NAHINUMDOM KA BA?

Nabasa ba nimog maayo ang bag-ong mga gula sa Ang Bantayanang Torre? Sulayi kon makatubag ka sa mosunod nga mga pangutana:

Sa Nisan 14, kanus-a ihawon ang nating karnero sa Paskuwa?

Ang pipila ka hubad sa Bibliya nag-ingon nga kini ihawon “taliwala sa duha ka gabii,” buot ipasabot, sa pagkilumkilom—human sa pagsalop sa adlaw apan samtang hayag-hayag pa. (Ex. 12:6)—12/15, panid 18-19.

Unsang mga prinsipyo sa Bibliya ang mogiya sa mga batan-on sa paghimog maalamong mga desisyon?

Ang tulo mao ang (1) Pangitaon pag-una ang Gingharian sa Diyos ug ang iyang pagkamatarong. (Mat. 6:19-34) (2) Malipay nga moalagad sa uban. (Buh. 20:35) (3) Malipay sa pag-alagad kang Jehova samtang batan-on pa. (Eccl. 12:1)—1/15, panid 19-20.

Unsang upat ka magkakabayo ang midasdas sukad sa 1914?

Si Jesus, nga nagsakay sa puting kabayo, nagpalagpot kang Satanas ug sa iyang mga demonyo gikan sa langit. Ang nagsakay sa kabayo nga ang bulok samag kalayo naglarawan sa mga gubat nga nag-apektar sa katawhan. Ang nagsakay sa itom nga kabayo naglarawan sa gutom. Ang nagsakay sa luspad nga kabayo nagpahinabog kamatayon pinaagig makamatayng sakit, nga nakapatay ug milyonmilyon. (Pin. 6:2-8)—2/1, panid 6-7.

Kanus-a mahitabo “ang kasal sa Kordero”? (Pin. 19:7)

“Ang kasal sa Kordero” mahitabo dihang matapos na sa Hari, si Jesu-Kristo, ang pagpangdaog, sa ato pa, dihang malaglag na ang Dakong Babilonya ug mahuman na ang gubat sa Armagedon.—2/15, panid 10.

Nganong ang mga Hudiyo sa adlaw ni Jesus “nagpaabot” sa Mesiyas? (Luc. 3:15)

Dili kita makaseguro nga ang unang siglong mga Hudiyo nakasabot sa tagna ni Daniel bahin sa Mesiyas sama kanato. (Dan. 9:24-27) Bisan pa niana, lagmit nadungog nila ang gipahibalo sa mga manulonda ngadto sa pipila ka magbalantay sa karnero o sa giingon sa propetisang si Ana pagkakita niya sa masusong si Jesus diha sa templo. Dugang pa, ang mga astrologo nangita sa “usa nga natawong hari sa mga Hudiyo.” (Mat. 2:1, 2) Sa ulahi, miingon si Juan nga Tigbawtismo nga ang Kristo hapit nang moabot.—2/15, panid 26-27.

Sa unsang paagi nato malikayan nga ang atong Oo mahimong Dili? (2 Cor. 1:18)

Tinuod nga tungod sa mga kahimtang nga dili nato kontrolado, dili nato matuman usahay ang atong saad. Apan kon mosaad o makigsabot ta, angay gyod natong paningkamotan nga tumanon kana.—3/15, panid 32.

Sa unsang paagi kita makasukol sa tentasyon sa pagtan-awg pornograpiya?

Ang tulo ka paagi nga makatabang mao ang (1) Paglingiw dayon kon makakitag law-ay nga hulagway. (2) Pagbantay sa atong hunahuna pinaagi sa paghunahunag positibong mga butang ug pag-ampo sa Diyos. (3) Pagbantay sa atong lakang pinaagi sa paglikay sa pornograpikong mga salida o Web site.—4/1, panid 10-12.

Unsay mahimong kapeligrohan kon ang usa ka Kristohanon mobiya sa iyang pamilya aron manarbaho sa laing nasod?

Kon dili mag-ubag puyo ang ginikanan ug mga anak, ang mga anak makaagom sa emosyonal ug moral nga kadaot. Mahimong mayugot sila sa ilang ginikanan. Ug ang mga hamtong nga layo sa ilang kapikas mahimong mag-atubang ug seksuwal nga mga tentasyon.—4/15, panid 19-20.

Nganong balion ang bitiis sa mga kriminal nga gilansang sa estaka?

Ang mga Romano naglansang ug mga kriminal diha sa estaka. Ang mga Hudiyo mihangyo nga balion ang bitiis sa mga kriminal nga gilansang tupad kang Jesus. Sa paghimo niana, ang mga kriminal maglisod pagginhawa, nga makapadali sa ilang kamatayon. Busa, dili sila kinahanglang magpabilin sa estaka sa tibuok gabii. (Deut. 21:22, 23)—5/1, panid 11.

Unsang upat ka pangutana ang angay natong hinumdoman dihang moduol sa mga tawo diha sa ministeryo?

Kinsa sila? Asa ko nakig-estorya nila? Kanus-a ko nakig-estorya nila? Unsaon nako sila pag-estorya?—5/15, panid 12-15.

Unsa ka makamatay ang pagpanigarilyo?

Sa miaging siglo, kini mipatayg 100,000,000 ka tawo. Karon, kini mokalas ug mga 6,000,000 ka kinabuhi kada tuig.—6/1, panid 3.