Sundoga si Jehova—Ipakita ang Hustisya ug Pagkamatarong

“Ako si Jehova, ang Usa nga nagapakitag mahigugmaong-kalulot, hustisya ug pagkamatarong diha sa yuta; tungod kay niining mga butanga ako may kahimuot.”​—JEREMIAS 9:24.

 1. Unsang tagsaong palaaboton ang gitanyag ni Jehova?

SI Jehova nagsaad nga ang adlaw moabot sa dihang ang tanan makaila kaniya. Pinaagi sa iyang propetang si Isaias, siya nag-ingon: “Sila dili mobuhat sa bisan unsang kadaot ni magpahinabo ug kadaotan sa tibuok nakong bukid nga balaan; tungod kay ang yuta mapuno gayod sa kahibalo kang Jehova ingon sa katubigan nga nagatabon sa dagat mismo.” (Isaias 11:9) Pagkatagsaon kana nga palaaboton!

 2. Unsay nalakip sa pagkaila kang Jehova? Ngano?

² Apan, unsay kahulogan nga makaila kang Jehova? Kang Jeremias, si Jehova nagpadayag kon unsay labing bililhon: “Ang pagbaton sa lalom nga pagsabot ug pagbaton ug kahibalo kanako, nga ako si Jehova, ang Usang nagapakita sa mahigugmaong-kalulot, hustisya ug pagkamatarong diha sa yuta; kay niining mga butanga ako may kahimuot.” (Jeremias 9:24) Sa ingon, ang pagkaila kang Jehova naglakip sa paagi sa iyang pagpakitag hustisya ug pagkamatarong. Unya kon atong ipakita kanang mga hiyasa, siya mahimuot kanato. Sa unsang paagi mahimo nato kana? Diha sa iyang Pulong, ang Bibliya, si Jehova nagtipig ug usa ka talaan sa iyang mga pagpakiglabot uban sa di-hingpit nga mga tawo latas sa kapanahonan. Pinaagi sa pagtuon niini, kita makaila sa dalan ni Jehova nga may hustisya ug pagkamatarong ug sa ingon makasundog kaniya.​—Roma 15:4.

Makataronganon Apan Mahangawaon

3, 4. Nganong makataronganon man si Jehova sa paglaglag sa Sodoma ug Gomora?

³ Ang balaang paghukom sa Sodoma ug Gomora maoy usa ka hingpit nga panig-ingnan nga nag-ilustrar sa ubay-ubayng kinaiyahan sa hustisya ni Jehova. Dili lamang kay si Jehova nagpahamtang sa gikinahanglang silot kondili mitagana usab siyag kaluwasan alang sa mga tawong takos niana. Makataronganon ba gayod ang paglaglag niadtong mga siyudara? Si Abraham, kinsa lagmit may diyutayng kahibalo sa sukod sa pagkadaotan sa Sodoma, sa sinugdan wala maghunahuna niana. Gipasaligan ni Jehova si Abraham nga kon makaplagan bisan ang napulo lamang ka matarong nga tawo, ang maong siyudad dili niya laglagon. Tin-aw, ang hustisya ni Jehova dili gayod madalidalion o way-kaluoy.​—Genesis 18:20-32.

⁴ Ang pagsusi sa duha ka manulonda mihatag ug tin-aw nga pruyba sa moral nga pagkadaotan sa Sodoma. Sa dihang nasayran sa mga lalaki sa siyudad, “gikan sa bata ngadto sa tigulang,” nga duha ka lalaki miabot sa balay ni Lot, sila misulong sa iyang balay sa tuyo nga himoon ang binayot nga panglugos. Migrabe na kaayo ang ilang pagkadaotan! Sa walay duhaduha, ang paghukom ni Jehova sa siyudad matarong.​—Genesis 19:1-5, 24, 25.

