Tibuok-Kalibotang Kasegurohan Ilalom sa “Prinsipe sa Pakigdait”
Kapitulo 9
Ang Pakigtugon sa Diyos Uban sa Iyang “Higala” Nakahatag nag Kaayohan sa Milyonmilyon
KAPIN sa 1,950 ka tuig kanhi ang usa ka tinuod nga higala sa tibuok katawhan miingon: “Walay bisan kinsa ang may labaw nga gugma kay niini, nga ang usa ka tawo magatugyan sa iyang kalag alang sa iyang mga higala.” (Juan 15:13) Ang namulong, si Jesus, maoy kaliwat sa usa ka tawo nga gitawag ang higala sa labing Labaw sa tibuok uniberso, si Jehova nga Diyos. Kadtong panaghigalaa, bisan pag maorag mopatim-aw nga may pagkatuwang, naglihok na aron ang milyonmilyon makabatog kaayohan.
2 Kinsa man ang tawo sa karaang panahon nga nakaangkon ug dako kaayo alang kanato tungod sa iyang pagpakighigala sa Diyos? Siya mao si Abraham, usa ka kaliwat sa tawong si Shem, kinsa usa sa mga naluwas sa tibuok-yutang Lunop sa adlaw ni Noe. Si Abraham misulod sa usa ka pakiglabot sa Diyos, nga nagpadayag sa mga hiyas sa usa ka matuod nga higala. Si Abraham, nga gipalihok sa gugma ug sa pagtuo, milihok nga nahiuyon sa kabubut-on sa Diyos, ug tungod niini ang magsusulat sa Bibliya si Santiago mipahayag: “Ang kasulatan natuman nga nagaingon: ‘Si Abraham mituo kang Jehova, ug kini giisip kaniya nga pagkamatarong,’ ug siya gitawag ‘higala ni Jehova.’”—Santiago 2:23.
3 Kadtong tawo sa pagtuo ug sa aksiyon naggikan sa siyudad sa Ur sa mga taga-Kaldea, ug siya ang una nga gitawag Hebreohanon. (Genesis 14:13) Kining ngalana gipadapat ngadto sa iyang mga kaliwat sa nasod sa Israel. (Filipos 3:5) Tungod sa paghimo niya kang Abraham nga iyang higala, si Jehova nga Diyos nagpahibalo kaniya sa pipila sa Iyang mga butang tinago. Kini gipaila sa nahisulat sa Genesis 18:17-19.
4 Kana nagailustrar unsa ka dako ang pagpabili ni Jehova nga Diyos sa pagtuo ug sa pagsalig nga gibutang ni Abraham diha kaniya, nga misangpot sa walay-pagduhaduha nga pagkamasinugtanon sa bahin ni Abraham. Busa nga walay pagkaulaw o pagbasol, gitapos ni Jehova ang iyang mga pamulong ngadto sa nasod sa Israel pinaagi sa pag-ingon: “Apan ikaw, Oh Israel, mao ang akong alagad, ikaw, Oh Jacob, si kinsa akong napili, ang binhi ni Abraham nga akong higala.”—Isaias 41:8.
Ang Abrahamikong Pakigtugon Miepekto Na
5 Kon asa kutob motultol ang pakighiusa sa usa ka mahigugmaong higala gihulagway sa kamatuoran nga ang Soberano sa uniberso, si Jehova, mihimog pakigtugon uban niining usa lamang ka tawo, si Abraham. Sa Genesis 15:18 atong mabasa: “Niadtong adlawa si Jehova mihimo uban kang Abram [Abraham] sa usa ka pakigtugon, nga miingon: ‘Sa imong binhi akong igahatag kining yutaa, gikan sa suba sa Ehipto hangtod sa dakong Suba, ang subang Euprates.’”
6 Ang Euprates mao ang suba nga gitabok ni Abraham ug sa iyang panimalay sa pagsulod sa Yutang Saad. Sa panahon sa pagtabok, si Abraham wala pay anak, bisan tuod niadto siya nag-edad nag 75, ug ang iyang asawa may panuigon nga dili na manganak. (Genesis 12:1-5) Bisan pa niana, atubangan nianang sukwahing mga kahimtang, ang Diyos miingon ngadto sa masinugtanong si Abraham: “Hangad, palihog, sa kalangitan ug ipha ang mga bituon, kon makahimo ka sa pag-ihap kanila. . . . Maingon niana ang imong binhi.”—Genesis 15:2-5.
