Nganong Itaho Kon Unsay Daotan?

“SIYA nga nagbutyag sa usa ka butang mahimong kaaway sa katawhan,” ang pipila moingon sa Kasadpang Aprika. Mao kana ang nahitabo kang Olu sa dihang giakusar niya ang iyang magulang nga lalaki nga miunay sa iyang igsoong babaye. “Bakakon ka!” misinggit ang magulang. Unya gikulata niya pag-ayo si Olu, gipapahawa siya gikan sa pinuy-anan sa pamilya, ug gisunog ang tanang sinina ni Olu. Ang mga taga-balangay mipaluyo sa magulang. Kay wala na dawata sa balangay, kinahanglang mobiya si Olu. Human lamang makitang namabdos ang babaye nga ang mga tawo nakaamgo nga si Olu nagsulti sa tinuod. Ang magulang miangkon, ug si Olu gidawat pag-usab. Mahimong lahi unta ang mahitabo. Mahimong mamatay unta si Olu.

Tin-aw, kadtong walay gugma kang Jehova lagmit dili moapresyar nga ibutyag ang ilang sayop. Ang kiling sa makasasalang tawo mao ang pagsukol sa pagbadlong ug pagkasuko sa naghatag niana. (Itandi ang Juan 7:7.) Dili ikahibulong nga daghan ang sama ka hilom sa mga bato kon bahin na sa pagbutyag sa mga sayop sa uban ngadto sa may awtoridad sa pagtul-id kanila.

Pag-apresyar sa Bili sa Pagbadlong

Hinunoa, taliwala sa katawhan ni Jehova adunay lahing tinamdan ngadto sa pagbadlong. Ang diyosnong mga lalaki ug babaye dulot nga nag-apresyar sa kahikayan nga gihimo ni Jehova sa pagtabang sa mga nakasala sulod sa Kristohanong kongregasyon. Ilang giila ang maong disiplina ingong kapahayagan sa iyang mahigugmaong-kalulot.​—Hebreohanon 12:​6-11.

Kini ikailustrar sa usa ka hitabo sa kinabuhi ni Haring David. Bisan tuod siya maoy matarong nga tawo sukad sa iyang pagkabatan-on, dihay panahon nga nalangkit siya sa seryosong pagpakasala. Una, nanapaw siya. Unya, sa pagsulay nga tabonan ang iyang sayop, gihikay niya nga ipapatay ang bana sa babaye. Apan gibutyag ni Jehova ang sala ni David ngadto kang Natan nga propeta, kinsa maisogong nagsukmat kang David mahitungod sa maong butang. Nga migamit ug epektibong ilustrasyon, si Natan nangutana kang David kon unsay angayng buhaton ngadto sa usa ka tawong dato nga daghag karnero apan mikuha ug miihaw sa bugtong nating-karnero, usa ka gimahal nga ginalam, sa usa ka kabos nga tawo aron sa pag-abiabi sa iyang higala. Si David, usa ka kanhing magbalantay, misilaob sa kaligutgot ug kasuko. Siya miingon: “Ang tawo nga nagbuhat niini takos patyon!” Unya gipadapat ni Natan ang ilustrasyon kang David, nga nag-ingon: “Ikaw mismo mao ang tawo!”​—2 Samuel 12:​1-7.

Si David wala masuko kang Natan; ni misulay siya pagpanalipod sa iyang kaugalingon ni mibalos siya pag-akusar. Hinunoa, ang pagbadlong ni Natan nagpalihok pag-ayo sa iyang tanlag. Nasubo, si David misugid: “Nakasala ako batok kang Jehova.”​—2 Samuel 12:13.

Ang pagyagyag ni Natan sa sala ni David, nga gisundan sa diyosnong pagbadlong, may maayong mga resulta. Bisan tuod si David wala panalipdi sa mga sangpotanan sa iyang sala, siya naghinulsol ug napasig-uli kang Jehova. Unsay gibati ni David sa maong pagbadlong? Siya misulat: “Kon ugaling ako hampakon sa usang matarong, kana maoy mahigugmaong-kalulot; ug kon ugaling ako iyang badlongon, kana maoy lana sa ibabaw sa akong ulo, nga dili buot dumilian sa akong ulo.”​—Salmo 141:5.

Sa atong adlaw usab, ang mga alagad ni Jehova mahimong malangkit sa seryosong sala, bisan kadtong matinumanon na sulod sa daghang katuigan. Nakaamgong ang mga ansiyano makatabang, kadaghanan mouna sa pagduol kanila alang sa tabang. (Santiago 5:​13-16) Apan usahay ang nakasala mahimong mosulay pagtabon sa iyang sala, sama kang Haring David. Unsay angay natong buhaton kon kita nakahibalo bahin sa seryosong sala diha sa kongregasyon?

Kansang Responsibilidad Kana?