 5. Giunsa pagluwas sa Diyos si Lot ug ang iyang pamilya gikan sa Sodoma?

⁵ Human hisgoti ang pagkalaglag sa Sodoma ug Gomora isip usa ka pasidaan, si apostol Pedro misulat: “Si Jehova mahibalo kon unsaon sa pagpahigawas sa katawhan nga may diyosnong pagkamahinalaron gikan sa pagsulay.” (2 Pedro 2:6-9) Ang hustisya wala unta matuman kon si Lot ug ang iyang pamilya nalaglag duyog sa daotang katawhan sa Sodoma. Sa ingon, si Lot gipasidan-an sa mga manulonda ni Jehova mahitungod sa umaabot nga paglaglag. Sa dihang naglangaylangay si Lot, ang mga manulonda “sa kahangawa ni Jehova” migunit kaniya, sa iyang asawa, ug sa iyang mga anak babaye ug gidala sila sa gawas sa siyudad. (Genesis 19:12-16) Makapaneguro kitang ipakita ni Jehova ang susamang pagkamahunahunaon sa mga matarong sa umaabot nga kalaglagan niining daotang sistema.

 6. Nganong angayng dili kita sobrang mabalaka bahin sa umaabot nga kalaglagan sa daotang sistema sa mga butang?

⁶ Bisan pag ang kalaglagan niining sistemaha usa unya ka panahon “sa pagpadapat sa hustisya,” walay katarongan nga kita sobrang mabalaka. (Lucas 21:22) Ang paghukom nga ipatuman sa Diyos sa Armagedon mapamatud-an unyang “bug-os nga matarong.” (Salmo 19:9) Sumala sa nasayran ni Abraham, kitang mga tawo bug-os makasalig gayod sa hustisya ni Jehova, nga labi pang hataas kay sa atoa. Si Abraham nangutana: “Dili ba ang Maghuhukom sa tibuok yuta mobuhat kon unsay matarong?” (Genesis 18:25; itandi ang Job 34:10.) O sumala sa haom nga pagpahayag niini ni Isaias, “kinsay nagtudlo [kang Jehova] sa dalan sa hustisya?”​—Isaias 40:14.

Usa ka Matarong nga Buhat Aron Pagluwas sa Katawhan

 7. Unsa ang koneksiyon tali sa hustisya sa Diyos ug sa iyang kaluoy?

⁷ Ang hustisya sa Diyos gipadayag dili lamang sa paagi sa iyang pagsilot sa mga mamumuhat ug daotan. Si Jehova nagbatbat sa iyang kaugalingon ingong “matarong nga Diyos ug Manluluwas.” (Isaias 45:21) Dayag, adunay suod nga koneksiyon tali sa pagkamatarong, o hustisya, sa Diyos ug sa iyang tinguha nga luwason ang katawhan gikan sa mga epekto sa sala. Sa pagkomento bahin niining tekstoha, ang The International Standard Bible Encyclopedia, 1982 Edisyon, mipunting nga “ang hustisya sa Diyos nagtinguha sa dayag nga paagi sa pagpahayag sa Iyang kaluoy ug pagpalampos sa Iyang kaluwasan.” Dili ingon nga ang hustisya sa Diyos kinahanglang sambogan ug kaluoy kondili, hinunoa, nga ang kaluoy maoy pagpahayag sa hustisya sa Diyos. Ang tagana sa Diyos sa lukat aron maluwas ang katawhan mao ang labing talagsaong pananglitan niining maong kinaiyahan sa balaang hustisya.

8, 9. (a) Unsay nalakip sa kabatbatan, “usa ka buhat nga matarong”? Ngano? (b) Unsay gipangayo ni Jehova gikan kanato?