7 Ang pakigtugon nga gihimo ni Jehova uban sa iyang “higala” atong matawag Abrahamikong pakigtugon. Kanang pakigtugona miepekto sa 1943 W.K.P. sa gisugot ni Abraham ang mga kinahanglanon sa pakigtugon sa Diyos ug mitabok sa Euprates sa iyang pagpaingon sa Yutang Saad. Niadtong tuiga si Jehova nga Diyos nailalom sa obligasyon nga panalanginan ug binhi ang walay-anak nga si Abraham. Ang Kasugoan nga iya sa pakigtugon nga gihimo uban sa nasod sa Israel didto sa Bukid sa Sinai mitungha 430 ka tuig sa ulahi, sa 1513 W.K.P.—Genesis 12:1-7; Exodo 24:3-8.
Pakigtugon sa Kasugoan Gidugang sa Abrahamikong Pakigtugon
8 Niadtong panahona, ang mga kaliwat ni Abraham pinaagi sa iyang anak si Isaac nahimong usa ka katawhang may kagawasan. Ang nasod sa Israel giluwas gikan sa Ehipto ug gidala ngadto sa Bukid sa Sinai sa Arabia. Pinaagi kang Moises ingong tigpataliwala, sila gipasulod sa kasabotan o pakigtugon sa Kasugoan uban kang Jehova nga Diyos. Sanglit kadtong mga Israelinhon maoy kinaiyanhong mga kaliwat sa “higala” ni Jehova, si Abraham, unsa ba ang katuyoan niadtong pakigtugon sa Kasugoan? Kadto magsilbing panalipod sa piniling katawhan ni Jehova. Ang pakigtugon sa Kasugoan wala magkanselar sa Abrahamikong pakigtugon, bisan pag kadto nagpadayag nga ang nasod sa Israel sad-an sa mga kalapasan sumala sa hingpit nga kasugoan sa Diyos.—Galacia 3:19-23.
9 Sa masambingayong pagkasulti, ang mga Israelinhon nahimong “mga anak” sa pakigtugon sa Kasugoan. Ilang gibati nga tungod kay sila kinaiyanhong mga kaliwat ni Abraham, sila awtomatikong nahimong “binhi” nga pinaagi niana ang tanang nasod magpanalangin sa ilang kaugalingon. Natuman ba kana? Wala! Karong adlawa, halos 3,500 ka tuig sa ulahi, atong makita ang independenteng sekular nga Republika sa Israel, apan kini nagapakigbisog alang sa kalungtaran niini taliwala sa daghang mabatokong kanasoran.
10 Busa karong adlawa ang pagkahimong usa ka proselitang Hudiyo uban ang hunahuna nga sa maong paagi mahimong bahin sa “binhi” ni Abraham aron panalanginan ang nahibiling katawhan dili mao ang paagi ni Jehova nga Diyos. Nan, unsa man diay ang nahitabo?
11 Gipatin-aw ni apostol Pablo ang butang alang kanato, nga miingon: “Nahisulat nga nabatonan ni Abraham ang duha ka anak lalaki, ang usa pinaagi sa ulipong babaye [Agar] ug ang usa pinaagi sa babayeng may kagawasan [Sara]; apan ang anak pinaagi sa ulipong babaye sa pagkamatuod natawo pinaagi sa unod, ang laing anak pinaagi sa babayeng may kagawasan pinaagi sa usa ka saad. Kining mga butanga nagabarog nga usa ka simbolikong drama; kay kining mga bayhana nagkahulogan sa duha ka pakigtugon, ang usa gikan sa Bukid sa Sinai, nga nagapanganak ug mga anak alang sa pagkaulipon, ug mao si Agar. Karon kining Agar nagkahulogan nga Sinai, usa ka bukid sa Arabia, ug siya katumbas sa Jerusalem karong adlawa, kay siya naulipon uban sa iyang mga anak. Apan ang Jerusalem sa itaas may kagawasan, ug siya mao ang atong inahan.”—Galacia 4:22-26.
12 Ang Jerusalem nga maoy katumbas sa ulipong babaye si Agar maoy yutan-on, nga gipuy-an sa unodnong mga Hudiyo. Sa mga adlaw ni Jesu-Kristo, kadto ang kaulohan sa nasod sa Israel ug nailalom sa pakigtugon sa Kasugoan. (Mateo 23:37, 38) Samtang epektibo pa ang pakigtugon sa Kasugoan nga gipataliwad-an ni Moises, ang kinaiyanhong Israel mao ang makitang bahin sa organisasyon ni Jehova. Sa ingon kadto gilarawanan sa usa ka babaye, si Agar ang ulipong babaye ni Sara.
