Iwali ug Ihatag ang Bug-os nga Pamatuod
1 Ingong “pangulo ug komandante,” giandam ni Jesus ang iyang mga tinun-an alang sa dakong buluhaton sa pagwali nga naghulat sa unahan. (Isa. 55:4; Luc. 10:1-12; Buh. 1:8) Gihubit ni apostol Pedro ang sugo nga gihatag ni Jesus kanila niining mga pulonga: “Siya nagsugo kanamo nga magwali ngadto sa katawhan ug maghatag ug bug-os nga pamatuod nga kini Siya mao ang gitudlo sa Diyos nga mahimong maghuhukom sa mga buhi ug sa mga patay.” (Buh. 10:42) Unsay nalangkit sa paghatag ug bug-os nga pamatuod?
2 Daghan kitag makat-onan pinaagi sa pagtagad sa panig-ingnan ni apostol Pablo. Sa dihang nakigtigom uban sa mga ansiyano sa kongregasyon sa Efeso, gipahinumdoman niya sila: “Ako wala magpugong sa pagsulti kaninyo sa bisan unsa man sa mga butang nga makaayo ni sa pagtudlo kaninyo sa publiko ug sa balay ug balay. Apan ako bug-os nga nagpamatuod ngadto sa mga Hudiyo ug sa mga Grego mahitungod sa paghinulsol ngadto sa Diyos ug sa pagtuo diha sa atong Ginoong Jesus.” Bisan pa sa iyang ginaatubang nga mga pagsulay, naningkamot si Pablo sa pag-abot sa daghan kutob sa maarangan dala ang maayong balita. Wala siya matagbaw nga ipaambit lamang ang paninugdang mga kamatuoran ngadto sa iyang mga tigpaminaw, kondili naningkamot siya sa pagpaambit sa “tanang gimbut-an sa Diyos.” Aron matuman kini, andam siyang manikaysikay ug mohimog mga sakripisyo. Siya midugang: “Sa unsa mang hinungdan wala ko pakamahala ang akong kalag, basta lamang akong mahuman ang akong ginadagan ug ang ministeryo nga akong nadawat sa Ginoong Jesus, nga bug-os magpamatuod sa maayong balita bahin sa dili-takos nga kalulot sa Diyos.”—Buh. 20:20, 21, 24, 27.
3 Sa unsang paagi atong masundog ang panig-ingnan ni Pablo karong adlawa? (1 Cor. 11:1) Pinaagi sa pagpangita sa takos nga mga tawo bisan pag nag-atubang kita ug mga pagsulay, pinaagi sa pagpaningkamot nga maabot ang tanang etnikong mga grupo ug mga pinulongan dala ang maayong balita, ug pinaagi sa makugihong pag-ugmad sa interes nga atong makaplagan. (Mat. 10:12, 13) Kini nagkinahanglan ug panahon, panikaysikay, ug gugma alang sa katawhan.
4 Makaalagad Ka ba Ingong Oksilyare Payunir? Ang mga bulan sa Marso, Abril, ug Mayo makahatag ug maayong kahigayonan kanimo sa paghatag ug bug-os nga pagpamatuod pinaagi sa pag-oksilyare payunir. Pagkamakapadasig gayod ang pagtan-aw nga daghan kaayo sa miaging tuig ang mihimog linaing panikaysikay sa pag-oksilyare payunir!
5 Usa ka 80-anyos nga igsoong babaye nga may daghang suliran sa panglawas ang napalihok pinaagi sa pagdasig nga gitagana sa organisasyon ni Jehova. Siya misulat: “Gihaling niini pag-usab ang dugay nang tinguha sa akong kasingkasing, ug kini nagtukmod kanako nga kinahanglan akong mag-oksilyare payunir nga sa labing menos makausa pa.” Nakahukom siyang mag-oksilyare payunir sa Marso. “Ang una kong gibuhat,” matod niya, “mao ang paglingkod ug pagkuwenta sa gasto. Nakig-estorya ako sa akong anak babaye bahin niana tungod kay gikinahanglan ko ang iyang tabang. Gisorpresa ko niya pinaagi sa pag-oksilyare payunir usab.” Sulod sa maong bulan, ang edaran nga igsoong babaye migugol ug 52 oras diha sa ministeryo. “Sa makadaghan miampo ako kang Jehova sa pagbag-o sa akong kusog sa dihang mibati akog kaluya. Sa kataposan sa maong bulan, ako malipayon ug tagbaw kaayo, ug gipasalamatan ko si Jehova sa makadaghan tungod sa pagtabang kanako. Gusto kong mag-oksilyare payunir pag-usab.” Ang iyang malipayong kasinatian mahimong magdasig sa uban nga gusto gayong mag-oksilyare payunir bisan pa sa seryosong mga suliran sa panglawas.
