Nahinumdom Ka Ba?

Gipabilhan mo ba ang pagbasa sa dili pa dugayng mga gula sa Ang Bantayanang Torre? Buweno, tan-awa kon imong matubag ang mosunod nga mga pangutana:

• Sa Roma 5:3-5, nganong gilista ni apostol Pablo ang paglaom sa kataposan sa serye?

Gipresentar ni Pablo ang serye sa mga butang nga masinati sa mga Kristohanon—kasakitan, paglahutay, inuyonang kahimtang, ug paglaom. Kini nga “paglaom” dili mao ang paglaom nga unang nabatonan sa usa gikan sa Bibliya, kondili kini ang napalig-on, napalawom, napatuhop nga paglaom nga mabatonan sa usa ka Kristohanon paglabay sa panahon.—12/15, mga panid 22-3.

• Nganong ang usa ka Kristohanon karong adlawa angay nga dunay interes sa atletikong mga dula nga gisangka sa karaang Gresya?

Ang pagsabot sa kinaiyahan ug mga kustombre niadtong mga dulaa makahatag ug katin-awan sa daghang teksto sa Bibliya. Ang pipila niana naghisgot sa ‘pakigsangka subay sa mga lagda,’ ‘pagtangtang sa tanang kabug-at ug pagtutok sa panig-ingnan ni Jesus,’ ‘pagdagan sa lumba hangtod sa kataposan,’ ug pagbaton sa purongpurong, o ganti. (2 Timoteo 2:5; 4:7, 8; Hebreohanon 12:1, 2; 1 Corinto 9:24, 25; 1 Pedro 5:4)—1/1, mga panid 28-30.

• Unsang bag-ong paagi sa pagpahayag sa maayong balita ang gigamit niadtong Enero 1914?

Giluwatan niadto ang “Photo-Drama of Creation.” Gilangkoban kini ug upat-ka-bahin nga presentasyon nga may mga pelikula ug ginatos ka de-kolor nga mga slide, nga kadaghanan niini may gidungan o dinuyogan ug mga girekord-sa-plakang mga pakigpulong nga nagpatin-aw. Kawhaan ka hugpong niini nga Drama ang giandam ug kaylap nga gigamit aron sa pagtudlo sa mga tawo sa mensahe sa Bibliya.—1/15, mga panid 8-9.

• Sa unsang paagi ang Nagamandong Lawas lahi sa legal nga korporasyon?

Samtang ang mga direktor sa usa ka legal nga korporasyon giboto sa katungdanan pinaagi sa mga membro niini, ang Nagamandong Lawas wala gitudlo ni bisan kinsang tawo apan gitudlo ni Jesu-Kristo. Dili kinahanglan nga ang mga direktor sa nagkalainlaing mga korporasyon sa mga Saksi ni Jehova maoy mga membro sa Nagamandong Lawas. Sa di pa dugayng tinuig nga tigom sa Watch Tower Bible and Tract Society of Pennsylvania, ang mga membro sa Nagamandong Lawas nga nag-alagad ingong mga direktor ug mga opisyales boluntaryong mikanaog gikan sa ilang mga katungdanan. Ang nabakanteng mga katungdanan gihulipan sa hamtong nga mga igsoong lalaki sa “ubang mga karnero.” (Juan 10:16) Busa ang Nagamandong Lawas makagugol ug mas daghang panahon sa pag-andam ug espirituwal nga pagkaon ug sa baylo mas makaatiman sa espirituwal nga mga panginahanglan sa tibuok-kalibotang panag-igsoonay.—1/15, mga panid 29, 31.

• Unsang duha ka panig-ingnan sa Bibliya ang atong masusi aron makakat-on kon sa unsang paagi masagubang ang pagkaluya?

Ang usa mao si Ana, ang inahan ni Samuel. Mahimo untang tugotan niya ang iyang kaugalingon nga maluya sa dihang nasaypan siya ni Eli, ang hataas nga saserdote sa Israel. Hinunoa, prangka apan matinahuron niyang gisulti ang tinuod ngadto kaniya. Dugang pa, si Ana wala maghambin ug kasuko kang Eli. Ang ikaduha mao si Marcos, nga tingali naluya sa dihang gidid-an siya ni apostol Pablo nga iuban sa usa ka misyonaryong panaw. Inay maluya kay nawad-an niini nga pribilehiyo, siya nagpadayon sa iyang aktibong pag-alagad, nga mipanaw kauban ni Bernabe.—2/1, mga panid 20-2.

• Nganong angayng mag-amping ang mga Kristohanon sa paghatag sa uban, o pagdawat gikan kanila, ug mga kopya sa mga programa sa kompiyuter?

Kadaghanan sa mga programa sa kompiyuter (lakip ang mga dula) adunay lisensiya nga naglimite sa tag-iya/tiggamit sa pagbutang sa programa diha sa usa ka kompiyuter. Kasagaran, usa ka paglapas sa balaod sa gihuptang katungod ang paghimog mga kopya alang sa uban, bisan pag atong ihatag kini nga libre. Ang mga Kristohanon buot mosunod sa balaod nga, ‘ibayad kang Cesar ang mga butang ni Cesar.’ (Marcos 12:17)—2/15, mga panid 28-9.

• Kinsa si Cyril ug si Methodius, ug unsang kontribusyon sa pagtuon sa Bibliya ang ilang nahimo?

Managsoon sila nga natawo sa Tesalonica, Gresya, sa ikasiyam nga siglo. Ilang gimugna ang sinulat nga alpabeto alang sa mga pinulongang Slavic ug gihubad ang kadaghanang bahin sa Bibliya ngadto sa pinulongang Slavonic.—3/1, mga panid 28-9.

• Unsa ang kahulogan sa ekspresyong “ang paghunahuna sa espiritu”?—Roma 8:6.

Kini nagkahulogan nga kontrolado, dominado, ug gipalihok sa aktibong puwersa ni Jehova. Mahimong tugotan nato ang espiritu sa Diyos nga maglihok diha kanato pinaagi sa pagbasa ug pagtuon sa Bibliya, pinaagi sa pagsunod nga kinasingkasing sa balaod sa Diyos, ug pinaagi sa pag-ampo alang sa espiritu sa Diyos.—3/15, panid 15.

• Unsay atong buhaton kon gibati natong nasaypan pagsabot?

Hinungdanon nga paningkamotang tinoon ang mga butang diha sa espiritu sa gugma. Kon kini daw dili molampos, ayaw ug kaluya. Pangayoa ang pagsabot ug tabang gikan kang Jehova, kinsa mao ang “nagatimbang sa mga kasingkasing.” (Proverbio 21:2; 1 Samuel 16:7)—4/1, mga panid 21-3.