⁸ Ang bili sa lukat mismo​—ang bililhong kinabuhi sa bugtong Anak sa Diyos, si Jesu-Kristo​—hataas tungod kay ang mga sukdanan ni Jehova maoy tibuok kalibotan, ug siya mismo nagsunod kanila. (Mateo 20:28) Ang usa ka hingpit nga kinabuhi, ang kang Adan, nawala, busa ang usa ka hingpit nga kinabuhi gikinahanglan sa paglukat sa kinabuhi alang sa mga kaliwat ni Adan. (Roma 5:19-21) Si apostol Pablo mibatbat sa matinumanong dalan ni Jesus, lakip ang pagbayad sa lukat, ingong “usa ka buhat nga matarong.” (Roma 5:18, potnot) Ngano man kana? Kay gikan sa panglantaw ni Jehova, ang paglukat sa katawhan mao ang matarong ug makataronganong butang buhaton, bisan pag kadto kinahanglang himoon sa dakong kapildihan sa iyang kaugalingon. Ang mga anak ni Adan nahisamag “nabun-og nga tangbo,” nga dili gustong gupokon sa Diyos, o nahisamag “nagbaga nga pabilong lino,” nga dili niya buot pagngon. (Mateo 12:20) May pagsalig ang Diyos nga daghang matinumanong mga lalaki ug mga babaye ang motungha gikan sa mga kaliwat ni Adan.​—Itandi ang Mateo 25:34.

⁹ Angay unsay atong pagsanong niining kinalabwang buhat sa gugma ug hustisya? Usa sa mga butang nga gipangayo ni Jehova gikan kanato mao nga kita “magpakita ug hustisya.” (Miqueas 6:8) Sa unsang paagi atong mahimo kini?

Pangitaa ang Hustisya, Tinguhaa ang Pagkamatarong

10. (a) Unsa ang usa ka paagi nga kita magpakita ug hustisya? (b) Sa unsang paagi kita makapangita pag-una sa pagkamatarong sa Diyos?

¹⁰ Una sa tanan, kinahanglang magpahiuyon kita sa moral nga mga sukdanan sa Diyos. Tungod kay ang mga sukdanan sa Diyos makataronganon ug matarong, kita magpakita ug hustisya sa dihang kita magkinabuhi nga nahiuyon niini. Gidahom kana ni Jehova gikan sa iyang katawhan. “Pagtuon sa pagbuhat ug maayo; pangitaa ang hustisya,” gisugo ni Jehova ang mga Israelinhon. (Isaias 1:17) Si Jesus mihatag ug susamang tambag ngadto sa iyang mga mamiminaw diha sa Wali sa Bukid, sa dihang iyang gitugon sila nga ‘pangitaa pag-una ang gingharian ug ang pagkamatarong sa Diyos.’ (Mateo 6:33) Gidasig ni Pablo si Timoteo nga “tinguhaa ang pagkamatarong.” (1 Timoteo 6:11) Sa dihang kita magkinabuhi nga nahiuyon sa mga sukdanan sa Diyos sa panggawi ug isul-ob nato ang bag-ong personalidad, atong ginatinguha ang matuod nga hustisya ug pagkamatarong. (Efeso 4:23, 24) Sa laing mga pulong, atong gipangita ang hustisya pinaagi sa pagbuhat sa mga butang sa paagi sa Diyos.

11. Ngano ug sa unsang paagi angay kitang makigbisog batok sa pagmando sa sala?

¹¹ Sumala sa nasayran pag-ayo sa tanan, dili kanunayng sayon sa dili-hingpit nga mga tawo ang pagbuhat kon unsay makataronganon ug matarong. (Roma 7:14-20) Gidasig ni Pablo ang Romanong mga Kristohanon nga makigbisog batok sa pagmando sa sala, aron sila makatanyag sa ilang napahinungod nga mga lawas ngadto sa Diyos ingong “mga hinagiban sa pagkamatarong,” nga magamit sa Diyos sa pagtuman sa iyang katuyoan. (Roma 6:12-14) Sa susama, pinaagi sa pagtuon nga regular ug pagpadapat sa Pulong sa Diyos, kita makasabot sa “mapasiboong pagdumala-sa-kaisipan ni Jehova” ug ‘madisiplina sa pagkamatarong.’​—Efeso 6:4; 2 Timoteo 3:16, 17.

