Nagatudlo Ka ba Sama sa Pagtudlo ni Jesus?

“Nahingangha ang mga panon sa katawhan sa iyang paagi sa pagpanudlo; kay nagtudlo siya kanila ingong tawo nga adunay awtoridad, ug dili ingon sa ilang mga eskriba.”​—MATEO 7:28, 29.

 1. Kinsay misunod kang Jesus samtang siya nanudlo sa Galilea, ug unsa ang reaksiyon ni Jesus?

BISAG asa moadto si Jesus, modugok ang mga tawo kaniya. “Milibot siya lukop sa tibuok Galilea, nga nanudlo sa ilang mga sinagoga ug nagawali sa maayong balita sa gingharian ug nagapang-ayo sa tanang matang sa balatian ug sa tanang matang sa kaluyahon diha sa mga tawo.” Sa dihang mikaylap ang taho sa iyang mga kalihokan, “dakong mga panon sa katawhan ang misunod kaniya gikan sa Galilea ug Decapolis ug Jerusalem ug Judea ug gikan sa pikas daplin sa Jordan.” (Mateo 4:23, 25) Sa pagkakita kanila, “siya giabot ug kaluoy kanila, tungod kay sila pinanitan ug binalibag samag mga karnero nga walay pastol.” Samtang siya nagtudlo namatikdan nila ang kaluoy o malumo nga pagmahal nga iyang gibati alang kanila; kadto nahisama sa usa ka makahumpay nga haplas sa ilang mga samad nga maoy nakadani kanila ngadto kaniya.​—Mateo 9:35, 36.

 2. Gawas sa mga milagro ni Jesus, unsay nakapadugok sa panonpanong katawhan?

² Pagkadako sa milagro ang gihimo ni Jesus sa pag-ayo sa lawas​—sa paghimo sa mga sanlahon nga mahinlo, sa mga bungol nga makadungog, sa mga buta nga makakita, sa mga bakol nga makalakaw, sa pagbanhaw sa mga patay! Siyempre kining katingalahang mga pasundayag sa gahom ni Jehova nga nagalihok diha kang Jesus makapadugok gayod sa panonpanong mga tawo! Apan dili mga milagro lamang ang nakapadugok kanila; ang dagkong mga panon sa mga tawo miabot usab alang sa espirituwal nga pagpang-ayo nga gitagana dihang si Jesus nagapanudlo. Matikdi ang ilang pagsanong, pananglitan, human nakadungog sa iyang iladong Wali sa Bukid: “Sa dihang nahuman na si Jesus niining mga pulonga, ang epekto mao nga nahingangha ang mga panon sa katawhan sa iyang paagi sa pagpanudlo; kay nagtudlo siya kanila ingong tawo nga adunay awtoridad, ug dili ingon sa ilang mga eskriba.” (Mateo 7:28, 29) Kutloon sa ilang mga rabbi ang binabang mga tradisyon lamang gikan sa karaang mga rabbi ingon nga mao ang awtoridad sa ilang mga pagtulon-an. Gitudloan sila ni Jesus nga may awtoridad nga gikan sa Diyos: “Ang mga butang nga akong ginapamulong, sumala sa gikasulti kanako sa Amahan, sa ingon akong ginapamulong kini sila.”​—Juan 12:50.

Iyang Pagpanudlo Nakaabot sa Kasingkasing

 3. Sa unsang paagi ang paghatod ni Jesus sa iyang mensahe lahi nianang sa mga eskriba ug mga Pariseo?

³ Ang kalainan tali sa pagtulon-an ni Jesus ug nianang sa mga eskriba ug sa mga Pariseo mao nga dili lamang ang diwa​—mga kamatuoran nga gikan sa Diyos nga lahi sa mabug-at nga binabang mga tradisyon nga gikan sa mga tawo—​kondili ang paagi usab sa iyang pagtudlo niini. Ang mga eskriba ug ang mga Pariseo mapahitas-on ug mapintas, magarbohong nagpangayog dungganong mga titulo ug matinamayong gitagad ang mga panon sa mga tawo ingong “tinunglo nga katawhan.” Apan, si Jesus mapaubsanon, malumo, malulot, maluloy-on, ug kanunayng mapahiuyonon, ug siya naluoy kanila. Si Jesus nagtudlo dili lamang sa tukmang mga pulong kondili sa madanihong mga pulong usab nga gikan sa iyang kasingkasing, nga nakaabot direkta sa mga kasingkasing sa iyang mga tigpatalinghog. Nadani ang mga tawo kaniya sa iyang malipayong mensahe, nga nakapukaw kanila sa pag-adto sa templo nga temprano pa sa pagpamati kaniya, ug nagpahimo kanila sa pagsunod gayod kaniya ug sa pagpamati kaniya nga may kahimuot. Panonpanon sa mga tawo ang nangabot sa pagpamati kaniya, nga nag-ingon: “Wala pa gayoy laing tawo nga nakapamulong ug sama niini.”​—Juan 7:46-49; Marcos 12:37; Lucas 4:22; 19:48; 21:38.

