Tabangi ang Uban nga Modawat sa Mensahe sa Gingharian

“Si Agripa miingon kang Pablo: ‘Sa mubong panahon makombinsir mo ako nga mahimong Kristohanon.’”—BUHAT 26:28.

1, 2. Sa unsang paagi nahitabo nga si apostol Pablo miatubang kang Gobernador Festo ug Haring Herodes Agripa II?

SA CESAREA sa 58 K.P., ang Romanong Gobernador Porcio Festo giduaw ni Haring Herodes Agripa II ug sa iyang igsoong babaye nga si Bernice. Sa dihang giimbitar ni Gobernador Festo, sila nangabot “uban ang mapagarbohong pasundayag ug misulod sa lawak sa mga mamiminaw uban sa mga komandante militar maingon man sa mga tawong halangdon sa siyudad.” Sa sugo ni Festo, ang Kristohanong apostol nga si Pablo gipaatubang kanila. Sa unsang paagi nahitabo nga kining sumusunod ni Jesu-Kristo miatubang sa hukmanan ni Gobernador Festo?—Buhat 25:13-23.

² Ang giingon ni Festo sa iyang mga bisita motubag sa maong pangutana. Siya miingon: “Haring Agripa ug kaninyong tanan nga ania uban kanamo, inyong nakita kining tawhana nga mahitungod kaniya ang tibuok panon sa mga Hudiyo sa tingob mihangyo kanako didto sa Jerusalem ug dinhi, nga nanagsinggit nga siya dili na angayng mabuhi pa. Apan akong naila nga siya walay nahimong bisan unsa nga takos sa kamatayon. Busa sa dihang kining tawhana miapelar kang Agusto, mihukom ako nga ipadala siya. Apan mahitungod kaniya ako walay tinong ikasulat ngadto sa akong Ginoo. Busa ako siyang gidala atubangan kaninyo, ug ilabina atubangan kanimo, Haring Agripa, aron nga, human mahimo ang hudisyal nga pag-usisa, ako adunay ikasulat. Kay daw dili-makataronganon nga ipadala ko ang usa ka binilanggo ug dili usab ipaila ang mga sumbong batok kaniya.”—Buhat 25:24-27.

 3. Nganong gipasakaan man ug sumbong si Pablo sa relihiyosong mga lider?

³ Ang giingon ni Festo nagpaila nga si Pablo nag-atubang ug bakak nga mga sumbong nga sedisyon—usa ka krimen nga takos sa silot nga kamatayon. (Buhat 25:11) Apan, si Pablo walay sala. Ang mga sumbong mitungha tungod sa kasina sa relihiyosong mga lider sa Jerusalem. Sila misupak sa buluhaton ni Pablo ingong magmamantala sa Gingharian ug nayugot pag-ayo nga iyang gitabangan ang uban nga mahimong mga sumusunod ni Jesu-Kristo. Nga guwardiyado kaayo, si Pablo gidala gikan sa Jerusalem paingon sa dunggoanang siyudad sa Cesarea, diin siya miapelar kang Cesar. Gikan didto siya dad-on sa Roma.

 4. Unsang makapatingalang mga pulong ang gilitok ni Haring Agripa?

⁴ Handurawa si Pablo nga didto sa palasyo sa gobernador atubangan sa usa ka grupo nga naglakip sa magmamando sa usa ka hinungdanong bahin sa Romanhong Imperyo. Si Haring Agripa miatubang kang Pablo ug miingon: “Ikaw gitugotang mosulti.” Samtang nagsulti si Pablo, nahitabo ang talagsaong butang. Ang giingon ni Pablo nakaapektar sa hari. Gani, si Haring Agripa miingon: “Sa mubong panahon makombinsir mo ako nga mahimong Kristohanon.”—Buhat 26:1-28.

