MARCOS

Ang Romanhong angga sa anak nga lalaki ni Maria nga taga-Jerusalem. Ang iyang Hebreohanong ngalan maoy Juan, nga nagkahulogang “Si Jehova Nagpakitag Pabor; Si Jehova Mapuangoron.” (Buh 12:​12, 25) Si Marcos maoy ig-agaw ni Bernabe, iyang kauban sa panaw ug sa uban pang unang Kristohanong mga misyonaryo, ug giinspirar sa pagsulat sa Ebanghelyo nga nagdala sa iyang kaugalingong ngalan. (Col 4:10) Si Marcos mao ang Juan Marcos nga gihisgotan sa basahon sa Mga Buhat ug usab ang Juan sa Buhat 13:​5, 13.

Siya dayag nga usa ka unang magtutuo ni Kristo. Ang balay sa iyang inahan gigamit ingong dapit sa pagsimba sa unang Kristohanong kongregasyon, nga lagmit nagpasabot nga siya ug ang iyang inahan nahimong mga sumusunod ni Jesus sa wala pa mamatay si Kristo. (Buh 12:12) Sanglit si Marcos lamang ang naghisgot bahin sa batan-ong lalaki nga halos hubo nga mikalagiw sa gabii nga gibudhian si Jesus, makataronganon ang pagtuo nga si Marcos mismo mao kadtong batan-ona. (Mar 14:​51, 52) Busa lagmit gayod nga didto si Marcos sa dihang ang balaang espiritu gibubo nganha sa mga 120 ka tinun-an ni Kristo niadtong Pentekostes 33 K.P.​—Buh 1:13-15; 2:1-4.

Human matuman nila ang pag-alagad pinaagig pagdalag hinabang sa Jerusalem, si Bernabe ug Saulo (Pablo) “namalik ug giuban nila si Juan, ang usa nga gianggaan ug Marcos.” Mopatim-aw nga si Marcos maoy ilang tig-alagad, lagmit nag-atiman sa ilang pisikal nga panginahanglan samtang sila nagpanaw. (Buh 12:25; 13:5) Tungod sa pipila ka rason nga wala ibutyag, sa pag-abot nila sa Perga sa Pamfilia, “si Juan [Marcos] mibiya kanila ug mibalik sa Jerusalem.” (Buh 13:13) Sa dihang sa ulahi si Pablo migikan sa iyang ikaduhang misyonaryong panaw, bisag si Bernabe determinado nga paubanon si Marcos, si Pablo “naghunahuna nga dili angayng paubanon siya kanila, sanglit mibiya man siya kanila sa Pamfilia ug wala mokuyog kanila sa buluhaton.” Nahitabo ang “pagsilaob sa kasuko,” ug sila nagbulag; gikuyog ni Bernabe si Marcos ngadto sa Cipro ug gikuyog ni Pablo si Silas latas sa Sirya ug Cilicia.​—Buh 15:36-41.

Apan, sa paglabay sa panahon human niadto, ang nahimong panagkabingkil ni Pablo, Bernabe, ug Marcos dayag nga naalim, tungod kay si Marcos kauban ni Pablo sa Roma ug miduyog kaniya sa pagpadalag mga pangomosta ngadto sa mga Kristohanon sa Colosas (mga 60-61 K.P.). Si Pablo naghisgot nga may pag-uyon kaniya, nga nag-ingon: “Si Aristarko nga akong kaubang binihag nangomosta kaninyo, ug ingon man si Marcos nga ig-agaw ni Bernabe, (nga mahitungod kaniya kamo gisugo sa pagdawat kaniya kon ugaling siya mahianha kaninyo).” (Col 4:10) Si Marcos lakip usab niadtong gihisgotan ni Pablo nga nangomosta kang Filemon sa dihang ang apostol misulat kaniya gikan sa Roma (usab mga 60-61 K.P.). (Flm 23, 24) Sa ulahi (mga 65 K.P.), sa dihang si Pablo nabilanggo na usab sa Roma, siya espesipikong naghangyo kang Timoteo nga ‘kuhaon si Marcos ug dad-on siya diri uban kanimo, kay siya mapuslanon kanako sa pag-alagad.’​—2Ti 4:11.

Si Juan Marcos kauban usab ni Pedro didto sa Babilonya, tungod kay siya gihisgotan nga nagpadala ug mga pangomosta diha sa unang sulat sa apostol (gisulat mga 62-64 K.P.). Si Pedro nagtawag kaniya nga “Marcos nga akong anak,” lagmit nagpakita sa malig-ong bugkos sa Kristohanong pagmahal nga naugmad tali kanila. (1Pe 5:13; itandi ang 1Ju 2:​1, 7.) Busa, si Marcos, nga kanhi maoy hinungdan sa suliran, nakabaton sa komendasyon ug pagsalig sa inilang mga alagad sa Diyos ug nakapahimulos pa ug mas dakong pribilehiyo ingong usa nga giinspirar sa pagsulat sa usa ka asoy bahin sa ministeryo ni Jesus.​—Tan-awa ang JUAN Num. 4; MARCOS, MAAYONG BALITA SUMALA NI.