Unsay Kahulogan sa Panihapon sa Ginoo Alang Kanimo?
“Si bisan kinsa nga mokaon sa tinapay o moinom sa kopa sa Ginoo sa paagi nga dili-takos mahimong sad-an maylabot sa lawas ug sa dugo sa Ginoo.”—1 CORINTO 11:27.
1. Unsa ang labing hinungdanong okasyon nga giplano alang sa tuig 2003, ug unsay sinugdanan niini?
ANG labing hinungdanong okasyon nga giplano alang sa tuig 2003 mahitabo human sa pagsalop sa adlaw sa Abril 16. Ang mga Saksi ni Jehova nianang panahona magtigom sa pagsaulog sa Memoryal sa kamatayon ni Jesu-Kristo. Sumala sa gipakita sa nag-unang artikulo, gisugdan ni Jesus kini nga selebrasyon, nga gitawag usab nga Panihapon sa Ginoo, human nga siya ug ang iyang mga apostoles nagsaulog sa Paskuwa sa Nisan 14, 33 K.P. Ang mga emblema sa Memoryal nga tinapay nga walay lebadura ug pulang bino nagsimbolo sa walay-sala nga lawas ni Kristo ug sa iyang giula nga dugo—ang bugtong halad nga makalukat sa katawhan gikan sa napanunod nga sala ug kamatayon.—Roma 5:12; 6:23.
2. Unsang pasidaan ang natala sa 1 Corinto 11:27?
2 Kadtong makig-ambit sa mga emblema sa Memoryal kinahanglang maghimo niana sa takos nga paagi. Giklaro kana ni apostol Pablo sa dihang misulat siya sa mga Kristohanon sa karaang Corinto, diin dili husto ang paagi sa pagsaulog sa Panihapon sa Ginoo. (1 Corinto 11:20-22) Si Pablo misulat: “Si bisan kinsa nga mokaon sa tinapay o moinom sa kopa sa Ginoo sa paagi nga dili-takos mahimong sad-an maylabot sa lawas ug sa dugo sa Ginoo.” (1 Corinto 11:27) Unsay kahulogan nianang mga pulonga?
Ang Pipila Nagsaulog Niini sa Dili-Takos nga Paagi
3. Sa unsang paagi naggawi ang daghang Kristohanon sa Corinto panahon sa mga selebrasyon sa Panihapon sa Ginoo?
3 Daghang Kristohanon sa Corinto nakigbahin sa Memoryal sa dili-takos nga paagi. Nabahinbahin sila, ug labing menos sulod sa usa ka yugto sa panahon, gidala sa pipila ang ilang panihapon ug gikaon kini una pa o panahon sa tigom, nga sagad nagpatuyang sa pagkaon ug pag-inom. Sila dili alisto sa mental ni sa espirituwal. Naghimo kini kanila nga “sad-an maylabot sa lawas ug sa dugo sa Ginoo.” Kadtong wala makapanihapon gigutom ug nalinga. Oo, daghan ang nakig-ambit nga walay pagtahod ug walay bug-os nga kaamgohan sa pagkaseryoso sa okasyon. Dili ikatingala nga ilang gipahinabo nga hukman sila!—1 Corinto 11:27-34.
4, 5. Nganong kadtong kanunay nga makig-ambit sa mga emblema sa Memoryal kinahanglang magsusi sa ilang kaugalingon?
4 Sa pagsingabot sa Memoryal kada tuig, kadtong kanunay nga makig-ambit sa mga emblema kinahanglang magsusi sa ilang kaugalingon. Aron makapakig-ambit niining hiniusang pagpangaon sa hustong paagi, kinahanglan nga maayo ang ilang espirituwal nga kahimtang. Si bisan kinsa nga magpakitag kawalay pagtahod, ilabina pagtamay, sa halad ni Jesus mameligrong ‘putlon gikan sa katawhan sa Diyos,’ sama ra sa usa ka Israelinhon nga nakig-ambit sa hiniusang pagpangaon samtang siya anaa sa mahugaw nga kahimtang.—Levitico 7:20; Hebreohanon 10:28-31.