6 Usa ka igsoong lalaki nga wala damhang matangtang sa iyang sekular nga trabaho ang nagpahimulos sa kahigayonan sa pag-oksilyare payunir. Sa bulan nga siya misulod niana, siya mas pang nagmasiboton sa buluhatong pagsangyaw, ug sa kataposan sa maong bulan, siya nakasugod ug usa ka bag-ong pagtuon sa Bibliya. Sa pagpamalandong sa maong kasinatian, siya miingon: “Pagkamabungahon nga bulan!” Pagkamalipayon niya tungod sa pagtultol ug tabang ni Jehova! Oo, si Jehova nagbubo ug dagayang panalangin ngadto kaniya tungod sa iyang panikaysikay gayod diha sa ministeryo, ug siya mopanalangin usab kanimo.—Mal. 3:10.
7 Alang sa daghan, ang pag-oksilyare payunir dili sayon. Hinunoa, bisan pa sa sekular ug pamilyahanon nga mga responsabilidad maingon man ang personal nga mga suliran, daghang igsoong lalaki ug babaye ang nakahimo niana. Ang paghatag ug bug-os nga pamatuod sagad naglangkit ug sakripisyo sa atong bililhong panahon ug kusog, apan ang mga panalangin walay katumbas.—Prov. 10:22.
8 Ang Marso, Abril, ug Mayo maoy haom nga mga bulan nga mag-oksilyare payunir. Dunay lima ka hinapos sa semana ang Marso ug may lima ka Sabado ang Mayo. Gawas pa, kini maoy mga bulan nga tingbakasyon alang sa mga nagtungha. Ang pagpahimulos sa maong ekstra nga mga hinapos sa semana ug mga pista opisyal ug sa pagsangyaw sa pipila ka gabii mahimong magtugot sa pipila nga may bug-os-panahong trabaho nga makaoksilyare payunir. Aron makaeskedyul ug 50 ka oras diha sa ministeryo sulod sa Marso, Abril, o Mayo, magamit mo ba ang usa sa sampol nga mga eskedyul sa pag-oksilyare payunir nga gilakip niining artikuloha? Hisgoti ang imong eskedyul sa uban; walay duhaduha nga madasig ang uban sa pagduyog kanimo diha sa ministeryo. Kon dili ka makaoksilyare payunir, paghimog espesipikong tumong sulod sa maong mga bulan, ug paluyohi kadtong makapayunir. Pagplano na karon alang sa dugang pag-alagad sulod sa Marso, Abril, ug Mayo.
9 Ipakita ang Pagpabili Alang sa Memoryal: Matag tuig sa panahon sa Memoryal, ang pagkamapasalamaton alang sa lukat nagtukmod sa daghan sa ‘pagpalit sa nahiangay nga panahon’ aron mag-oksilyare payunir. (Efe. 5:15, 16) Dinhi sa Pilipinas sa miaging tuig, aduna ing 9,515 ka oksilyare payunir sa Marso, 15,458 sa Abril, ug 12,652 sa Mayo. Kana may aberids nga 12,542 kada bulan sa maong tulo ka bulan. Ang maong gidaghanon mas taas kon itandi sa aberids nga gidaghanon nga 1,691 nga nag-oksilyare payunir sulod sa matag bulan sa nag-unang mga bulan sa maong tuig sa pag-alagad. Kining panahona sa Memoryal maoy laing maayong kahigayonan sa pagpakita sa atong tim-os nga pagpabili sa halad lukat ni Kristo pinaagi sa pagpauswag sa atong kalihokan diha sa ministeryo sa kanataran.
