“Ang Espiritu Nagasusi sa Lawom nga mga Butang sa Diyos”
“Ginasusi sa espiritu ang tanang butang, bisan ang lawom nga mga butang sa Diyos.”—1 COR. 2:10.
1. Unsang papel sa balaang espiritu ang gipasiugda ni Pablo sa 1 Corinto 2:10, ug unsang mga pangutana ang motungha?
MAPASALAMATON gayod kita sa paglihok sa balaang espiritu ni Jehova! Ang Kasulatan naghisgot sa espiritu ingong magtatabang, gasa, tigpamatuod, ug usa nga mangamuyo alang kanato. (Juan 14:16; Buh. 2:38; Roma 8:16, 26, 27) Si apostol Pablo nagpasiugda sa laing hinungdanong papel sa balaang espiritu: “Ginasusi sa espiritu ang tanang butang, bisan ang lawom nga mga butang sa Diyos.” (1 Cor. 2:10) Sa pagkatinuod, gigamit ni Jehova ang iyang balaang espiritu sa pagpadayag sa lawom nga espirituwal nga mga kamatuoran. Kon wala pa ang tabang niini, may masabtan kaha kita sa mga katuyoan ni Jehova? (Basaha ang 1 Corinto 2:9-12.) Hinunoa, dunay mga pangutana nga motungha: Sa unsang paagi ‘ang espiritu nagasusi sa lawom nga mga butang sa Diyos’? Kinsay gigamit ni Jehova sa pagpadayag niining mga butanga niadtong unang siglo K.P.? Sa unsa ug pinaagi ni kinsa nga ang espiritu nagasusi niining lawom nga mga butang sa atong adlaw?
2. Unsa ang duha ka paagi nga molihok ang espiritu?
2 Si Jesus naghisgot ug duha ka paagi nga molihok ang espiritu. Sa hapit na siyang mamatay, giingnan niya ang iyang mga apostoles: “Ang magtatabang, ang balaang espiritu, nga ipadala sa Amahan sa akong ngalan, siya magtudlo kaninyo sa tanang butang ug magpahinumdom kaninyo sa tanang butang nga akong gisulti kaninyo.” (Juan 14:26) Busa, ang balaang espiritu molihok ingong magtutudlo ug tigpahinumdom. Ingong magtutudlo, motabang kini sa mga Kristohanon sa pagsabot sa mga butang nga wala nila masabti. Ingong tigpahinumdom, motabang kini kanila sa paghinumdom ug sa pagpadapat sa hustong paagi sa mga butang nga gipatin-aw.
Sa Unang Siglo
3. Unsay giingon ni Jesus nga nagpaila nga anam-anam nga ipadayag ang “lawom nga mga butang sa Diyos”?
3 Gitudloan ni Jesus ang iyang mga tinun-an ug daghang kamatuoran nga bag-o kanila. Apan, daghan pa kaayo silag angayng makat-onan. Giingnan ni Jesus ang iyang mga apostoles: “Duna pa akoy daghang butang nga isulti kaninyo, apan dili pa kamo makadaog sa pagdala [o, makasabot] niini sa pagkakaron. Hinunoa, sa dihang moabot siya, ang espiritu sa kamatuoran, siya magatultol kaninyo ngadto sa tibuok nga kamatuoran.” (Juan 16:12, 13) Busa gipaila ni Jesus nga pinaagi sa balaang espiritu, anam-anam nga ipadayag ang lawom nga espirituwal nga mga butang.
4. Sa Pentekostes 33 K.P., sa unsang paagi ang balaang espiritu milihok ingong magtutudlo ug tigpahinumdom?
4 Sa adlaw sa Pentekostes 33 K.P., ang “espiritu sa kamatuoran” miabot, nga gibubo diha sa 120 ka Kristohanon nga nagtigom sa Jerusalem. Dihay nakita ug nadungog nga mga ebidensiya niini. (Buh. 1:4, 5, 15; 2:1-4) Ang mga tinun-an nagsultig lainlaing pinulongan “bahin sa halangdong mga butang sa Diyos.” (Buh. 2:5-11) Panahon na kadto sa pagpadayag ug usa ka bag-ong butang. Si Joel nagtagna bahin niini nga pagbubo sa balaang espiritu. (Joel 2:28-32) Ang mga tumatan-aw wala magdahom nga ang tagna matuman niining paagiha, ug si apostol Pedro maoy nanguna sa pagpatin-aw kanila sa maong hitabo. (Basaha ang Buhat 2:14-18.) Busa, ang balaang espiritu milihok ingong magtutudlo pinaagi sa pagpasabot kang Pedro nga ang nasinati sa mga tinun-an maoy katumanan nianang karaang tagna. Ang espiritu milihok usab ingong tigpahinumdom, kay si Pedro wala lamang mokutlo kang Joel kondili sa duha usab ka salmo ni David. (Sal. 16:8-11; 110:1; Buh. 2:25-28, 34, 35) Ang nakita ug nadungog niadtong tanang nagtigom maoy lawom gayod nga mga butang sa Diyos.
