Ang Katawhan ni Jehova Nalig-on sa Pagtuo
“Ang mga kongregasyon padayong nalig-on sa pagtuo ug sila nanag-uswag sa gidaghanon matag-adlaw.”—BUHAT 16:5.
1. Sa unsang paagi gigamit sa Diyos si apostol Pablo?
GIGAMIT ni Jehova nga Diyos si Saulo sa Tarsus ingong “usa ka piniling sudlanan.” Ingong si apostol Pablo, siya ‘nag-antos sa daghang butang.’ Apan pinaagi sa iyang buluhaton ug sa uban, ang organisasyon ni Jehova nagatagamtam ug panaghiusa ug katingalahang pag-uswag.—Buhat 9:15, 16.
2. Nganong mapuslanong hatagan ug pagtagad ang Buhat 13:1–16:5?
2 Ang mga Hentil nangahimong mga Kristohanon sa nagtubong gidaghanon, ug ang hinungdanong tigom sa nagamandong lawas dakog nahimo sa pagpauswag sa panaghiusa sa katawhan sa Diyos ug sa paglig-on kanila sa pagtuo. Mapuslanon kaayo ang paghatag ug pagtagad niini ug sa ubang mga kaugmaran nga gitala sa Buhat 13:1–16:5, kay ang mga Saksi ni Jehova karon nagasinatig samang pag-uswag ug espirituwal nga mga panalangin. (Isaias 60:22) (Diha sa pribadong pagtuon sa mga artikulo sa Buhat niining gulaa, among gisugyot nga inyong basahon ang mga teksto gikan sa basahon nga gipaila sa pinalutawng mga letra.)
Ang mga Misyonaryo Milihok
3. Unsang buluhaton ang gibuhat sa “mga propeta ug mga magtutudlo” sa Antioquia?
3 Ang mga lalaki nga gipadala sa kongregasyon sa Antioquia, Syria, nagtabang sa mga magtutuo nga mahimong malig-on sa pagtuo. (13:1-5) Sa Antioquia mao ang “mga propeta ug mga magtutudlo” si Bernabe, Simeon (Niger), Lucio sa Cyrene, Manaen, Saulo sa Tarsus. Ang mga propeta nagpatin-aw sa Pulong sa Diyos ug sa gitagnang mga hitabo, samtang ang mga magtutudlo naghatag ug instruksiyon sa mga Kasulatan ug sa diyosnong pagkinabuhi. (1 Corinto 13:8; 14:4) Si Bernabe ug Saulo nakadawat ug espesyal nga asaynment. Giuban ang ig-agaw ni Bernabe nga si Marcos, sila miadto sa Cipro. (Colosas 4:10) Sila nagsangyaw sa mga sinagoga diha sa sidlakang dunggoanan sa Salamis, apan walay rekord nga ang mga Hudiyo maayo ug pagsanong. Sanglit sila maayo man ug pagkabutang, unsa pa may ilang gikinahanglan alang sa Mesiyas?
4. Unsay nahitabo samtang ang mga misyonaryo nagpadayon sa pagsangyaw sa Cipro?
4 Gipanalanginan sa Diyos ang ubang pagpamatuod nga buluhaton sa Cipro. (13:6-12) Didto sa Paphos, ang mga misyonaryo nakahibalag ug Hudiyohanon nga salamangkiro ug bakak nga propeta nga si Bar-Jesus (Elimas). Sa dihang siya misulay sa pagpugong sa Gobernador Sergio Paulo sa pagpamati sa Pulong sa Diyos, si Saulo napuno sa balaang espiritu ug miingon: ‘O tawo nga puno sa limbong ug lansis, ikaw nga anak sa Yawa, ikaw nga kaaway sa tanang pagkamatarong, dili ka ba mohunong sa pagtuis sa matul-id nga mga dalan ni Jehova?’ Niana, ang kamot sa Diyos sa pagsilot nagbuta kang Elimas sulod sa usa ka higayon, ug si Sergio Paulo “nahimong usa ka magtutuo, kay siya natingala sa pagtulon-an ni Jehova.”
5, 6. (a) Sa dihang si Pablo nagpakigpulong sa sinagoga sa Antioquia sa Pisidia, unsay iyang giingon bahin kang Jesus? (b) Unsay epekto sa pakigpulong ni Pablo?