Ang Matuod nga mga Anak sa Abrahamikong Pakigtugon
13 Sa laing bahin, ang “Jerusalem sa itaas” mao ang dili-makitang langitnong organisasyon ni Jehova. Sa tumbas nga paagi, kini gihulagwayan sa usa ka babaye, si Sara, ang matuod nga asawa ni Abraham. Ang pakigtugon sa Kasugoan wala himoa uban niining organisasyona, busa “ang Jerusalem sa itaas,” may kagawasan, sama kang Sara sa kakaraanan. Kini mao ang organisasyong nagpatungha sa sinaad nga “binhi,” ug kana ang hinungdang gitawag kana ni apostol Pablo nga “atong inahan.”
14 Nan, sa pagkamatuod ang Abrahamikong pakigtugon mapadapat kaniya ingong ang simbolikong asawa sa Labaw nga Abraham, oo, sa unibersohanong organisasyon ni Jehova didto sa itaas sa mga langit. Kini nagpasabot nga ang inanak-sa-espiritung mga tinun-an ni Jesu-Kristo maoy, sama kang apostol Pablo, ang mga anak sa Abrahamikong pakigtugon. Si Pablo nagpadayon sa pagpangatarongan nianang paagiha, nga nag-ingon:
15 “Kay kini nahisulat: ‘Paglipay, ikaw nga babayeng apuli nga dili na manganak; paghugyaw ug singgit sa kusog, ikaw babaye nga dili na magbati sa kasakit sa pag-anak; kay ang mga anak sa babaye nga wala na tagda labi pang daghan kay kaniya nga adunay bana.’ Karon, mga igsoon, kita maoy mga anak nga iya sa saad sama kang Isaac. Apan maingon nga kaniadto ang usang natawo sa paagi sa unod misugod sa paglutos sa usang natawo sa paagi sa espiritu, mao man usab karon. Bisan pa niana, unsay ginaingon sa Kasulatan? ‘Hinginli ang ulipong babaye ug ang iyang anak, kay ang anak sa ulipong babaye dili gayod mahimong usa ka manununod uban sa anak sa babayeng may kagawasan.’ Busa, mga igsoon, kita maoy mga anak, dili sa ulipong babaye, kondili sa babayeng may kagawasan.”—Galacia 4:27-31; Isaias 54:1.
16 Sa ingon kadtong simbolikong drama sa karaang panahon mitagna nga si Jehova nga Diyos, ang Labaw nga Abraham, maghiklin sa pakigtugon sa Kasugoan nga himoon uban sa Israel sa Bukid sa Sinai. Sa maong paagi ang dugang (ang pakigtugon sa Kasugoan) sa Abrahamikong pakigtugon ibuhin, o kuhaon, nga mabilin lamang ang Abrahamikong pakigtugon uban ang saad niini sa usa ka “binhi” nga pinaagi niana ang tanang banay sa yuta magapanalangin sa ilang kaugalingon.
17 Busa ang dinugang nga pakigtugon sa Kasugoan magpadayon hangtod sa pag-abot sa sinaad nga “binhi,” ug kadto mao si Jesu-Kristo. Pinaagi sa balaang milagro, siya nahimong unodnong kaliwat ni Abraham. Siya nahimong ang pangunang kaliwat niadtong maong patriarka. Siya dili lamang unodnong kaliwat ni Abraham kondili mao ang Anak sa Diyos, ug busa usa ka hingpit nga tawo, ang usa nga nagpabiling “maunongon, walay sala, walay hugaw, nahibulag sa mga makasasala.” (Hebreohanon 7:26) Ugaling lamang, ang iyang pagkahimong Pangulong Tinugyanan sa Diyos aron sa pagpanalangin sa tanang banay sa yuta nag-agad sa paghalad sa iyang hingpit tawhanong kinabuhi ug sa pagpadapat sa bili niini alang sa tanang tawo. Pinaagi sa maong pagsakripisyo sa kaugalingon, siya mag-alagad nga dakong Hataas nga Saserdote ni Jehova, nga magatanyag sa usa ka halad nga nakakab-ot sa tanang balaang kinahanglanon.
Pakigtugon sa Kasugoan Gilansang ni Jesus sa Kahoy sa Pagsakit
18 Ang mga benepisyo sa maong halad lukat ipresentar una alang sa Hudiyonhong nasod, nga niana siya Jesus nahisakop tungod sa iyang milagrosong pagkatawo pinaagi sa ulayng si Maria. Kadto kinahanglanon gayod, kay ang mga Hudiyo nailalom man sa dobleng pagkahinukman sa kamatayon. Sa unsang paagi naingon? Una, sila mao ang mga anak sa makasasalang si Adan, ug ikaduha, tungod sa ilang pagkadili-hingpit sila nahimong tinunglo tungod kay wala makasunod diha sa kinabuhi sa pakigtugon sa Kasugoan uban sa Diyos. Bisan pa niana, si Jesus nahimong usa ka tunglo alang kanila. Tungod sa pagkalansang sa usa ka kahoy sa pagsakit hangtod sa pagkamatay, siya nakaarang sa pagwagtang sa tunglo gikan sa “nawalang mga karnero sa balay sa Israel.” Sa 33 K.P., ang pakigtugon sa Kasugoan gilansang ni Jesus ngadto sa kahoy sa pagsakit, ug ang Hudiyonhong toril ilalom niadtong temporaryong pakigtugon sa Kasugoan gisirhan, gitapos.—Mateo 15:24; Galacia 3:10-13; Colosas 2:14.