10 Samtang nagsingabot ang Abril 16, palandonga kon unsay kahulogan sa Memoryal alang kanimo. Hunahunaa ang mga hitabo nga mitultol sa kamatayon ni Kristo ug ang mga hunahuna nga nakapabalaka pag-ayo kaniya. Palandonga, usab, ang kalipay nga gibutang sa atubangan ni Jesus ug kon sa unsang paagi nakatabang kana kaniya sa paglahutay sa maong pagdagmal. Palandonga ang iyang posisyon karon ingong Ulo sa kongregasyon, nga nanguna sa buluhatong pagsangyaw ug paghimog tinun-an. (1 Cor. 11:3; Heb. 12:2; Pin. 14:14-16) Dayon ipasundayag ang imong pagpabili sa tanang nahimo ni Kristo pinaagi sa pagpakig-ambit sa bug-os diha sa buluhatong pagsangyaw segun sa itugot sa imong mga kahimtang.
11 Dasiga ang Uban nga Bug-os Magpamatuod: Pinaagi sa pag-alagad ingong oksilyare payunir, ang mga ansiyano ug ministeryal nga mga alagad anaa sa hustong kahimtang sa pagdasig sa uban. Sa dihang makig-uban sa mga magmamantala diha sa ministeryo sa kanataran ug sa dihang mohimog mga pagduaw isip magbalantay, sila adunay maayong kahigayonan nga personal nga makatabang sa uban nga makapakig-ambit sa bug-os sa maong linaing kalihokan. Hinaot iampo natong tanan ang maong mga butang, sa ingon magpalig-on sa atong hiniusang mga panikaysikay sa paghatag ug bug-os nga pamatuod.
12 Samtang mokooperar ang tanang ansiyano ug ministeryal nga mga alagad uban sa mga kahikayan sa kongregasyon alang sa dugang kalihokan sulod sa mga bulan sa Marso, Abril, ug Mayo, ang magtatan-aw sa pag-alagad ilabina angayng mohimog nahiangayng mga kahikayan alang sa pagsangyaw. Angay niyang organisahon ang mga dapit nga sangyawan, mga adlaw, ug mga panahon diin kombenyente alang sa kadaghanang magmamantala ug kinahanglang regular kining ipahibalo. Mahimong himoon ang mga kahikayan sa lainlaing panahon nga magkatigom sulod sa maong adlaw, nga maghatag ug kahigayonan sa tanan diha sa kongregasyon nga makapakig-ambit sa nagkalainlaing matang sa pagsangyaw. Kini mahimong maglakip sa pagsangyaw diha sa mga tindahan, sa kadalanan, sa pagpamalaybalay, sa mga balikduaw, ug sa pagsangyaw pinaagig telepono. Dugang pa, angay niyang hikayon nga may igong suplay sa mga literatura, magasin, ug teritoryo nga mabatonan sulod sa maong mga bulan.
13 Ang tanyag alang sa Marso mao ang librong Kahibalo, uban ang tumong nga makasugod ug mga pagtuon sa Bibliya. Ang maayong mga sugyot sa pagtanyag sa librong Kahibalo makita sa pasukip sa Mayo 2002 nga Atong Ministeryo sa Gingharian. Ang tanyag sa Abril mao ang mga magasing Bantayanang Torre ug Pagmata! Sulayi ang paggamit sa mga sugyot nga makita diha sa “Kon Unsay Isulti Labot sa mga Magasin.” Ang tanan angayng mangandam pag-ayo aron makahatag ug bug-os nga pamatuod.
14 Pagkabulahan nato nga magbuhat ilalom sa pagtultol sa Ulo sa kongregasyon, si Kristo Jesus, ug makabaton sa pribilehiyo sa pagpaambit sa maayong balita ngadto sa uban! Samtang nagsingabot ang mga bulan sa Marso ug Abril, sa makausa pa manlimbasog kita nga himoon ang maong mga bulan nga atong kinamaayohan sukad samtang tumanon ta ang sugo ni Kristo nga iwali ug ihatag ang bug-os nga pamatuod.
[Kahon sa panid 4]
Lainlaing mga Paagi sa Pag-oksilyare Payunir sa Marso, Abril, ug Mayo 2003
Adlaw Oras
Lunes 1 2 — — 2 —
Martes 1 — 3 — — —
Miyerkoles 1 2 — 5 — —
Huwebes 1 — 3 — — —
Biyernes 1 2 — — — —
Sabado 5 4 3 5 6 7
Dominggo 2 2 3 2 2 3
Marso 56 56 54 55 50 50
Abril 50 50 51 53 — —
Haom ba ang usa niining mga eskedyula alang kanimo?