Kinabuhi ug Ministeryo ni Jesus
Kataposang mga Pagpakita, ug Pentekostes 33 K.P.
SA USA ka panahon gihikay ni Jesus nga ang tanang 11 sa iyang mga apostoles makigtagbo kaniya sa usa ka bukid sa Galilea. Lagmit gisultihan ang ubang mga tinun-an mahitungod sa tigom, ug nagkatigom ang katibuk-ang gidaghanon nga kapin sa 500 ka tawo. Pagkamalipayon kadtong kombensiyona sa mipakita si Jesus ug misugod sa pagtudlo kanila!
Apil sa ubang mga butang, gisaysay ni Jesus ngadto sa dakong panon nga siya gihatagan sa Diyos sa tanang pagbulot-an sa langit ug sa yuta. “Busa, panlakaw kamo,” siya miawhag, “ug paghimog mga tinun-an sa katawhan sa tanang nasod, nga magabawtismo kanila diha sa ngalan sa Amahan ug sa Anak ug sa balaang espiritu, nga magatudlo kanila sa pagbantay sa tanang butang nga akong gisugo kaninyo.”
Hunahunaa ra kana! Mga lalaki, mga babaye, ug mga bata ngatanan nagdawat sa mao mismong sugo nga moapil sa buluhaton sa paghimog tinun-an. Mosulay ang mga magsusupak sa pagpahunong sa ilang pagwali ug pagtudlo, apan gilipay sila ni Jesus: “Tan-awa! Ako magauban kaninyo sa tanang adlaw hangtod sa konklusyon sa sistema sa mga butang.” Si Jesus nagpabiling uban sa iyang mga sumusunod pinaagi sa balaang espiritu, aron sa pagtabang kanila sa pagtuman sa ilang ministeryo.
Si Jesus mipakita sa iyang kaugalingon nga buhi ngadto sa iyang mga tinun-an sulod sa yugtong 40 ka adlaw human sa iyang pagkabanhaw. Panahon sa maong mga pagpakita, iyang gitudloan sila mahitungod sa Gingharian sa Diyos, ug iyang gipasiugda kon unsa ang ilang mga responsabilidad ingong iyang mga tinun-an. Sa usa ka okasyon siya mipakita pa ngadto sa iyang igsoon sa inahan nga si Santiago ug gikombinsir ang maong kaniadto dili-magtutuo nga Siya mao gayod ang Kristo.
Samtang ang mga apostoles didto pa sa Galilea, si Jesus dayag nagsugo kanila sa pagbalik sa Jerusalem. Sa nakigtagbo kanila didto, siya miingon kanila: “Ayaw kamo pagpahawa sa Jerusalem, apan magpadayon sa paghulat sa gisaad sa Amahan, nga inyong nadungog gikan kanako; tungod kay si Juan, sa pagkamatuod, nagbawtismo kaninyo sa tubig, apan kamo pagabawtismohan sa balaang espiritu dili na daghang adlaw gikan karon.”
Sa ulahi si Jesus nakigkita na usab sa iyang mga apostoles ug gidala sila sa gawas sa siyudad abot sa Betania, nga nahimutang sa silangang bakilid sa Bukid sa mga Olibo. Katingad-anan, bisan pa sa tanan nga iyang gisulti bahin sa iyang duol nang pagbiya aron moadto sa langit, nagtuo gihapon sila nga ang iyang Gingharian pagatukoron sa yuta. Busa sila nangutana: “Ginoo, imo bang ipasig-uli ang gingharian sa Israel karong panahona?”
Inay nga mosulay sa pagtul-id na usab sa ilang sayop nga mga pagtuo, si Jesus yanong mitubag: “Dili inyo ang pagkahibalo sa mga panahon o mga kapanahonan nga gimbut-an sa Amahan.” Dayon, sa pagpasiugda na usab sa buluhaton nga ilang pagabuhaton, siya miingon: “Kamo magadawat ug gahom inig-abot sa balaang espiritu diha kaninyo, ug kamo mahimong mga saksi ko sa Jerusalem ug sa tibuok Judea ug Samaria ug sa kinalay-ang bahin sa yuta.”
Samtang sila nagtan-aw pa, si Jesus misugod sa pagkayab sa langit, ug dayon gitabonan siya sa panganod gikan sa ilang panan-aw. Tapos sa paghukas sa iyang unodnong lawas, siya misaka ngadto sa langit ingong usa ka espiritung persona. Samtang ang 11 nagpadayon sa pagsud-ong sa langit, 2 ka tawo nga nagsul-ob ug puting biste mipakita sa ilang tapad. Ang maong materyalisadong mga manulonda nangutana: “Mga tawo sa Galilea, nganong kamo nagabarog nga nagtan-aw sa langit? Kining Jesus nga gidawat gikan kaninyo ngadto sa langit sa samang paagi moanhi sama sa inyong nakita nga siya mipaingon sa langit.”
Ang paagi sa bag-o pang pagbiya ni Jesus sa yuta mao nga walay paghugyaw sa publiko ug ang iya lang matinumanong mga sumusunod ang nakakita. Busa mobalik siya sa samang paagi—nga walay paghugyaw sa publiko ug ang iya lang matinumanong mga sumusunod ang makasabot nga siya nahibalik ug nagsugod sa iyang presensiya diha sa gahom sa Gingharian.
Ang mga apostoles karon midulhog sa Bukid sa mga Olibo, mitabok sa Walog sa Kidron, ug misulod na usab sa Jerusalem. Sila nagpabilin didto sa pagkamasinugtanon sa sugo ni Jesus. Napulo ka adlaw sa ulahi, sa Hudiyonhong Piyesta sa Pentekostes 33 K.P., samtang mga 120 sa mga tinun-an nagtigom sa usa ka itaas nga lawak sa Jerusalem, ang kasaba nga sama sa mihuros kusog nga hangin kalit milukop sa tibuok nga balay. Ang mga dila nga samag kalayo nadayag, ug ang usa mipatong sa matag usa niadtong diha, ug ang mga tinun-an ngatanan misugod sa pagsultig lainlaing mga pinulongan. Kini mao ang pagbubo sa balaang espiritu nga gisaad ni Jesus! Mateo 28:16-20; Lucas 24:49-52; 1 Corinto 15:5-7; Buhat 1:3-15; 2:1-4.
◆ Kinsay gihatagan ni Jesus ug panamilit nga mga instruksiyon didto sa usa ka bukid sa Galilea, ug unsa ang maong mga instruksiyon?
◆ Unsang paglipay ang gitagana ni Jesus alang sa iyang mga tinun-an, ug sa unsang paagi siya magpabilin nga uban kanila?
◆ Unsang gidugayon tapos sa iyang pagkabanhaw nga si Jesus mipakita ngadto sa iyang mga tinun-an, ug unsay iyang gitudlo kanila?
◆ Kang kinsang tawhana, nga lagmit dili pa usa ka tinun-an una pa sa kamatayon ni Jesus, nagpakita si Jesus?
◆ Unsang duha ka kataposang pakigtagbo ang nabatonan ni Jesus uban sa iyang mga apostoles, ug unsay nahitabo sa maong mga okasyon?
◆ Sa unsang paagi nga si Jesus mobalik sa samang paagi sa iyang pagbiya?
◆ Unsay nahitabo sa Pentekostes 33 K.P.?