12. Unsay angay natong likayan aron kita magtagad sa uban sa paagi nga buot nato nga pagatagdon kita ni Jehova?

¹² Ikaduha, kita nagpakita ug hustisya sa dihang tagdon nato ang uban sa paagi nga buot nato nga pagatagdon kita ni Jehova. Sayon ang pagbaton ug dobleng sukdanan​—usa nga mapatuyangon alang sa atong kaugalingon apan usa nga mapig-oton alang sa uban. Kita daling magpakamatarong sa atong kaugalingong mga kakulangan, apan kita daling mosaway sa mga kahuyangan sa uban, nga tingali gamay ra kon itandi sa atoa. Si Jesus pintok nga nangutana: “Nan, nganong tan-awon nimo ang uhot diha sa mata sa imong igsoon, apan wala magatagad sa salagunting diha sa imong kaugalingong mata?” (Mateo 7:1-3) Dili gayod angayng kalimtan nato nga walay usa kanato ang makabarog kon si Jehova maoy mag-utingkay sa atong mga kasaypanan. (Salmo 130:3, 4) Kon ang hustisya ni Jehova magtugot nga dili niya panumbalingon ang mga kahuyangan sa atong mga igsoon, kinsa ba kita aron hukman nato sila nga madinaoton?​—Roma 14:4, 10.

13. Nganong ang usa ka matarong nga tawo mobating obligado nga isangyaw ang maayong balita sa Gingharian?

¹³ Ikatulo, atong gipasundayag ang diyosnong hustisya sa dihang makugihon kitang nagabuhat sa pagsangyawng buluhaton. “Ayaw hawiri ang maayo gikan niadtong kini nahiangay, kon mahitabo nga anaa sa gahom sa imong kamot ang pagbuhat niini,” mao ang tambag kanato ni Jehova. (Proverbio 3:27) Dili matarong nga atong tagoon sa atong kaugalingon ang nagahatag-kinabuhi nga kahibalo nga gihatag nga dagaya kaayo sa Diyos kanato. Tinuod, daghang tawo tingali magsalikway sa atong mensahe, apan samtang ang Diyos nagpadayon sa pagkaluoy kanila, angayng kita andam sa paghatag kanila kanunay sa higayon nga ‘makakab-ot sa paghinulsol.’ (2 Pedro 3:9) Ug sama kang Jesus, kita mobatig kahimuot sa dihang kita may matabangan sa pagdangop ngadto sa hustisya ug pagkamatarong. (Lucas 15:7) Karon ang maayong panahon nga kita ‘magpugas sa binhi sa pagkamatarong.’​—Oseas 10:12.

“Mga Prinsipe Alang sa Hustisya Mismo”

14. Unsa ang papel nga gidula sa mga ansiyano kon bahin sa hustisya?

¹⁴ Kitang tanan kinahanglang mosubay sa dalan sa pagkamatarong, apan ang mga ansiyano sa Kristohanong kongregasyon adunay linaing responsabilidad bahin niini. Ang prinsipenhong pagmando ni Jesus ‘gipalig-on pinaagi sa hustisya ug pagkamatarong.’ Nahiuyon niana, ang sukdanan alang sa mga ansiyano maoy balaang hustisya. (Isaias 9:7) Anaa sa ilang hunahuna ang gibatbat nga matagnaon sa Isaias 32:1: “Tan-awa! Ang usa ka hari magamando alang sa pagkamatarong mismo; ug mahitungod sa mga prinsipe, sila magamando ingon nga mga prinsipe alang sa hustisya mismo.” Ingong tinudlo-sa-espiritung mga magtatan-aw, o ‘mga piniyalan sa Diyos,’ ang mga ansiyano angayng magbuhat sa mga butang sa paagi sa Diyos.​—Tito 1:7.