5 Gitandi ni Pablo ang Memoryal ngadto sa hiniusang pagpangaon sa karaang Israel. Naghisgot siya bahin niadtong mga nakig-ambit kang Kristo ug dayon miingon: “Dili kamo mahimong moinom sa kopa ni Jehova ug sa kopa sa mga demonyo; dili kamo mahimong moambit sa ‘lamesa ni Jehova’ ug sa lamesa sa mga demonyo.” (1 Corinto 10:16-21) Kon ang usa ka tawo nga kanunayng nakig-ambit sa mga emblema sa Memoryal makahimog bug-at nga sala, kinahanglang isugid niya kini kang Jehova ug mangayo usab ug espirituwal nga tabang sa mga ansiyano sa kongregasyon. (Proverbio 28:13; Santiago 5:13-16) Kon siya tinuod nga naghinulsol ug nagpatunghag mga bunga nga nahiangay sa paghinulsol, siya takos nga nagpakig-ambit.—Lucas 3:8.
Pagtambong Isip Matinahorong mga Tigpaniid
6. Alang kang kinsa gitagana sa Diyos ang pribilehiyo nga makig-ambit sa Panihapon sa Ginoo?
6 Angay ba nga kadtong nagahimo karon ug maayo ngadto sa nanghibilin sa 144,000 nga mga igsoon ni Kristo makig-ambit sa Panihapon sa Ginoo? (Mateo 25:31-40; Pinadayag 14:1) Dili. Ang Diyos nagtagana sa maong pribilehiyo alang sa mga indibiduwal nga iyang gidihogan sa balaang espiritu nga mahimong “kaubang mga manununod ni Kristo.” (Roma 8:14-18; 1 Juan 2:20) Nan, unsay himoon niadtong naglaom nga mabuhi sa walay kataposan sa tibuok-yutang paraiso ilalom sa pagmando sa Gingharian? (Lucas 23:43; Pinadayag 21:3, 4) Sanglit dili sila kaubang mga manununod ni Jesus nga may langitnong paglaom, sila motambong sa Memoryal isip matinahorong mga tigpaniid.—Roma 6:3-5.
7. Nganong ang unang-siglo nga mga Kristohanon nahibalo nga sila kinahanglang makig-ambit sa mga emblema sa Memoryal?
7 Ang tinuod nga mga Kristohanon sa unang siglo dinihogan sa balaang espiritu. Daghan kanila nakagamit sa usa o kapin pa sa milagrosong mga gasa sa espiritu, sama sa pagsultig lainlaing pinulongan. Busa, dili malisod alang niining mga tawhana ang pagkahibalo nga sila dinihogan sa espiritu ug kinahanglang makig-ambit sa mga emblema sa Memoryal. Apan, sa atong panahon, kini matino pinasukad sa dinasig nga mga pulong sama niini: “Ang tanan nga gitultolan sa espiritu sa Diyos, kini sila mga anak sa Diyos. Kay kamo wala makadawat ug espiritu sa pagkaulipon nga nagpahinabog kahadlok pag-usab, apan kamo nakadawat ug espiritu sa pagsagop ingong mga anak, nga pinaagi niining espirituha kita nagatuaw: ‘Abba, Amahan!’”—Roma 8:14, 15.
8. Kinsay gihawasan sa “mga trigo” ug sa “mga bunglayon” nga gihisgotan sa Mateo kapitulo 13?
8 Latas sa daghang siglo, ang tinuod nga mga dinihogan nanubo ingong “mga trigo” diha sa uma nga may “mga bunglayon,” o mini nga mga Kristohanon. (Mateo 13:24-30, 36-43) Sukad sa katuigan sa 1870, ang “trigo” anam-anam nga nadayag, ug pipila ka tuig sa ulahi ang dinihogan nga Kristohanong mga magtatan-aw gisultihan: “Ang mga ansiyano . . . kinahanglang magpahayag niini nga mga kondisyon ngadto niadtong magtigom [alang sa Memoryal],—(1) pagtuo diha sa dugo [ni Kristo]; ug (2) pagpahinungod ngadto sa Ginoo ug sa iyang pag-alagad, bisan hangtod sa kamatayon. Dayon kinahanglan nilang dapiton ang tanan nga may samang panghunahuna ug sa ingon nakapahinungod na, sa pagpakigbahin sa pagsaulog sa kamatayon sa Ginoo.”—Studies in the Scriptures, Series VI, The New Creation, panid 473.a
Pagpangita sa “Ubang mga Karnero”
9. Sa unsang paagi ang pag-ila sa “dakong panon” naklaro sa 1935, ug sa unsang paagi kini nakaapektar sa pipila nga nakig-ambit sa mga emblema sa Memoryal?