5, 6. (a) Human sa Pentekostes 33 K.P., unsang hinungdanong mga pangutana maylabot sa bag-ong pakigsaad ang kinahanglang tubagon? (b) Kinsay mipresentar sa maong mga isyu, ug sa unsang paagi nakahimog desisyon?
5 Daghan pang butang ang kinahanglang ipatin-aw sa unang-siglong mga Kristohanon. Pananglitan, dihay mga pangutana nga mitungha bahin sa bag-ong pakigsaad nga nagsugod sa Pentekostes. Ang bag-ong pakigsaad ba para lamang sa mga Hudiyo ug Hudiyong mga kinabig? Ang mga Hentil ba mahimong bahin usab niana ug madihogan sa balaang espiritu? (Buh. 10:45) Ang mga Hentil ba kinahanglan unang magpatuli ug magpailalom sa Moisesnong Balaod? (Buh. 15:1, 5) Kini maoy hinungdanon kaayong mga pangutana. Ang espiritu ni Jehova gikinahanglan aron sa pagsusi niining lawom nga mga butang. Nan, pinaagi kang kinsa kini molihok?
6 Ang matag isyu nga kinahanglang tubagon gipresentar pinaagi sa tinudlong mga igsoon. Si Pedro, Pablo, ug Bernabe presente sa tigom sa nagamandong lawas ug ilang giasoy kon sa unsang paagi si Jehova nagliso sa iyang pagtagad sa dili-tinuling mga Hentil. (Buh. 15:7-12) Human konsideraha ang mga ebidensiya duyog sa giingon sa Hebreohanong Kasulatan ug uban sa tabang sa balaang espiritu, ang nagamandong lawas nakahimog desisyon. Dayon gipahibalo nila kana sa mga kongregasyon pinaagig sulat.—Basaha ang Buhat 15:25-30; 16:4, 5; Efe. 3:5, 6.
7. Sa unsang paagi gipadayag ang lawom nga mga kamatuoran?
7 Daghan pang butang ang nahatagag katin-awan pinaagi sa inspiradong mga sinulat ni Juan, Pedro, Santiago, ug Pablo. Apan miabot ang panahon human makompleto ang Kristohanong Kasulatan nga gihunong ang mga gasa sa pagpanagna ug ang milagrosong pagpadayag ug kahibalo. (1 Cor. 13:8) Magpadayon ba paglihok ang espiritu ingong magtutudlo ug tigpahinumdom? Padayon ba kining motabang sa mga Kristohanon sa pagsusi sa lawom nga mga butang sa Diyos? Ang tagna nagpakita nga kini magpadayon.
Panahon sa Kataposan
8, 9. Kinsa ang “mosidlak” nga may hait nga salabotan sa panahon sa kataposan?
8 Maylabot sa panahon sa kataposan, usa ka manulonda ang mitagna: “Ang mga may hait nga salabotan mosidlak sama sa kahayag sa kawanangan; ug kadtong mga nagpadangat sa daghan ngadto sa pagkamatarong, sama sa mga bituon hangtod sa panahong walay tino, bisan hangtod sa kahangtoran. . . . Ug ang matuod nga kahibalo modagaya.” (Dan. 12:3, 4) Kinsa ang makabatog hait nga salabotan ug mosidlak? Si Jesus naghatag ug ideya bahin niana diha sa iyang sambingay sa mga trigo ug mga bunglayon. Naghisgot bahin sa “kataposan sa sistema sa mga butang,” siya miingon: “Niana nga panahon ang mga matarong mosidlak ingon nga kahayag sa adlaw diha sa gingharian sa ilang Amahan.” (Mat. 13:39, 43) Sumala sa pagpatin-aw ni Jesus, ang “mga matarong” mao ang “mga anak sa gingharian,” ang dinihogang mga Kristohanon.—Mat. 13:38.
