Aduna Unyay Pagkabanhaw sa mga Matarong
“Ako adunay paglaom ngadto sa Diyos . . . nga aduna unyay pagkabanhaw sa mga matarong ug sa mga dili-matarong.”—BUHAT 24:15.
1. Unsang situwasyon ang giatubang sa tanang katawhan sukad nga nakasala si Adan ug Eva?
“BISAN unsa ang hikaplagan nga buhat sa imong kamot, buhata kana uban ang imong kusog, kay walay buluhaton ni lalang ni kahibalo ni kaalam sa Sheol, ang dapit diin ikaw moadto.” (Ecclesiastes 9:10) Uban niining pipila, maayong pagkapili nga mga pulong, ang maalamong Haring Solomon nagahubit sa usa ka situwasyon nga giatubang sa matag kaliwatan sa katawhan sukad nga nakasala ang atong unang mga ginikanan, si Adan ug Eva. Nga walay gipili, ang kamatayon sa ngadtongadto magalamoy sa tanan—dato ug kabos, hari ug ordinaryong tawo, matinuohon ug walay pagtuo. Sa pagkatinuod, ang kamatayon “nagmando ingong hari.”—Roma 5:17.
2. Nganong ang pipila ka mga matinumanon nahigawad niining panahon sa kataposan?
2 Bisan pa sa kinaulahiang kauswagan sa medikal nga siyensiya, ang kamatayon nagamando gihapon ingong hari bisan karong adlawa. Samtang kini dili ikahibulong, ang pipila daw nahigawad sa dihang sila sa kataposan moatubang na niining dugay na kaayong kaaway. Ngano? Buweno, balik sa katuigang 1920, gimantala sa Watch Tower Society ang mensahe nga “Minilyong buhi karon dili na gayod mamatay.” Kinsa ba kining minilyon? Ang “mga karnero” nga gihisgotan diha sa mga pahayag ni Jesus bahin sa mga karnero ug mga kanding. (Mateo 25:31-46) Kining mga karnerohon gitagna nga motungha sa panahon sa kataposan, ug ang ilang paglaom mao ang kinabuhing walay kataposan diha sa usa ka paraiso sa yuta. Sa paglabay sa panahon, ang katawhan sa Diyos nakabaton ug mas maayong pagsabot sa posisyon niining “mga karnero” diha sa mga katuyoan ni Jehova. Nasabtan nga kining mga masinugtanon mailhan gikan sa gahig-ulong “mga kanding,” ug human sa kalaglagan sa ulahi, ang mga karnero magapanunod sa yutan-ong dominyo sa Gingharian nga giandam alang kanila.
Pagtigom sa mga Karnerohon
3. Unsang buluhatona ang gitagad ug maayo sa katawhan sa Diyos sukad pa sa 1935?
3 Sugod sa 1935, ‘ang matinumanong ulipon’ nagtagad ug maayo sa pagpangita sa maong mga karnerohon ug nagadala kanila ngadto sa organisasyon ni Jehova. (Mateo 24:45; Juan 10:16) Kining daling matudloan nga mga Kristohanon nakadangat sa pag-ila nga si Jesus karon nagmando na sa langitnong Gingharian ni Jehova ug nga ang panahon kusog nga nagsingabot alang sa kataposan niining daotang sistema sa mga butang ug ang pagpasulod sa usa ka bag-ong kalibotan nga niana magapuyo ang pagkamatarong. (2 Pedro 3:13; Pinadayag 12:10) Nianang bag-ong kalibotan, ang makapalipay nga mga pulong ni Isaias mamatuman: “Iyang pagalamyon ang kamatayon hangtod sa walay kataposan.”—Isaias 25:8.
4. Bisan ug kinasingkasing nga nagalaom nga makitang mabayaw ang pagkasoberano ni Jehova sa Armageddon, unsay nahitabo sa daghan sa ubang mga karnero?