 4. Unsa ilabina ang nakapadani sa daghang tawo sa pagsangyaw ni Jesus?

⁴ Dayag, usa sa mga katarongan nga ang mga tawo nadani sa iyang pagtulon-an mao ang iyang paggamit ug mga ilustrasyon. Nakita ni Jesus ang nakita sa uban, apan siya naghunahuna sa mga butang nga wala mosantop sa ilang hunahuna. Ang mga liryo nga nanubo sa kaumahan, mga langgam nga nanaghimo sa ilang mga salag, mga lalaki nga nanagpugas ug binhi, mga magbalantay nga nanagdala pagbalik sa nangawalang mga karnero, mga babaye nga nanagtapak sa karaang mga sinina, mga bata nga nanagdula sa tiyanggihan, mga mangingisda nga nanagbutad sa ilang mga pukot​—kasagarang mga butang nga nakita sa tanan—​dili gayod ordinaryo sa mga mata ni Jesus. Bisan asa siya motan-aw, iyang makita kon unsay iyang magamit sa pag-ilustrar sa Diyos ug sa Iyang Gingharian o sa paghimog usa ka punto bahin sa tawhanong katilingban sa iyang palibot.

 5. Diha sa unsa gipasukad ni Jesus ang iyang mga ilustrasyon, ug unsay naghimo sa iyang mga ilustrasyon nga epektibo?

⁵ Ang mga ilustrasyon ni Jesus gipasukad diha sa matag-adlawng mga butang nga nakita sa mga tawo sa makadaghan, ug sa dihang ang mga kamatuoran ilangkit niining pamilyar nga mga butang, kini dali ug dulot nga masilsil sa mga hunahuna sa mga nagpatalinghog. Ang maong mga kamatuoran dili kay nadungog lamang; kini makita sa mga mata sa hunahuna ug dali nga mahinumdoman sa ulahi. Ang mga sambingay ni Jesus simple, nga walay makalibog nga mga materyal nga mahimong makababag ug makasanta sa ilang pagsabot sa mga kamatuoran. Tagda, pananglitan, ang sambingay bahin sa maayong silingan nga Samaritano. Imong tin-aw nga makita kon unsa gayod ang maayong silingan. (Lucas 10:29-37) Unya dihay ilustrasyon sa duha ka anak nga lalaki​—ang usa nga miingon nga siya moadto sa pagtrabaho sa ubasan apan wala diay, ang usa pa miingon nga siya dili moadto apan miadto sa pagtrabaho. Imong masabtan dayon kon unsa ang tinuod nga pagkamasinugtanon​—ang pagbuhat sa gitudlo nga buluhaton. (Mateo 21:28-31) Walay katulogon o naglatagaw nga mga hunahuna samtang buhi nga nagpanudlo si Jesus. Ang ilang mga hunahuna puliki sa pagpamati ug pagtan-aw.

Si Jesus Mapahiuyonon kon Kini Itugot Tungod sa Gugma

 6. Kanus-a ilabinang makatabang ang pagkamakataronganon, o pagkamapahiuyonon?

⁶ Sa makadaghang higayon sa dihang ang Bibliya maghisgot bahin sa pagkamakataronganon, ang potnot magpakita nga kini nagpasabot sa pagkamapahiuyonon. Ang kaalam nga gikan sa Diyos mapahiuyonon kon adunay nagpagaan nga mga kahimtang. Kita kinahanglang magmakataronganon, o mapahiuyonon, usahay. Ang mga ansiano kinahanglang andam makig-uyon kon kini itugot tungod sa gugma ug kon kinasingkasing ang paghinulsol. (1 Timoteo 3:3; Santiago 3:17) Si Jesus nagbilin ug dalayegong mga panig-ingnan sa pagkamakiuyonon, nga mihimog mga eksepsiyon sa pangatibuk-ang mga lagda sa dihang gikinahanglan ang kaluoy o kahangawa.

