Pagpasidungog sa Diyos sa Paglaom

“Si Jehova nagaingon: . . . ‘Kadtong nagapasidungog kanako ako nagapasidungog, ug kadtong nagatamay kanako pagatamayon.’”​—1 SAMUEL 2:30.

TUNGOD sa mga palaabuton nga atong mabatonan, binase sa Bibliya, angay ug makataronganon nga atong pasidunggan “ang Diyos sa paglaom,” “ang Diyos nga nagahatag ug paglaom.” (Roma 15:13, King James Version; New World Translation) Ngano man kana? Sa unsang paagi, kita nga gamay kaayo, nga mga tawong dili-hingpit, makapasidungog sa Dakong Maglalalang sa tibuok uniberso? Ug kita ba iyang pagapasidunggan?

2. Unsay gibati ni Jesus bahin sa pagpasidungog nga gihatag sa Diyos?

² Kita makakat-on gikan sa nahitabo kang Jesus. Walay makalimod kanato nga tinguha gayod ni Jesus nga mapasidunggan ang iyang Amahan, mahimaya. (Juan 5:23; 12:28; 15:8) Sa pagkatinuod, gibadlong ni Jesus ang mga Pariseo ug mga eskriba kinsa ‘nagapasidungog sa Diyos pinaagi sa ilang mga ngabil apan halayo kaniya ang ilang mga kasingkasing.’ Palihog matikdi, nga ang ilang dili pagpasidungog sa Diyos nalangkit ang dili-maayong mga motibo ug mga lihok. (Mateo 15:7-9) Nan, kita ba makaingon nga sa pagpasidungog ni Kristo sa Diyos, nalangkit ang iyang paglaom? Sa unsang paagi misanong si Jehova sa maong pagpasidungog?

3. Sa unsang paagi nahibalo kita nga naglaom si Jesus kang Jehova?

³ Kinasingkasing nga gisunod ni Jesus ang mga pulong ni David sa Salmo 16:10: “Dili mo pagabiyaan ang akong kalag sa Sheol. Ni motugot ka nga ang imong usa nga maunongon makakita sa gahong.” Tungod kay may paglaom siya nga banhawon, nakapahayag si Jesu-Kristo ug kusganong mga pulong ngadto sa usa ka mamumuhat ug daotan nga gilansang tapad kaniya: “Sa pagkatinuod ako magaingon kanimo karong adlawa, Ikaw magauban kanako sa Paraiso.” (Lucas 23:39-43) Namatay sa ulahi kadtong mamumuhat ug daotan, busa siya wala makasaksi sa tulo ka adlaw sa ulahi sa kompirmasyon sa paglaom ni Jesus nga gibanhaw. Apan usa ka nakasaksi mitaho: “Kining maong Jesus gibanhaw sa Diyos, ug kaming tanan mga saksi niini.” (Buhat 2:31, 32) Usa kadto ka kamatuoran.

4. Unsang pasidungog ang nadawat ug takos si Jesus? (Pinadayag 5:12)

⁴ Ang kadaghanan sa komung mga tawo nga gialagaran ni Jesus nahibalo nga takos siya sa pagtahod, o pasidungog. (Lucas 4:15; 19:36-38; 2 Pedro 1:17, 18) Dayon siya namatay samag kriminal. Nakabag-o ba kana sa mga butang? Wala, tungod kay nadawat ni Jesus ang pag-uyon sa Diyos nga iyang gilaoman. Busa, gibangon siya ni Jehova sa kinabuhi. Ang kamatuoran nga “ang Diyos sa paglaom” mibanhaw sa iyang Anak sa kinabuhi ug gisul-oban siya sa pagkadili-mamatay diha sa gingharian sa espiritu nagpamatuod nga ang Amahan nagpadayon sa paghimaya sa iyang Anak. Si Pablo miingon: “Among nakita si Jesus . . . nga gipurongpurongan ug himaya ug dungog tungod sa iyang pag-antos sa kamatayon, aron nga pinaagi sa dili-takos nga kalulot sa Diyos makatilaw siyag kamatayon alang sa matag-usa ka tawo.”​—Hebreohanon 2:7, 9; Filipos 2:9-11.