4 Sanglit ang kataposan sa kalibotan ni Satanas haduol na kaayo, ang karnerohong mga Kristohanon malipay gayod nga mabuhi hangtod nga mabayaw ang pagkasoberano ni Jehova sa umaabot nga kasakitan sa Bantogang Babilonya ug sa ubang bahin sa kalibotan ni Satanas. (Pinadayag 19:1-3, 19-21) Alang sa kinabag-an, kini wala mahitabo nianang paagiha. Daghang nagalaom nga mahilakip sa “minilyon” nga dili na mamatay sa pagkatinuod nangamatay. Ang pipila nangamatay nga martir tungod sa kamatuoran diha sa mga bilanggoan ug mga kampo konsentrasyon o diha sa mga kamot sa relihiyosong mga panatiko. Ang uban nangamatay sa mga aksidente o tungod sa gitawag nga kinaiyanhong mga hinungdan—sakit ug pagkatigulang. (Salmo 90:9, 10; Ecclesiastes 9:11) Tin-aw, daghan pa ang mangamatay sa dili pa moabot ang kataposan. Sa unsang paagi makita niining mga tawhana ang katumanan sa saad sa usa ka bag-ong kalibotan nga niini magapuyo ang pagkamatarong?
Ang Paglaom sa Pagkabanhaw
5, 6. Unsay umaabot niadtong may yutan-ong paglaom nga mamatay sa dili pa ang Armageddon?
5 Gihatag ni apostol Pablo ang tubag sa dihang siya namulong atubangan sa Romanong gobernador nga si Felix. Ingon sa girekord sa Buhat 24:15, si Pablo maisogong miingon: “Ako adunay paglaom ngadto sa Diyos . . . nga aduna unyay pagkabanhaw sa mga matarong ug sa mga dili-matarong.” Ang paglaom sa pagkabanhaw mohatag kanatog kaisog atubangan sa grabeng mga kalisod. Tungod niana nga paglaom, ang atong minahal nga mga igsoong lalaki ug babaye nga nagkasakit ug nakamatikod nga basin sila mamatay dili angayng mawad-ag kadasig. Bisan unsay mahitabo, nasayod sila nga anihon nila ang ganti sa pagkamatinumanon. Tungod sa paglaom sa pagkabanhaw, ang atong maisogong mga igsoong lalaki ug babaye nga moatubang sa kamatayon diha sa mga kamot sa mga maglulutos nasayod nga imposibleng makadaog ang ilang mga maglulutos. (Mateo 10:28) Kon adunay mamatay diha sa kongregasyon, kita masubo tungod sa pagkawala nianang tawhana. Sa samang panahon, kon siya usa sa ubang mga karnero, kita malipay nga ang atong isigkamagtutuo nagpamatuod nga matinumanon hangtod sa kataposan ug karon nagapahulay, nga nakaseguro sa usa ka umaabot diha sa bag-ong kalibotan sa Diyos.—1 Tesalonica 4:13.
6 Oo, ang paglaom sa pagkabanhaw maoy usa ka hinungdanong bahin sa atong pagtuo. Apan, nganong ang atong pagtuo sa pagkabanhaw malig-on kaayo, ug kinsay nakig-ambit niana nga paglaom?
7. Unsa ang pagkabanhaw, ug unsa ang pipila ka kasulatan nga nagpahayag sa pagkatino niini?
7 Ang Gregong pulong alang sa “pagkabanhaw” maoy a·naʹsta·sis, nga sa literal nagkahulogang “nagabarog.” Kini nagapunting sa paninugdan sa pagbangon gikan sa mga patay. Makaiikag, ang aktuwal nga pulong “pagkabanhaw” dili makita sa Hebreohanong Kasulatan, apan ang paglaom sa pagkabanhaw tin-aw nga gipahayag didto. Atong makita kana, pananglitan, diha sa mga pulong nga gipamulong ni Job taliwala sa iyang pag-antos: “O nga sa Sheol unta tagoan mo ako, . . . nga imo unta akong tagalan ug panahon ug mahinumdom ka kanako!” (Job 14:13) Sa susama, sa Oseas 13:14, atong mabasa: “Gikan sa gahom sa Sheol pagalukaton ko sila; pagatubson ko sila gikan sa kamatayon. Hain man ang imong mga ikos, O Kamatayon? Hain man ang imong pagkamalaglagon, O Sheol?” Sa 1 Corinto 15:55, si apostol Pablo mikutlo niining mga pulonga ug gipakita nga ang gitagnang kadaogan batok sa kamatayon matuman pinaagi sa pagkabanhaw. (Siyempre, nianang tekstoha si Pablo naghisgot bahin sa langitnong pagkabanhaw.)
