GALIO

Ang prokonsul sa Acaya nga atubangan sa iyang hukmanan ang mga Hudiyo nag-akusar kang Pablo sa pagdaldal sa mga tawo ngadto sa laing tinuohan sa pagsimba sa Diyos. Gidismis ni Galio ang kaso tungod kay walay nalangkit niini nga paglapas sa Romanhong balaod. Tungod niini, ang panon sa katawhan nagbun-og kang Sostenes nga maoy nagadumalang opisyal sa sinagoga, apan si Galio wala gihapon mangilabot niini.​—Buh 18:12-17.

Sumala sa sekular nga mga tinubdan, si Galio natawo sa Cordova, Espanya, sa pagsugod sa unang siglo K.P. Siya mao ang anak nga lalaki sa orador nga si Seneca ug ang magulang nga igsoon ni Seneca nga pilosopo. Ang orihinal nga ngalan ni Galio maoy Lucius Annaeus Novatus. Apan sa dihang siya gisagop sa orador nga si Lucius Junius Galio, iyang gigamit ang ngalan sa nagsagop kaniya.

Ang usa ka inskripsiyon gikan sa Delphi makatabang sa pagtino sa petsa sa pagkaprokonsul ni Galio sa Acaya. (Buh 18:12) Tungod kay mga tipik na lamang kini, ang inskripsiyon kinahanglang balayon pag-usab, apan kini tin-awng naundan sa ngalan ni “[Lucius Ju]nius Galio, . . . prokonsul.” Ang mga historyador sa katibuk-an nagkauyon nga ang inskripsiyon maoy usa ka sulat gikan kang Emperador Claudio Cesar ug nga ang numero 26 nga makaplagan diha niana nagpasabot sa pagdawat ni Claudio sa pasidungog ingong emperador sa ika-26 nga higayon. (Si Claudio mao ang nagpasig-uli sa Acaya ingong bulag nga lalawigan nga ilalom sa pagdumala sa senado ug busa adunay usa ka prokonsul.) Lagmit nga kini nga sulat gisulat sa unang katunga sa 52 K.P., kay ang ubang mga inskripsiyon nagpakita nga si Claudio gipasidunggan ingong emperador sa ika-27 nga higayon una pa ang Agosto 1, 52 K.P. Ang usa ka Carianhon nga inskripsiyon ug ang usa ka inskripsiyon diha sa agianag tubig nga gitawag ug Aqua Claudia sa Roma nagpetsa sa ika-26 ug ika-27 nga pagpasidungog sa pagkaemperador ni Claudio sulod sa tuig sa iyang ika-12 nga yugto sa paghupot sa tribunal nga gahom. Kining ika-12 nga yugto sa iyang paghupot sa tribunal nga gahom maoy katumbas sa Enero 25, 52 K.P., hangtod sa Enero 24, 53 K.P. Busa mopatim-aw nga ang pagkaprokonsul ni Galio sa Acaya (usa ka katungdanan nga kasagarang molungtad ug usa ka tuig, nga magsugod sa ting-init) nagsugod sa ting-init sa 51 K.P. hangtod sa ting-init sa 52 K.P., bisan tuod nga ang pipila ka eskolar mipabor sa 52-53 K.P.