 5. Nganong epektibo kaayo ang gisulti ni Pablo kang Agripa?

⁵ Tiaw mo kana! Tungod sa hanas nga pagdepensa ni Pablo, ang usa ka magmamando naapektahan sa modulot nga gahom sa Pulong sa Diyos. (Hebreohanon 4:12) Unsay nakapaepektibo sa depensa ni Pablo? Ug unsay atong makat-onan gikan kang Pablo nga makatabang kanato sa atong buluhaton nga paghimog mga tinun-an? Kon atong analisahon ang iyang depensa, duha ka pangunang mga punto ang klaro: (1) Makapakombinsir ang presentasyon ni Pablo. (2) Iyang gigamit ang iyang kahibalo sa Pulong sa Diyos sa hanas nga paagi, sama ra nga ang usa ka artisano mogamit sa usa ka himan sa epektibong paagi.

Gamita ang Arte sa Pagpangombinsir

6, 7. (a) Sumala sa pagkagamit diha sa Bibliya, unsay kahulogan sa “pagpangombinsir”? (b) Unsay bahin sa pagpangombinsir diha sa pagtabang sa uban nga modawat sa usa ka pagtulon-an sa Bibliya?

⁶ Diha sa basahon sa Mga Buhat, ang Gregong mga termino alang sa pagpangombinsir sublisubling gigamit maylabot kang Pablo. Unsay kalabotan niini sa atong buluhatong paghimog mga tinun-an?

⁷ Diha sa orihinal nga pinulongan sa Kristohanon Gregong Kasulatan, ang “pagpangombinsir” nagpasabot ug “pagdani” o pagpahinabog “kausaban sa hunahuna pinaagi sa impluwensiya sa pangatarongan o pagtagad sa moral,” nag-ingon ang Vine’s Expository Dictionary of New Testament Words. Ang pagsusi sa lintunganayng kahulogan maghatag ug dugang katin-awan. Naghatag kinig ideya sa pagsalig. Busa kon imong kombinsihon ang usa ka tawo nga modawat sa usa ka pagtulon-an sa Bibliya, imong naangkon ang iyang pagsalig, mao nga siya motuo sa pagkatinuod sa maong pagtulon-an. Dayag nga dili pa igo nga sultian ang usa ka tawo kon unsay giingon sa Bibliya aron siya motuo niana ug mopadapat niana. Ang imong mamiminaw kinahanglang kombinsido nga tinuod ang imong giingon, kana mang maong indibiduwal usa ka bata, silingan, kauban sa trabaho, kauban sa eskuylahan, o paryente.—2 Timoteo 3:14, 15.

 8. Unsay nalangkit sa pagkombinsir sa usa ka tawo sa Kasulatanhong kamatuoran?

⁸ Sa unsang paagi makombinsir nimo ang usa ka tawo nga ang imong gipahayag gikan sa Pulong sa Diyos mao ang kamatuoran? Pinaagi sa lohikal nga pangatarongan, maayong argumento, ug kinasingkasing nga pangaliyupo, si Pablo naningkamot sa pagpahinabog kausaban sa hunahuna sa mga tawo nga iyang kaestorya.a Busa, inay kay isulti lamang nga ang usa ka butang tinuod, kinahanglang mohatag ka ug makapatagbawng ebidensiya aron sa pagsuportar sa imong giingon. Sa unsang paagi mahimo kini? Seguroa nga ang imong giingon lig-ong gipasukad sa Pulong sa Diyos ug dili sa personal nga hunahuna. Lain pa, gamita ang dugang ebidensiya sa pagpaluyo sa imong kinasingkasing nga Kasulatanhong mga pahayag. (Proverbio 16:23) Pananglitan, kon ipunting nimo nga ang masinugtanong katawhan makatagamtam ug kinabuhi diha sa usa ka paraisong yuta, paluyohi kanang maong pahayag ug Kasulatanhong reperensiya, sama sa Lucas 23:43 o Isaias 65:21-25. Sa unsang paagi makahatag ka ug dugang ebidensiya sa pagpaluyo sa imong Kasulatanhong punto? Makagamit ka ug mga pananglitan gikan sa kasinatian sa imong mamiminaw. Mahimong pahinumdoman nimo siya sa yano ug walay-bayad nga kalipay nga matagamtam gikan sa katahom sa pagsalop sa adlaw, sa kahumot sa usa ka bulak, sa kalami sa usa ka prutas, o sa kalipay nga magtan-aw sa inahan nga langgam nga magpakaon sa iyang mga kuyabog. Tabangi siya sa pagsabot nga ang maong mga kalipay maoy ebidensiya nga buot sa Maglalalang nga kita malipay sa kinabuhi dinhi sa yuta.—Ecclesiastes 3:11, 12.