9 “Mosidlak” ba ang tanang dinihogan? Sa usa ka diwa, oo, kay ang tanang Kristohanon makigbahin man sa pagsangyaw, sa paghimog mga tinun-an, ug sa paglig-onay sa usag-usa diha sa mga tigom. Ang mga dinihogan maoy magpakitag ehemplo niining bahina. (Zac. 8:23) Apan gawas niana, duna pay lawom nga mga butang nga ipadayag panahon sa kataposan. Ang tagna nga gisulat ni Daniel “gitimbrehan” hangtod nianang panahona. (Dan. 12:9) Sa unsang paagi ug pinaagi kang kinsa nga ang espiritu magasusi sa lawom nga mga butang?
10. (a) Pinaagi kang kinsa nga ang espiritu nagpadayag sa lawom nga mga kamatuoran panahon sa kataposang mga adlaw? (b) Isaysay kon sa unsang paagi gipatin-aw ang kamatuoran bahin sa dakong espirituwal nga templo ni Jehova.
10 Sa dihang adunay espirituwal nga butang nga kinahanglang ipatin-aw sa atong adlaw, ang balaang espiritu motabang sa tinudlong mga hawas sa “matinumanon ug maalamong ulipon” didto sa tibuok-kalibotang hedkuwarter aron masabtan ang lawom nga mga kamatuoran nga wala masabti kaniadto. (Mat. 24:45; 1 Cor. 2:13) Ang Nagamandong Lawas magkonsiderar sa bag-ong mga katin-awan. (Buh. 15:6) Kon gikinahanglan ang kausaban, ila kining ipatik aron mahibaloan sa tanan. (Mat. 10:27) Paglabay sa panahon, mahimong gikinahanglan pa ang dugang katin-awan, ug kini usab matinud-anong isaysay.—Tan-awa ang kahong “Kon sa Unsang Paagi Gipadayag sa Espiritu ang Kahulogan sa Espirituwal nga Templo.”
Nakabenepisyo Kita sa Papel sa Espiritu
11. Sa unsang paagi ang tanang Kristohanon karon nakabenepisyo sa papel sa balaang espiritu sa pagpadayag sa lawom nga mga butang sa Diyos?
11 Ang tanang matinumanong Kristohanon nakabenepisyo sa papel sa balaang espiritu sa pagpadayag sa lawom nga mga butang sa Diyos. Sama sa unang-siglong mga Kristohanon, kita nagatuon usab ug sa ulahi atong mahinumdoman ug mapadapat ang mga butang nga atong nasabtan sa tabang sa balaang espiritu. (Luc. 12:11, 12) Dili kinahanglang mokuha kitag taas nga edukasyon aron masabtan ang lawom nga mga kamatuoran nga anaa sa atong mga publikasyon. (Buh. 4:13) Sa unsang paagi nato mapauswag ang atong pagsabot sa lawom nga mga butang sa Diyos? Tagda kining pipila ka sugyot.
12. Kanus-a kita angayng mag-ampo alang sa balaang espiritu?
12 Pag-ampo alang sa balaang espiritu. Sa dili pa kita magtuon, angay kitang mag-ampo nga giyahan kita sa balaang espiritu. Haom kini bisan pag kita nag-inusara o kulag panahon. Ang maong mapainubsanong pangamuyo makapalipay gayod sa atong langitnong Amahan. Ingon sa gisulti ni Jesus, si Jehova dagayang magahatag sa iyang balaang espiritu kon sinsero kitang mangayo niana.—Luc. 11:13.
13, 14. Sa unsang paagi makatabang ang pagpangandam alang sa mga tigom aron masabtan ang lawom nga mga butang sa Diyos?
13 Pangandam alang sa mga tigom. Atong nadawat ang “pagkaon sa hustong panahon” pinaagi sa ulipong matang. Gituman sa “ulipon” ang iyang responsibilidad pinaagi sa pagtaganag binase-sa-Bibliya nga mga basahon ug paghatag ug eskedyul kon kanus-a kini hisgotan diha sa mga tigom. Sa dihang isugyot nila sa “tibuok kapunongan sa mga igsoon” nga konsiderahon ang usa ka impormasyon, ila nang natimbangtimbang pag-ayo ang mga rason kon nganong angay kanang tun-an. (1 Ped. 2:17; Col. 4:16; Jud. 3) Kon buhaton nato ang atong maarangan sa pagsunod sa ilang sugyot, kita nakigkooperar sa balaang espiritu.—Pin. 2:29.