5. Unsang linaing paagi gipasidunggan si Jesus, miresulta ug unsang dugang pasidungog sa Diyos?

⁵ Si Jesus, nga nakapasidungog kang Jehova, mihisgot ug usa ka linain nga paagi nga gipasidunggan siya sa Amahan. Diha sa usa ka pagpakita ngadto sa iyang matinumanong mga apostoles, siya miingon: “Kanako gikahatag ang tanang kagahom sa langit ug sa yuta. Busa panglakaw kamo ug himoang mga tinun-an ang katawhan sa tanang kanasoran, sa pagbawtismo kanila sa ngalan sa Amahan ug sa Anak ug sa balaang espiritu . . . Tan-awa! ako magauban kaninyo sa kanunay hangtod sa konklusyon sa sistema sa mga butang.” (Mateo 28:18-20) Busa dugang gipasidunggan sa Amahan ang Anak pinaagi sa paghatag kaniya ug tagsaong kagahom. Kini gigamit alang sa mga tawo nga magahimo sa buluhaton nga mohatag pasidungog sa Usa nga gipaningkamotan ni Jesus nga pasidunggan. Nan, nagkahulogan ba kini nga kitang mga tawong dili-hingpit makapasidungog sa pila ka paagi sa Amahan ug sa baylo pasidunggan usab niya?

Mga Tawo Nagapasidungog sa Diyos

6. Angay ba ang pagpangandoy nga mapasidunggan, apan unsang kapeligrohan niini? (Lucas 14:10)

⁶ Ang mga tawo dili mahunahunaon sa pagpasidungog sa Diyos pag-una, tungod kay mas interesado sila sa pagbaton ug dungog alang sa ilang kaugalingon. Ang pila tingali moingon nga normal alang kanato nga gustong mapasidunggan. May pagkatinuod kini, kay normal ang pagtinguhag maayong reputasyon, nga may igong dungog gikan niini. (1 Timoteo 3:2, 13; 5:17; Buhat 28:10) Apan, ang tinguha nga mapasidunggan sa mga tawo daling mapasobrahan. Makita kini diha sa kadaghanan nga nangagpas nga mahimong dungganon bisan unsa pay bili o mobuhat ug bisan unsa aron lang dili mapakaulawan.

7. Nganong ang pasidungog sa mga tawo limitadog bili?

⁷ Kon imong palandongon kana, bisan ang labing dakong pasidungog gikan sa tawo lumalabay, kay ang tanan sa ulahi mangamatay. Oh, ang panumdoman sa pila ka mga bayani tingali pasidunggan sa makadiyut, apan nakalimtan na ang kadaghanan sa mga patay. Pila ba ka tawo ang nahibalo sa ngalan sa ilang mga apohan sa tuhod o nahibalo kon kinsa ang mga pangulo sa ilang nasod sa usa ka gatos ka tuig kanhi? Sa pagkatinuod, nabuhi man o wala mabuhi ang usa ka tawo dili gihapon makabag-o sa mga butang. Siya usa lamang ang pudyot sa abog diha sa mga timbangan sa panahon, usa ka gamayng tulo sa agos diha sa kinabuhi. Ug bisan kon siya pasidunggan sa mubong panahon inigkamatay niya, siya wala nay kalibotan niana. (Job 14:21; 2 Cronicas 32:33; Ecclesiastes 9:5; Salmo 49:12, 20) Ang bugtong butang nga mohatag kalainan mao ang pagbaton ug paglaom nga gitagana sa Diyos, sa pagpasidungog kaniya, ug pagapasidunggan usab sa baylo. Atong makita kini sa mga kinabuhi sa duha ka katalirongan sa karaang Israel.

