Ang Kongregasyon “Nakabaton ug Yugto sa Kalinaw”

1, 2. Unsay tuyo ni Saulo sa Damasco?

ANG mga tawong isog ug dagway nagsingabot na sa Damasco ug sila may daotang tuyo didto. Ilang bunloton ang mga tinun-an ni Jesus gikan sa ilang mga balay, gaposon, pakaulawan, ug guyoron paingon Jerusalem aron pasilotan sa Sanhedrin.

² Ang lider sa maong pundok nga si Saulo nalangkit na sa pagpatayg tawo.a Di pa dugay, siya miuyon ug nagtan-aw lang samtang gibato sa panatiko niyang mga kauban ang debotadong tinun-an ni Jesus nga si Esteban hangtod namatay. (Buh. 7:57–8:1) Kay wala pa makontento sa iyang paglutos sa mga sumusunod ni Jesus sa Jerusalem, si Saulo nahisamag sulo nga andam na sa pagpasilaob sa kalayo sa paglutos. Gusto niyang puohon ang samokang sekta nga nailhang ang “Dalan.”—Buh. 9:1, 2; tan-awa ang kahon nga “Ang Awtoridad ni Saulo sa Damasco.”

3, 4. (a) Unsay nahitabo kang Saulo? (b) Unsang mga pangutana ang atong hisgotan?

³ Sa kalit, ang sulaw nga kahayag milamdag kang Saulo. Ang iyang mga kauban nakakita sa kahayag apan wala sila makatingog sa kakugang. Si Saulo gibutaan ug natumba. Unya, nakadungog siyag tingog gikan sa langit nga nag-ingon: “Saulo, Saulo, nganong ginalutos ko nimo?” Kay nalibog, siya nangutana: “Kinsa man ka, Ginoo?” Nakuratan gayod si Saulo sa tubag: “Ako si Jesus, nga imong ginalutos.”—Buh. 9:3-5; 22:9.

⁴ Unsay makat-onan nato sa unang mga pulong ni Jesus kang Saulo? Sa unsang paagi makabenepisyo kita sa pagpamalandong sa mga hitabo may kalabotan sa pagkakombertir ni Saulo? Ug unsang mga leksiyon ang atong makat-onan sa paagi sa pagpahimulos sa kongregasyon sa yugto sa kalinaw human makombertir si Saulo?

5, 6. Unsay atong makat-onan sa mga pulong ni Jesus kang Saulo?

⁵ Sa dihang gibalda ni Jesus ang panaw ni Saulo paingon sa Damasco, Siya wala mangutana: “Nganong ginalutos nimo ang akong mga tinun-an?” Apan siya nangutana: “Nganong ginalutos ko nimo?” (Buh. 9:4) Oo, gibati mismo ni Jesus ang kasakit sa mga paglutos sa iyang mga sumusunod.—Mat. 25:34-40, 45.

⁶ Kon gidaogdaog ka tungod sa imong pagtuo sa Kristo, salig gayod nga si Jehova ug si Jesus nahibalo sa imong kahimtang. (Mat. 10:22, 28-31) Sa pagkakaron, ang pagsulay mahimong dili wad-on. Hinumdomi, si Jesus nakakita sa papel ni Saulo sa pagpatay kang Esteban ug sa iyang pagguyod sa matinumanong mga tinun-an gikan sa ilang mga balay sa Jerusalem. (Buh. 8:3) Apan si Jesus wala mangilabot adtong tungora. Bisan pa niana, si Jehova, pinaagi sa Kristo, naghatag kang Esteban ug sa ubang mga tinun-an sa gikinahanglang kusog aron sila magpabiling matinumanon.

7. Unsay kinahanglan nimong himoon aron malahutay ang paglutos?

⁷ Malahutay usab nimo ang paglutos kon himoon nimo kini: (1) Magmadeterminado sa pagpabiling maunongon bisag unsay mahitabo. (2) Magpatabang kang Jehova. (Filip. 4:6, 7) (3) Itugyan kang Jehova ang pagpanimalos. (Roma 12:17-21) (4) Salig nga si Jehova mohatag kanimog kusog sa paglahutay hangtod nga iyang wad-on ang pagsulay.—Filip. 4:12, 13.

8, 9. Unsa kahay gibati ni Ananias bahin sa iyang asaynment?

