Pagministeryo sa Ubang Dapit sa Galilea

Tibuok adlaw nga puliki si Jesus ug ang upat ka tinun-an didto sa Capernaum. Pagkagabii, gidala sa mga taga-Capernaum ang mga masakiton aron ayohon ni Jesus. Halos wala na siyay panahon para sa iyang kaugalingon.

Pagkaugma, sayo sa buntag, samtang ngitngit pa, mibangon si Jesus ug miadto sa gawas. Nangita siyag mingaw nga lugar aron makaampo sa iyang Amahan. Pero namatikdan dayon ni “Simon ug sa iyang mga kauban” nga wala si Jesus maong gipangita nila siya. Lagmit si Pedro ang nanguna sa pagpangita kay didto man sa iyang balay nagsaka si Jesus.—Marcos 1:36; Lucas 4:38.

Pagkakita nila kang Jesus, si Pedro miingon: “Ang tanan nangita nimo.” (Marcos 1:37) Busa gusto gyod sa mga taga-Capernaum nga magpabilin didto si Jesus. Ila gyong giapresyar ang mga gihimo ni Jesus, maong “sila mihangyo nga dili siya mobiya.” (Lucas 4:42) Pero, ang pangunang tumong ba sa pag-anhi ni Jesus sa yuta mao lang ang pagpang-ayo? Ug nianang lugara lang ba niya himoon ang iyang buluhaton? Unsay iyang gisulti bahin niini?

Gitubag ni Jesus ang iyang mga tinun-an: “Mangadto ta sa laing dapit, sa kasikbit nga mga lungsod aron makawali sab ko didto, kay mianhi ko alang niini nga katuyoan.” Gani, ang mga tawong mihangyo niya nga magpabilin, iyang giingnan: “Kinahanglan usab nakong isangyaw ang maayong balita sa Gingharian sa Diyos ngadto sa ubang siyudad, kay ako gipadala alang niini.”—Marcos 1:38; Lucas 4:43.

Usa sa pangunang mga rason kon nganong mianhi si Jesus sa yuta mao ang pagsangyaw bahin sa Gingharian sa Diyos. Ang maong Gingharian magbalaan sa ngalan sa iyang Amahan ug wad-on niini ang tanang sakit. Pinaagi sa pagpang-ayo, gipamatud-an ni Jesus nga gipadala siya sa Diyos. Gatosan ka tuig kanhi, si Moises mihimo sab ug mga milagro aron pamatud-an nga gipadala siya sa Diyos.—Exodo 4:1-9, 30, 31.

Busa mibiya si Jesus sa Capernaum aron mosangyaw sa ubang mga siyudad. Mikuyog niya ang iyang upat ka tinun-an—ang magsoong si Pedro ug Andres, apil sab ang magsoong si Juan ug Santiago. Usa ka semana una niini, gidapit sila ni Jesus nga mokuyog niya sa pagsangyaw.

Milampos gayod ang pagsangyaw ni Jesus ug sa iyang upat ka tinun-an sa tibuok Galilea! Gani, daghan ang nakabalita bahin kang Jesus. “Ang balita bahin kaniya mikaylap sa tibuok Sirya,” sa rehiyon sa 10 ka siyudad nga gitawag ug Decapolis, ug sa tabok sa Suba sa Jordan. (Mateo 4:24, 25) Daghang tawo niining mga lugara, ingon man sa Judea, ang misunod kang Jesus ug sa iyang mga tinun-an. Daghag gidala kaniya nga masakiton. Wala sila pakyasa ni Jesus, kay giayo niya ang mga masakiton ug gipalayas ang daotang mga espiritu gikan sa mga tawong gidemonyohan.