15, 16. (a) Sa unsang paagi ang mga ansiyano nagsundog sa matinumanong magbalantay diha sa ilustrasyon ni Jesus? (b) Unsay pagbati sa mga ansiyano bahin niadtong nahisalaag sa espirituwal nga paagi?

¹⁵ Gipakita ni Jesus nga ang hustisya ni Jehova mahangawaon, maluluy-on, ug makataronganon. Labaw sa tanan, gisulayan niya ang pagtabang niadtong may mga suliran ug “sa pagpangita ug sa pagluwas sa unsay nawala.” (Lucas 19:10) Sama sa magbalantay sa ilustrasyon ni Jesus nga wala mohunong sa pagpangita hangtod nga iyang nakaplagan ang nawalang karnero, ang mga ansiyano mangita niadtong nahisalaag sa espirituwal nga paagi ug maningkamot sa paggiya kanila balik sa panon.​—Mateo 18:12, 13.

¹⁶ Inay kay hukmang madinaoton kadtong tingali nakahimog bug-at nga mga sala, ang mga ansiyano magtinguha sa pag-ayo ug pagtultol kanila ngadto sa paghinulsol kon posible kana. Sila magkalipay sa dihang sila makatabang sa usang nahisalaag. Hinuon, makapasubo kanila sa dihang ang mamumuhat ug daotan dili maghinulsol. Unya tungod sa matarong nga mga sukdanan sa Diyos kinahanglang ilang ipalagpot ang usang dili mahinulsolon. Bisan pa niana, sama sa amahan sa anak nga mausikon, sila maglaom nga may adlaw ra nga ang usang nakasala ‘mahidangat sa iyang maayong panimuot.’ (Lucas 15:17, 18) Sa ingon, mga ansiyano ang manguna sa pagduaw sa mga napalagpot aron pahinumdoman sila kon sa unsang paagi makabalik sila sa organisasyon ni Jehova.a

17. Unsa ang tumong sa mga ansiyano sa dihang magahusay sa usa ka kaso sa daotang buhat, ug unsang hiyas ang motabang kanila sa pagkab-ot sa maong tumong?

¹⁷ Ang mga ansiyano ilabinang kinahanglan nga mosundog sa hustisya ni Jehova sa dihang magahusay sa mga kaso sa daotang buhat. Ang mga makasasala ‘nagpadayon sa pagduol’ kang Jesus tungod kay ilang gibati nga siya makasabot ug makatabang kanila. (Lucas 15:1; Mateo 9:12, 13) Siyempre, si Jesus wala mokonsentir sa daotang buhat. Ang usa ka panahon sa pagpangaon nga gigugol nga kauban ni Jesus nakapatandog kang Zaqueo, nga iladong tikasan, nga maghinulsol ug magtul-id sa tanang pag-antos nga iyang gipahinabo sa uban. (Lucas 19:8-10) Ang mga ansiyano karong adlawa nakabaton sa samang tumong sa ilang hudisyal nga mga paghusay​—ang pagtultol sa usang nakasala sa paghinulsol. Kon sila daling maduol sama kang Jesus, daghang mamumuhat ug daotan ang mas sayonan nga magpatabang kanila.

18. Unsay makapaarang sa mga ansiyano nga mahisamag “usa ka dapit nga tagoanan gikan sa hangin”?

¹⁸ Ang usa ka sensitibong kasingkasing magtabang sa mga ansiyano sa pagpadapat ug balaang hustisya, nga dili mapintason ni way-pagbati. Makaiikag, si Esdras nag-andam sa iyang kasingkasing, dili lamang sa iyang hunahuna, aron itudlo ang hustisya sa mga Israelinhon. (Esdras 7:10) Ang masinabtanong kasingkasing makapaarang sa mga ansiyano sa pagpadapat sa nahiangayng Kasulatanhong mga prinsipyo ug pagtagad sa mga kahimtang sa matag indibiduwal. Sa dihang giayo ni Jesus ang babaye nga naghinugo, iyang gipakita nga ang hustisya ni Jehova nagkahulogan sa pagsabot sa malangkobong katuyoan ingon man sa estriktong diwa sa balaod. (Lucas 8:43-48) Ang mga ansiyano nga magpadapat sa hustisya uban sa kahangawa ikatanding sa “usa ka dapit nga tagoanan gikan sa hangin” alang niadtong giatake sa ilang mga kahuyangan mismo o niining daotang sistema nga atong gipuy-an.​—Isaias 32:2.