 7. Unsa ang pipila ka panig-ingnan sa pagkamapahiuyonon ni Jesus?

⁷ Kas-a si Jesus miingon: “Si bisan kinsa nga dili-moangkon kanako atubangan sa mga tawo, ako usab dili-moangkon kaniya atubangan sa akong Amahan nga anaa sa mga langit.” Apan wala niya isalikway si Pedro, bisag gilimod siya ni Pedro sa makatulo. Dihay nagpagaan nga mga kahimtang, nga dayag gitagad ni Jesus. (Mateo 10:33; Lucas 22:54-62) Dihay nagpagaan usab nga mga kahimtang sa dihang gilapas sa mahugaw nga babaye nga gitalinugo ang Kasugoan ni Moises pinaagi sa pagpakig-uban sa panon. Wala usab siya hukmi ni Jesus. Siya nakasabot sa iyang kalisdanan. (Marcos 1:40-42; 5:25-34; tan-awa usab ang Lucas 5:12, 13.) Gisultihan ni Jesus ang iyang mga apostol nga dili siya ipaila ingon nga Mesiyas, bisan pa siya wala mag-inistrikto sa pagsunod niadtong lagdaa sa dihang iyang gipaila ang iyang kaugalingon nga mao ang Mesiyas sa usa ka babayeng taga-Samaria diha sa atabay. (Mateo 16:20; Juan 4:25, 26) Niining tanang kahimtanga, ang gugma, kaluoy, ug kahangawa naghimo niining pagkamakiuyonon nga tukma.​—Santiago 2:13.

 8. Kanus-a gituis sa mga eskriba ug mga Pariseo ang mga lagda, ug kanus-a nga dili?

⁸ Lahi kini sa dili-makiuyonong mga eskriba ug mga Pariseo. Kon sila na ang malangkit ilang lapason ang mga tradisyon sa Igpapahulay sa pagdala nila sa turong baka ngadto sa tubig. O kon ang ilang torong baka o ilang anak nga lalaki mahulog sa atabay, ilang lapason ang Igpapahulay aron sa pagkuha kaniya. Apan kon bahin sa ordinaryong mga tawo, dili gayod sila makiuyonon! Sila “dili buot motarog [sa mga kinahanglanon] pinaagi sa ilang tudlo.” (Mateo 23:4; Lucas 14:5) Alang kang Jesus, ang mga tawo mas hinungdanon kay sa kadaghanan sa mga lagda; alang sa mga Pariseo, ang mga lagda mas hinungdanon kay sa mga tawo.

Pagkahimong “Anak sa Kasugoan”

 9, 10. Human mibalik sa Jerusalem, diin hikaplagi si Jesus sa iyang mga ginikanan, ug unsay ipasabot sa pagpangutana ni Jesus?

⁹ Ang pipila nagmulo nga usa lamang ka hitabo ang narekord sa panahon sa pagkabata ni Jesus. Apan daghan ang wala makaamgo sa pagkahinungdanon sa maong hitabo. Gitaho kini kanato sa Lucas 2:46, 47: “Human sa tulo ka adlaw ilang nakaplagan siya sa templo, nga naglingkod taliwala sa mga magtutudlo ug nagapamati kanila ug nagapangutana kanila. Apan kadtong tanan nga nagapamati kaniya padayong nahibulong sa iyang pagsabot ug sa iyang mga tubag.” Ang Theological Dictionary of the New Testament ni Kittel nagpatungha sa ideya nga niining bahina ang Gregong pulong alang sa “nagapangutana” dili lamang tungod sa kamausisaon sa usa ka bata. Ang pulong mahimong magpunting sa pagpangutana nga gamiton diha sa hudisyal nga pag-usisa, imbestigasyon, balos nga pangutana, bisan ang “mausisaon ug malansisong mga pangutana sa mga Pariseo ug mga Saduceo,” sama nianang gihisgotan diha sa Marcos 10:2 ug 12:18-23.