5 Gikan sa Cipro, ang grupo milawig ngadto sa siyudad sa Perga sa Asia Minor. Dayon si Pablo ug Bernabe mipaingon sa amihanan latas sa bukirong mga dalan, nga tingali ‘nameligro sa katalagman sa mga suba ug sa mga tulisan sa dalan,’ ngadto sa Antioquia, sa Pisidia. (2 Corinto 11:25, 26) Didto si Pablo mipakigpulong diha sa sinagoga. (13:13-41) Iyang gisubli ang pakiglabot sa Diyos uban sa Israel ug gipaila ang kaliwat ni David si Jesus ingong Manluluwas. Bisag ang Hudiyohanong mga magmamando nagsugo sa pagpatay kang Jesus, ang saad ngadto sa ilang mga amahan natuman sa dihang gibanhaw siya sa Diyos. (Salmo 2:7; 16:10; Isaias 55:3) Gipasidan-an ni Pablo ang iyang mga mamiminaw sa dili pagyubit sa gasa sa Diyos sa kaluwasan pinaagi ni Kristo.—Habacuc 1:5, Septuagint.
6 Ang pakigpulong ni Pablo nakapukaw ug kadasig, sama sa mga pakigpulong publiko nga gihatag sa mga Saksi ni Jehova karong adlawa. (13:42-52) Sa pagkasunod nga Adlawng Igpapahulay hapit ang tanang tawo sa siyudad nagkatigom sa pagpatalinghog sa pulong ni Jehova, ug napuno sa kasina ang mga Hudiyo. Gani, sa usa ka semana lamang, ang mga misyonaryo nakakabig ug daghang mga Hentil kay sa nakabig sa mga Hudiyo sa tibuok nilang mga kinabuhi! Sanglit ang mga Hudiyo mapasipad-ong misupak kang Pablo, kadto maoy panahon alang sa espirituwal nga kahayag sa pagsidlak sa laing dapit, ug sila gisultihan: ‘Sanglit inyong gisalikway ang pulong sa Diyos ug inyong gihukman ang inyong kaugalingon nga dili-takos sa kinabuhing dayon, kami mangadto sa mga nasod.’—Isaias 49:6.
7. Unsay reaksiyon ni Pablo ug Bernabe sa paglutos?
7 Karon ang mga Hentil misugod sa pagkalipay, ug ang tanan nga matinguhaon sa kinabuhing walay kataposan nahimong mga magtutuo. Samtang ang pulong ni Jehova mikaylap sa tibuok nasod, hinunoa, gihulhogan sa mga Hudiyo ang inilang mga babaye (tingali sa pagpiit sa ilang mga bana o ang uban) ug kadagkoan sa paglutos kang Pablo ug Bernabe ug giabog sila gawas sa ilang mga kayutaan. Apan kana wala makapahunong sa mga misyonaryo. Sila sa yano “nagtaktak sa abog sa ilang mga tiil batok kanila” ug miadto sa Iconio (modernong Konya), usa ka dakong siyudad sa Romanhong probinsiya sa Galacia. (Lucas 9:5; 10:11) Buweno, komosta ang mga tinun-an nga nabilin sa Antioquia sa Pisidia? Kay nalig-on sa pagtuo, sila “padayong napuno sa kalipay ug sa balaang espiritu.” Kini nagtabang kanato sa pagtan-aw nga ang paglutos dili angay makababag sa espirituwal nga pag-uswag.
Malig-on sa Pagtuo Bisan pa sa Paglutos
8. Unsay nahitabo ingong resulta sa malamposong pagsangyaw sa Iconio?
8 Si Pablo ug Bernabe mismo napamatud-ang malig-on sa pagtuo bisan pa sa paglutos. (14:1-7) Sa pagsanong sa ilang pagpamatuod diha sa sinagoga sa Iconio, daghang mga Hudiyo ug mga Grego ang nahimong mga magtutuo. Sa dihang gihulhogan sa dili-matinuohong mga Hudiyo ang mga Hentil batok sa bag-ong mga magtutuo, ang duha ka mamumuo namulong nga maisogon pinaagi sa awtoridad sa Diyos, ug siya nagpakita sa iyang pag-uyon pinaagi sa paghatag kanila ug gahom sa paghimog mga ilhanan. Nabahin niini ang maggubtanong panon, ang uban midapig sa mga Hudiyo ug ang uban sa mga apostol (mga pinadala). Ang mga apostoles dili mga talawan, apan sa dihang ilang nahibaloan ang usa ka plano sa pagbato kanila, sila sa maalamon migikan aron sa pagsangyaw sa Liconia, usa ka rehiyon sa Asia Minor diha sa habagatang Galacia. Pinaagi sa pagkamaalamon, kita usab makapadayong aktibo diha sa ministeryo bisan pa sa paglutos.—Mateo 10:23.