9 Paglabay sa panahon, ang organisasyon ni Jehova misugod sa paghatag ug pagtagad sa uban pa gawas sa dinihogang mga sumusunod ni Kristo. Ang usa ka talagsaong kaugmaran maylabot niini nahitabo sa tungatunga sa katuigan sa 1930. Una pa niana, ang katawhan sa Diyos nag-isip sa “dakong panon” sa Pinadayag 7:9 ingong ikaduhang espirituwal nga matang nga makauban sa 144,000 nga gibanhawng mga dinihogan sa langit—samag mga abay o kauban sa pangasaw-onon ni Kristo. (Salmo 45:14, 15; Pinadayag 7:4; 21:2, 9) Apan niadtong Mayo 31, 1935, sa pakigpulong nga gihatag diha sa kombensiyon sa mga Saksi ni Jehova sa Washington, D.C., T.B.A., gipatin-aw gikan sa Kasulatan nga ang “dakong panon” (“dakong pundok,” King James Version) nagtumong sa “ubang mga karnero” nga nagkinabuhi panahon sa kataposan. (Juan 10:16) Human sa kombensiyon, ang pipila nga kanhi nakig-ambit sa mga emblema sa Memoryal mihunong sa pagpakig-ambit tungod kay sila nakaamgo nga ang ilang paglaom yutan-on, dili langitnon.
10. Unsaon nimo paghubit ang paglaom ug mga katungdanan sa “ubang mga karnero” karon?
10 Ilabina sukad sa 1935 nga padayon ang pagpangita sa “ubang mga karnero,” kinsa nagtuo sa lukat, nagpahinungod sa ilang kaugalingon sa Diyos, ug nagpaluyo sa dinihogang “gamayng panon” sa kalihokan sa pagsangyaw sa Gingharian. (Lucas 12:32) Kining ubang mga karnero naglaom sa pagkinabuhi sa yuta sa walay kataposan, apan sa tanang ubang mga bahin, sila kaamgid sa nanghibilin karon nga mga manununod sa Gingharian. Sama sa langyawng mga pumoluyo sa karaang Israel nga nagsimba kang Jehova ug nagpasakop sa Balaod, ang ubang mga karnero karon nagdawat ug Kristohanong mga katungdanan, sama sa pagsangyaw sa maayong balita uban sa mga membro sa espirituwal nga Israel. (Galacia 6:16) Apan, maingon nga walay langyawng pumoluyo nga mahimong hari o saserdote sa Israel, ang ubang mga karnero dili usab mahimong magmando didto sa langitnong Gingharian o mag-alagad ingong mga saserdote.—Deuteronomio 17:15.
11. Nganong ang petsa sa pagpahinungod sa usa ka tawo dunay kalabotan sa iyang paglaom?
11 Unya, sa katuigan sa 1930 nagkaanam ka klaro nga, sa katibuk-an, ang langitnong matang napili na. Sa daghang tuig na karon, ang gipangita mao ang ubang mga karnero, kansang paglaom maoy yutan-on. Kon ang usa ka dinihogan dili magmatinumanon, lagmit gayod nga ang usa ka tawo nga dugay nang nag-alagad nga matinumanon sa Diyos ingong usa sa ubang mga karnero maoy ihulip sa bakante sa 144,000.
Kon Nganong Dunay Sayop nga mga Pagdahom
12. Ubos sa unsang mga kahimtang nga ang usa kinahanglang mohunong sa pagpakig-ambit sa mga emblema sa Memoryal, ug ngano?