⁸ Human tubaga ang pangutana ni Saulo, “Kinsa man ka, Ginoo?” si Jesus miingon kaniya: “Bangon ug adto sa siyudad, ug sultihan ra ka kon unsay kinahanglan nimong buhaton.” (Buh. 9:6) Ang gibutaang si Saulo giagak paingon sa iyang balay-abtanan sa Damasco, ug didto nagpuasa ug nag-ampo siyag tulo ka adlaw. Kasamtangan, sa maong siyudad si Jesus nakigsulti bahin kang Saulo ngadto sa tinun-ang si Ananias, kinsa “maayog dungog sa tanang Hudiyo” nga nagpuyo sa Damasco.—Buh. 22:12.

⁹ Nagsagol ang gibati ni Ananias! Ang Ulo sa kongregasyon nga mao ang nabanhawng si Jesu-Kristo nakigsulti mismo kaniya, nga nagpili kaniya alang sa linaing asaynment. Pagkadakong pribilehiyo, apan pagkakuyaw nga asaynment! Dihang gisugo siya nga makigsulti kang Saulo, si Ananias mitubag: “Ginoo, nakadungog ko gikan sa daghang tawo bahin niining tawhana, bahin sa tanang kadaot nga iyang gihimo sa imong mga balaan sa Jerusalem. Ug mianhi siya dinhi nga may awtoridad gikan sa pangulong mga saserdote sa pagdakop sa tanang nagatawag sa imong ngalan.”—Buh. 9:13, 14.

10. Unsay atong makat-onan sa reaksiyon ni Jesus sa pagpahayag ni Ananias ug kabalaka?

¹⁰ Wala badlonga ni Jesus si Ananias tungod sa pagpahayag sa iyang kabalaka. Hinunoa, si Jesus mihatag kaniyag tin-awng instruksiyon. Ug agig konsiderasyon, gisultihan siya ni Jesus sa hinungdan kon nganong gihatagan siya niadtong talagsaong asaynment. Kini ang giingon ni Jesus bahin kang Saulo: “Kining tawhana maoy usa ka piniling sudlanan alang kanako sa pagdala sa akong ngalan ngadto sa kanasoran ingon man sa mga hari ug sa mga anak ni Israel. Kay akong ipakita kaniya ang tanang butang nga angay niyang antoson tungod sa akong ngalan.” (Buh. 9:15, 16) Si Ananias misunod dayon kang Jesus. Giadto niya ang maglulutos nga si Saulo ug giingnan: “Saulo, igsoon ko, ang Ginoong Jesus, nga nagpakita kanimo diha sa dalan samtang nagpadulong ka dinhi, nagpadala kanako aron makakita ka pag-usab ug mapuno ka sa balaang espiritu.”—Buh. 9:17.

11, 12. Unsay atong makat-onan gikan sa mga panghitabo nga naglangkit kang Jesus, Ananias, ug Saulo?

¹¹ Daghan ang atong makat-onan gikan sa mga panghitabo nga naglangkit kang Jesus, Ananias, ug Saulo. Pananglitan, si Jesus direktang nagdumala sa buluhatong pagsangyaw, ingon sa iyang gisaad. (Mat. 28:20) Bisan pag dili siya direktang makigsulti sa mga tawo karon, siya ang nagdumala sa buluhatong pagsangyaw pinaagi sa matinumanong ulipon, nga karon maoy iyang gitudlo ibabaw sa iyang mga sulugoon sa panimalay. (Mat. 24:45-47) Ubos sa pagdumala sa Nagamandong Lawas, ang mga magmamantala ug payunir ginapadala aron sa pagpangita niadtong buot pang makakat-on bahin sa Kristo. Ingon sa nahisgotan na sa miaging kapitulo, daghan kanila nag-ampo alang sa giya sa Diyos ug dayon may mga Saksi ni Jehova nga miduaw kanila.—Buh. 9:11.