Mga Magtutuo “Gipahayag na nga Matarong”
8, 9. (a) Sa unsang paagi ang dili-hingpit nga mga tawo makabatog bahin sa pagkabanhaw sa mga matarong? (b) Unsa ang pasikaranan sa atong paglaom sa usa ka kinabuhi nga dili matapos sa kamatayon?
8 Sa iyang pahayag ngadto kang Felix, nga gikutlo sa parapo 5, si Pablo miingon nga aduna unyay pagkabanhaw sa mga matarong ug sa mga dili-matarong. Kinsa ang mga matarong nga pagabangonon unya? Buweno, walay tawo ang matarong sa kinaiyahan. Kitang tanan makasasala sukad sa pagkahimugso, ug kita makahimog mga sala sa tibuok natong kinabuhi—nga naghimo kanatong takos sa kamatayon tungod sa duha ka katarongan. (Roma 5:12; 6:23) Bisan pa niana, sa Bibliya makaplagan nato ang mga pulong “gipahayag na nga matarong.” (Roma 3:28) Kini nagapunting sa mga tawo kinsa, bisan ug dili-hingpit, gipasaylo na ni Jehova ang ilang mga sala.
9 Ang ekspresyon kanunay kaayong gigamit maylabot sa dinihogang mga Kristohanon, nga may langitnong paglaom. Sa Roma 5:1, si apostol Pablo nag-ingon: “Karon nga kita gipahayag na nga matarong ingon nga resulta sa pagtuo, tagamtamon nato ang pakigdait uban sa Diyos pinaagi sa atong Ginoong Jesu-Kristo.” Ang tanang dinihogang mga Kristohanon gipahayag na nga matarong tungod sa pagtuo. Pagtuo sa unsa? Ingon sa detalyadong pagpatin-aw ni Pablo sa basahon sa mga taga-Roma, kini mao ang pagtuo kang Jesu-Kristo. (Roma 10:4, 9, 10) Si Jesus namatay ingong usa ka hingpit nga tawo ug human niana gibanhaw gikan sa mga patay ug mikayab sa langit aron itanyag ang bili sa iyang tawhanong kinabuhi alang kanato. (Hebreohanon 7:26, 27; 9:11, 12) Sa dihang gidawat ni Jehova ang maong halad, si Jesus, sa ingon, naglukat sa tawhanong rasa gikan sa pagkaulipon sa sala ug kamatayon. Kadtong magpakitag pagtuo niini nga kahikayan makabaton ug dakong kaayohan gikan niana. (1 Corinto 15:45) Tungod niini ang matinumanong mga lalaki ug babaye adunay paglaom nga makapanunod sa usa ka kinabuhi nga dili matapos sa mabangis nga kaaway, ang kamatayon.—Juan 3:16.
10, 11. (a) Unsang pagkabanhaw ang nagapaabot sa matinumanong dinihogang mga Kristohanon? (b) Unsang matanga sa pagkabanhaw ang gilaoman sa una-Kristohanong mga magsisimba?
10 Tungod sa halad lukat ni Jesus, ang matinumanong mga dinihogan, kay gipahayag na nga matarong, adunay seguradong paglaom nga mabanhaw ingong dili-mamatay nga espiritung mga linalang, sama kang Jesus. (Pinadayag 2:10) Ang ilang pagkabanhaw gihisgotan sa Pinadayag 20:6, nga nag-ingon: “Malipayon ug balaan ang bisan kinsa nga adunay bahin sa unang pagkabanhaw; ibabaw niini nila ang ikaduhang kamatayon walay awtoridad, apan sila mahimong mga saserdote sa Diyos ug sa Kristo, ug magamando ingong mga hari uban kaniya sulod sa usa ka libo ka tuig.” Kini mao ang langitnong pagkabanhaw. Matikdi, hinunoa, nga ang Bibliya nagatawag niini nga “unang pagkabanhaw,” nga nagapasabot nga adunay daghan pa nga mosunod.
