Roma 6:23—“Ang Suhol Gikan sa Sala mao ang Kamatayon, Apan ang Walay Bayad nga Gasa Gikan sa Dios mao ang Kinabuhing Dayon”

“Ang bayad sa sala maoy kamatayon, apan ang gasa nga ginahatag sa Diyos maoy kinabuhing walay kataposan pinaagi ni Kristo Jesus nga atong Ginoo.”—Roma 6:23, Bag-ong Kalibotang Hubad.

“Ang suhol gikan sa sala mao ang kamatayon, apan ang walay bayad nga gasa gikan sa Dios mao ang kinabuhing dayon diha kang Cristo Jesus nga atong Ginoo.”—Roma 6:23, Ang Biblia, PBS.

Pinaagi niini nga mga pulong, gipatin-aw ni apostol Pablo nga ang mga tawo mamatay kay sila makasasala. Pero ang Diyos naghatag sa iyang matinumanong mga magsisimba ug nindot nga paglaom—ang gasa nga kinabuhing walay kataposan.

“Ang bayad sa sala maoy kamatayon.” Ang tanan natawo nga dili hingpit ug busa naay tendensiya sa paghimog sala.a (Salmo 51:5; Ecclesiastes 7:20) Kay natawo sila nga makasasala, ang tanang tawo matigulang ug mamatay.—Roma 5:12.

Sa pag-ilustrar niini nga punto, gitandi ni Pablo ang sala ngadto sa agalon nga mohatag ug bayad o suhol. Sama nga ang trabahante magdahom ug suhol sa iyang gitrabaho, ang mga tawo makadahom pod nga mamatay sila tungod sa ilang pagkadili-hingpit.

Pero miingon pod si Pablo nga ang tawo “nga namatay gipagawas na gikan sa iyang sala.” (Roma 6:7) Dihang mamatay ang usa ka tawo, siya napahigawas na sa bisan unsang sala nga iyang nahimo. Kanay hinungdan kon nganong walay rason nga maghunahuna nga ang patay padayong nag-antos tungod sa ilang nangaging mga sala. Gani, ang Bibliya klarong nag-ingon nga ang patay dili na makahunahuna o makalihok ug wala nay pagbati.—Ecclesiastes 9:5.

“Apan ang gasa nga ginahatag sa Diyos maoy kinabuhing walay kataposan pinaagi ni Kristo Jesus.” Sukwahi sa “bayad” sa sala, ang Diyos naghatag ug gasa nga kinabuhing walay kataposan. Ang orihinal nga pulong sa “gasa” puwede sab hubaron nga “dili takos nga gasa” o “gasa tungod sa pagkamahinatagon.” Nagtumong ni sa butang nga gihatag ngadto sa usa ka tawo, bisag wala niya kini hagoi. Walay makasasalang tawo ang makabaton ug kaluwasan ug kinabuhing walay kataposan sa iyang kaugalingong paningkamot. (Salmo 49:7, 8) Pero kinabubut-ong ihatag sa Diyos ang bililhong gasa nga kinabuhing walay kataposan niadtong magpakitag pagtuo kang Jesus.—Juan 3:16; Roma 5:15, 18.

Gisulat kini ni Pablo ngadto sa mga Kristohanon sa Roma niadtong mga 56 C.E. Dayag nga ang ubang Kristohanon adtong panahona naay sayop nga mga panghunahuna bahin sa kaluoy sa Diyos. Kay naimpluwensiyahan sila sa Gregong pilosopiya, lagmit naghunahuna sila nga kon daghan silag sala, mas makabenepisyo sila sa kapasayloan sa Diyos. (Roma 6:1) Ang uban nangatarongan tingali nga wala silay tulubagon sa ilang mga sayop kay wala na sila mailalom sa Moisesnong Balaod. (Roma 6:15) Sa iyang sulat, gipasiugda ni Pablo nga ang mga Kristohanon dili makabenepisyo sa kaluoy sa Diyos kon tugotan nila nga kanunayng magpadaog sa sala.—Roma 6:12-14, 16.

Ang giingon ni Pablo nagpasalig sa mga magsisimba karon sa Diyos nga bisag natawo sila nga makasasala, duna gihapon silay paglaom. Kon ilang tumanon ang moral nga mga sukdanan sa Diyos ug dili magpadaog sa ilang sayop nga mga tinguha, ang Diyos nagsaad nga hatagan silag kinabuhing walay kataposan.—Roma 6:22.

Tan-awa kining mubo nga video nga nagsumaryo sa basahon sa Roma.