12 Ang dinihogang mga Kristohanon segurado gayod nga sila may langitnong pagtawag. Apan komosta kon ang pipila ka indibiduwal nga walay langitnong pagtawag nakig-ambit sa mga emblema sa Memoryal? Karon nga sila nakaamgo nga dili gayod langitnon ang ilang paglaom, tino nga itukmod sila sa ilang tanlag sa paghunong sa pagpakig-ambit. Dili mahimuot ang Diyos kang bisan kinsa nga nagpresentar sa iyang kaugalingon nga gitawag aron mahimong langitnong hari ug saserdote bisag nahibalo siya nga siya wala gayoy langitnong pagtawag. (Roma 9:16; Pinadayag 20:6) Gilaglag ni Jehova ang Levihanon nga si Kore tungod sa mapangahasong pagtinguha sa Aaronikong pagkasaserdote. (Exodo 28:1; Numeros 16:4-11, 31-35) Kon si bisan kinsang Kristohanon makaamgo nga siya sayop nga nakig-ambit sa mga emblema sa Memoryal, siya kinahanglang mohunong sa pagpakig-ambit ug mapaubsanong mag-ampo alang sa pagpasaylo ni Jehova.—Salmo 19:13.
13, 14. Ngano kaha nga ang uban sayop nga magdahom nga sila may langitnong pagtawag?
13 Ngano kaha nga ang uban sayop nga magdahom nga sila may langitnong pagtawag? Ang kamatayon sa usa ka kapikas o uban pang trahedya mahimong hinungdan nga mawad-an silag kaikag sa kinabuhi sa yuta. O tingali magtinguha sila nga mahisamag paglaom sa usa ka suod nga higala nga nag-angkong usa ka dinihogang Kristohanon. Siyempre, ang Diyos wala magtudlo kang bisan kinsa nga magrekluta sa uban alang niining pribilehiyoa. Ug siya dili magdihog sa mga manununod sa Gingharian pinaagi sa pagpadungog kanila ug mga tingog nga moingong sila dinihogan.
14 Ang bakak nga relihiyosong ideya nga ang tanang maayong mga tawo moadto sa langit basin maoy hinungdan nga ang pipila maghunahuna nga sila may langitnong pagtawag. Busa, kita kinahanglang magbantay nga dili maimpluwensiyahan sa kanhing sayop nga mga panglantaw o ubang mga hinungdan. Pananglitan, tingali pangutan-on sa uban ang ilang kaugalingon: ‘Nagtomar ba ako ug mga tambal nga nag-apektar sa akong mga emosyon? Ako ba emosyonal kaayo nga pagkatawo nga masayop ako sa pagtuo nga ako usa ka dinihogan?’
15, 16. Ngano kaha nga ang pipila masayop sa paghinapos nga sila mga dinihogan?
15 Ang pipila tingali mangutana sa ilang kaugalingon: ‘Buot ko ba nga mahimong prominente? Ako ba nangambisyon ug awtoridad karon o ingong umaabot nga kaubang manununod ni Kristo?’ Sa dihang nagtawag ug mga manununod sa Gingharian sa unang siglo, dili tanan ang may katungdanan diha sa kongregasyon. Ug ang mga tawong may langitnong pagtawag dili magtinguha ug pagkaprominente o manghambog nga sila dinihogan. Sila magpasundayag ug pagpaubos nga gidahom niadtong nagbaton sa “panghunahuna ni Kristo.”—1 Corinto 2:16.
16 Ang pipila tingali nakahinapos nga sila may langitnong pagtawag tungod kay sila nakabaton ug daghang kahibalo sa Bibliya. Apan ang pagkadinihogan sa espiritu dili mohatag ug talagsaong pagsabot, kay si Pablo kinahanglan pang magtudlo ug magtambag sa pipila ka dinihogan. (1 Corinto 3:1-3; Hebreohanon 5:11-14) Ang Diyos may kahikayan sa pagtaganag espirituwal nga pagkaon alang sa tanan niyang katawhan. (Mateo 24:45-47) Busa walay angayng maghunahuna nga ang pagkahimong dinihogang Kristohanon mohatag kaniyag kaalam nga labaw niadtong dunay yutan-ong paglaom. Ang katakos sa pagtubag sa mga pangutana sa Kasulatan, pagsangyaw, o paghatag ug mga pakigpulong sa Bibliya dili ilhanan sa pagdihog sa espiritu. Ang mga Kristohanon nga may yutan-ong paglaom kuwalipikado usab kaayo niining mga bahina.