8. Unsang lit-ag ang nahulogan ni Eli nga nalangkit sa paghatag ug pasidungog?

⁸ Usa na si Eli. Siya nag-alagad sa Diyos sa tagsaong posisyon ingong hataas nga saserdote sulod sa 40 ka tuig ug nakapribilehiyo usab sa paghukom sa Israel. (1 Samuel 1:3, 9; 4:18) Apan, sa ulahi siya mipakitag kahuyang bahin sa iyang mga anak si Hopni ug si Pinehas. Bisag mga saserdote, ilang giabusohan ang ilang katungdanan pinaagi sa pagpangawat sa mga bahin sa mga halad ug sa pakigbahin sa imoral nga sekso. Dihang walay laing gihimo ang ilang amahan gawas sa pagbadlong kanilag diyutay, miingon ang Diyos nga si Eli ‘nagpasidungog sa iyang mga anak kay kanako.’ Si Jehova nakasaad sa pagpadayon sa Aaronikong pagkasaserdote, apan iyang giputol ang pamilya ni Eli gikan sa katungdanan sa pagkahataas nga saserdote. Ngano? Ang Diyos mibatbat: “Kadtong nagapasidungog kanako ako magapasidungog, ug kadtong nagatamay kanako pagatamayon.”​—1 Samuel 2:12-17, 29-36; 3:12-14.

9. Sa unsang paagi gihatagan si Samuel ug higayon sa pagpasidungog kang Jehova?

⁹ Sa kasukwahi anaa si Samuel. Tingali nahibalo kamo nga gidala siya sa iyang mga ginikanan sa linghod pa nga panuigon diha sa tabernakulo sa Silo. Usa ka gabii niana nakigsulti si Jehova sa batan-on. Malingaw ka sa pagbasa niining asoya diha sa 1 Samuel 3:1-14, handurawa dihang nakamata kining batan-ona, dili sa daguhob sa kilat, kondili sa hinayng tingog nga iyang nasaypan nga tingog sa tigulang nga Eli. Unya palandonga kon unsa ka makahahadlok kadto alang sa batan-ong Samuel sa pagsulti sa tigulang nga hataas nga saserdote sa determinasyon sa Diyos sa pagsilot sa banay ni Eli. Apan gihimo kadto ni Samuel; iyang gipasidunggan ang Diyos pinaagi sa pagkamasugtanon.​—1 Samuel 3:18, 19.

10. Sanglit gipasidunggan ang Diyos, sa unsang paagi gipasidunggan ni Jehova si Samuel?

¹⁰ Daghang mga tuig nga gipasidunggan ni Samuel si Jehova ingong propeta, ug gipasidunggan siya sa Diyos. Tan-awa kini diha sa 1 Samuel 7:7-13. Mitubag dayon si Jehova sa pangamuyo ni Samuel ug panabang sa pagpildi sa mga Pilistihanon. Dili ba kadungganan alang kanimo nga mailhan sa Diyos? Dihang ang mga anak si Samuel wala mosunod sa iyang pagtultol, wala siya isalikway sa Diyos sama sa iyang pagsalikway kang Eli. Tungod kini kay gihimo ni Samuel kutob sa iyang maarangan aron mapasidunggan ang Diyos. Dugang pagpakita niini, wala mouyon si Samuel sa pagpangayo sa mga tawo ug tawhanong hari. (1 Samuel 8:6, 7) Gigamit sa Diyos si Samuel sa pagdihog kang Saul ug David. Dihang namatay si Samuel, gipasidunggan siya sa Israel pinaagi sa pagbangotan. Apan, labing hinungdanon, gipasidunggan siya sa Diyos pinaagi sa paghisgot kaniya diha sa Bibliya nga usa sa mga tawo sa pagtuo nga gipanalanginag pagkabanhaw ug sa maayong mga butang nga gitagana sa Diyos alang kanila. (Salmo 99:6; Jeremias 15:1; Hebreohanon 11:6, 16, 32, 39, 40) Wala ba kini nagpakita nga ang pagpasidungog sa “Diyos sa paglaom” bililhon?

Pasidunggan ba Nimo “ang Diyos sa Paglaom”?

11, 12. Unsay atong kinahanglan palandongon bahin sa pagpasidungog kang Jehova, ug unsa ang usa ka paagi aron kita makahimo niana?