14 Sa dihang mangandam alang sa mga tigom, mas maayong basahon ang gisitar nga mga teksto ug sabton kon sa unsang paagi mapadapat kana sa ulohan nga ginatun-an. Kini nga paagi sa pagtuon anam-anam nga magpalalom sa atong pagsabot sa Bibliya. (Buh. 17:11, 12) Ang pagbasa sa mga teksto motabang kanato sa paghinumdom niana sa tabang sa balaang espiritu. Dugang pa, kon atong makita ang teksto diha sa Bibliya, mahimong dali ra natong mahinumdoman kon asang dapita kana pangitaon sa sunod.
15. Nganong angay natong basahon dayon ang bag-ong mga publikasyon, ug sa unsang paagi nimo kini mahimo?
15 Basaha dayon ang bag-ong mga publikasyon. Dunay mga artikulo sa atong magasin nga dili hisgotan sa mga tigom, apan giandam kini alang sa atong kaayohan. Bisan ang mga magasin nga itanyag sa publiko giandam usab alang kanato. Niining puliki nga kalibotan, sagad kitang maghulat. Kon magdaladala kitag publikasyon nga wala pa nato mabasa o wala pa mahumag basa, basin makahigayon kita sa pagbasa niana samtang nagpaabot. Ang uban mamati ug mga audio recording sa atong mga publikasyon samtang maglakaw o magbiyahe. Kining mga publikasyona, nga maampingong gidukiduki apan daling masabtan bisan sa ordinaryong mga magbabasa, makapalalom sa atong pagsabot ug pagpabili sa espirituwal nga mga butang.—Hab. 2:2.
16. Unsay kaayohan sa pagsulat ug pagpanukiduki bahin sa mga pangutana nga mosantop sa atong hunahuna?
16 Pamalandong. Sa dihang magbasa ka sa Bibliya o sa atong mga publikasyon, paggahig panahon sa paghunahuna sa imong gibasa. Samtang imo kining buhaton, mahimong mosantop sa imong hunahuna ang mga pangutana. Puwede nimong isulat ang maong mga pangutana ug manukiduki bahin niana sa ulahi. Sagad nga tun-an nato pag-ayo ang mga butang nga makapainteres kanato. Ang kahibalo nga atong makuha mahimong bahin sa atong personal nga bahandi nga atong magamit kon gikinahanglan.—Mat. 13:52.
17. Unsang programa ang inyong gisunod alang sa pamilyahanon o personal nga pagtuon?
17 Pag-eskedyul ug panahon alang sa pamilyahanong pagsimba. Ang Nagamandong Lawas nagdasig kanatong tanan sa paggahin ug usa ka gabii o laing panahon matag semana alang sa personal o pamilyahanong pagtuon. Duna kitay kahigayonan nga ipadapat kining tambaga tungod kay nausab man ang eskedyul sa atong tigom. Unsay inyong hisgotan panahon sa Pamilyahanong Pagsimba? Ang uban nagbasag Bibliya, nga nanukiduki sa mga bersikulo nga wala kaayo nila masabti ug naghimog mugbong nota diha sa ilang Bibliya. Daghang pamilya ang naggahin ug panahon sa paghisgot kon unsaon nila pagpadapat ang impormasyon nga ilang gitun-an. Ang pipila ka ulo sa pamilya nagpilig materyal nga gikinahanglan sa pamilya o naghisgot sa mga ulohan o pangutana nga gustong konsiderahon sa pamilya. Sa walay duhaduha, makahunahuna ka pag laing mga ulohan nga pagahisgotan.a
18. Nganong dili kita angayng mohunong sa pagtuon sa lawom nga mga kamatuoran sa Pulong sa Diyos?
18 Si Jesus miingon nga ang espiritu molihok ingong magtatabang. Busa dili kita mohunong sa pagtuon sa lawom nga mga kamatuoran sa Pulong sa Diyos. Ang maong mga kamatuoran maoy bahin sa bililhong “kahibalo sa Diyos,” ug gidapit kita sa pagsusi niana. (Basaha ang Proverbio 2:1-5.) Nagpatin-aw kana sa “mga butang nga giandam sa Diyos alang kanilang nahigugma kaniya.” Samtang maningkamot kita sa pagkat-on ug dugang bahin sa Pulong ni Jehova, ang balaang espiritu motabang kanato, kay “ginasusi sa espiritu ang tanang butang, bisan ang lawom nga mga butang sa Diyos.”—1 Cor. 2:9, 10.