9, 10. (a) Sa unsang paagi misanong ang mga molupyo sa Listra sa pagkaayo sa tawong bakol? (b) Unsay reaksiyon ni Pablo ug Bernabe sa Listra?
9 Ang siyudad sa Liconia sa Listra ang sunod nga nakadawat ug pagpamatuod. (14:8-18) Didto giayo ni Pablo ang usa ka tawong bakol sukad pa sa pagkatawo. Kay wala makaamgo nga si Jehova maoy responsable sa milagro, ang panon misinggit: “Ang mga diyos nanganaog dinhi kanato sa dagway sa mga tawo!” Samtang kini gisinggit sa pinulongang Liconianhon, si Bernabe ug Pablo wala mahibalo kon unsay nagakahitabo. Sanglit si Pablo man maoy nanguna sa pagsulti, ang mga tawo naglantaw kaniya nga si Hermes (ang larinong mensahero sa mga diyos) ug nagtuo nga si Bernabe mao si Zeus, ang pangulo sa Gregong diyos.
10 Ang saserdote ni Zeus nagdala pa gani ug mga baka ug mga girnalda aron sa pagtanyag ug mga halad kang Pablo ug Bernabe. Tingali misulti sa masabtang pinulongang Grego o migamit ug tighubad, gipatin-aw dayon sa mga bisita nga sila usab maoy mga tawo nga may mga kahuyangon ug nga sila nagsangyaw sa maayong balita aron ang mga tawo mopahilayo gikan “niining walay kapuslanang mga butang” (walay-kinabuhing mga diyosdiyos, o mga idolo) ug modangop ngadto sa buhi nga Diyos. (1 Hari 16:13; Salmo 115:3-9; 146:6) Oo, ang Diyos kaniadto nagtugot sa mga nasod (apan dili sa mga Hebreohanon) sa paglakaw sa ilang kaugalingong dalan, apan wala niya pasagdi ang iyang kaugalingon nga walay mopamatuod sa iyang paglungtad ug pagkamaayo ‘sa paghatag kanilag ulan ug mabungahong mga panahon, nga nagpuno sa ilang mga kasingkasing sa bug-os uban ang pagkaon ug paglipay.’ (Salmo 147:8) Bisan pa sa maong pangatarongan, si Bernabe ug Pablo halos dili makapugong sa panon sa pagtanyag kanilag mga halad. Apan, ang mga misyonaryo wala modawat sa pasidungog ingong mga diyos, ni ilang gigamit ang maong awtoridad aron makaplagan ang Kristiyanidad sa maong dapit. Usa ka maayong panig-ingnan, ilabina kon mangandoy kita ug pasidungog alang sa gitugot ni Jehova nga mahimo nato diha sa iyang pag-alagad!
11. Unsay atong makat-onan gikan sa pulong: “Kita kinahanglang managsulod ngadto sa gingharian sa Diyos pinaagi sa daghang mga kasakit”?
11 Sa kalit, mitungha ang paglutos. (14:19-28) Sa unsang paagi? Nahulhogan sa mga Hudiyo nga gikan sa Antioquia sa Pisidia ug Iconio, gibato si Pablo sa mga tawo ug giguyod siya gawas sa siyudad, nga nagdahom nga siya patay na. (2 Corinto 11:24, 25) Apan sa dihang siya gialirongan sa mga tinun-an, siya mibangon ug misulod sa Listra nga wala himatikdi, tingali tungod sa kangitngit. Sa pagkasunod nga adlaw, siya ug si Bernabe miadto sa Derbe, diin didto ubay-ubay ang nahimong mga tinun-an. Sa dihang miduaw pag-usab sa Listra, Iconio, ug Antioquia, gipalig-on sa mga misyonaryo ang mga tinun-an, nagdasig kanila nga magpabilin sa pagtuo, ug miingon: “Kita kinahanglang managsulod ngadto sa gingharian sa Diyos pinaagi sa daghang mga kasakit.” Ingong mga Kristohanon, kita usab makalaom nga makaagig mga kasakit ug kinahanglang dili mosulay sa pag-ikyas kanila pinaagi sa pagkompromiso sa atong pagtuo. (2 Timoteo 3:12) Sa maong panahon, ang mga ansiano gitudlo sa mga kongregasyon nga alang kanila ang sulat ni Pablo ngadto sa mga taga Galacia gisulat.
