CENCREA

Ang asoy sa Buhat 18:18 naghisgot nga gipamub-an ni Pablo ang iyang buhok didto sa Cencrea tungod kay siya nakahimo ug panaad, ug human niana siya lagmit milawig gikan sa Cencrea paingon sa Efeso nga inubanan ni Priscila ug Aquila (niadtong mga 52 K.P.). Sa pagsulat ngadto sa Roma mga upat ka tuig sa ulahi, gihisgotan sa apostol ang “kongregasyon sa Cencrea.” Ang sulat ni Pablo ngadto sa mga taga-Roma lagmit nakadangat kanila pinaagi ni Febe nga naggikan sa siyudad sa Cencrea.​—Rom 16:​1, 2.

Ang Cencrea nahimutang sa kiliran sa Gulpo sa Saron diha sa usa ka hiktin nga yuta nga mga 11 km (7 mi) sa S sa Corinto, ug nadugtong kini ngadto niana nga siyudad pinaagi sa nagkutay nga mga kuta sa kasundalohan. Ang Cencrea mao ang dunggoanan sa Corinto alang sa mga dapit sa S sa Gresya, samtang ang Lechaeum, sa pikas nga kiliran sa hiktin nga yuta, nagsilbing dunggoanan sa Corinto alang sa Italya ug sa mga dapit nga nahimutang sa kasadpan. Ang mga kagun-oban sa maong dapit karong adlawa naglakip sa mga tinukod ug sa mga diki sa dagat duol sa presenteng balangay sa Kechriais.