19. Unsay sanong sa usa ka igsoong babaye sa pagpadapat sa balaang hustisya?

¹⁹ Usa ka igsoong babaye nga nakahimog bug-at nga sala direktang nakapabili sa balaang hustisya. “Sa prangka, nahadlok ako nga moduol sa mga ansiyano,” siya miangkon. “Apan ila akong gitagad nga may kahangawa ug dignidad. Ang mga ansiyano sama sa mga amahan inay kay estriktong mga maghuhukom. Ako ilang gitabangan sa pagsabot nga si Jehova dili magsalikway kanako kon modesisyon ako nga tul-iron ang akong mga dalan. Akong direktang nasayran kon sa unsang paagi siya nagdisiplina kanato sama sa usa ka mahigugmaong Amahan. Nakahimo ako sa pagbukas sa atong kasingkasing ngadto kang Jehova, nga nagsalig nga iyang pamation ang akong pangaliyupo. Sa paghinumdom, ako makaingon nga matinud-anon nga ang pagpakigtagbo sa mga ansiyano pito ka tuig kanhi maoy panalangin gikan ni Jehova. Sukad niadto, ang akong relasyon uban niya labi pang nalig-on.”

Tumana ang Hustisya ug Buhata Kon Unsay Matarong

20. Unsa ang mga kaayohan sa pagsabot ug pagpakitag hustisya ug pagkamatarong?

²⁰ Salamat na lang, ang balaang hustisya nagkahulogan ug labaw pa kaayo kay sa paghatag sa matag tawo kon unsay takos kaniya. Ang hustisya ni Jehova nagpalihok kaniya sa paghatag ug kinabuhing walay kataposan niadtong magpakitag pagtuo. (Salmo 103:10; Roma 5:15, 18) Ang Diyos makiglabot kanato niining paagiha tungod kay ang iyang hustisya magtagad sa atong mga kahimtang, ug kini magtinguha sa pagluwas inay paghukom nga madinaoton. Tinuod, ang mas maayong pagsabot sa giladmon sa hustisya ni Jehova mas magpasuod kanato kaniya. Ug samtang atong paningkamotan ang pagsunod niining kinaiyahan sa iyang personalidad, ang atong mga kinabuhi ug kadtong sa uban tugob nga panalanginan. Ang atong pagtinguha sa hustisya dili ingon nga dili mamatikdan sa atong langitnong Amahan. Si Jehova nagsaad kanato: “Bantayi ninyo ang hustisya, ug buhata kon unsay matarong. Kay ang akong kaluwasan haduol na nga moabot, ug igapadayag ang akong pagkamatarong. Malipayon ang tawong may kamatayon nga magbuhat niini.”​—Isaias 56:1, 2.

[Footnote]

Nahinumdom Ka Ba?

◻ Unsay gitudlo kanato sa kalaglagan sa Sodoma ug Gomora bahin sa hustisya ni Jehova?

◻ Nganong ang lukat usa ka talagsaong pagpahayag sa hustisya ug gugma sa Diyos?

◻ Unsa ang tulo ka paagi nga kita makapakitag hustisya?

◻ Sa unsang linaing paagi ang mga ansiyano makasundog sa balaang hustisya?

[Mga hulagway sa panid 15]

Pinaagi sa atong pagsangyaw nga buluhaton, atong gipasundayag ang diyosnong hustisya

[Hulagway sa panid 16]

Sa dihang ipasundayag sa mga ansiyano ang diyosnong hustisya, kadtong may mga suliran mas sayonan nga magpatabang kanila