¹⁰ Ang mao gihapong diksiyonaryo nagpadayon: “Tungod niini nga paggamit mahimong ipangutana kon . . . ang [Lucas] 2:46 wala kaayo magpunting sa mausisahong pangutana sa bata kondili hinunoa sa Iyang malamposong pagpangatarongan. Mas mohaom ang [bersikulo] 47 sa ulahi nga panghunahuna.”a Ang hubad ni Rotherham sa bersikulo 47 nagpakita niana ingong usa ka kulbahinam nga pag-atubangay: “Karon ang tanan niadtong nakadungog kaniya nahingangha pag-ayo, tungod sa iyang pagsabot ug sa iyang mga tubag.” Ang Word Pictures in the New Testament ni Robertson nag-ingon nga ang ilang padayong kahibulong nagpasabot nga “sila nahingangha pag-ayo nga halos namudlat ang ilang mga mata.”

11. Unsay reaksiyon ni Maria ug Jose sa ilang nakita ug nadungog, ug unsay gisugyot sa usa ka teolohikanhong diksiyonaryo?

¹¹ Sa dihang ang mga ginikanan ni Jesus sa kataposan miabot sa templo, “nahingangha sila.” (Lucas 2:48) Si Robertson nag-ingon nga ang Gregong pulong niining pahayaga nagkahulogang “pag-igo, pag-abog pinaagi sa pagsuntok.” Siya midugang nga si Jose ug Maria “naigo” sa ilang nakita ug nadungog. Sa usa ka diwa, si Jesus maoy usa na ka katingalahang magtutudlo. Ug tungod niining hitaboa sa templo, ang diksiyonaryo ni Kittel nag-ingon nga “gisugdan na ni Jesus sukad sa Iyang pagkabata ang pagpakiglalis hangtod ang Iyang mga kaaway sa kataposan mosurender gayod.”

12. Unsay gipasiugda sa ulahing mga pagpakigdebate ni Jesus sa mga lider sa relihiyon?

¹² Ug sila gayod misurender! Sa mga tuig sa ulahi, pinaagi sa mao gihapong paagi sa pagpangutana gipildi ni Jesus ang mga Pariseo hangtod nga sila wala na ‘mangahas sukad niadtong adlawa sa pagpangutana kaniyag dugang pa.’ (Mateo 22:41-46) Ang mga Saduceo napahilom usab bahin sa pangutana labot sa pagkabanhaw, ug ‘nawad-an silag kaisog nga mosukna pa kaniyag usa ka pangutana.’ (Lucas 20:27-40) Ang mga eskriba wala usab mosaler. Human nakigdebate ang usa kanila kang Jesus, ‘walay si bisan kinsa pa nga may kaisog ang nangutana kaniya.’​—Marcos 12:28-34.

13. Unsay nagpahimo sa hitabo sa templo nga hinungdanon sa kinabuhi ni Jesus, ug unsa pang dugang kasayoran ang gisugyot niana?

¹³ Nganong kining hitaboa nga naglangkit kang Jesus ug sa mga magtutudlo sa templo mao ang usa nga napili nga iasoy bahin sa iyang pagkabata? Hinungdanon kaayong bahin kadto sa kinabuhi ni Jesus. Sa dihang siya mga 12 anyos pa, siya gitawag sa ulahi sa mga Hudiyo nga “anak sa kasugoan,” nga may kaakohan sa pagtuman sa tanang mga ordinansa niini. Sa dihang mireklamo si Maria kang Jesus bahin sa iyang nahatag nga kabalaka ngadto kaniya ug kang Jose, ang tubag sa iyang anak nagpaila nga siya malagmit nasayod sa milagrosong kinaiyahan sa iyang pagkahimugso ug sa iyang Mesiyasnong umaabot. Kana gisugyot pinaagi sa iyang pag-ingon nga sa direkta gayod nga paagi, ang Diyos mao ang iyang Amahan: “Nganong gipangita pa man ninyo ako? Wala ba kamo mahibalo nga ako kinahanglang maania sa balay sa akong Amahan?” Makaiikag, kini ang unang mga pulong gikan kang Jesus nga narekord sa Bibliya, ug kini nagpaila sa iyang pagkahibalo sa katuyoan ni Jehova sa pagpadala kaniya dinhi sa yuta. Busa, kining tibuok nga asoy maoy usa nga may dakong kahulogan.​—Lucas 2:48, 49.