¹¹ Ang mga kaso ni Jesus ug Samuel, sa paghatag lamang ug duha ka pananglitan sa Bibliya, nagpamatuod nga ang mga tawo makahimo sa pagpasidungog sa ilang “Diyos sa paglaom” nga una sa ilang kinabuhi. Ug kadtong duha ka kaso nagpakita nga sa atong pagbuhat niini kita tukmang makapangita ug makadawat sa pasidungog gikan sa Diyos. Apan sa unsang paagi imong mahimo kini uban sa makataronganong pagsalig nga imong pahimut-an ang Diyos, pagapasidunggan niya, ug makabaton sa imong binase sa Bibliya nga paglaom?

¹² Ang pagkabaton ug tinuod, matinahurong kahadlok nga dili-makapahimuot sa Diyos maoy usa sa paagi. (Malaquias 1:6) Tingali mouyon dayon kita nianang pulonga. Apan, hinumdomi ang mga anak ni Eli. Kon napangutana mo sila kon buot ba nilang pasidunggan ang Diyos pinaagi sa matinahurong pagbaton ug kahadlok kaniya, tingali moingon usab silag oo. Ang problema anaa sa atong pagpadapat sa mga buhat diha sa adlaw-adlaw nga kinabuhi sa atong tinguha sa pagpasidungog sa Diyos pinaagi sa pagbaton ug kahadlok kaniya.

13. Iilustrar kon sa unsang paagi ang tinguha sa pagpasidungog sa Diyos pinaagi sa pagbaton ug kahadlok kaniya makatabang kanato.

¹³ Dihang makaatubang kita ug masulayong situwasyon nga diin kita makapangawat o makahimog seksuwal nga imoralidad nga dili mahibaloan sa katibuk-an, ang ato bang tinguha sa pagpasidungog sa Diyos makaapekto sa atong mga aksiyon? Angay atong ugmaron ang pagbati, ‘Bisan pag magpabiling tinagoan ang daotang buhat, ang akong pagpadala sa kasal-anan maoy pagpasipala sa “Diyos sa paglaom” kang kansang ngalan akong gidala.’ Ug ang kamatuoran mao nga ang daotan dili magpabiling tinagoan, sama nga wala magpabiling tinagoan ang mga butang nga nahimo sa mga anak ni Eli. Gipakita kini sa mga pulong ni Pablo mahitungod sa “matarong nga paghukom sa Diyos”: “Siya magabalos ra sa matag usa sumala sa iyang mga binuhatan; kinabuhing dayon niadtong nagapangitag himaya ug kadungganan ug pagkadili mamatay pinaagi sa pagpailob diha sa mga buhat nga maayo; apan alang sa mga maalsahon ug wala magsunod sa kamatuoran kondili nagasunod hinoon sa pagkadili-matarong aduna unyay kasuko ug kapungot.”​—Roma 2:5-8.

14. Unsang laing paagi nga atong mapasidunggan ang Diyos, ug unsa ang angay natong ipangutana sa atong kaugalingon?

¹⁴ Sa laing bahin, gihisgotan ni Pablo ang pakigbahin “sa buhat nga maayo,” nga nagapasidungog sa Diyos nga moresultag “himaya ug kadungganan” gikan kaniya. Ang pangunang buluhaton niining matanga karon mao kanang gihisgotan ni Jesus diha sa Mateo 28:19, 20: ‘Himoang tinun-an ang katawhan sa tanang kanasoran, sa pagbawtismo kanila ug sa pagtudlo kanila sa pagtuman sa tanang mga butang nga akong gisugo kaninyo.’ Sa tibuok yuta, minilyon sa mga Saksi ni Jehova aktibo niining nagapasidungog sa Diyos nga buluhaton sa pagsangyaw ug pagpanudlo. Daghan ang nagapangabudlay aron mahimong bug-os panahong mga ministro ingong mga payunir, permanente man o sa panahon sa bakasyon gikan sa sekular nga trabaho o sa tunghaan. Uban niini sa hunahuna, ang kada usa kanato sa mapuslanon makapalandong kon unsay iyang baroganan mahitungod niining buluhatona. Tingali mangutana ka, pananglitan, ‘Gipasidunggan ko ba “ang Diyos sa paglaom” pinaagi sa pakigbahin sa bug-os diha sa buluhatong pagsangyaw?’