17. Ang pagdihog sa espiritu nag-agad sa unsa ug kang kinsa?
17 Kon may usa ka isigkamagtutuo nga mangutana bahin sa langitnong pagtawag, ang usa ka ansiyano o laing hamtong nga Kristohanon makahisgot niini uban kaniya. Apan, ang usa ka tawo dili makahimo niining maong desisyon alang sa laing tawo. Ang tawo nga tinuod nga gitawag dili kinahanglang mangutana sa uban kon kini ba ang iyang paglaom. Ang mga dinihogan “gipahimugso pag-usab, dili pinaagi sa madunot, kondili pinaagi sa dili-madunot nga binhi sa pagsanay, pinaagi sa pulong sa buhi ug malungtarong Diyos.” (1 Pedro 1:23) Pinaagi sa iyang espiritu ug Pulong, ang Diyos nagtanom sa “binhi” nga maghimo sa maong tawo nga “bag-ong linalang,” nga may langitnong paglaom. (2 Corinto 5:17) Ug si Jehova maoy mopili. Ang pagdihog “nagaagad, dili sa usa nga nagatinguha ni sa usa nga nagadagan, kondili sa Diyos.” (Roma 9:16) Busa sa unsang paagi maseguro sa usa ka tawo nga siya dunay langitnong pagtawag?
Kon Nganong Segurado Sila
18. Sa unsang paagi ang espiritu sa Diyos nagpamatuod uban sa espiritu sa mga dinihogan?
18 Ang pagpamatuod sa espiritu sa Diyos magkombinsir sa dinihogang mga Kristohanon nga sila dunay langitnong mga palaaboton. “Kamo nakadawat ug espiritu sa pagsagop ingong mga anak,” misulat si Pablo, “nga pinaagi niining espirituha kita nagatuaw: ‘Abba, Amahan!’ Ang espiritu mismo nagpamatuod uban sa atong espiritu nga kita mga anak sa Diyos. Nan, kon kita mga anak, kita usab mga manununod: mga manununod gayod sa Diyos, apan kaubang mga manununod ni Kristo, basta duyog kita nga magaantos aron kita usab duyog nga pagahimayaon.” (Roma 8:15-17) Ubos sa impluwensiya sa balaang espiritu, ang espiritu, o nagpatigbabawng tinamdan, sa mga dinihogan magpalihok kanila nga ipadapat sa ilang kaugalingon ang giingon sa Kasulatan bahin sa espirituwal nga mga anak ni Jehova. (1 Juan 3:2) Ang espiritu sa Diyos maghatag kanila ug pagbati nga sila iyang mga anak ug magpatungha diha kanila ug talagsaong paglaom. (Galacia 4:6, 7) Oo, maanindot ang walay-kataposang kinabuhi sa yuta ingong hingpit nga mga tawo nga gilibotan sa mga membro sa pamilya ug mga higala, apan dili kana ang ilang hinatag-sa-Diyos nga paglaom. Pinaagi sa iyang espiritu, gibutang sa Diyos diha kanila ang lig-on kaayong langitnong paglaom nga andam nilang isakripisyo ang tanan nilang yutan-ong mga pagbati ug mga palaaboton.—2 Corinto 5:1-5, 8; 2 Pedro 1:13, 14.
19. Unsay papel sa bag-ong pakigsaad diha sa kinabuhi sa dinihogang mga Kristohanon?
19 Ang dinihogang mga Kristohanon segurado sa ilang langitnong paglaom, nga sila gihimo nang membro sa bag-ong pakigsaad. Si Jesus naghisgot niini sa dihang iyang gisugdan ang Memoryal ug nag-ingon: “Kini nga kopa nagkahulogan sa bag-ong pakigsaad tungod sa akong dugo, nga igabubo alang kaninyo.” (Lucas 22:20) Ang mga membro sa bag-ong pakigsaad mao ang Diyos ug ang mga dinihogan. (Jeremias 31:31-34; Hebreohanon 12:22-24) Si Jesus ang tigpataliwala. Gipalihok pinaagi sa giulang dugo ni Kristo, ang bag-ong pakigsaad nagkuha dili lamang gikan sa mga Hudiyo kondili usab gikan sa kanasoran ug usa ka katawhan alang sa ngalan ni Jehova ug naghimo kanila nga bahin sa “binhi” ni Abraham. (Galacia 3:26-29; Buhat 15:14) Kining “walay kataposang pakigsaad” magpaposible sa tanang espirituwal nga mga Israelinhon nga mabanhaw ngadto sa imortal nga kinabuhi sa langit.—Hebreohanon 13:20.
