Labaw ba ang Imong Personal nga Opinyon?

“BAG-ONG Iglesya Nabahin Mahitungod sa mga Paring Bayot,” matud sa pangunang-ulohan. Ang balita mipadayon sa pagyagyag sa dulot nga mga pagkabahin sa Iglesya sa Inglaterra mahitungod sa suliran sa homoseksuwal o bayot nga mga pari.

“Adunay usa ka dapit sa iglesya alang sa mga homoseksuwal,” mao ang pangangkon sa ministrong nagdumala sa pagpanguhag klero sa iglesya. Sa iyang hunahuna, ang usa ka homoseksuwal nga ‘matinud-anon ug kasaligan’ sa iyang relasyon uban sa laing lalaki may katungod nga ordinahan.

“Ang nagapraktis homoseksuwal nga klero maoy makasasala ug kinahanglang moluwat” mao ang katugbang nga pagtuo sa usa ka rektor sa simbahan. Gibati niya nga ang mga klerigo kinahanglang sulundan sa tanan nilang moral nga kagawian.​—The Sunday Times, London, Nobyembre 8, 1987.

Pihong ang matag usa niining mga tawhana kombinsidong husto ang iyang opinyon. Apan ang personal bang opinyon angay mao ang kataposang awtoridad sa mga butang nga bililhon? Tingali moingon kang oo, kay nagtuo nga “ang matag usa may katungod sa iyang kaugalingong opinyon.”

Bisan pa niana, tagda kining duha ka inspiradong pahayag sa Bibliya: “Busa, tinguhaon nato ang mga butang nga madaiton ug ang mga butang makapalig-on sa usag usa.” “Karon ako nagaawhag kaninyo, mga igsoon, . . . nga kamong tanan magasulting may panaghiusa, ug walay pagkabahinbahin sa inyong taliwala, kondili kamo magkahiusa unta sa samang kaisipan.”​—Roma 14:19; 1 Corinto 1:10.

Busa, unsa man kon ikaw, ingong Kristohanon, malisdan nga mouyon sa Kristohanong kongregasyon bahin sa usa ka hinungdanong butang? Unsaon nimo kana pagsagubang aron mahuptan ang bililhong pakigdait ug panaghiusa sa kongregasyon?​—Mateo 5:9; 1 Pedro 3:11.

Tagda ang usa ka kahimtang nga naugmad sa unang-siglong Kristohanong kongregasyon sa dihang isipon sa pipila nga labaw ang ilang personal nga opinyon. Tan-awa kon sa unsa misangpot kadto sa kataposan ug suknaa ang imong kaugalingon: ‘Unsa kahay akong buhaton kon didto pa ako?’

Mga Suliran Mahitungod sa Sirkunsisyon

Niadtong 36 K.P. ang dili-sinirkunsidahang mga Hentil unang gidawat sa Kristohanong kongregasyon. Bisan tuod naandam sa Diyos si apostol Pedro alang sa maong kulbahinam nga hitabo, si Pedro ug kadtong nag-uban kaniya natingala sa pagkakitang ang balaang espiritu gibubo diha sa dili-sinirkunsidahang katawhan. (Buhat 10:1-16, 34-48) Daghang ubang Hudiyong Kristohanon nalisdan sa pagsabot niadto. Ngani, ang pila ka Hudiyong Kristohanon, “mga tigpaluyo sa sirkunsisyon,” nagsaway kang Pedro tungod sa pagpakig-uban sa mga tawong dili sinirkunsidahan.​—Buhat 11:2, 3.

Nganong kadtong mga nanaway nabalisa? Kay sulod sa halos 2,000 ka tuig, ang sirkunsisyon maoy usa ka ilhanan sa espesyal nga relasyon uban sa Diyos. Sa gisugo ni Jehova nga Diyos si Abraham nga magpasirkunsisyon ang tanang lalaki sa iyang panimalay, Siya miingon: “Kini magaalagad nga usa ka ilhanan sa pakigtugon tali kanako ug kaninyo . . . sa panahong walay katinoan.” (Genesis 17:10-13) Daghang kasiglohan sa ulahi, ang sirkunsisyon hinungdanon gihapon kaayo alang sa mga Hudiyo. Daghan kanila mibating ang pagkawalay sirkunsisyon nagkahulogan sa pagkahugaw. (Isaias 52:1) Gibati nila nga ang balaang katawhan sa Diyos dili makiglabot sa mahugaw, walay-sirkunsisyong mga Hentil.

