsang kagahom gibuhat ko kining mga butanga: Ang pamawtismo ni Juan, diin ba kadto gikan? Gikan ba sa langit o gikan sa mga tawo?”

Ang mga saserdote ug ang mga tigulang nagpangutan-anay sa usag usa kon unsaon nila sa pagtubag. “Kon moingon kita, ‘Gikan sa langit,’ siya moingon kanato, ‘Nan, nganong wala man lagi ninyo siya tuohi?’ Apan kon moingon kita, ‘Gikan sa mga tawo,’ mahadlok kita sa mga tawo, kay silang tanan nagtuo man nga si Juan tinuod nga propeta.”

Ang mga pangulo wala mahibalo kon unsay itubag. Busa mitubag sila kang Jesus: “Ambot lang.”

Unya, si Jesus miingon: “Dili ko usab kamo tug-anan pinaagi sa unsang kagahom gibuhat ko kining mga butanga.” Mateo 21:19-27; Marcos 11:19-33; Lucas 20:1-8.

◆ Nganong makahuloganon ang Martes, Nisan 11?

◆ Unsang leksiyon ang gihatag ni Jesus sa dihang iyang gipalaya ang igira?

◆ Giunsa ni Jesus sa pagtubag ang mga tawong nangutana kon unsang kagahom nga gibuhat niya kining mga butanga?