¹² Si Ananias masinugtanong midawat ug usa ka asaynment ug siya gipanalanginan. Nagtuman ba ka sa sugo nga bug-os magpamatuod bisan pag mobati kag kakulba sa maong asaynment? Ang pipila mobatig kakulba sa pagpamalaybalay ug sa pagpakig-estorya sa mga tawong dili nila kaila. Ang uban malisdan sa pagsangyaw sa mga tawo diha sa mga tindahan, opisina, sa kadalanan, o pinaagig telepono o sulat. Nabuntog ni Ananias ang iyang kakulba ug nakapribilehiyo siya sa pagtabang kang Saulo nga makadawat sa balaang espiritu.b Siya nagmalamposon kay siya misalig kang Jesus ug iyang giisip si Saulo nga iyang igsoon. Mabuntog usab nato ang atong kakulba kon sama kang Ananias, kita mosalig nga si Jesus ang nagdumala sa buluhatong pagsangyaw, kita maluoy sa mga tawo, ug atong isipon nga bisan ang mga tawong kahadlokan kaayo mahimong mga magtutuo sa umaabot.—Mat. 9:36.

13, 14. Kon nagtuon ka sa Bibliya apan dili pa bawtismado, unsay imong makat-onan gikan sa panig-ingnan ni Saulo?

¹³ Gipadapat dayon ni Saulo ang iyang nahibaloan. Sa dihang gipasig-uli ang iyang panan-aw, siya nagpabawtismo ug nakig-uban sa mga tinun-an sa Damasco. Apan dili lang kana ang iyang gihimo. “Sa walay langan siya nagwali diha sa mga sinagoga bahin kang Jesus, nga siya ang Anak sa Diyos.”—Buh. 9:20.

¹⁴ Kon nagtuon ka sa Bibliya apan dili pa bawtismado, sundogon ba nimo si Saulo ug ipadapat dayon ang imong natun-an pinaagi sa pagpabawtismo? Tinuod, si Saulo nakasaksi mismo ug usa ka milagro sa Kristo, mao nga natukmod siya sa paglihok. Apan ang uban nakasaksi usab ug mga milagro ni Jesus. Pananglitan, usa ka grupo sa mga Pariseo ang nakakita nga giayo niya ang kuyos nga kamot sa usa ka tawo, ug daghang Hudiyo ang nahibalo nga si Lazaro gibanhaw ni Jesus. Apan daghan kanila ang walay interes ug misupak pa kaniya. (Mar. 3:1-6; Juan 12:9, 10) Sukwahi kanila, ang kasingkasing ni Saulo nausab. Nganong misanong man si Saulo apan ang uban wala? Kay siya mas nahadlok sa Diyos kay sa tawo ug siya nagpabili gayod sa kaluoy nga gipakita kaniya sa Kristo. (Filip. 3:8) Kon susama ang imong pagsanong, ayaw tugoti nga adunay makapugong kanimo sa pagsangyaw ug pagkahimong kuwalipikado alang sa bawtismo.

15, 16. Unsay gihimo ni Saulo diha sa mga sinagoga, ug unsay sanong sa mga Hudiyo sa Damasco?

¹⁵ Maimadyin ba nimo ang kahingangha, kakurat, ug kasuko nga gibati sa mga tawo sa dihang misugod si Saulo sa pagwali bahin kang Jesus diha sa mga sinagoga? “Dili ba mao man kining tawhana ang pintas nga nag-atake niadtong mga atua sa Jerusalem nga nagtawag niining ngalana?” sila nangutana. (Buh. 9:21) Sa dihang si Saulo nagpatin-aw kon nganong nausab ang iyang tinamdan, iyang “gipamatud-an nga si Jesus mao ang Kristo pinaagi sa makapakombinsir nga mga pangatarongan.” (Buh. 9:22) Apan ang maayong pagpangatarongan dili makakombinsir sa tanan. Kini dili makapausab sa hunahuna sa mga tawo nga garboso o naulipon sa tradisyon. Bisan pa niana, wala mosurender si Saulo.

¹⁶ Tulo ka tuig sa ulahi, ang mga Hudiyo sa Damasco supak gihapon kang Saulo. Ug buot nila siyang patyon. (Buh. 9:23; 2 Cor. 11:32, 33; Gal. 1:13-18) Sa dihang nasayran ni Saulo ang maong daotang laraw, siya nagmaalamon ug mibiya sa siyudad nga nagpatunton sulod sa bukag agi sa usa ka gawang sa paril sa siyudad. Gibatbat ni Lucas nga kadtong mitabang kang Saulo sa pag-ikyas niadtong gabhiona maoy “mga tinun-an” ni Saulo. (Buh. 9:25) Kining mga pulonga lagmit nagpaila nga ang pipila nga nakadungog sa pagwali ni Saulo sa Damasco misanong ug nahimong mga sumusunod sa Kristo.