Sa 49 K.P. si apostol Pablo giatubang didto sa Siryanhong Antioquia sa pipila sa maong “mga tigpaluyo sa sirkunsisyon.” Sa pagkatapos sa una niyang misyonaryong panaw, gitaho niya sa kongregasyon didto sa unsang paagi ang Diyos “nag-abli alang sa [walay-sirkunsisyon] nga mga nasod sa pultahan sa pagtuo.” Daw tin-aw alang kaniya nga dili na kinahanglang sirkunsidahan ang maong mga tawo sa kanasoran. Ugaling, ang pila ka lalaki gikan sa Judea may lahing hunahuna. “Gawas nga kamo magpasirkunsisyon sumala sa batasan ni Moises,” sila nagpatuo, “kamo dili maluwas.” Gibati nila nga ang sirkunsisyon kinahanglan sa kaluwasan ug ang tanang Hentil nga mga nakabig sa Kristiyanidad magpasirkunsisyon.​—Buhat 14:26–​15:1.

Ang kusog nga mga pagbati nalangkit. Pihong sila nakagamit ug makapahaylo nga mga katarongan sa pagpaluyo sa ilang hunahuna. Giunsa paghupot ang pakigdait ug panaghiusa sa kongregasyon? Tapos nga hisgotig maayo ang ulohan, ang kongregasyon sa Antioquia “naghikay nga si Pablo ug si Bernabe ug ang pipila nga uban kanila moadto sa mga apostol ug sa mga ansiano sa Jerusalem mahitungod sa maong panaglalis.” (Buhat 15:2) Walay timailhan nga sa butang nga maugdang kaayo, ang matag usa may katungod sa iyang kaugalingong opinyon. Ang maong mga Kristohanon nagbaton ug igong pagpaubos ug kamaunongon sa teokratikanhong kahikayan aron mangitag mabulot-anong desisyon gikan sa ilang sentrong nagatudlong lawas.​—1 Corinto 14:33, 40; Santiago 3:17, 18; 1 Pedro 5:5, 6.

Nahimo ang Usa ka Desisyon

Ang mga apostoles ug ang mga ansiano sa Jerusalem (dayag giila nga usa ka nagmandong lawas sa unang Kristohanong kongregasyon) mabinantayong nagsusi sa dinasig-sa-espiritung Kasulatan ug nagsubli giunsa sa balaang espiritu sa pagdumala ang mga butang latas sa nangaging 13 ka tuig. Ilang desisyon? Alang sa Hentil nga mga nakabig, ang sirkunsisyon dili na kinahanglan sa kaluwasan. (Buhat 15:6-29) Diha ang usa ka tin-awng lagda nga nagpuli sa personal nga opinyon.

Ang mga kongregasyon nga nagtuman sa maong giya “nagpadayon nga nalig-on sa pagtuo ug nagdaghan sa adlaw-adlaw.” (Buhat 16:4, 5) Hinuon, ang pipila ka tawo wala modawat sa desisyon sa nagmandong lawas. Sila kombinsido gihapon nga husto ang ilang opinyon ug ang pagsunod sa Moisesnong Kasugoan kinahanglan alang sa kaluwasan. Unsa kahay imong himoon? Sila nahimong peligroso, makapabahin nga impluwensiya taliwala sa mga Kristohanon. Tan-awa ang tambag nga gihatag ni apostol Pablo latas sa sunod 15 ka tuig samtang gipaningkamotan niya ang pagpanalipod sa matinumanong mga Kristohanon batok sa impluwensiya sa maong gahig hunahuna nga mga tawo.

Galacia, Asia Minor, c. 50-52 K.P. Ang kagawasan nga naangkon sa mga Kristohanon pinaagi sa halad ni Jesu-Kristo nameligro. Ang kahadlok sa paglutos pinaagi sa Hudiyong mga kaaway naghimo nga ang pila ka Kristohanon buot magpatuman sa mga ideya gikan sa Moisesnong Kasugoan diha sa kaubang mga Kristohanon. (Galacia 6:12, 13) Gipahinumdoman ni apostol Pablo ang mga tinun-an nga ang pagtuman sa maong Hudiyong mga batasan sama sa sirkunsisyon maoy pagtugot nga sila “mayugohan na usab sa yugo sa pagkaulipon.” Sanglit sila mga makasasala, walay mausa kanila ang makatuman sa Kasugoan sa hingpit, mao nga sila ginatunglo sa Kasugoan, sama ra sa mga Hudiyo. Ang halad lamang ni Jesus ang makahimo nilang hinlo ug makaluwas kanila. “Kon kamo masirkunsidahan [ug niana maobligar sa pagtuman sa tibuok nga Kasugoan],” matud ni Pablo, “si Kristo mawalay kapuslanan alang kaninyo.”​—Galacia 5:1-4; Buhat 15:8-11.