11 Sa Hebreohanon kapitulo 11, si Pablo naghisgot sa hataas nga linya sa una-Kristohanong mga alagad sa Diyos nga nagpakitag malig-ong pagtuo kang Jehova nga Diyos. Kini sila adunay pagtuo usab sa pagkabanhaw. Sa bersikulo 35 nianang kapituloha, si Pablo naghisgot bahin sa milagrosong mga pagkabanhaw nga nahitabo sa kasaysayan sa Israel, nga nag-ingon: “Ang mga babaye midawat sa ilang mga patay pinaagig pagkabanhaw; apan ang uban nga mga tawo gipangsakit tungod kay sila dili man modawat ug kapagawasan pinaagig unsa man nga lukat, aron nga sila managpakakab-ot ug usa ka mas maayong pagkabanhaw.” Kadtong matinumanong mga saksi sa karaang mga panahon makapanglantaw sa usa ka mas maayong pagkabanhaw kay sa niadtong mga nalangkit, pananglitan, kang Elias ug Eliseo. (1 Hari 17:17-22; 2 Hari 4:32-37; 13:20, 21) Ang ilang paglaom maoy pagkabanhaw ngadto sa usa ka kalibotan diin ang mga alagad sa Diyos dili na pagasakiton tungod sa ilang pagtuo, usa ka kalibotan diin ang mga babaye dili na mamatyan sa ilang mga minahal. Oo, sila nagapaabot nga bangonon gikan sa mga patay ngadto sa samang bag-ong kalibotan nga atong ginalaoman. (Isaias 65:17-25) Si Jehova wala kaayoy gibutyag kanila nga sama sa iyang gibutyag kanato bahin niining bag-ong kalibotan. Bisan pa niana, sila nasayod nga ang bag-ong kalibotan umaabot, ug sila buot nga maanaa niana.
Ang Yutan-ong Pagkabanhaw
12. Gipahayag ba nga matarong ang una-Kristohanong mga matinumanon? Ipatin-aw.
12 Angay ba natong hunahunaon ang pagkabanhaw niining matinumanon una-Kristohanong mga lalaki ug babaye nianang bag-ong kalibotan ingong bahin sa pagkabanhaw sa mga matarong? Dayag nga oo, tungod kay ang Bibliya naghisgot kanila ingong mga matarong. Pananglitan, ang tinun-ang si Santiago naghisgot sa usa ka lalaki ug usa ka babaye sa karaang mga panahon nga gipahayag na nga matarong. Ang lalaki mao si Abraham, ang ginikanan sa Hebreohanong rasa. Mahitungod kaniya atong mabasa: “‘Si Abraham nagbutang ug pagtuo kang Jehova, ug kadto giisip kaniya ingong pagkamatarong,’ ug gitawag siya nga ‘higala ni Jehova.’” Ang babaye mao si Rahab, usa ka dili-Israelinhon nga nagpakitag pagtuo kang Jehova. Siya “gipahayag nga matarong” ug nahimong bahin sa Hebreohanong nasod. (Santiago 2:23-25) Busa, ang mga lalaki ug babaye sa karaang mga panahon nga nagpakitag malig-ong pagtuo kang Jehova ug sa iyang mga saad ug nagpabiling matinumanon hangtod sa kamatayon gipahayag na nga matarong ni Jehova pinasikad sa ilang pagtuo, ug sila sa walay duhaduha mahilakip sa ‘pagkabanhaw sa mga matarong.’
13, 14. (a) Unsaon nato pagkasayod nga ang mga Kristohanon nga may yutan-ong paglaom mahimong ikapahayag nga matarong? (b) Unsay kahulogan niini alang kanila?