20. Ang mga dinihogan gihimong membro sa unsang pakigsaad uban kang Kristo?
20 Ang mga dinihogan segurado sa ilang paglaom. Sila gihimong membro sa laing pakigsaad, ang pakigsaad sa Gingharian. Bahin sa ilang pagpakig-ambit uban kang Kristo, si Jesus nag-ingon: “Kamo mao ang nagpabilin kanako diha sa akong mga pagsulay; ug nagahimo ako ug pakigsaad uban kaninyo, maingon nga ang akong Amahan naghimo ug usa ka pakigsaad kanako, alang sa usa ka gingharian.” (Lucas 22:28-30) Kining maong pakigsaad tali ni Kristo ug sa iyang kaubang mga hari magapadayon hangtod sa kahangtoran.—Pinadayag 22:5.
Ang Panahon sa Memoryal—Usa ka Bulahang Panahon
21. Sa unsang paagi kita makabaton ug dakong benepisyo panahon sa Memoryal?
21 Dunay daghang panalangin panahon sa Memoryal. Makabenepisyo kita gikan sa gieskedyul nga pagbasa sa Bibliya alang niining yugtoa. Kini usab ilabinang angayang panahon alang sa pag-ampo, sa pagpamalandong bahin sa yutan-ong kinabuhi ug kamatayon ni Jesus, ug sa pagpakigbahin sa buluhatong pagsangyaw sa Gingharian. (Salmo 77:12; Filipos 4:6, 7) Ang selebrasyon mismo magpahinumdom kanato sa gugma nga gipakita sa Diyos ug ni Kristo may kalabotan sa halad lukat ni Jesus. (Mateo 20:28; Juan 3:16) Kining maong tagana mohatag kanatog paglaom ug kahupayan ug kinahanglang magpalig-on sa atong determinasyon sa pagsubay sa dalan nga sama nianang kang Kristo. (Exodo 34:6; Hebreohanon 12:3) Ang Memoryal kinahanglang magpalig-on usab kanato sa pagtuman sa atong dedikasyon ingong mga alagad sa Diyos ug mahimong maunongong mga sumusunod sa iyang hinigugmang Anak.
22. Unsa ang kinadak-ang gasa sa Diyos alang sa mga tawo, ug unsay usa ka paagi sa pagpakitag apresasyon alang niini?
22 Pagkamaayong mga gasa ang gihatag ni Jehova kanato! (Santiago 1:17) Kita may pagtultol sa iyang Pulong, nakabaton ug tabang sa iyang espiritu, ug may paglaom sa kinabuhing walay kataposan. Ang kinadak-ang gasa sa Diyos mao ang halad ni Jesus alang sa kasal-anan sa mga dinihogan ug alang sa tanang nagpasundayag ug pagtuo. (1 Juan 2:1, 2) Unsa ka hinungdanon ang kamatayon ni Jesus alang kanimo? Usa kaha ikaw niadtong magpakitag pagpasalamat alang niini pinaagi sa pagtigom human sa pagsalop sa adlaw sa Abril 16, 2003, sa pagsaulog sa Panihapon sa Ginoo?
[Footnote]
a Gipatik sa mga Saksi ni Jehova apan karon wala na giimprenta.
Unsay Imong mga Tubag?
• Kinsay angayng makig-ambit sa mga emblema sa Memoryal?
• Nganong ang “ubang mga karnero” motambong sa Panihapon sa Ginoo ingong matinahorong mga tigpaniid lamang?
• Sa unsang paagi mahibaloan sa dinihogang mga Kristohanon nga sila kinahanglang makig-ambit sa tinapay ug bino sa Memoryal sa kamatayon ni Kristo?
• Ang panahon sa Memoryal maoy angayang panahon alang sa unsa?
[Graph/Mga hulagway sa panid 18]
(Alang sa aktuwal nga pagkahan-ay, tan-awa ang publikasyon)
Mitambong sa Memoryal
SA MINILYON
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Hulagway sa panid 18]
Motambong ka ba sa Panihapon sa Ginoo niining tuiga?
[Mga hulagway sa panid 21]
Ang panahon sa Memoryal maoy angayang panahon alang sa dugang pagbasa sa Bibliya ug pagpakigbahin sa buluhaton sa pagsangyaw sa Gingharian