Unsay Giingon sa Bibliya Bahin sa Kaminyoon?

Human lalanga sa Diyos ang unang lalaki ug babaye, iya silang gihiusa diha sa kaminyoon. Iyang gihimo ang kaminyoon ingong espesyal nga relasyon tali sa lalaki ug babaye aron mahimong pundasyon sa pamilya.—Genesis 1:27, 28; 2:18.

Gusto sa Diyos nga magmalipayon ang magtiayon. (Proverbio 5:18) Sa Bibliya, naghatag siyag mga sukdanan ug prinsipyo nga makatabang aron molampos ang kaminyoon.

Niining artikuloha

• Unsa ang mga sukdanan sa Diyos alang sa kaminyoon?

• Unsay giingon sa Bibliya bahin sa panagbulag ug diborsiyo?

• Kinahanglan bang legal nga marehistro ang kasal aron uyonan sa Diyos?

• Unsang papel ug responsibilidad ang gihatag sa Bibliya sa bana ug asawa?

• Nagsugo ba ang Diyos nga angay gyong manganak ang mga magtiayon karon?

• Sa unsang paagi makatabang ang Bibliya sa among kaminyoon?

• Mga teksto sa Bibliya bahin sa kaminyoon

Sukad pa sa sinugdan, gihimo sa Diyos ang kaminyoon ingong panaghiusa sa usa ka lalaki ug usa ka babaye. (Genesis 2:24) Wala uyoni sa Diyos ang poligamiya, homoseksuwalidad, o pag-live in. (1 Corinto 6:9; 1 Tesalonica 4:3) Gitudloan ni Jesus ang iyang mga sumusunod nga sundon ang orihinal nga sukdanan sa Diyos alang sa kaminyoon.—Marcos 10:6-8.

Para sa Diyos, permanente ang kaminyoon. Dihang kaslon ang usa ka lalaki ug usa ka babaye, manaad sila nga magmaunongon sa usag usa ug mag-uban samtang silang duha buhi. Gidahom sa Diyos nga tumanon nila ang maong panaad.—Marcos 10:9.

Duna tingali mga panahon nga dili magkauban ang bana ug asawa, sama pananglitan dihang ang usa mobiyahe tungod sa emerhensiya sa pamilya. Pero wala dasiga sa Bibliya ang panagbulag tungod sa mga problema sa magtiayon. Hinuon, gidasig niini ang mga magtiayon nga sulbaron ang ilang problema.—1 Corinto 7:10.

Ang pagpanapaw mao lang ang Kasulatanhong basehanan sa diborsiyo. (Mateo 19:9) Busa kon dili pagpanapaw ang hinungdan sa panagbulag o pagdiborsiyo sa bana ug asawa, pareho silang dili gawasnon nga makig-date o magminyo pag-usab sumala sa Bibliya.—Mateo 5:32; 1 Corinto 7:11.

Gidahom sa Diyos nga sundon sa mga Kristohanon ang mga balaod sa gobyerno bahin sa kaminyoon. (Tito 3:1) Kon posible nga iparehistro sa magtiayon ang ilang kaminyoon ug ila kining gihimo, gipakita nila nga ilang gitahod ang sekular nga mga awtoridad ug ang sukdanan sa Diyos nga ang kaminyoon maoy permanenteng relasyon.a

• Responsibilidad sa magtiayon. Kinahanglang higugmaon ug tahoron sa magtiayon ang usag usa. (Efeso 5:33) Kinahanglan nilang ihatag ang seksuwal nga panginahanglan sa usag usa sa mahigugmaong paagi ug likayan ang tanang matang sa pagluib. (1 Corinto 7:3; Hebreohanon 13:4) Kon duna silay mga anak, responsibilidad nilang duha ang pagpadako kanila.—Proverbio 6:20.

  

  Wala idetalye sa Bibliya kon unsaon pagbahin sa mga magtiayon ang sekular nga trabaho ug mga buluhaton sa balay. Silay modesisyon kon unsay kinamaayohan alang sa ilang pamilya.

• Ang papel sa bana. Ang Bibliya nag-ingon nga “ang bana maoy ulo sa iyang asawa.” (Efeso 5:23) Nagpasabot ni nga angay niyang giyahan ang iyang pamilya ug kinahanglan siyang mohimog mga desisyon alang sa kaayohan sa iyang asawa ug mga anak.

  

  Angay niyang paneguroon nga matagan-an ang ilang pisikal, emosyonal, ug espirituwal nga mga panginahanglan. (1 Timoteo 5:8) Ikapakita niya nga iyang gipabilhan ang mga hiyas ug katakos sa iyang asawa pinaagi sa pagpakigtinabangay kaniya ug pagkonsiderar sa iyang opinyon ug pagbati dihang mohimog mga desisyon. (Proverbio 31:11, 28) Ang Bibliya nag-ingon nga angayng himoon sa bana ang iyang mga responsibilidad sa mahigugmaong paagi.—Colosas 3:19.

• Ang papel sa asawa. Ang Bibliya nag-ingon nga “ang asawa angay nga dunay dakong pagtahod sa iyang bana.” (Efeso 5:33) Malipay ang Diyos kon tahoron sa asawa ang papel nga gihatag Niya ngadto sa iyang bana.

  

  Ang papel sa asawa mao ang pagtabang sa iyang bana sa paghimog maayong desisyon ug pagpaluyo sa pagkaulo niini. (Genesis 2:18) Gidayeg sa Bibliya ang asawa nga nagtuman sa iyang importanteng papel sa kaminyoon.—Proverbio 31:10.

Wala. Sa una, gisugo sa Diyos ang pipila niya ka magsisimba nga manganak. (Genesis 1:28; 9:1) Pero kini nga sugo dili mapadapat sa mga Kristohanon. Wala sugoa ni Jesus ang iyang mga sumusunod nga manganak. Ug wala sab mag-ingon ang iyang mga tinun-an sa una nga ang mga magtiayon angayng manganak. Nagdepende sa magtiayon kon gusto ba nilang manganak o dili.

Dunay mga prinsipyo sa Bibliya nga makatabang sa magtiayon aron maayo ang sinugdanan sa ilang kaminyoon. Ang mga prinsipyo sa Bibliya makatabang sab aron malikayan o maatubang ang mga problema sa kaminyoon.

Ang mga prinsipyo sa Bibliya makatabang sa magtiayon sa …

• pagpakitag tinuod nga gugma.—1 Corinto 13:4-7; Colosas 3:14.

• pagsinabtanay bisan pa sa mga kalainan.—1 Corinto 10:24.

• pagkahimong maayong tigpaminaw.—Santiago 1:19.

• pagpakitag pagtahod.—Roma 12:10.

• pagpasaylo.—1 Pedro 4:8.

• pagpabiling maunongon.—Marcos 10:9.

• pagpakitag pailob.—Efeso 4:2, 3.

• pagtinabangay.—Ecclesiastes 4:9.

• pagtuman sa ilang panaad.—Awit ni Solomon 8:7.