Unsa Gayoy Hitsura ni Jesus?

Walay tawo nga dunay letrato ni Jesus. Wala gyod siya magpahimog painting o eskultora sa iyang dagway. Pero makita siya diha sa daghang obra nga gihimo sa mga dibuhista ug eskultor sulod sa daghang siglo.

Siyempre, wala sila mahibalo kon unsa gayoy hitsura ni Jesus. Ang kultura, relihiyon, ug ang gusto sa nagpahimog painting o eskultora sagad maoy nakaimpluwensiya nila sa ilang paglarawan sa hitsura ni Jesus. Pero ang ilang paghulagway kang Jesus makaimpluwensiya ug makalubog pa gani sa panglantaw sa mga tawo bahin kang Jesus ug sa iyang mga gitudlo.

Ang ubang dibuhista ug eskultor naglarawan kang Jesus ingong luyahon nga tawo, taas ug buhok, nipis ug bungot, o magul-anon. Gilarawan pod sa uban si Jesus ingong gamhanan, nga dunay lingin nga kahayag ibabaw sa ulo, o dili makigduol ug tawo. Husto ba ang ilang paglarawan kang Jesus? Unsaon nato pagkahibalo? Pinaagi sa pagsusi sa giingon sa Bibliya nga makahatag natog ideya kon unsa tingaliy iyang hitsura. Kini makatabang sab aron makabaton kitag hustong panglantaw bahin kaniya.

Kana ang giingon ni Jesus sa iyang pag-ampo panahon sa iyang bawtismo. (Hebreohanon 10:5; Mateo 3:13-17) Unsay hitsura sa iyang lawas? Mga 30 ka tuig sa miagi, ang anghel nga si Gabriel miingon kang Maria: “Ikaw manamkon sulod sa imong tagoangkan ug manganak ug usa ka anak nga lalaki, . . . Anak sa Diyos.” (Lucas 1:31, 35) Sa ato pa, si Jesus hingpit nga tawo, sama kang Adan nga hingpit dihang siya gibuhat. (Lucas 3:38; 1 Corinto 15:45) Seguradong maskulado si Jesus, ug tingali liwat siya sa iyang inahang si Maria nga usa ka Hudiyo.

Si Jesus dunay bungot kay ingon niana ang mga Hudiyo, nga lahi sa mga Romano. Ang ilang bungot maoy simbolo sa pagkadungganon ug pagkatinahod; mubo kini ug hapsay. Seguradong inatiman ni Jesus ang iyang bungot, ug maayong pagkatupi ang iyang buhok. Ang mga Nazareo lang sama kang Samson ang dili magpatupig buhok.​—Numeros 6:5; Maghuhukom 13:5.

Sa dakong bahin sa 30 ka tuig nga kinabuhi ni Jesus, panday siya, nga walay modernong mga gamit sa pagpamanday. (Marcos 6:3) Busa seguradong dakog lawas si Jesus. Sa unang bahin sa iyang ministeryo, “giabog niya ang tanan nga may mga karnero ug mga baka pagawas sa templo, ug giyabo niya ang mga sensilyo sa mga tig-ilis ug salapi ug gipanglintuwad ang ilang mga lamesa.” (Juan 2:14-17) Kusgan lang ang makahimo niana. Gigamit ni Jesus ang lawas nga gihatag sa Diyos kaniya sa pagtuman sa gisugo kaniya: “Kinahanglan nga sa ubang siyudad usab ipahayag ko ang maayong balita sa gingharian sa Diyos, tungod kay alang niini gipadala ako.” (Lucas 4:43) Nagkinahanglag lig-ong panglawas aron makalahutay sa pagbaktas sa tibuok Palestina sa pagsangyaw niini nga mensahe.

Kini nga imbitasyon seguradong nakapadani sa mga tawong “nabudlayan ug nabug-atan,” kay si Jesus mahigalaon ug buotan. (Mateo 11:28-30) Ang iyang pagkamabination ug pagkabuotan napasiugda diha sa iyang saad sa paghatag ug kalagsik o kahupayan niadtong gustong magpatudlo kaniya. Bisan ang mga bata gustong makigsuod kang Jesus, kay ang Bibliya nag-ingon: “Iyang gikugos ang mga bata.”​—Marcos 10:13-16.