 9. Sa unsang paagi ikapakita nato ang pagkamakataronganon diha sa atong buluhatong pagsangyaw?

⁹ Sa dihang maningkamot sa pagkombinsir sa usa ka tawo nga modawat sa usa ka pagtulon-an sa Bibliya, mag-amping nga ang imong kadasig dili maghimo kanimong dogmatiko, sa ingon magsira sa hunahuna ug kasingkasing sa imong mamiminaw. Ang librong Tunghaan sa Ministeryo naghatag niining maong pasidaan: “Ang pintok nga pagsulti sa kamatuoran nga magyagyag sa kabakakan sa usa ka gimahal nga tinuohan sa laing tawo, bisan pag suportadog daghan kaayong teksto sa Kasulatan, kasagarang dili maangayan. Pananglitan, kon ang popular nga mga selebrasyon yanong iyagyag ingon nga may paganong sinugdanan, kini mahimong dili makapausab sa pagbati sa ubang mga tawo bahin niana. Ang nangatarongan nga paagi kasagarang mas malamposon.” Nganong maningkamot pag-ayo nga mahimong makataronganon? Ang teksbok nag-ingon: “Ang nangatarongan nga paagi modasig ug panaghisgot, maghatag sa mga tawo sa butang nga mapamalandong sa ulahi, ug mohatag ug kahigayonan alang sa umaabot nga mga kabildohay. Kini kusog nga makadani.”—Colosas 4:6.

Pagpangombinsir nga Makapalihok sa Kasingkasing

10. Sa unsang paagi gipaila ni Pablo ang iyang depensa atubangan kang Agripa?

¹⁰ Karon susihon nato pag-ayo ang mga pulong ni Pablo sa pagdepensa diha sa Buhat kapitulo 26. Matikdi kon giunsa niya pagsugod ang iyang diskurso. Sa pagpaila sa iyang ulohan, si Pablo nakakita ug makataronganong pasukaranan nga dayegon si Agripa, bisan pag ang hari nalangkit sa makauulawng relasyon uban sa iyang igsoong babaye nga si Bernice. Si Pablo miingon: “Mahitungod sa tanang butang nga niini ako gisumbong sa mga Hudiyo, Haring Agripa, giisip ko ang akong kaugalingon nga malipayon nga sa imong atubangan himoon ko ang akong pagdepensa karong adlawa, ilabina nga ikaw nakasinati sa tanang kostumbre ingon man sa mga lantugi taliwala sa mga Hudiyo. Busa ako nagpakiluoy kanimo nga maminaw kanako nga mapailobon.”—Buhat 26:2, 3.

