Kinabuhi ug Ministeryo niJesus

Sa Dihang Gibanhaw si Lazaro

SI Jesus, uban niadtong mikuyog niya, miabot na karon sa handomanang lubnganan ni Lazaro. Sa pagkamatuod, kini maoy usa ka langob nga dunay bato nga gibutang sa ganghaan. “Kuhaa ang bato,” miingon si Jesus.

Mitutol sa Marta, nga wala makasabot sa buhaton ni Jesus. “Ginoo,” siya miingon, “baho na siya karon kay upat na man ka adlaw ang milabay.”

Apan si Jesus nangutana: “Wala ba ako mag-ingon kanimo nga kon motuo ikaw makita mo ang himaya sa Diyos?”

Busa gikuha ang bato. Dayon gihangad ni Jesus ang iyang mga mata ug miampo: “Amahan, nagapasalamat ako kanimo nga gipamatian mo ako. Matuod, ako nahibalo nga ikaw mamati kanako sa kanunay; apan gipamulong ko kini tungod sa panon sa katawhan nga nagaalirong kanako, aron sila motuo nga ikaw mao ang nagpadala kanako.” Miampo si Jesus sa atubangan sa katilingban aron mahibalo ang mga tawo nga ang iyang buhaton mahimo tungod sa gahom nga madawat gikan sa Diyos. Dayon siya misinggit sa makusog nga tingog: “Lazaro gumula ka!”

Ug niana, migula si Lazaro. Ang iyang mga kamot ug tiil binugkosan ug mga bendahi, ug ang iyang nawong naputos sa panapton. “Badbari ninyo siya ug palakta siya,” miingon si Jesus.

Sa pagkakita sa milagro, ang mga Hudiyo nga miabot aron sa paglipay kang Maria ug Marta mituo kang Jesus. Apan, ang uban milakaw aron sa pagsulti sa mga Pariseo sa nahitabo. Sila ug ang labaw nga mga saserdote dalidaling mihikay ug tigom sa hataas nga korteng Hudiyohanon, ang Sanhedrin.

Ang Sanhedrin giapilan sa mga Pariseo ug mga Saduceo, sa labaw nga mga saserdote, ang presenteng hataas nga saserdote, si Caipas, ug ang hataas nga mga saserdote niadto. Kini ang

gikagul-an: “Unsa may atong buhaton, kay kining tawhana nagahimog daghang milagro? Kon pasagdan ta siya, ang tanan motuo kaniya, ug ang mga Romanhon manganhi ug ilang laglagon ang atong balaang dapit ug ang atong nasod.”

Bisag miadmiter ang relihiyosong mga lider nga si Jesus “nakahimog daghang milagro,” ang ilang gikabalak-an lang mao ang ilang kaugalingong posisyon ug awtoridad. Ang pagbanhaw kang Lazaro maoy dako kaayong hampak sa mga Saduceo, sanglit sila dili man motuo ug pagkabanhaw.

Si Caipas, nga tingali usa ka Saduceo, misulti karon, nga nag-ingon: “Kamo mga walay alamag, ug kamo wala gani makasabot nga maoy maayo alang kaninyo nga usa lamang ka tawo ang mamatay alang sa katawhan ug nga dili ang tibuok nasod maoy pagalaglagon.”

Giimpluwensiyahan sa Diyos si Caipas sa pagsulti niini, kay si apostol Juan sa ulahi misulat: “Kini, pinaagi, [kang Caipas] nagsulti dili sa kaugalingon niyang pagbulot-an.” Ang buot nga ipasabot ni Caipas mao nga angay patyon si Jesus aron mapugngan Siya gikan sa dugang pagdaot sa ilang mga posisyon sa awtoridad ug impluwensiya. Apan, sumala kang Juan, ‘si Caipas nanagna nga si Jesus mamatay dili alang sa nasod lamang, kondili usab sa pagtigom sa mga anak sa Diyos.’ Ug, sa pagkamatuod, maoy katuyoan sa Diyos nga ang iyang Anak mamatay ingong lukat alang sa tanan.

Si Caipas karon milampos sa pagpaimpluwensiya sa Sandhedrin sa paghimog plano sa pagpatay kang Jesus. Apan si Jesus, nga hayan nakahibalo niining mga plano gikan kang Nicodemus, nga usa ka membro sa Sanhedrin nga mahigalon kaniya, mipalayo gikan didto. Juan 11:38-54.

◆ Nganong nag-ampo si Jesus sa atubangan sa katilingban sa wala pa magbanhaw kang Lazaro?

◆ Unsay reaksiyon sa uban nga nakakita sa pagbanhaw?

◆ Unsay nagpakita sa pagkadaotan sa mga membro sa Sanhedrin?

◆ Unsay tuyo ni Caipas, unsay gipatagna kaniya sa Diyos?