13 Apan, komosta ang karnerohong mga indibiduwal karong adlawa, kadtong may yutan-ong paglaom nga nagpahinungod sa ilang kaugalingon kang Jehova ug nga mamatay nga matinumanon niining panahon sa kataposan? Sila ba mahilakip sa pagkabanhaw sa mga matarong? Dayag gayod. Usa ka dakong panon sa maong mga matinumanon ang nakita diha sa panan-awon ni apostol Juan. Matikdi kon sa unsang paagi siya naghubit kanila: “Nakita ko, ug, tan-awa! usa ka dakong panon sa katawhan, nga walay tawong makaihap, gikan sa tanang kanasoran ug mga tribo ug katawhan ug mga dila, nga nagbarog atubangan sa trono ug atubangan sa Kordero, nga nagsininag mga puting taas-nga-bisti; ug adunay mga palwa sa palma diha sa ilang mga kamot. Ug sa makusog nga tingog sila nagasigig singgit, nga nag-ingon: ‘Ang kaluwasan utang namo sa atong Diyos, nga naglingkod sa trono, ug sa Kordero.’”—Pinadayag 7:9, 10.
14 Matikdi nga kining mga maaghop kombinsido gayod sa ilang kaluwasan, ug kini ilang giisip nga gikan kang Jehova ug kang Jesus, “ang Kordero.” Dugang pa, sila nagabarog atubangan kang Jehova ug sa Kordero, ang tanan nagbistig maputi. Nganong maputi? Usa ka langitnong linalang misulti kang Juan: “Ilang gilabhan ang ilang mga taas-nga-bisti ug nagpaputi niini sa dugo sa Kordero.” (Pinadayag 7:14) Sa Bibliya, ang puti maoy usa ka simbolo sa kaputli, pagkamatarong. (Salmo 51:7; Daniel 12:10; Pinadayag 19:8) Ang kamatuoran nga ang dakong panon nakit-ang nagsul-ob ug maputing mga bisti nagpasabot nga si Jehova naglantaw kanila ingong mga matarong. Sa unsang paagi kana posible? Tungod kay sila, ingnon pa, naglaba sa ilang mga taas-nga-bisti sa dugo sa Kordero. Sila nagpakitag pagtuo sa giulang dugo ni Jesu-Kristo ug busa gipahayag na nga matarong ingong mga higala sa Diyos nga may panglantaw nga makalabang-buhi sa dakong kasakitan. Busa, ang bisan kinsa nga matinumanon dedikadong Kristohanon karon nga bahin sa “dakong panon” nga mamatay sa dili pa ang dakong kasakitan makaseguro nga mahimong bahin sa yutan-ong pagkabanhaw sa mga matarong.
15. Sanglit ang mga matarong ug mga dili-matarong pagabanhawon, unsa ang kaayohan sa pagkabanhaw sa mga matarong?
15 Kana nga pagkabanhaw gihubit diha sa Pinadayag kapitulo 20, bersikulo 13, niining mga pulonga: “Ang dagat nagtugyan sa mga patay nga diha niini, ug gitugyan sa kamatayon ug sa Hades ang mga patay nga diha nila, ug sila gihukman nga tagsa-tagsa sumala sa ilang mga buhat.” Busa, sa dakong Adlaw sa Paghukom ni Jehova sa usa ka libo ka tuig, kadtong tanan nga anaa sa panumdoman sa Diyos pagabanhawon—ang mga matarong ug ang mga dili-matarong. (Buhat 17:31) Aw, pagkamaayo gayod unya kana alang sa mga matarong! Sila nagkinabuhi na sa mga kinabuhing may pagtuo. Sila nakabaton na ug suod nga relasyon kang Jehova ug masaligon sa katumanan sa iyang mga katuyoan. Ang matarong nga mga saksi sukad sa wala pa ang Kristohanong Panahon mahigmata gikan sa kamatayon nga andam sa pagkat-on kon sa unsang paagi ang mga saad ni Jehova bahin sa Binhi natuman. (1 Pedro 1:10-12) Kadtong bahin sa ubang karnero nga ginalantaw ni Jehova nga mga matarong sa atong adlaw manggula gikan sa lubnganan nga mahinamon sa pagtan-aw sa yutan-ong Paraiso nga ilang gipakigsulti sa dihang sila nagpahayag sa maayong balita niining sistema sa mga butang. Pagkamalipayong panahon unya kana!