11. Sa unsang paagi ang gisulti ni Pablo kang Agripa nagpakita ug pagtahod, ug unsay benepisyo niini?

¹¹ Namatikdan ba nimo nga giila ni Pablo ang taas nga katungdanan ni Agripa pinaagi sa pagtawag kaniya pinaagi sa iyang titulo nga Hari? Kini nagpakitag pagtahod, ug pinaagi sa iyang maalamong pagpili sa mga pulong, gipasidunggan ni Pablo si Agripa. (1 Pedro 2:17) Ang apostol miila kang Agripa ingong nasinati sa tanang kostumbre ug mga balaod sa iyang Hudiyong mga ginsakpan ug miingon nga siya nalipay nga siya makahimo sa iyang pagdepensa atubangan nianang daghag-nahibaloang magmamando. Si Pablo, nga usa ka Kristohanon, wala molihok nga daw siya mibati nga mas labaw kang Agripa, kinsa dili usa ka Kristohanon. (Filipos 2:3) Hinunoa, si Pablo mihangyo sa hari sa pagpamati kaniya nga mapailobon. Busa, si Pablo nagpatunghag kahimtang diin si Agripa, maingon man ang ubang mga mamiminaw, mas lagmit nga modawat sa iyang ipresentar. Siya nagpahilunag pundasyon, usa ka punto nga gikauyonan nga niana ipasukad niya ang iyang mga argumento.

12. Sa buluhaton nga pagmantala sa Gingharian, sa unsang paagi mapalihok nato ang kasingkasing sa atong mga mamiminaw?

¹² Sama kang Pablo sa dihang miatubang kang Agripa, gikan sa introduksiyon hangtod sa konklusyon sa atong pagpresentar sa mensahe sa Gingharian, palihokon nato ang kasingkasing sa atong mamiminaw. Mahimo nato kini pinaagi sa pagpasundayag ug sinserong pagtahod alang sa tawo nga atong gisangyawan ug pinaagi sa pagpakitag tiunayng kaikag sa iyang kagikan ug panghunahuna.—1 Corinto 9:20-23.

Gamita ang Pulong sa Diyos sa Hanas nga Paagi

13. Sa unsang paagi ikaw, sama kang Pablo, makaaghat sa imong mga mamiminaw?

¹³ Si Pablo nagtinguha sa pag-aghat sa iyang mga mamiminaw sa paglihok sumala sa maayong balita. (1 Tesalonica 1:5-7) Aron mahimo kana, iyang gipalihok ang ilang mahulagwayong kasingkasing, ang sentro sa panukmod. Samtang konsiderahon pa nato ang depensa ni Pablo atubangan kang Agripa, matikdi kon sa unsang paagi si Pablo ‘naggamit sa pulong sa Diyos sa hustong paagi’ pinaagi sa paghisgot sa mga butang nga gisulti ni Moises ug sa mga manalagna.—2 Timoteo 2:15.

14. Ipatin-aw kon sa unsang paagi si Pablo migamit sa arte sa pagpangombinsir sa dihang miatubang siya kang Agripa.

¹⁴ Si Pablo nahibalo nga si Agripa maoy Hudiyo sa ngalan lamang. Nagtandog sa kahibalo ni Agripa bahin sa Judaismo, si Pablo nangatarongan nga sa iyang pagsangyaw siya “walay gisulti nga bisan unsa gawas sa mga butang nga giingon sa mga Manalagna ug ni Moises nga mahitabo” mahitungod sa kamatayon ug pagkabanhaw sa Mesiyas. (Buhat 26:22, 23) Direktang nakigsulti kang Agripa, si Pablo nangutana: “Ikaw ba, Haring Agripa, nagatuo sa mga Manalagna?” Si Agripa nag-atubang ug malisod nga situwasyon. Kon siya moingon nga iyang gisalikway ang mga manalagna, ang iyang dungog ingong Hudiyong magtutuo madaot. Apan kon mouyon siya sa pangatarongan ni Pablo, mapadayag niya sa publiko nga siya uyon sa apostol ug mameligro nga tawgong Kristohanon. Si Pablo maalamong nagtubag sa iyang kaugalingong pangutana, nga nag-ingon: “Nahibalo ako nga ikaw nagatuo.” Sa unsang paagi gitukmod si Agripa sa iyang kasingkasing sa pagtubag? Siya miingon: “Sa mubong panahon makombinsir mo ako nga mahimong Kristohanon.” (Buhat 26:27, 28) Bisan tuod si Agripa wala mahimong Kristohanon, si Pablo dayag nga nakaapektar sa iyang kasingkasing sa usa ka sukod pinaagi sa iyang mensahe.—Hebreohanon 4:12.