12. Kanus-a natapos ang unang misyonaryong panaw ni Pablo, unsay gibuhat sa duha ka misyonaryo?
12 Miagi sa Pisidia, si Pablo ug Bernabe misulti sa pulong didto sa Perga, usa ka iladong siyudad sa Panpilia. Wala magdugay, sila mibalik sa Antioquia, Syria. Ang unang panaw ni Pablo nga karon natapos na, gipahibalo sa duha ka misyonaryo ang kongregasyon “sa daghang butang nga gihimo sa Diyos pinaagi kanila, ug nga iyang gibuksan ngadto sa mga nasod ang pultahan sa pagtuo.” Mipalabay ug pipila ka panahon uban sa mga tinun-an sa Antioquia, kini sa walay duhaduha nakatabang kanila ug dako nga malig-on sa pagtuo. Ang mga pagduaw sa nagapanawng mga magtatan-aw karong adlawa adunay samang espirituwal nga mga epekto.
Usa ka Hinungdanong Isyu Nasulbad
13. Kon ang Kristiyanidad dili angay mabahin ngadto sa Hebreohanon ug dili-Hudiyohanong pundok-pundok, unsay gikinahanglan?
13 Ang kalig-on diha sa pagtuo nagkinahanglag panaghiusa sa hunahuna. (1 Corinto 1:10) Bisag dili unta angay mabahin ang Kristiyanidad ngadto sa Hebreohanon ug dili-Hudiyohanong pundok-pundok, ang nagamandong lawas kinahanglang mohimog desisyon kon kinahanglan bang sundon sa mga Hentil nga nagaganayan ngadto sa organisasyon sa Diyos ang Moisesnong Kasugoan ug magpasirkunsisyon. (15:1-5) Dihay mga tawo nga gikan sa Judea mipanaw ngadto sa Antioquia sa Syria ug misugod sa pagtudlo sa Hentil nga mga magtutuo didto nga gawas kon sila magpasirkunsisyon, sila dili maluwas. (Exodo 12:48) Busa, si Pablo, Bernabe, ug ang uban gipadala ngadto sa mga apostoles ug sa mga ansiano sa Jerusalem. Bisan didto, ang mga magtutuo nga niadto kutihan sa balaod ang mga Pariseo miinsister nga ang mga Hentil kinahanglang magpasirkunsisyon ug magbantay sa Kasugoan.
14. (a) Bisag dihay nahitabong panaglalis sa tigom sa Jerusalem, unsang maayong panig-ingnan ang nahatag? (b) Unsa ang diwa sa pangatarongan ni Pablo niadtong okasyona?
14 Usa ka tigom ang gihimo aron masuta ang kabubut-on sa Diyos. (15:6-11) Oo, ang panaglalis nahitabo, apan walay panag-away samtang ang mga lalaki nga may lig-ong pagtuo nagpahayag sa ilang kaugalingon—usa ka maayong panig-ingnan alang sa mga ansiano karong adlawa! Unya si Pedro miingon: ‘Ang Diyos naghimog pagpili diha kaninyo nga pinaagi sa akong baba ang mga Hentil [nga sama kang Cornelio] makadungog sa maayong balita ug managtuo. Siya nagpamatuod pinaagi sa paghatag kanila ug balaang espiritu ug walay gihimong pagpihig tali kanato ug kanila. [Buhat 10:44-47] Busa nganong inyong sulayan ang Diyos pinaagi sa pagsangon kanila ug yugo [usa ka obligasyon nga bantayan ang Kasugoan] diha sa ilang mga liog nga bisan ang atong mga ginikanan ug bisan kita wala makahimo sa pagpas-an? Kita [mga Hudiyo sumala sa unod] nagatuo nga kita maluwas pinaagi sa dili-takos nga kalulot sa Ginoong Jesus diha sa samang paagi niadtong mga tawhana.’ Ang pagdawat sa Diyos sa walay-sirkunsisyong mga Hentil nagpakita nga ang sirkunsisyon ug ang pagbantay sa Kasugoan dili hinungdanon alang sa kaluwasan.—Galacia 5:1.
15. Unsang pangunang punto ang gipatin-aw ni Santiago, ug unsay iyang gisugyot sa sulat ngadto sa Hentil nga mga Kristohanon?