16. Unsay atong ikasulti bahin sa pagkabanhaw sa Adlaw sa Paghukom alang niadtong mangamatay sa atong panahon?
16 Sa panahon nianang usa ka libo ka tuig nga Adlaw sa Paghukom, kanus-a ba gayod pagabanhawon kadtong nangamatay nga matinumanon niining kataposang mga tuig sa sistema sa mga butang ni Satanas? Walay giingon ang Bibliya. Bisan pa niana, dili ba makataronganon nga hunahunaon nga kadtong giisip nga matarong nga mamatay sa atong panahon makabaton ug sayong pagkabanhaw ug sa ingon makaambit uban sa dakong panon nga makalabang-buhi sa Armageddon sa buluhaton sa pag-abiabi sa una pang mga kaliwatan nga pagabanhawon gikan sa mga patay? Oo, gayod!
Usa ka Paglaom nga Nagahatag ug Kalipay
17, 18. (a) Unsang paglipay ang ginatagana sa paglaom sa pagkabanhaw? (b) Unsay magpalihok kanato sa pagpahayag mahitungod kang Jehova?
17 Ang paglaom sa pagkabanhaw nagahatag ug kalig-on ug kalipay sa tanang Kristohanon karong adlawa. Kon kita magpabiling matinumanon, walay wala-damhang panghitabo ug walay kaaway ang maghikaw kanato sa atong ganti! Pananglitan, sa 1992 Yearbook of Jehovah’s Witnesses, sa panid 177, didto makita ang mga letrato sa maisogong mga Kristohanon sa Ethiopia nga namatay inay kay ikompromiso ang ilang pagtuo. Ang kapsiyon mabasa: “Mga nawong nga laoman natong makita diha sa pagkabanhaw.” Pagkadako nga pribilehiyo unya nga mahimamat kining mga tawhana ug ang di-maihap pang uban nga nagpakitag susamang pagkamatinumanon atubangan sa kamatayon!
18 Komosta ang atong kaugalingong mga minahal ug mga igsoong lalaki ug babaye nga tungod sa edad o sakit dili makalabang sa dakong kasakitan? Mahitungod sa paglaom sa pagkabanhaw, sila adunay kahibulongang umaabot kon sila magpabiling matinumanon. Ug kon kita usab maisogong magpakitag pagtuo diha sa halad lukat ni Jesus, kita adunay kahibulongang umaabot. Ngano? Tungod kay, sama kang Pablo, kita nagalaom sa “pagkabanhaw sa mga matarong ug sa mga dili-matarong.” Sa tibuok natong kasingkasing, kita magpasalamat kang Jehova alang niini nga paglaom. Sa pagkatinuod, kini magpalihok kanato nga ipahayag ang mga pulong sa salmista: “Ipahayag ang himaya [sa Diyos] taliwala sa mga nasod, sa taliwala sa tanang katawhan ang iyang katingalahang mga buhat. Kay dako si Jehova ug takos gayod nga pagadayegon.”—Salmo 96:3, 4.
Makapatin-aw Ka Ba?
◻ Unsang mga kasulatan ang motabang sa pagpamatuod sa atong paglaom sa usa ka yutan-ong pagkabanhaw?
◻ Sa unsang pasikaranan nga ang mga Kristohanon karon gipahayag na nga matarong?
◻ Sa unsang paagi ang paglaom sa pagkabanhaw nagahatag kanatog kaisog ug determinasyon?
[Hulagway sa panid 9]
Sama kang Pablo, ang dinihogang mga Kristohanon nagalaom sa langitnong pagkabanhaw