15. Unsay nahitabo sa pila ka mga Kristohanon may kalabotan sa pagpasidungog kang Jehova diha sa pag-alagad sa katilingban?

¹⁵ Ang ubang mga Kristohanon nga sa dugay nang katuigan maoy aktibong mga magwawali sa anam-anam nagakaluya. Naanad na sila sa pagbaton lamang ug gamay o panagsang pakigbahin sa importanteng buluhaton sa paghimog tinun-an. Wala kami magpasabot sa mga indibiduwal nga may pisikal nga mga limitasyon ug maluya tungod sa mga epekto sa pagkatigulang. Gawas nila, ang pagkaluya nakita taliwala sa pila ka mga Saksi sa nagkalainlaing mga panuigon. Makaikag, wala maghisgot si Pablo sa usa ka grupo sa panuigon dihang iyang gipasidan-an ang mga Kristohanon batok sa ‘pagkaluya.’ Hinunoa, bisan pila pay panuigon sa tawo, ang importante mao nga nagkinahanglan ug paningkamot ang regular nga pakigbahin. Sama sa nahitabo sa mga adlaw ni Pablo, ang uban karon nangatarongan, ‘Nahimo ko ang akong bahin sa milabayng mga katuigan, busa karon ang bag-ong mga Kristohanon na usab ang angay maningkamot.’​—Galacia 6:9; Hebreohanon 12:3.

16. Nganong makabaton kitag kaayohan sa pagsusi sa kaugalingon niining bahina?

¹⁶ Kadtong naapektohan niining paagiha piho diyutay ra, apan tingali mangutana ka, ‘Ako ba sa pagkatinuod nakamatikod ning kilinga sa akong bahin? Sa unsang paagi ang akong bahin sa ministeryo ikatandi niadtong sa miagi?’ Kon may nahitabo mang pagkaluya o wala, angay nga atong isilsil sa hunahuna nga ang atong “Diyos sa paglaom” nagasaad nga mohatag ug “himaya ug kadungganan ug kalinaw alang sa tanan nga nagabuhat ug maayo.” (Roma 2:10) Gigamit ni Pablo ang Gregong pulong nga nagkahulogan “sa pagbuhat ug usa ka butang, paghimo, pagtuman.” Pagkahinungdanon nga atong likayan kanang nahitabo sa mga Pariseo ug mga eskriba, nga mipasidungog lamang sa Diyos pinaagi sa usa ka porma sa pag-alagad sa ngabil! (Marcos 7:6; Pinadayag 2:10) Sa kasukwahi, dihang sa kinasingkasing kita aktibong nagapakigbahin sa pag-alagad sa katilingban, atong gipalig-on sa atong kaugalingon ug sa uban nga kita adunay tinuod nga paglaom. Atong gipasidunggan ang atong Maglalalang ug Maghahatag-ug-kinabuhi. Ug kita mahilinya nga pagapasidunggan niya, karon ug sa walay kataposan.​—Lucas 10:1, 2, 17-20.

Uban sa Atong Bililhong mga Butang

17, 18. Unsang laing paagi nga atong mapasidunggan ang Diyos, ug nganong ang pagpanuko sa pagbuhat niini dili makataronganon?

¹⁷ Mahitungod sa usa ka paagi diin atong mapasidunggan ang atong “Diyos sa paglaom,” ang Proverbio 3:9 nagaingon: “Pasidunggi si Jehova pinaagi sa imong bililhong mga butang ug sa inunahang bunga sa tanan mong abot.” Gihubad ni Spurrell kining bersikuloha: “Himayaa si Jehova pinaagi sa imong manggad, ug sa labing maayo sa tanang abot.”​—A Translation of the Old Testament Scriptures from the Original Hebrew.