15 Ang kongregasyon walay timik sa dihang mihinapos si Pedro, apan daghan pa ang gipamulong. (15:12-21) Gipahayag ni Bernabe ug Pablo ang bahin sa mga ilhanan nga gihimo sa Diyos pinaagi kanila diha sa mga Hentil. Unya ang tsirman, ang igsoon ni Jesus sa inahan nga si Santiago, miingon: ‘Gisugilon kanato ni Simeon [ang Hebreohanong ngalan ni Pedro] ang pagbali sa Diyos sa iyang pagtagad ngadto sa mga nasod aron sa pagsagop ug usa ka katawhan gikan kanila alang sa iyang ngalan.’ Gipaila ni Santiago nga ang gitagnang pagtukod pag-usab sa “tabernakulo ni David” (ang pagtukod pag-usab sa pagkahari sa linya ni David) natuman diha sa pagpanigom sa mga tinun-an ni Jesus (mga manununod sa Gingharian) taliwala sa Hudiyo ug mga Hentil. (Amos 9:11, 12, Septuagint; Roma 8:17) Sanglit mao man kini ang katuyoan sa Diyos, dawaton gayod kini sa mga tinun-an. Si Santiago nagtambag sa nagsulat sa Hentil nga mga Kristohanon sa paglikay gikan sa (1) mga butang nga nahugawan sa mga diyosdiyos, (2) sa pakighilawas, (3) sa dugo ug sa mga linuok. Kini nga mga pagdili anaa sa mga sinulat ni Moises nga ginabasa diha sa mga sinagoga sa matag adlawng Igpapahulay.—Genesis 9:3, 4; 12:15-17; 35:2, 4.
16. Sa unsang tulo ka punto nga ang sulat sa unang siglong nagamandong lawas naghatag ug giya hangtod karong adlawa?
16 Ang nagamandong lawas karon nagpadalag usa ka sulat ngadto sa Hentil nga mga Kristohanon sa Antioquia, Syria, ug Cilicia. (15:22-35) Ang balaang espiritu ug ang mga magsusulat nag-awhag sa paglikay gikan sa mga butang nga gikahalad sa mga diyosdiyos, sa dugo (naandan nga ginakaon sa ubang mga tawo); sa mga linuok nga wala makaagas ang ilang dugo (gilantaw sa daghang pagano kana nga karne ingong usa ka kinaham); sa pakighilawas (Grego, por·neiʹa, nagpaila sa gidiling seksuwal nga relasyon gawas sa Kasulatanhong kaminyoon). Pinaagi sa maong paglikay, sila mouswag sa espirituwal, sama sa gibuhat sa mga Saksi ni Jehova karong adlawa tungod kay ginasunod nila “kining hinungdanong mga butang.” Ang mga pulong “Maayong panglawas kaninyo!” sama ra sa pag-ingong “Adyos,” ug kini dili ikahinapos nga kining mga kinahanglanona sa panguna may kalabotan sa mga paagi sa pagbaton ug mahimsog nga panglawas. Sa dihang gibasa ang sulat sa Antioquia, ang kongregasyon nalipay sa nahatag niini nga pagdasig. Niadtong panahona, ang katawhan sa Diyos sa Antioquia nalig-on usab sa pagtuo pinaagi sa makapadasig nga mga pulong ni Pablo, Silas, Bernabe, ug uban. Hinaot nga kita usab mangitag paagi sa pagdasig ug paglig-on sa mga isigkamagtutuo.
Ikaduhang Misyonaryong Panaw Misugod
17. (a) Unsang problema ang mitungha sa dihang gihimo ang ikaduhang misyonaryong panaw? (b) Sa unsang paagi giatiman ni Pablo ug Bernabe ang ilang panagbingkil?
17 Usa ka problema ang mibangon sa dihang gilaraw ang ikaduhang misyonaryong panaw. (15:36-41) Gisugyot ni Pablo nga siya ug si Bernabe moduaw pag-usab sa mga kongregasyon sa Cipro ug Asia Minor. Si Bernabe miuyon apan gusto niyang iuban ang iyang ig-agaw nga si Marcos. Si Pablo misupak tungod kay gibiyaan sila ni Marcos didto sa Panpilia. Niana, ang “usa ka pagsilaob sa kasuko” ang nahitabo. Apan si Pablo ug si Bernabe wala mangitag kabayawan sa kaugalingon pinaagi sa pagsulay sa paglangkit sa ubang mga ansiano o sa nagamandong lawas sa ilang pribadong kabingkilan. Pagkamaayong panig-ingnan!
