Kinabuhi ug Ministeryo ni Jesus

Iyang Gihikap ang Iyang Biste

ANG balita mahitungod sa pag-uli ni Jesus gikan sa Decapolis nakaabot sa Capernaum, ug ang dakong panon nagtapok sa daplin sa dagat aron sa pagdawat kaniya. Pihong sa maong panahon ilang nadunggan nga iyang gipalinaw ang bagyo ug giayo ang mga tawong gidemonyohan. Karon, samtang siya mipaingon sa baybayon, sila mitapok kaniya, nga ikag ug malaomon.

Usa niadtong maikagon nga makakita kang Jesus mao si Jairo, usa ka opisyal nga tagdumala sa sinagoga. Siya mihapa sa tiilan ni Jesus ug nangaliyupong balikbalik: “Ang akong batang babaye anaa sa grabeng kahimtang. Mahimo bang mouban ka ug pandongan mo siya sa imong mga kamot aron siya mamaayo ug mabuhi.” Sanglit siya maoy bugtong niyang anak ug 12 anyos pa lamang, siya minahal kaayo ni Jairo.

Si Jesus misugot ug, nga gikuyogan sa panon, nagpadulong sa balay ni Jairo. Mahanduraw nato ang kaukyab sa katawhan samtang sila nagpaabot ug laing milagro. Apan ang pagtagad sa usa ka babaye diha sa panon nasentro sa iyang kaugalingong grabeng problema.

Sulod sa 12 ka dugayng katuigan kining bayhana nag-antos sa paghinugo. Siya miadto sa sunodsunod nga doktor, nga migugol sa tanan niyang salapi sa mga tambal. Apan siya wala maayo; hinunoa, iyang problema migrabe lamang.

Sumala sa imong lagmit mapabilhan, gawas nga nakapaluya kaayo kaniya, ang iyang sakit makauulaw usab ug makapaubos. Ang usa sa linangkob dili mohisgot sa publiko sa maong sakit. Dugang pa, ilalom sa Moisesnong Kasugoan ang paghinugo mohimo sa usa ka babaye nga hugaw, ug si bisan kinsang makahikap kaniya o sa iyang bisteng namantsahan sa dugo kinahanglang maghugas ug mahimong hugaw hangtod sa gabii.

Ang babaye nakadungog sa mga milagro ni Jesus ug sa maong panahon nangita kaniya. Tungod sa iyang pagkahugaw, siya miagi latas sa panon nga dili madayag kutob sa mahimo, nga miingon sa iyang kaugalingon: “Kon unta mahikap ko ang iyang panggawas nga biste ako mamaayo.” Sa dihang iyang nahimo kana, dihadiha iyang nabatyagan nga mihunong ang iyang paghinugo!

“Kinsa ba ang mihikap kanako?” Pagkadako gayod sa iyang kakugang sa maong mga pulong ni Jesus! Unsaon niya pagkasayod? ‘Magtutudlo,’ mitutol si Pedro, ‘ang panon nagaalirong kanimo ug nagadutdot kanimo, ug ikaw moingon, “Kinsay mihikap kanako?”’

Sa pagtan-aw sa palibot alang sa babaye, si Jesus misaysay: “May mihikap kanako, kay akong nasabtan nga ang gahom mibiya kanako.” Sa pagkamatuod, kadto dili ordinaryong paghikap, kay ang pagkaayo nga misangpot nagkuha man sa kusog ni Jesus.

Sa pagkasabot nga siya dili makalikay nga mamatikdan, ang babaye miduol ug mihapa sa atubangan ni Jesus, nga nahadlok ug nangurog. Atubangan sa tanang tawo, iyang gisulti ang tibuok kamatuoran mahitungod sa iyang sakit ug sa unsang paagi siya naayo sa bag-o pa gayod.

Kay natandog sa bug-os niyang pagsugid, si Jesus maluluy-ong naglipay kaniya: “Anak, ang imong pagtuo nag-ayo kanimo. Lumakaw ka sa pakigdait, ug magmaayo sa panglawas gikan sa imong grabeng sakit.” Pagkanindot nga masayrang ang Usa nga napili sa Diyos sa pagmando sa yuta maoy mainiton, maluluy-ong tawo, kinsa nagamahal sa katawhan ug may gahom sa pagtabang kanila! Mateo 9:18-22; Marcos 5:21-34; Lucas 8:40-48; Levitico 15:25-27.

◆ Kinsa si Jairo, ug nganong siya miadto kang Jesus?

◆ Unsa ang problema sa usa ka babaye, ug nganong ang pag-adto kang Jesus alang sa tabang lisod kaayo alang kaniya?

◆ Sa unsang paagi naayo ang babaye, ug giunsa siya sa paglipay ni Jesus?