Sa dihang ang mga ansiyano nakahibalo bahin sa seryosong sala, ilang duolon ang indibiduwal nga nalangkit aron hatagan ug gikinahanglang tabang ug pagtul-id. Responsibilidad sa mga ansiyano nga hukman ang mga nakasala sa sulod sa Kristohanong kongregasyon. Samtang nagmabinantayon pag-ayo sa espirituwal nga kahimtang niini, ilang tabangan ug tambagan si bisan kinsa nga mihimog dili-maalamon o sayop nga lakang.​—1 Corinto 5:​12, 13; 2 Timoteo 4:​2; 1 Pedro 5:​1, 2.

Apan unsa na man kon dili ka ansiyano ug nakahibalo ka bahin sa usa ka seryosong sala sa laing Kristohanon? Ang mga lagda makaplagan diha sa Balaod nga gihatag ni Jehova sa nasod sa Israel. Ang Balaod nag-ingon nga kon ang usa ka tawo nakasaksi ug apostatang mga buhat, sedisyon, pagbuno, o pipila ka ubang seryosong mga krimen, iyang responsibilidad ang pagtaho niana ug ang pagtestigos bahin sa iyang nahibaloan. Ang Levitico 5:​1 nag-ingon: “Karon kon adunay tawo nga makasala nga niana siya nakadungog ug publikong pagtunglo ug siya nakasaksi o siya nakakita niana o nakahibalo niana, kon dili siya motaho niana, siya kinahanglang manubag sa iyang kasaypanan.”​—Itandi ang Deuteronomio 13:​6-8; Ester 6:​2; Proverbio 29:24.

Bisan tuod dili ilalom sa Moisesnong Balaod, ang mga Kristohanon karong adlawa magiyahan sa mga prinsipyo nga nagpaluyo niana. (Salmo 19:​7, 8) Busa kon nakahibalo ka bahin sa seryosong sala sa isigka-Kristohanon, unsay angay nimong buhaton?

Pagdumala sa Kahimtang

Una sa tanan, hinungdanon nga adunay balidong katarongan sa pagtuo nga ang seryosong sala nahitabo gayod. “Dili ka magsaksi batok sa imong isigkatawo nga walay pasikaranan,” miingon ang maalamong tawo. “Niana dili ka mahimong buangbuang pinaagi sa imong mga ngabil.”​—Proverbio 24:28.

Mohukom ka tingali nga direktang moadto sa mga ansiyano. Dili sayop ang pagbuhat niana. Apan, kasagaran, ang labing mahigugmaong dalan mao ang pagduol sa tawo nga nalangkit. Tingali ang mga kamatuoran dili gayod ingon sa gituohang nahitabo. O tingali ang kahimtang gidumala na sa mga ansiyano. Malinawong hisgoti ang maong butang uban sa maong tawo. Kon aduna gihapoy katarongan nga motuo nga ang seryosong sala nahimo, dasiga siya sa pagduol sa mga ansiyano alang sa tabang, ug isaysay ang kaalam sa pagbuhat niana. Ayaw ipanugilon sa uban kanang hitaboa, kay kana maoy pagtabitabi.

Kon ang tawo dili motaho ngadto sa mga ansiyano sulod sa igoigong yugto sa panahon, nan buhata kana. Ang usa o duha ka ansiyano maghisgot dayon sa hitabo kauban sa akusado. Ang mga ansiyano kinahanglang “magsusi ug magsukitsukit ug mangutana pag-ayo” aron masuta kon nahimo ba ang sayop. Kon nahimo man, dumalahon nila ang kaso sumala sa mga lagda sa Kasulatan.​—Deuteronomio 13:​12-14.

Labing menos duha ka saksi ang gikinahanglan sa pag-establisar sa gisumbong nga sala. (Juan 8:​17; Hebreohanon 10:28) Kon molimod ang tawo sa sumbong ug ikaw lang ang mitestigos, ang maong butang isalig na lang kang Jehova. (1 Timoteo 5:​19, 24, 25) Kini buhaton sa kahibalo nga ang tanang butang “naladlad nga bukas” kang Jehova ug nga kon ang tawo sad-an, ngadtongadto “hiapsan” siya sa iyang mga sala.​—Hebreohanon 4:13; Numeros 32:23.

Apan pananglitan ang tawo milimod sa sumbong ug ikaw lamang ang saksi batok kaniya. Ikaw ba karon mahimong ibali pagsumbong nga nagbutangbutang? Dili, gawas lang kon gitabitabi nimo ngadto sa wala malangkit sa maong butang. Dili mapasipad-on ang pagtaho sa mga kahimtang nga nag-apektar sa kongregasyon ngadto sa adunay awtoridad ug responsibilidad sa pagdumala ug pagtul-id sa mga butang. Sa pagkatinuod, nahiuyon kini sa atong tinguha nga kanunayng buhaton kon unsa ang husto ug maunongon.​—Itandi ang Lucas 1:​74, 75.