15. Sa unsang paagi si Pablo nakatukod ug kongregasyon sa Tesalonica?

¹⁵ Namatikdan ba nimo nga ang pagpresentar ni Pablo sa maayong balita naglakip sa pagpahayag ug pagpangombinsir? Tungod kay gigamit ni Pablo kanang maong paagi samtang iyang ‘gigamit ang pulong sa Diyos sa hustong paagi,’ ang uban nga nakadungog kaniya wala lamang mamati kondili nahimo usab nga mga magtutuo. Mao kini ang kahimtang sa Tesalonica, diin gipangita ni Pablo ang mga Hudiyo ug ang mahinadlokon-sa-Diyos nga mga Hentil diha sa sinagoga. Ang asoy sa Buhat 17:2-4 nag-ingon: “Sumala sa nabatasan ni Pablo siya misulod niini, ug sulod sa tulo ka igpapahulay siya nangatarongan kanila gikan sa mga Kasulatan, nga nagpatin-aw ug nagpamatuod pinaagig mga pangutlo nga kinahanglang si Kristo mag-antos ug bangonon gikan sa mga patay . . . Ingong resulta ang pipila kanila nahimong mga magtutuo.” Si Pablo maayong mangombinsir. Siya nangatarongan, nagpatin-aw, ug nagpamatuod pinaagi sa Kasulatan nga si Jesus mao ang dugay-nang-gisaad nga Mesiyas. Unsay resulta? Natukod ang kongregasyon sa mga magtutuo.

16. Sa unsang paagi makaplagan nimo ang mas dakong kalipay sa pagmantala sa Gingharian?

¹⁶ Puwede ka bang mahimong hanas sa arte sa pagpangombinsir sa dihang nagapatin-aw sa Pulong sa Diyos? Kon mao, makakaplag ka ug dugang katagbawan sa kaugalingon ug kalipay diha sa imong buluhaton nga pagsangyaw ug pagpanudlo sa mga tawo bahin sa Gingharian sa Diyos. Mao kini ang eksperyensiya sa mga magmamantala sa maayong balita nga nagpadapat sa mga sugyot sa paggamit pa ug dugang sa Bibliya diha sa buluhatong pagsangyaw.

17. Aron ipakita kon sa unsang paagi mapuslanon ang paggamit sa Bibliya diha sa atong ministeryo, iasoy ang usa ka personal nga eksperyensiya o ihatag ang diwa sa eksperyensiya nga ania niining parapoha.

¹⁷ Pananglitan, usa ka nagapanawng magtatan-aw sa mga Saksi ni Jehova misulat: “Daghan kaayong igsoong lalaki ug mga babaye ang sa pagkakaron nagkupot na sa Bibliya sa dihang mamalaybalay sila. Nakatabang kini sa mga magmamantala sa pagbasa ug usa ka teksto ngadto sa kadaghanan sa mga tawo nga ilang mahimamat. Nakatabang kini sa tagbalay ug sa magmamantala sa paglangkit sa Bibliya, dili lamang sa mga magasin ug mga libro, sa atong ministeryo.” Siyempre, ang pagbitbit nato ug Bibliya samtang nakigbahin sa kalihokang pagsangyaw nagdepende sa lainlaing mga butang, lakip na sa lokal nga mga kostumbre. Bisan pa niana, gusto natong mabatonan ang reputasyon sa hanas nga paggamit sa Pulong sa Diyos sa pagkombinsir sa uban nga modawat sa mensahe sa Gingharian.