¹⁸ Sanglit ilado ang nagkalainlaing mga klero sa ilang hingaping kahakog ug maluhong paagi sa kinabuhi, daghang mga tawo nagapanuko sa paghatag sa mga iglesya ug sa relihiyosong mga organisasyon kang kansang tumong daw dayag nga nagpakita nga nagatumpi lamang ug bahandi. (Pinadayag 18:4-8) Apan, kining maong mga pag-abuso, dili makabag-o sa pagkatinuod sa Proverbio 3:9. Sumala nianang dinasig nga tambag, sa unsang paagi atong magamit ang atong “bililhong mga butang” aron “makapasidungog kang Jehova,” nga atong “Diyos sa paglaom”?

19. Iilustrar kon sa unsang paagi gipadapat sa uban ang Proverbio 3:9.

¹⁹ Nakita sa mga Saksi ni Jehova nga ang nagatubong gidaghanon sa mga tawong misanong sa balita sa Gingharian nagkinahanglan magpadako sa mga Kingdom Hall o sa pagtukod ug bag-o. Nan, ania, ang usa sa paagi sa “paghimaya kang Jehova pinaagi sa imong manggad.” Ang mga batan-on ug tigulang nakabahin sa paghimo niini, sama sa pagsaad sa kaugalingon sa pag-amot alang sa mga galastohan sa pagtukod. Ang pagtuman niining tinagong mga panaad nagkinahanglan ug disiplina sa kaugalingon o gani pagsakripisyo, ilabina kon ang plano ug pagtapos sa proyekto sa pagtukod molawig ug dugayng panahon. (2 Corinto 9:6, 7) Sa gihapon, ang paggamit sa mga pundo niining paagiha tinuod nga nagapasidungog kang Jehova, kay ang mga Kingdom Hall maoy mga dapit diin ang mga Kristohanon nagasimba kaniya ug nga diin sila ug ang ilang mga kauban makabaton ug kahibalo sa Diyos. Ang mga pulong ni Jesus diha sa Mateo 6:3, 4 naghatag kanato ug maayong katarongan sa pagsalig nga pasidunggan sa Diyos kadtong nagapasidungog kaniya.

20. (a) Nganong ang pagsusi sa kaugalingon kinahanglan sa pagpadapat sa Proverbio 3:9? (b) Unsang mga pangutana ang atong ibangon sa atong kaugalingon?

²⁰ Apan, aniay pagabantayan: Ang mga Pariseo ug mga eskriba, kinsa matud pa ni Jesus wala unaha ang pagpasidungog sa Diyos, naneguro nga sila mao ang una nga makapahimulos gikan sa ilang bahandi. Busa ang tambag diha sa Mateo 15:4-8 nagsugyot nga kita magpasakop sa pagsusi sa kaugalingon may kalabotan sa ‘pagpasidungog kang Jehova pinaagi sa atong bililhong mga butang.’ (Jeremias 17:9, 10) Pananglitan, ang usa ka Kristohanon nga nahimong bahandianon tungod sa iyang negosyo tingali mangatarongan sa iyang pagpadayon sa pagtrabaho sa bug-os pa aron makakita ug mas daghan pa. Tingali siya mangatarongan, ‘Ang uban misulod sa payunir nga ministeryo o mibalhin sa pag-alagad sa lugar nga ilabinang gikinahanglan ang mga magwawali, apan ang akong linain nga paagi sa pag-alagad sa Diyos mao ang pagpangitag dugang salapi aron daghan akog maamot.’ Hayan daghang maayong butang ang mahimo sa iyang mga kontribusyon. Apan maayong mangutana siya, ‘Ang ako bang estilo sa kinabuhi nagapabanaag nga ang paggamit sa salapi sa pagpasidungog sa Diyos mao ang akong pangunang motibo sa pagpangitag dugang ug dugang pang salapi?’ (Lucas 12:16-19; itandi sa Marcos 12:41-44.) Ug, ‘Mahikay ko ba ang akong mga kalihokan aron makabaton ako ug mas dakong bahin diha sa labing importanteng buluhaton alang sa atong adlaw​—ang pagwali sa maayong balita?’ Sa pagkatinuod, bisan unsa pay kahimtang sa atong kinabuhi, atong masusi ang atong mga motibo ug mga lihok ug pangutana, ‘Sa unsang paagi bug-os ko pang mapasidunggan ang akong Maghahatag-ug-kinabuhi ug “Diyos sa paglaom”?’