17. (a) Unsay sanong sa mga tawo bahin sa kamatuoran sa Bibliya? (b) Unsay paningkamotan natong buhaton, ug ngano?

¹⁷ Dihang misugod ka sa pagsulti sa imong pamilya, mga higala, ug sa uban pa bahin sa kamatuoran sa Bibliya nga imong nakat-onan, nagtuo ka nga sila modawat niini sanglit kini makataronganon. Midawat tingali ang pipila, apan ang daghan wala. Gani, mahimong giisip pa ka nga kaaway sa mga membro sa imong kaugalingong panimalay. (Mat. 10:32-38) Apan, kon ikaw maningkamot nga mahimong hanas sa pagpangatarongan pinasukad sa Kasulatan ug maghupot ug Kristohanong panggawi, sa ngadtongadto basin mausab ra ang tinamdan bisan sa mga magsusupak.—Buh. 17:2; 1 Ped. 2:12; 3:1, 2, 7.

18, 19. (a) Unsay nahitabo sa dihang gidepensahan ni Bernabe si Saulo? (b) Unsaon nato pagsundog si Bernabe ug Saulo?

¹⁸ Sa pagsulod ni Saulo sa Jerusalem, natural lang nga dili motuo ang mga tinun-an nga siya sumusunod na sa Kristo. Apan sa dihang gipamatud-an ni Bernabe nga si Saulo usa na gayod ka tinun-an, siya gidawat sa mga apostoles ug nakig-uban kanila sa taastaas nga panahon. (Buh. 9:26-28) Si Saulo nagmabinantayon apan wala niya ikaulaw ang maayong balita. (Roma 1:16) Maisogon siyang nagwali sa Jerusalem, diin gisugdan niya kaniadto ang grabeng paglutos sa mga tinun-an ni Jesu-Kristo. Nalisang gayod ang mga Hudiyo sa Jerusalem sa pagkaamgo nga sila gitalikdan na sa ilang sinaligang manlalaban kanhi, mao nga gusto nilang patyon siya. “Dihang nasayran kini sa mga igsoon,” matod sa asoy, “ilang gidala [si Saulo] sa Cesarea ug gipaadto siya sa Tarso.” (Buh. 9:30) Miuyon adto si Saulo ingong pagpasakop sa pagdumala ni Jesus pinaagi sa kongregasyon. Nakahatag kadtog kaayohan kaniya ug sa kongregasyon.

¹⁹ Matikdi nga si Bernabe ang mihimog unang tikang sa pagtabang kang Saulo. Tungod gayod sa maong kaayo nga kining duha ka madasigong alagad ni Jehova nahimong suod nga managhigala. Sama kang Bernabe, ikaw ba andam motabang sa mga bag-ohan sa kongregasyon pinaagi sa pagkuyog kanila sa pagsangyaw ug pagtabang kanila nga mouswag sa kamatuoran? Makadawat kag daghang panalangin kon kanay imong buhaton. Kon bag-ohan kang magmamantala sa maayong balita, sama kang Saulo, magpatabang ba ka? Kon makig-uban ka sa eksperyensiyadong mga magmamantala, ikaw mahimong mas hanas sa ministeryo, mas malipayon, ug makabatog dumalayong mga higala.

20, 21. Sa unsang paagi ang ‘mga yugto sa kalinaw’ gipahimuslan pag-ayo sa mga alagad sa Diyos kanhi ug karon?

²⁰ Human si Saulo makombertir ug luwas nga nakabiya, “ang kongregasyon sa tibuok Judea ug Galilea ug Samaria nakabaton ug yugto sa kalinaw.” (Buh. 9:31) Sa unsang paagi gipahimuslan sa mga tinun-an kining paborableng panahon? (2 Tim. 4:2) Ang asoy nag-ingon nga sila ‘nalig-on.’ Ang mga apostoles ug ubang responsableng mga lalaki nagpalig-on sa pagtuo sa mga tinun-an ug nanguna sa buluhaton samtang ang kongregasyon “nagkinabuhi nga may kahadlok kang Jehova ug nagkinabuhi uyon sa paghupay sa balaang espiritu.” Pananglitan, gipahimuslan ni Pedro ang panahon sa pagpalig-on sa mga tinun-an sa lungsod sa Lida sa Patag sa Saron. Tungod sa iyang paningkamot, daghan nga nagpuyo sa palibot ang “nahimong magtutuo sa Ginoo.” (Buh. 9:32-35) Ang mga tinun-an wala magpabalda sa sekular nga mga tumong apan naghago sa pag-atiman sa usag usa ug sa pagwali sa maayong balita. Tungod niana, ang kongregasyon “padayong midaghan.”