Corinto, Gresya, c. 55 K.P. Ang mga katarongan mahitungod sa sirkunsisyon nagbahin sa kongregasyon. Nasayod si Pablo nga ang sirkunsisyon sa kaugalingon dili sala. Kadto nahimong bahin sa hingpit nga Kasugoan sa Diyos. (Salmo 19:7; Roma 7:12) Si Pablo naghikay gani nga ang iyang batan-ong kauban si Timoteo (kansang inahan Hudiya) masirkunsidahan. Gihimo kadto ni Pablo, dili tungod kay kadto obligado, kondili kay dili niya buot nga hatagan ang mga Hudiyo ug hinungdan nga mapandol mahitungod sa maayong balita. (Buhat 16:3) Gidasig niya ang mga Kristohanon nga molikay nga malanggikit sa makasamok nga mga panaglantugi. “May tawo ba nga sinirkunsidahan sa pagtawag kaniya?” siya nangutana. “Dili siya magpakawalay-sirkunsisyon. May tawo ba nga walay sirkunsisyon sa pagtawag kaniya? Dili siya magpasirkunsisyon [nga maghunahunang kadto hinungdanon sa kaluwasan].” Ang hinungdanong butang mao ang pagsugot sa tin-awng mga sugo sa Diyos, apil kadtong naggikan sa Kristohanong kongregasyon.​—1 Corinto 7:18-20; Hebreohanon 13:17.

Filipos, Gresya, c. 60-61 K.P. Kadtong mibati nga ang mga Kristohanon kinahanglan gihapong magtuman sa Hudiyonhong Kasugoan nagpadayon sa dili pagpanumbaling sa tin-awng ebidensiya nga si Jehova nagpanalangin sa Kristohanong kongregasyon, nga karon nag-apil sa daghang walay-sirkunsisyong mga magtutuo. Kadtong nagpaluyo sa sirkunsisyon nagpahinabog espirituwal nga kadaot sa uban pinaagi sa pagduso sa ilang personal nga mga opinyon. Busa, ang sinultihan ni apostol Pablo sa maong panahon may pagkasakit na: “Pagbantay kamo sa mga iro [giisip sa mga Hudiyo nga mahugaw sa seremonyal nga paagi], pagbantay kamo sa mga magbubuhat sa kadaot, pagbantay kamo niadtong nagasamadsamad sa unod.”​—Filipos 3:2.

Creta, c. 61-64 K.P. Gibilin ni apostol Pablo si Tito aron sa pagdumala sa buluhaton sa mga Kristohanon sa Creta. Makaiikag, ang dili-Hudiyong si Tito wala mapugos nga magpasirkunsisyon. (Galacia 2:3) Karon gitugon ni Pablo si Tito nga magmalig-on batok sa mga kaaway sa kamatuoran, nga nahimong ingon ang maong mga tigpasiugda sa sirkunsisyon. Angay pa silang ipalagpot gikan sa kongregasyon kon mopadayon sila sa pagsangyaw sa ilang makapabahing personal nga mga opinyon. Siya namulong mahitungod sa “mga tawong masukihon, walay-kapuslanan nga mga tabian, ug mga maglilimbong sa hunahuna, ilabina kadtong mga tawo nga nagasunod sa sirkunsisyon,” ug nagpadayon: “Kinahanglang tak-omon ang mga baba niini nila, kay kining mga tawhana mismo nagapadayon sa pagpukan sa tibuok nga mga panimalay pinaagi sa pagtudlog mga butang nga dili angay unta.”​—Tito 1:10, 11; 3:10, 11; 1 Timoteo 1:3, 7.

Makapasubo kaayong mga sangpotanan! Ang maong mga tawo magarbohon kaayo sa ilang personal nga mga opinyon nga gisalikway nila ang pagtultol sa Kristohanong kongregasyon, nagpukan sa pagtuo sa uban, ug nagdaot sa ilang maayong relasyon uban sa Diyos.​—Itandi ang Numeros 16:1-3, 12-14, 31-35.

Unsay Imong Buhaton?

Makalikay ba kita sa pagbuhat sa samang sayop karong adlawa? Oo, kon sa sinugdan atong tinoon nga ang atong personal nga opinyon dili mosumpaki sa tin-awng pagtulon-an sa Bibliya. Pananglitan, bahin sa homoseksuwalidad, ang Bibliya nagaingon: “Ang mga mahilayon sa sekso . . . ni ang mga bayot . . . dili magapanunod sa gingharian sa Diyos.” (1 Corinto 6:9, 10, New International Version) Apan, sa dihang ang Kasulatanhong direksiyon o mando alang kanato daw bukas sa lainlaing mga opinyon, kinahanglang atong ipasundayag ang mapaubsanong pagsanong nga gipakita sa unang mga Kristohanon ug dawaton ang mga hukom ug mga mando gikan sa kongregasyon sa Diyos. Sa kataposan, bisan sa mga bahin nga niana ang usa ka butang sa Kasulatanhon dili husto o sayop apan anaa lamang sa personal nga hukom, angay natong pabilhan pag-ayo ang pakigdait sa uban, sa ingon subsob nga andam mopahiuyon.

Andam ka bang mopadayag nianang espirituha? Kon mao, ikaw nagapakitag maayong salabotan sa katimbang, kay nagaila nga ang pakigdait ug panaghiusa labi pang bililhon kay sa imong personal nga opinyon.