Paghupot sa Pagkabalaan Diha sa Kongregasyon

Ang usa ka katarongan sa pagtaho sa sala mao nga kana mosangpot sa pagtipig sa kahinlo sa kongregasyon. Si Jehova maoy usa ka hinlo nga Diyos, usa ka balaan nga Diyos. Siya nagbaod sa tanang nagsimba kaniya nga magmahinlo sa espirituwal ug moral. Ang iyang dinasig nga Pulong nagtambag: “Ingong masinugtanong mga anak, hunong na sa pagpaumol sumala sa mga tinguha nga inyo kanhing gibatonan diha sa inyong kawalay-alamag, hinunoa, kauyon sa Balaang Usa nga mitawag kaninyo, magmabalaan usab kamo sa tanan ninyong mga panggawi, tungod kay kini nahisulat: ‘Kinahanglan kamong magmabalaan, tungod kay ako balaan.’” (1 Pedro 1:​14-16) Ang mga indibiduwal nga nagbuhat ug kahugawan o sala makabuling ug makapahinabo sa dili-pag-uyon ni Jehova sa enterong kongregasyon gawas kon tul-iron o palagpoton sila.​—Itandi ang Josue, kapitulo 7.

Ang mga sulat ni apostol Pablo ngadto sa Kristohanong kongregasyon sa Corinto nagpakita kon sa unsang paagi ang pagtaho sa sala misangpot sa paghinlo sa katawhan sa Diyos didto. Sa iyang unang sulat, si Pablo misulat: “Sa tinuod may gikataho nga pakighilawas taliwala kaninyo, ug ang ingon niana nga pakighilawas wala bisan gani taliwala sa mga nasod, nga ang gibatonang asawa sa usa ka tawo iya sa iyang amahan.”​—1 Corinto 5:1.

Ang Bibliya wala magtug-an kanato kon gikan kang kinsa nadawat sa apostol kadtong tahoa. Tingali si Pablo nakadungog bahin sa kahimtang gikan kang Stefanas, Fortunato, ug Acaico, kinsa mibiyahe gikan sa Corinto ngadto sa Efeso diin nag-estar si Pablo. Si Pablo nakadawat usab ug sulat nga nagpakisayod gikan sa Kristohanong kongregasyon sa Corinto. Bisan unsa pa ang tinubdan, sa dihang ang kahimtang gikataho kang Pablo sa kasaligang mga saksi, nianang panahona siya nakahatag ug pagtultol bahin sa maong butang. “Kuhaa ang tawo nga tuman-kadaotan gikan sa inyong taliwala,” siya misulat. Ang tawo gipalagpot gikan sa kongregasyon.​—1 Corinto 5:13; 16:​17, 18.

Maayo ba ang gisangpotan sa instruksiyon ni Pablo? Siyempre! Dayag, ang nakasala nakaamgo. Sa iyang ikaduhang sulat ngadto sa mga taga-Corinto, si Pablo miawhag nga ang kongregasyon “malulotong magpasaylo ug maghupay” sa mahinulsolong tawo. (2 Corinto 2:​6-8) Busa ang pagtaho sa sala mitultol sa binuhatan nga misangpot sa paghinlo sa kongregasyon ug pagpasig-uli ngadto sa pabor sa Diyos sa tawo nga nagdaot sa iyang relasyon uban sa Diyos.

Makakita pa kita ug laing pananglitan diha sa unang sulat ni Pablo ngadto sa Kristohanong kongregasyon sa Corinto. Nianang panahona ang apostol nagngalan sa mga saksi nga maoy nagtaho sa maong butang. Siya misulat: “Gihimo ang pagtug-an ngari kanako bahin kaninyo, akong mga igsoon, nilang sa balay ni Cloe, nga nagalungtad ang mga panagsumpakiay taliwala kaninyo.” (1 Corinto 1:11) Si Pablo nahibalo nga kining maong panagsumpakiay, duyog sa paghatag ug wala-mahiangayng pagpasidungog sa mga tawo, nagpatungha ug mabahinbahinong tinamdan nga naghulga sa pagbungkag sa panaghiusa sa kongregasyon. Busa, tungod sa dulot nga pagtagad sa espirituwal nga kaayohan sa iyang isigkamagtutuo didto, si Pablo milihok dayon ug misulat ug matul-irong tambag ngadto sa kongregasyon.

Karong adlawa, ang kadaghanan sa mga igsoong lalaki ug babaye sa mga kongregasyon sa tibuok yuta naghago aron sa pagtipig sa espirituwal nga kahinlo sa kongregasyon pinaagi sa paghupot sa matag usa ug inuyonang baroganan atubangan sa Diyos. Ang pipila nag-antos sa pagbuhat niana; ang uban nangamatay gani aron sa paghupot sa ilang integridad. Tino nga ang pagkonsentir o pagtabon sa sala magpakita ug kakulang ug apresasyon niining maong mga paningkamot.