Hupti ang Panglantaw sa Diyos sa Ministeryo

18, 19. (a) Sa unsang paagi giisip sa Diyos ang atong ministeryo, ug nganong angay natong ugmaron ang iyang panglantaw? (b) Unsay motabang kanato sa paghimog malamposong mga pagbalikduaw? (Tan-awa ang kahon nga nag-ulohang “Kon sa Unsang Paagi Molampos sa Paghimog mga Balikduaw,” sa panid 16.)

¹⁸ Ang laing paagi sa pagtandog sa kasingkasing sa atong mga mamiminaw naglakip sa paghupot sa panglantaw sa Diyos sa ministeryo ug sa pagkahimong mapailobon. Ang kabubut-on sa Diyos mao nga ang tanang matang sa mga tawo “makadangat sa tukmang kahibalo sa kamatuoran.” (1 Timoteo 2:3, 4) Dili ba mao man kana ang atong tinguha? Si Jehova mapailobon usab, ug ang iyang pagkamapailobon naghatag ug mga kahigayonan alang sa daghan sa pagkakab-ot sa paghinulsol. (2 Pedro 3:9) Busa, sa dihang duna kitay makaplagan nga andam nga mamati sa mensahe sa Gingharian, mahimong gikinahanglan ang sublisubli nga pagduaw aron maugmad ang maong interes. Nagkinahanglag panahon ug pailob ang pagpaabot nga motubo ang mga binhi sa kamatuoran. (1 Corinto 3:6) Ang mga sugyot sa nagaubang kahon nga nag-ulohang “Kon sa Unsang Paagi Molampos sa Paghimog mga Balikduaw” naghatag ug mga sugyot sa pag-ugmad sa maong interes. Hinumdomi, ang kinabuhi sa mga tawo—ilang mga problema ug mga situwasyon—kanunayng nagakausab. Magkinahanglan tingaling moduaw sa makadaghan aron maabtan sila diha sa balay, apan takos kini sa paningkamot. Buot nato silang hatagan ug kahigayonan nga makadungog sa mensahe sa Diyos sa kaluwasan. Busa, pag-ampo kang Jehova nga Diyos alang sa kaalam sa pag-ugmad sa imong kahanas sa pagpangombinsir diha sa imong buluhaton sa pagtabang sa uban nga modawat sa mensahe sa Gingharian.

¹⁹ Sa dihang makaplagan na ang usa ka tawo nga gustong mamati ug dugang pa bahin sa mensahe sa Gingharian, unsa pay atong mahimo ingong Kristohanong mga mamumuo? Ang among sunod nga artikulo naghatag ug mga sugyot.

[Footnote]

Nahinumdom Ka Ba?

• Unsay nakapaepektibo sa depensa ni Pablo atubangan kang Haring Agripa?

• Sa unsang paagi ang atong mensahe makapalihok sa kasingkasing?

• Unsay motabang kanato sa paggamit sa Pulong sa Diyos sa epektibong paagi sa pagtandog sa kasingkasing?

• Sa unsang paagi lantawon nato ang ministeryo sumala sa panglantaw sa Diyos?

[Kahon/Mga hulagway sa panid 16]

Kon sa Unsang Paagi Molampos sa Paghimog mga Balikduaw

• Ipakita ang sinserong personal nga interes sa mga tawo.

• Pagpili ug makapadaning ulohan sa Bibliya nga pagahisgotan.

• Ipahimutang ang pundasyon alang sa matag sunod nga pagduaw.

• Hunahunaa kanunay ang maong tawo sa pagbiya nimo.

• Balik dayon, tingali human sa usa o duha ka adlaw, aron halingon ang interes.

• Hinumdomi nga ang imong tumong mao ang pagsugod ug pagtuon sa Bibliya sa balay.

• Pag-ampo nga patuboon ni Jehova ang interes.

[Hulagway sa panid 15]

Si Pablo migamit sa arte sa pagpangombinsir sa dihang miatubang siya kang Gobernador Festo ug Haring Agripa