19 Busa ang usa ka bag-ong toril kinahanglang buksan sa pagpasulod sa espirituwal nga mga karnero sa binanhawng Maayong Magbalantay, si Jesu-Kristo. Ang nagsakripisyo-sa-kaugalingong Maayong Magbalantay mao usab ang simbolikong ganghaan sa maong bag-ong toril. (Juan 10:7) Kadtong gipasulod sa maong bag-ong toril ilalom sa Maayong Magbalantay nahimong ang inanak-sa-espiritung mga anak sa Labaw nga Abraham ug sa ingon bahin sa Iyang “binhi.” (Roma 2:28, 29) Ingong katumanan niini, sulod niining kataposang mga adlaw ang usa ka nahibilin nianang espirituwal nga “binhi” nagaalagad nga usa ka panalangin alang sa nagkadaghang minilyong katawhan diha sa kapin sa 200 ka kayutaan.
[Mga Pangutana nga Pagatun-an]
1, 2. (a) Unsang panaghigalaay ang nagsugod na sa paglihok alang sa kaayohan sa milyonmilyon? (b) Nganong si Abraham nahimong higala sa Diyos?
3, 4. (a) Unsay nagailustrar unsa ka dako ang pagpabili ni Jehova sa pagtuo ug pagsalig nga gibutang ni Abraham diha kaniya? (b) Uban ang unsang mga pulong nga gitapos ni Jehova ang iyang mga pamulong sa Isaias 41:8?
5, 6. (a) Unsang pakigtugon ang gihimo ni Jehova uban sa iyang higalang si Abraham? (b) Atubangan sa unsang sukwahing mga kahimtang nga gihimo sa Diyos ang usa ka saad ngadto sa iyang higala mahitungod sa usa ka “binhi”?
7. (a) Unsay tawag sa maong pakigtugon? (b) Sa unsang tuig kini miepekto ug uban sa unsang hitabo sa kinabuhi ni Abraham? (c) Pila man kadto ka tuig una mahimo ang pakigtugon sa Kasugoan uban sa nasod sa Israel?
8. (a) Unsa ang katuyoan sa pakigtugon sa Kasugoan? (b) Ang pakigtugon ba sa Kasugoan nagnulo o nagwagtang sa Abrahamikong pakigtugon?
9, 10. (a) Unsay gibati sa malangkobon sa mga kaliwat ni Abraham mahitungod sa “binhi” nga pinaagi niana ang tanang nasod magapanalangin sa ilang kaugalingon? (b) Sa unsang paagi ang ilang panghunahuna namatud-ang maayo?
11. Giunsa pagpatin-aw ni apostol Pablo kon unsay nahitabo sa kinaiyanhong mga kaliwat ni Abraham?
12. Kang kinsa motumbas ang ulipong babaye si Agar?
13. (a) Unsa ang katumbas sa asawa ni Abraham, si Sara? (b) Nganong ang “ang Jerusalem sa itaas” matawag nga “may kagawasan”?
14. Ang Abrahamikong pakigtugon mapadapat ba sa “ang Jerusalem sa itaas,” ug busa matawag nga unsa ang inanak-sa-espiritung mga tinun-an ni Jesu-Kristo?
15. Unsay gisulti ni apostol Pablo sa Galacia 4:27-31 kon bahin sa “ang mga anak” sa Abrahamikong pakigtugon?
16. Unsay gitagna sa simbolikong drama sa karaang panahon kon bahin sa pakigtugon sa Kasugoan, nga tungod niini magapabilin ang unsa?
17. (a) Hangtod kanus-a magpabilin ang pakigtugon sa Kasugoan? (b) Nganong si Jesu-Kristo ang pangunang kaliwat ni Abraham? (c) Ang pagkahimo ni Jesus nga Pangulong Tinugyanan sa Diyos aron sa pagpanalangin sa tanang banay sa yuta nag-agad sa unsa?
18. (a) Kang kinsa ipresentar una ang mga kaayohan sa halad lukat, ug ngano? (b) Nahimong unsa man si Jesus?
19. (a) Unsang bag-ong toril ang kinahanglang mabuksan, ug unsay masulod niana? (b) Busa kadtong gipasulod sa bag-ong toril mahimong unsa?