MARINERO

Ang usa nga magpalawig o motabang sa pagmaneho sa usa ka barko; usa ka tripulante o sakayanon. (1Ha 9:​26, 27; Eze 27:​8, 9; Pin 18:17-19) Peligroso ang kinabuhi sa karaang mga marinero. Diha sa dagat nga gikusokuso sa bagyo, sila halos walay mahimo. Misulat ang salmista: “Tungod sa katalagman matunaw ang ila mismong mga kalag. Sila magsusapinday ug magparagparag sama sa usa ka hubog nga tawo, ug bisan ang tanan nilang kaalam malibog. Ug sila nagatuaw kang Jehova diha sa ilang kasakitan.”​—Sal 107:26-28.

Ang Buhat 27:15-19 naundan ug tin-aw nga asoy bahin sa gihimo sa mga marinero panahon sa usa ka bagyo. Ang bote nga giguyod ug dayag nga gigamit ingong pangsalbar kon gikinahanglan, giisa ug gikarga sa barko. Ang mga panggakot, nga lagmit mga pisi o mga kadena, gigamit sa paggakot sa barko, sa ato pa, gihikot palibot sa kasko sa barko ug gigaid diha sa salog. Ang mga kagamitan o mga kasangkapan sa barko giariya. Lagmit nagpasabot kini nga gikuhaan ang pangunang layag. Ang mga kargamento gitambog sa dagat aron mapagaan ang barko, nga nakatabang sa dugang nga pagpalutaw niini.​—Itandi ang Jon 1:5; Buh 27:38; tan-awa ang BARKO.