LEKSIYON 03
Makasalig ba Ka sa Bibliya?
Ang Bibliya daghag saad ug tambag. Tingali gusto kang mahibalo kon unsay gitudlo niini, pero basig dili pod ka gustong motuo dayon. Makasalig ba ka sa mga saad ug tambag nianang karaan nga basahon? Katuohan ba gyod ang giingon sa Bibliya kon sa unsang paagi magmalipayon karon ug sa umaabot? Milyonmilyon ang nagtuo niana. Palihog susiha kon makatuo pod ba ka sa Bibliya.
1. Tinuod ba ang atong mabasa sa Bibliya?
Ang Bibliya nag-ingon nga ang mabasa dinhi maoy “tukmang mga pulong sa kamatuoran.” (Ecclesiastes 12:10) Kini naghisgot bahin sa tinuod nga mga hitabo ug tinuod nga mga tawo. (Basaha ang Lucas 1:3; 3:1, 2.) Daghang historyano ug arkeologo ang nagpamatuod nga sakto ang mga petsa nga gihisgotan sa Bibliya ug tinuod ang mga tawo, lugar, ug hitabo nga gihisgotan niini.
2. Nganong makaingon ta nga ang Bibliya kasaligan gihapon bisag karaan na?
Naay daghang impormasyon nga daan nang gisulti sa Bibliya sa wala pa kini mahibaloi sa mga tawo. Pananglitan, naghisgot ni ug mga topiko bahin sa siyensiya. Daghan sa giingon sa Bibliya bahin sa maong mga topiko wala tuohi sa daghang tawo sa panahon nga gisulat kini. Pero napamatud-an karon sa siyensiya nga sakto ang giingon sa Bibliya. “Kanunay kining kasaligan, karon ug hangtod sa hangtod.”—Salmo 111:8.
3. Nganong makasalig ta sa giingon sa Bibliya bahin sa umaabot?
Ang Bibliya naay mga tagnaa bahin sa “mga butang nga wala pa mahimo [o, mahitabo].” (Isaias 46:10) Abante kaayong gitagna niini ang daghang hitabo. Detalyado sab kaayong gihisgotan niini ang kahimtang sa kalibotan karon. Niini nga leksiyon, atong hisgotan ang pipila sa mga tagna sa Bibliya. Mobilib gyod ka sa kasakto niini!
TUN-IG DUGANG
Sayra kon sa unsang paagi ang siyensiya nagpamatuod nga sakto ang giingon sa Bibliya, ug susiha ang pipila ka katingalahang tagna sa Bibliya.
4. Ang siyensiya ug Bibliya wala magkasumpaki
Sa karaang panahon, daghan ang nagtuo nga ang yuta naay gipatongan. I-play ang VIDEO.
Matikdi ang narekord sa basahon sa Job mga 3,500 ka tuig kanhi. Basaha ang Job 26:7, ug dayon hisgoti kini nga pangutana:
Nganong makapabilib ang giingon sa Bibliya nga ang yuta ‘nagbitay sa wala’?
Niadto lang mga katuigan sa 1800 nga nasabtan pag-ayo ang siklo sa tubig (water cycle). Pero matikdi ang giingon sa Bibliya mga 3,500 ka tuig kanhi. Basaha ang Job 36:27, 28, ug dayon hisgoti kini nga mga pangutana:
Nganong makapabilib ang giingon sa Bibliya bahin sa siklo sa tubig?
Nalig-on ba ang imong pagsalig sa Bibliya tungod sa mga teksto nga imong gibasa?
5. Ang Bibliya nagtagna ug importanteng mga hitabo
Basaha ang Isaias 44:27–45:2, ug dayon hisgoti kini nga pangutana:
Unsang mga detalye ang gitagna sa Bibliya 200 ka tuig una pa mapildi ang Babilonya?
Ang kasaysayan nagpamatuod nga niadtong 539 B.C.E.b napildi ni Haring Ciro sa Persia ug sa iyang kasundalohan ang siyudad sa Babilonya. Ilang gipasimang ang suba nga naghatag ug proteksiyon sa siyudad. Nakasulod sila sa siyudad agi sa ganghaan (gate) nga wala masirad-i, ug ilang nailog ang siyudad nga walay nahitabong giyera. Karon, paglabay sa kapig 2,500 ka tuig, ang Babilonya gun-ob na kaayo. Matikdi kon unsay gitagna sa Bibliya.
Basaha ang Isaias 13:19, 20, ug dayon hisgoti kini nga pangutana:
Nganong makaingon ta nga natuman gyod ni nga tagna?
Ang nagun-ob nga Babilonya naa sa Iraq
6. Gitagna sa Bibliya ang mga hitabo karon
Gitawag sa Bibliya ang atong panahon ingong “kataposang mga adlaw.” (2 Timoteo 3:1) Matikdi kon unsay gitagna sa Bibliya bahin niini nga panahon.
Basaha ang Mateo 24:6, 7, ug dayon hisgoti kini nga pangutana:
Unsang dagkong panghitabo ang giingon sa Bibliya nga mahitabo sa kataposang mga adlaw?
Basaha ang 2 Timoteo 3:1-5, ug dayon hisgoti kini nga mga pangutana:
Unsang kinaiya sa mga tawo ang giingon sa Bibliya nga makita sa kataposang mga adlaw?
Asa ani nga mga kinaiya ang imong nakita?
ANG UBAN MOINGON: “Dili tinuod ang mga estorya sa Bibliya.”
Para nimo, unsa ang pinakalig-on nga pamatuod nga kasaligan ang Bibliya?
SUMARYO
Ang kasaysayan, siyensiya, ug mga tagna nagpakita nga makasalig ka sa Bibliya.
Review
Tinuod ba ang atong mabasa sa Bibliya?
Unsay gihisgotan sa Bibliya nga uyon sa siyensiya?
Nagtuo ba ka nga ang Bibliya nagtagna bahin sa umaabot? Nganong kanay imong gituohan?
SUSIHA
Naa bay giingon ang Bibliya nga napamatud-an sa siyensiya nga sayop?
Unsay giingon sa Bibliya bahin sa “kataposang mga adlaw”?
“6 ka Tagna sa Bibliya nga Imong Nakitang Natuman” (Ang Bantayanang Torre, Mayo 1, 2011)
Sayra kon sa unsang paagi natuman ang mga tagna sa Bibliya bahin sa Imperyo sa Gresya.
Sayra kon sa unsang paagi ang mga tagna sa Bibliya nakausab sa panglantaw sa usa ka tawo bahin sa Bibliya.
“Para Nako, Walay Diyos” (Ang Bantayanang Torre Num. 5 2017)
a Ang tagna maoy mga mensahe sa Diyos bahin sa umaabot nga mga hitabo.
b Ang B.C.E. nagkahulogang “Before the Common Era,” ug ang C.E. nagkahulogang “Common Era.”