Si Jesus Nahigugma ugNakasabot sa mga Bata

14. Unsang makapaikag nga mga punto sa asoy sa batan-ong si Jesus diha sa templo ang angay makat-onan sa mga batan-on?

¹⁴ Kining asoya angayng makapaikag ilabina sa mga batan-on. Kini nagpakita sa pagkamasiboton ni Jesus sa pagtuon samtang siya nagtubo ngadto sa pagkahingkod nga tawo. Ang mga rabbi sa templo nakugang gayod sa kaalam niining 12-anyos nga “anak sa kasugoan.” Bisan pa siya nagpadayon gihapon sa pagtrabaho uban kang Jose sa pandayan, “nagpadayon sa pagpasakop” kaniya ug kang Maria, ug nagtubo “sa pabor sa Diyos ug sa mga tawo.”​—Lucas 2:51, 52.

15. Sa unsang paagi si Jesus mapaluyohon sa mga batan-on sa panahon sa iyang yutan-ong ministeryo, ug unsay ipasabot niini alang sa mga batan-on karong adlawa?

¹⁵ Si Jesus mapaluyohon kaayo sa mga batan-on sa panahon sa iyang yutan-ong ministeryo: “Sa dihang nakita sa pangulong mga saserdote ug sa mga eskriba ang kahibulongang mga butang nga iyang gihimo ug ang mga batang lalaki nga nanagpaninggit diha sa templo ug nanag-ingon: ‘Luwasa, kami nagaampo, ang Anak ni David!’ sila naglagot ug miingon kaniya: ‘Imo bang nadungog ang ginaingon nila?’ Si Jesus miingon kanila: ‘Oo. Wala ba gayod ninyo mabasahi kini, “Gikan sa baba sa mga bata ug mga masuso ikaw nagtagana ug pagdayeg”?’” (Mateo 21:15, 16; Salmo 8:2) Siya sama usab ka mapaluyohon sa gatosan ka libong mga batan-on karong adlawa kinsa naghupot sa ilang pagkamaunongon ug nagahatag pagdayeg, ang uban kanila nagabuhat gani niana sa kapildihan sa ilang mga kinabuhi!

16. (a) Unsang leksiyon ang gitudlo ni Jesus sa iyang mga apostol pinaagi sa pagpatindog ug bata sa ilang taliwala? (b) Unsang makuyaw nga panahon sa kinabuhi ni Jesus nga siya sa gihapon may panahon alang sa mga bata?

¹⁶ Sa dihang ang mga apostol naglalis kon kinsa kanila ang labing dako, si Jesus miingon sa 12: “‘Kon adunay buot nga mauna, kinahanglan siyang maulahi sa tanan ug maalagad sa tanan.’ Ug siya mikuha ug usa ka bata, gipabarog kini sa ilang taliwala ug gibalikis ang iyang mga bukton niini ug miingon kanila: ‘Bisan kinsa nga magadawat sa usa nga ingon niining mga bataa pinasukad sa akong ngalan, nagadawat kanako; ug bisan kinsa nga magadawat kanako, nagadawat, dili lamang kanako, apan usab kaniya nga nagpadala kanako.’” (Marcos 9:35-37) Dugang pa, sa dihang siya mipaingon sa Jerusalem sa kataposang higayon, aron atubangon ang makalilisang nga kasakit ug kamatayon, siya migahig panahon alang sa mga bata: “Pasagdi ang mga bata nga moduol kanako; ayaw sila pagpugngi, kay ang gingharian sa Diyos ilaha sa mga ingon kanila.” Iya dayon nga “gikugos ang mga bata ug misugod sa pagpanalangin kanila, nga nagpatong sa iyang mga kamot diha kanila.”​—Marcos 10:13-16.

17. Nganong mas masayon alang kang Jesus ang pagpakigsuod sa mga bata, ug unsa ang angay hinumdoman sa mga bata bahin kaniya?