Bisag grabe ang pag-antos ni Jesus una siya mamatay, dili siya tawong masulub-on. Pananglitan, sa mitambong siyag kasal sa Cana, iyang gihimo ang tubig ingong bino nga nakadugang ug kalipay sa okasyon. (Juan 2:1-11) Ug sa uban pang salosalo, nagtudlo siyag mga leksiyon nga dili gyod makalimtan.​—Mateo 9:9-13; Juan 12:1-8.

Labaw sa tanan, ang pagsangyaw ni Jesus naghatag ug kahigayonan sa mga mamiminaw nga makabatog makapalipayng palaaboton nga kinabuhing walay kataposan. (Juan 11:25, 26; 17:3) Dihang nagreport ang iyang 70 ka disipulo bahin sa ilang pagsangyaw, siya nalipay pag-ayo ug miingon: “Pagmaya tungod kay ang inyong mga ngalan nahisulat na sa mga langit.”​—Lucas 10:20, 21.

Ang mga lider sa relihiyon sa panahon ni Jesus nangitag paagi sa pagkuha sa atensiyon sa mga tawo ug sa pagpakita sa ilang awtoridad. (Numeros 15:38-40; Mateo 23:5-7) Si Jesus lahi kanila, kay iyang gisugo ang iyang mga apostoles nga dili sila angayng ‘magharihari.’ (Lucas 22:25, 26) Gani, si Jesus nagpasidaan: ‘Pagbantay sa mga eskriba nga buot maglakawlakaw nga may tag-as nga mga besti ug buot timbayaon diha sa mga tiyanggihan.’​—Marcos 12:38.

Pero lahi si Jesus kay motapo siya sa mga tawo, ug usahay dili pa gani siya mailhan. (Juan 7:10, 11) Bisan taliwala sa iyang 11 ka matinumanong apostoles, dili siya lahi tan-awon. Gihalokan pa gani si Jesus sa mabudhiong si Judas agig “ilhanan,” aron mailhan siya sa mga tawo nga nagpangita kaniya.​—Marcos 14:44, 45.

Daghan pang detalye nga wala nato mahibaloi, pero klaro nga ang hitsura ni Jesus lahi sa sagad nga paghulagway sa mga tawo kaniya. Apan ang mas importante dili kon unsa gayoy iyang hitsura kondili ang atong panglantaw kaniya.

Sa adlaw mismo nga gisulti ni Jesus kining mga pulonga, siya namatay ug gilubong. (Juan 14:19) Iyang gihatag ang iyang kinabuhi ingong “lukat baylo sa daghan.” (Mateo 20:28) Sa ikatulong adlaw, gibanhaw siya sa Diyos “diha sa espiritu” ug nagpakita ngadto sa uban niyang mga disipulo. (1 Pedro 3:18; Buhat 10:40) Unsay hitsura ni Jesus dihang nagpakita siya sa iyang mga disipulo? Tingali lahi na sa iyang orihinal nga hitsura, kay bisan gani kadtong suod niya wala dayon makaila kaniya. Si Maria Magdalena nagtuo nga usa siya ka hardinero, ug ang duha ka disipulo nga naglakaw paingon sa Emmaus nagtuo nga usa siya ka estranghero.​—Lucas 24:13-18; Juan 20:1, 14, 15.

Unsay atong paghulagway kang Jesus karon? Kapig 60 ka tuig human mamatay si Jesus, si apostol Juan nakakitag mga panan-awon bahin kaniya. Wala siya makakitag tawong himalatyon diha sa krus. Hinunoa, iyang nakita ang “Hari sa mga hari ug Ginoo sa mga ginoo,” ang Hari sa Gingharian sa Diyos, kinsa sa dili madugay maglaglag sa mga kaaway sa Diyos​—mga demonyo ug mga tawo—​dayon maghatag ug walay kataposang mga panalangin ngadto sa katawhan.​—Pinadayag 19:16; 21:3, 4.