[Footnote]
a Tan-awa usab ang Atong Ministeryo sa Gingharian sa Oktubre 2008, panid 8.
Unsay Imong Tubag?
• Unsa ang duha ka paagi nga ang espiritu motabang kanato sa pagsusi sa “lawom nga mga butang sa Diyos”?
• Pinaagi kang kinsa nga ang balaang espiritu nagpadayag sa lawom nga mga kamatuoran sa unang siglo?
• Sa unsang paagi nagalihok ang balaang espiritu sa paghatag ug katin-awan sa mga butang sa atong adlaw?
• Unsay imong mahimo aron makabenepisyo ka sa paglihok sa espiritu?
[Kahon sa panid 22]
Kon sa Unsang Paagi Gipadayag sa Espiritu ang Kahulogan sa Espirituwal nga Templo
Lakip sa “lawom nga mga butang sa Diyos” nga gipadayag sa unang siglo mao nga ang tabernakulo ug sa ulahi ang mga templo naglandong sa mas dakong espirituwal nga katinuoran. Ang maong katinuoran gitawag ni Pablo nga “matuod nga tolda, nga gipatindog ni Jehova, ug dili sa tawo.” (Heb. 8:2) Kini maoy dakong espirituwal nga templo, nga usa ka kahikayan sa pagduol sa Diyos nga gipaposible pinaagi sa halad ug pagkasaserdote ni Jesu-Kristo.
Ang “matuod nga tolda” nagsugod paglungtad niadtong 29 K.P. sa dihang si Jesus gibawtismohan ug gidawat siya ni Jehova nga mahimong hingpit nga halad. (Heb. 10:5-10) Human sa iyang kamatayon ug pagkabanhaw, si Jesus misulod sa Labing Balaan sa espirituwal nga templo ug nagpresentar sa bili sa iyang halad atubangan “sa persona sa Diyos.”—Heb. 9:11, 12, 24.
Sa laing teksto, si apostol Pablo miingon nga ang dinihogang mga Kristohanon “nagatubo ngadto sa pagkahimong usa ka balaang templo alang kang Jehova.” (Efe. 2:20-22) Kini bang temploha mao usab ang “matuod nga tolda” nga gihubit niya sa ulahi diha sa iyang sulat sa mga Hebreohanon? Sulod sa daghang katuigan, mao kanay pagtuo sa mga alagad ni Jehova. Morag mopatim-aw nga ang dinihogang mga Kristohanon giandam dinhi sa yuta aron mahimong “mga bato” sa langitnong templo ni Jehova.—1 Ped. 2:5.
Apan sa hapit na ang 1971, nasabtan sa mga membro sa ulipong matang nga ang templo nga gihisgotan ni Pablo sa iyang sulat sa mga taga-Efeso dili mahimong magtumong sa dakong espirituwal nga templo ni Jehova. Kon ang “matuod nga tolda” gilangkoban pa sa binanhaw nga dinihogang mga Kristohanon, motungha unta kini human magsugod ang ilang pagkabanhaw panahon sa “presensiya sa Ginoo.” (1 Tes. 4:15-17) Apan nga nagtumong sa tabernakulo, si Pablo misulat: “Kini nga tolda mismo maoy usa ka sambingay alang sa tinudlong panahon nga ania karon.”—Heb. 9:9.
Pinaagi sa maampingong pagtandi niini ug sa ubang mga teksto, nahimong tin-aw nga ang espirituwal nga templo natukod na ug ang dinihogang mga Kristohanon dili maoy “mga bato” nga giandam dinhi sa yuta aron gamiton sa pagtukod sa langitnong templo. Hinunoa, ang dinihogang mga Kristohanon nag-alagad sa sawang ug sa Balaang Dapit sa espirituwal nga templo, nga adlaw-adlawng nagtanyag sa Diyos ug “halad sa pagdayeg.”—Heb. 13:15.
[Hulagway sa panid 23]
Sa unsang paagi nato mapauswag ang atong pagsabot sa “lawom nga mga butang sa Diyos”?