²¹ Sa hinapos sa ika-20ng siglo nabatonan sa mga Saksi ni Jehova sa daghang nasod ang susamang “yugto sa kalinaw.” Kalit nahugno ang mga gobyerno nga nagdaogdaog sa katawhan sa Diyos sa daghang dekada, ug nahimong mas sayon ang pagsangyaw diha sa mga nasod diin gidili ang buluhaton ug sa pipila ka kahimtang, ang pagdili bug-os nga gitangtang. Gipahimuslan sa libolibong Saksi ang kahigayonan sa pagsangyaw diha sa publiko ug makapahingangha ang mga resulta.

22. Sa unsang paagi mapahimuslan nimo pag-ayo ang imong kagawasan?

²² Gipahimuslan ba nimo ang imong kagawasan? Kon nagpuyo ka sa usa ka nasod nga may kagawasan sa relihiyon, ikaw tentalon ni Satanas sa pagpangagpas ug materyal nga bahandi, imbes sa pag-alagad kang Jehova. (Mat. 13:22) Ayaw pagpabalda. Pahimusli pag-ayo ang mga yugto sa kalinaw nga tingali imong nabatonan karon. Isipa kana ingong kahigayonan sa bug-os nga pagpamatuod ug sa pagpalig-on sa kongregasyon. Hinumdomi, mahimong kalit nga mausab ang imong kahimtang.

23, 24. (a) Unsay mga punto nga atong makat-onan sa asoy bahin kang Tabitha? (b) Unsa gayod ang angay natong padayong buhaton?

²³ Tagda ang nahitabo sa tinun-ang si Tabitha o Dorcas. Siya nagpuyo niadto sa Jope, usa ka lungsod nga duol sa Lida. Kining matinumanong igsoon maalamong naggamit sa iyang panahon ug kahinguhaan, mao nga siya daghag “maayong buhat ug gasa sa kaluoy.” Apan siya kalit nga nasakit ug namatay.c Tungod sa iyang kamatayon, ang mga tinun-an sa Jope naguol pag-ayo, ilabina ang mga babayeng balo nga iyang natabangan. Pag-abot ni Pedro sa balay diin giandam ang lawas ni Tabitha alang sa paglubong, iyang gihimo ang milagro nga wala pa sukad mahimo sa mga apostoles ni Jesu-Kristo. Miampo si Pedro ug dayon iyang gibanhaw si Tabitha! Puwerteng lipaya sa mga babayeng balo ug ubang tinun-an sa dihang gipabalik sila ni Pedro sa lawak ug gipaatubang kanila ang buhi nang si Tabitha! Ang maong mga hitabo nakapalig-on gayod kanila alang sa mga pagsulay sa umaabot! Siyempre, ang maong milagro ‘nabaniog sa tibuok Jope, ug daghan ang nahimong magtutuo sa Ginoo.’—Buh. 9:36-42.

²⁴ Makakat-on kitag duha ka hinungdanong punto gikan sa makapadasig nga asoy bahin kang Tabitha. (1) Ang kinabuhi lumalabay lamang. Busa hinungdanon nga magbaton kitag maayong ngalan sa Diyos samtang kita makaarang pa! (Eccl. 7:1) (2) Ang paglaom sa pagkabanhaw maoy segurado. Si Jehova nakakita gayod sa daghang maayong buhat ni Tabitha, ug iya siyang gigantihan. Siya mahinumdom sa atong kakugi ug magbanhaw kanato kon kita mamatay sa dili pa ang Armagedon. (Heb. 6:10) Busa kon nag-atubang ta karon ug “lisod nga panahon” o nagpahimulos ug “yugto sa kalinaw,” magpadayon ta sa bug-os nga pagpamatuod bahin sa Kristo.—2 Tim. 4:2.