21. Unsang palaabuton ang atong mabatonan kon atong ginapasidunggan si Jehova karon?

²¹ Dili gayod kita pakyason ni Jehova. Pagkatahom nga palaabuton nga iyang ipahayag, karon ug ngadto sa umaabot, bahin kanato kanang iyang gipahayag sa matinumanong Israel: “Tungod kay ikaw bililhon sa akong pagtan-aw, ikaw gilantaw nga dungganan, ug gihigugma ko ikaw”! (Isaias 43:4) Kanang mao gihapong Usa nagsaad ug “kinabuhing dayon niadtong nagapangita sa himaya ug kadungganan.” Iyang gitultolan niining saara kadtong molahutay sa “buhat nga maayo.” Pagkahalangdon nga “Diyos sa paglaom”!

Unsaon Nimo sa Pagtubag?

◻ Mahitungod sa mga tawong nagapasidungog kang Jehova, unsay atong makat-onan gikan sa pananglitan ni Jesus?

◻ Sa unsang paagi lahi si Eli ug Samuel bahin sa pagpasidungog sa Diyos?

◻ Unsa ang pila ka paagi diin imong mapalambo ang pasidungog nga imong mahatag sa Diyos, ug unsang pagsanong nga mahimo nimong madawat?

◻ Unsay palaabuton ang naghulat niadtong nagauna sa pagpasidungog sa atong “Diyos sa paglaom”?

1. Unsay atong katarongan nga buot natong pasidunggan si Jehova? (1 Timoteo 1:17; Pinadayag 4:11)

[Kahon sa panid 20]

MGA SULAT BAHIN SA MGA AMOT

Aniay pila ka unod gikan sa mga sulat nga nadawat sa Brooklyn, New York, nga opisina sa Watch Tower Society:

“Ang akong ngalan mao si Abijah. Nuybe anyos ako. Gusto nakong ihatag kaninyo ang $4 alang sa mga igsoon nga nagtrabaho sa mga Kingdom Hall. Ilang magamit kini aron ipalit ug kahoy o karmelitos, walay sapayan kanako.”​—Oregon.

‘Inyong makitang gisukip ko ang akong personal nga tseke. Kapin na ako sa 96 anyos ug dili kaayo makadungog, apan nalipay gayod ako sa pagtigom sa akong salapi alang niana. Oo, nahibalo ako, nagamaneho akog segunda-manong awto, ug wala ako magpalabay sa akong panahon sa tingtugnaw diha sa Florida o sa California. Diyutay na kaayo ang akong mahimo sa pagwali sa maayong balita sa Gingharian pinaagi sa pagpanuktok sa mga pultahan. Apan akong gitigom ang akong salapi ug nagapadala ug pila diha kaninyo, nagtuo ako nga nakabahin gihapon ako niana.’​—Ohio.

‘Salamat kaninyo sa tanang butang nga inyong nahimo alang sa Kingdom Hall. Kining kuwartaha [$5] maoy alang sa pagtabang kaninyo sa mga libro ug sa mga Ang Bantayanang Torre aron among mabasa. Ang kuwarta gikan sa akong alkansiya. Salamat alang sa brosyur nga School sa pagsulti kanamo bahin sa mga droga.’

“Kini gisukipan ug usa ka tseke. Ang dos-siyentos dolyares niini maoy alang sa Kingdom Hall Building Fund. Ang nahibilin gamita sa bisan unsang paagi nga inyong makita nga gikinahanglan sa pagpauswag sa buluhatong pagsangyaw.”​—Missouri.