18. Unsay miresulta sa panagbulag ni Pablo ug Bernabe, ug sa unsang paagi kita makabaton kitag kaayohan gikan niining hitaboa?
18 Hinunoa, kini nga panaglalis misangpot ug panagbulag. Gidala ni Bernabe si Marcos uban niya sa Cipro. Si Pablo, duyog kang Silas, ingong iyang kauban, “miadto sa Syria ug Cilicia, nagpalig-on sa mga kongregasyon.” Si Bernabe tingali naimpluwensiyahan tungod sa relasyon sa pamilya, apan angay unta niyang ilhon ang pagkaapostol ni Pablo ug pagkapili ingong usa ka “pinili nga galamiton.” (Buhat 9:15) Ug kita komosta? Kini nga hitaboa angay mopasilsil kanato sa panginahanglan sa pag-ila sa teokratikanhong awtoridad ug sa pagtabang sa bug-os sa “matinumanon ug sa maalamong ulipon”!—Mateo 24:45, 47.
Nag-uswag Diha sa Kalinaw
19. Unsang panig-ingnan ang nabatonan sa presenteng-adlawng Kristohanong mga batan-on diha kang Timoteo?
19 Kini nga panagbingkil wala pasagdi nga makaapektar sa kalinaw sa kongregasyon. Ang katawhan sa Diyos padayong nalig-on sa pagtuo. (16:1-5) Si Pablo ug Silas miadto sa Derbe ug padayon ngadto sa Listra. Didto nagpuyo si Timoteo, ang anak nga lalaki sa Hudiyohanong magtutuo nga si Eunice ug sa iyang dili-magtutuong Gresyanhong bana. Si Timoteo batan-on pa, kay bisan sa 18 o 20 ka tuig nga milabay, siya gihapon gisultihan: “Ayaw itugot nga adunay motamay kanimo sa imong pagkabatan-on.” (1 Timoteo 4:12) Sanglit siya “may maayong pagpanghimatuod sa mga igsoon sa Listra ug [duolan sa 29 kilometro ang gilay-on gikan] sa Iconio,” siya nainila sa iyang maayong ministeryo ug diyosnong mga hiyas. Ang Kristohanong mga batan-on karong adlawa angayng mangayog tabang ni Jehova aron maugmad ang samang kadungganan. Gituli ni Pablo si Timoteo tungod kay duawon nila ang mga balay ug mga sinagoga sa mga Hudiyo nga nahibalo nga usa ka Hentil ang amahan ni Timoteo, ug buot sa apostol nga walay makababag sa Hudiyohanong mga lalaki ug mga babaye nga nagkinahanglang makakat-on bahin sa Mesiyas. Wala maglapas sa mga prinsipyo sa Bibliya, ang mga Saksi ni Jehova karong adlawa usab nagabuhat kutob sa ilang mahimo aron dawaton ang maayong balita sa tanang matang sa mga tawo.—1 Corinto 9:19-23.
20. Ang pagtuman sa sulat sa unang-siglong nagamandong lawas adunay unsang epekto, ug sa imong hunahuna sa unsang paagi kini nakaapektar kanato?
20 Uban kang Timoteo isip usa ka katabang, gipahatod ni Pablo ug Silas ngadto sa mga tinun-an aron ilang bantayan ang mga kasugoan sa nagamandong lawas. Ug unsay gisangpotan? Dayag sa paghisgot sa Syria, Cilicia, ug Galacia, si Lucas misulat: “Ang mga kongregasyon padayong nalig-on sa pagtuo ug nanag-uswag sa gidaghanon matag-adlaw.” Oo, ang pagtuman sa sulat sa nagamandong lawas misangpot ug panaghiusa ug espirituwal nga kauswagan. Pagkamaayong panig-ingnan alang sa atong malisod nga panahon, sa dihang ang katawhan ni Jehova kinahanglang magpabiling nahiusa ug malig-on sa pagtuo!
Unsay Imong Tubag?
◻ Unsay reaksiyon ni Pablo ug Bernabe sa paglutos?
◻ Unsay atong makat-onan gikan sa pulong: “Kita kinahanglang managsulod ngadto sa gingharian sa Diyos pinaagi sa daghang mga kasakit”?
◻ Unsang tambag ang atong makuha gikan sa tulo ka punto diha sa sulat nga gipadala sa unang-siglong nagamandong lawas?
◻ Sa unsang paagi ang mga butang nga nakapalig-on sa pagtuo sa unang-siglong mga Saksi ni Jehova aplikado kanato karong adlawa?