Tabang Alang sa mga Masalaypon

Nganong ang uban nga grabeng nakasala nagpanuko sa pagduol sa mga ansiyano sa kongregasyon? Kasagaran tungod kay wala sila makaamgo sa mga kaayohan sa pagduol sa mga ansiyano. Ang pipila sayop nga nagtuo nga kon sila mosugid, ang ilang sala iyagyag sa tibuok kongregasyon. Gilimbongan sa uban ang ilang kaugalingon bahin sa kaseryoso sa ilang gibuhat. Ang uban pa naghunahuna nga mapasibo nila ang ilang kaugalingon nga walay tabang sa mga ansiyano.

Apan ang maong mga makasasala nagkinahanglan ug mahigugmaong tabang gikan sa mga ansiyano sa kongregasyon. Si Santiago misulat: “Aduna bay masakiton taliwala kaninyo? Ipatawag kaniya ang mga ansiyano sa kongregasyon ngadto kaniya, ug paampoa sila alang kaniya, nga magahaplas kaniya ug lana sa ngalan ni Jehova. Ug ang pag-ampo sa pagtuo magpaayo sa usa nga nagaluya, ug bangonon siya ni Jehova. Usab, kon siya nakahimo ug mga sala, kini ipasaylo kaniya.”​—Santiago 5:​14, 15.

Pagkakahibulongang tagana ang pagtabang sa mga masalaypon nga mapasig-uli sa ilang espirituwalidad! Pinaagi sa pagpadapat sa makahupay nga tambag gikan sa Pulong sa Diyos ug pinaagi sa pag-ampo alang kanila, ang mga ansiyano makatabang sa mga masakiton sa espirituwal nga maulian sa ilang masalaypong mga dalan. Busa, inay mobating hinukman, ang mga mahinulsolon kasagarang mobati nga narepreskohan ug nahuwasan sa dihang nakigkita sila sa mahigugmaong mga ansiyano. Usa ka batan-ong lalaki nga taga-Kasadpang Aprika nakapakighilawas ug nagtabon sa iyang sala sulod sa pipila ka bulan. Human madayag ang iyang sala, siya miingon sa mga ansiyano: “Aduna gayod untay nagsukitsukit kanako bahin sa akong kalangkitan sa maong babaye! Makapahupay gayod nga ipadayag kining butanga.”​—Itandi ang Salmo 32:​3-5.

Usa ka Buhat sa May-Prinsipyong Gugma

Ang bawtismadong mga alagad sa Diyos ‘nakalabang na gikan sa kamatayon ngadto sa kinabuhi.’ (1 Juan 3:14) Apan kon sila makahimog seryosong sala, sila mibalik ngadto sa dalan sa kamatayon. Kon dili sila tabangan, sila mahimong makubalan sa paghimo ug sala, nga dili magtinguha sa paghinulsol ug pagbalik sa pagsimba sa matuod nga Diyos.​—Hebreohanon 10:​26-29.

Ang pagtaho sa sala maoy buhat sa tinuod nga kahangawa alang sa nakasala. Si Santiago misulat: “Mga igsoon ko, kon taliwala kaninyo adunay mahisalaag gikan sa kamatuoran ug ang lain makapabalik kaniya, hibaloi nga siya nga makapabalik sa makasasala gikan sa pagkasayop sa iyang dalan magaluwas sa iyang kalag gikan sa kamatayon ug magatabon ug daghang mga sala.”​—Santiago 5:​19, 20.

Busa, nganong itaho kon unsay daotan? Tungod kay kini adunay maayong sangpotanan. Sa pagkatinuod, ang pagtaho sa sala maoy usa ka buhat sa Kristohanong may-prinsipyong gugma nga gipakita ngadto sa Diyos, ngadto sa kongregasyon, ug ngadto sa nakasala. Samtang ang matag membro sa kongregasyon maunongong magpaluyo sa matarong nga mga sukdanan sa Diyos, si Jehova dagayang magapanalangin sa kongregasyon sa kinatibuk-an. Misulat si apostol Pablo: “Siya [Jehova] usab maghimo kaninyong lig-on hangtod sa kataposan, aron nga walay ikasumbong kaninyo sa adlaw sa atong Ginoong Jesu-Kristo.”​—1 Corinto 1:8.

[Kapsiyon sa panid 26]

Pagpakitag gugma ang pagdasig sa nakasala nga Saksi nga makigsulti sa mga ansiyano

[Kapsiyon sa panid 28]

Ang mga ansiyano motabang sa pagpasig-uli sa mga nakasala ngadto sa pabor sa Diyos