¹⁷ Si Jesus nahibalo kon sama sa unsa ang pagkahimong usa ka bata diha sa kalibotan sa mga hamtong. Siya nagkinabuhi uban sa mga edaran, nagtrabaho uban kanila, nakasinatig pagkahimong sakop kanila, ug nabati usab niya ang mainit, masaligong pagbati nga ilang gihigugma. Mga bata, ang mao gihapong Jesus maoy inyong higala; siya namatay alang kaninyo, ug kamo mahimong mabuhi nga walay kataposan kon inyong sundon ang iyang mga sugo.​—Juan 15:13, 14.

18. Unsang makapalipay nga hunahuna ang kanunay natong ibutang sa kaisipan, ilabina sa mga panahon sa kalisod ug kapeligrohan?

¹⁸ Ang pagtuman sa gisugo ni Jesus dili ingon ka lisod kon tan-awon. Mga batan-on, anaa siya andam sa pagtabang kaninyo ug kang bisan kinsa, sama sa atong mabasa diha sa Mateo 11:28-30: “Umari kanako, kamong tanan nga nagabudlay ug nabug-atan, ug ako magapalagsik kaninyo. Isangon ang akong yugo diha kaninyo [o, “Pas-ana ang akong yugo uban kanako,” potnot] ug pagkat-on gikan kanako, kay ako malumog-buot ug mapaubsanon sa kasingkasing, ug makakaplag kamog kahayahay alang sa inyong mga kalag. Kay maluloton ang akong yugo ug gaan ang akong luwan.” Handurawa lang, samtang ikaw nagalakaw sa kinabuhi sa pag-alagad kang Jehova, si Jesus nagalakaw tapad kanimo, naghimo sa yugo nga masayon ug sa luwan nga magaan. Makapalipay gayod kana nga palandongon alang kanatong tanan!

19. Unsang mga pangutana bahin sa mga paagi ni Jesus sa pagpanudlo ang mahimo natong sublion sa matag karon ug unya?

¹⁹ Human sublia ang pipila lang ka paagi sa pagtudlo ni Jesus, kita ba nagatudlo sama sa iyang pagtudlo? Sa dihang makakita kita ug masakiton sa pisikal o gigutom sa espirituwal, mapalihok ba kita sa kaluoy nga buhaton ang kutob sa atong mahimo sa pagtabang kanila? Sa dihang kita manudlo sa uban, nagatudlo ba kita sa Pulong sa Diyos, o, sama sa mga Pariseo, nagatudlo ba kita sa atong kaugalingong mga hunahuna? Alisto ba kita sa pagkakita sa adlaw-adlaw nga mga butang sa atong palibot nga magamit sa pagsaysay, paghulagway, pagpatin-aw, ug sa pagpauswag sa pagsabot sa espirituwal nga mga kamatuoran? Naglikay ba kita sa istriktong pagsunod sa pipila ka lagda sa dihang, tungod sa mga sirkumstansiya, mas maayong ipakita ang gugma ug kaluoy pinaagi sa pagkamapahiuyonon sa pagpadapat sa maong mga lagda? Ug komosta ang bahin sa mga bata? Nagpakita ba kita kanila ug samang malumong kabalaka ug mahigugmaong-kalulot nga gihimo ni Jesus? Ginadasig mo ba ang imong mga anak sa pagtuon sama sa paagi sa pagtuon ni Jesus sa bata pa? Molihok ka ba nga may kalig-on sama kang Jesus apan andam sa pagdawat nga mainiton sa mga mahinulsolon, sama sa paagi sa pagtigom sa himungaan sa iyang mga piso ilalom sa iyang mga pako?​—Mateo 23:37.

20. Uban sa unsang makapalipay nga hunahuna nga atong lipayon ang atong kaugalingon samtang kita nagaalagad sa atong Diyos?

²⁰ Kon kita maningkamot sa pagbuhat kutob sa atong maarangan sa pagtudlo sama sa pagtudlo ni Jesus, tino nga tugotan niya kitang ‘magpas-an sa iyang yugo uban kaniya.’​—Mateo 11:28-30.

[Footnote]

Nahinumdom Ka Ba?

◻ Nganong ang katawhan midugok kang Jesus?

◻ Nganong si Jesus usahay mapahiuyonon sa pagsunod sa pipila ka lagda?

◻ Unsay atong makat-onan gikan sa pagpangutana ni Jesus sa mga magtutudlo sa templo?

◻ Unsang mga leksiyon ang atong makat-onan gikan sa relasyon ni Jesus sa mga bata?