Kapitulo 13
Ang “Prinsipe sa Pakigdait” Mibali Ngadto Niadtong Anaa sa Gawas sa Bag-ong Pakigsaad
ANG natural nga mga Hudiyo karon, kadtong mga kaliwat sa unod sa patriarkang si Abraham, dili makalimod nga ang daang pakigsaad sa Moisesnong Kasugoan gipulihan ug bag-o ug labi pa ka maayong pakigsaad. Sila dili makapapas gikan sa ilang mga manuskrito sa Hebreohanong Kasulatan sa mga pulong sa Diyos diha sa Jeremias 31:31: “Tan-awa! Ang mga adlaw moabot na,’ nagaingon si Jehova, ‘ug ako magabuhat ug usa ka bag-ong pakigsaad uban sa balay sa Israel, ug uban sa balay sa Juda.’”
2 Wala gitagna ni Jeremias kon kinsa ang tigpataliwala nianang bag-ong pakigsaad. Apan sa gabii sa Nisan 14, 33 K.P., dihang gitunol ni Jesus ang kopa sa bino sa Paskua sa iyang mga disipulo, siya nagpakita nga siya mao ang Tigpataliwala. (Lucas 22:20) Diha sa Hebreohanon 7:22 kita gisultihan nga siya mao ang “pasalig,” seguridad, kun garantiya, sa bag-o ug “labi pa ka maayong pakigsaad.”
3 Pinaagi sa iyang halad alang sa bag-ong pakigsaad, si Jesus nahimong Hataas nga Saserdote ni Jehova. Siya wala mahimong saserdote pinaagi sa pagkahimong natural nga kaliwat gikan kang Aaron, ang unang hataas nga saserdote sa Israel. Siya gipanumpa sa katungdanan sa Hataas nga Saserdeote pinaagi sa Labing Hataas nga Diyos, si Jehova, ang Tighimog-Saserdote. Ang mga pulong sa Salmo 110:4 aplikado kang Jesus: “Si Jehova nanumpa (ug siya dili magbasol): ‘Ikaw mao ang saserdote sa walay kataposan sumala sa paagi ni Melchisedek!’”—Hebreohanon 7:20, 21.
4 Walay labot sa gamayng nanghibilin, ang nasod sa natural nga Israel misalikway kang Jesu-Kristo ingong Tigpataliwala sa bag-ong pakigsaad. Busa “ang balay sa Israel” nga bahin kanila nanagna si Jehova ug bag-ong pakigsaad nakitang usa ka espirituwal nga Israel, “ang Israel sa Diyos.” (Galacia 6:16) Ang espirituwal nga Israel gipanganak sa adlaw sa Pentekostes, sa 33 K.P. Sanglit espirituwal, kini nagapasulod ingong iyang mga lungsoranon ug dili mga Hudiyo, o mga Hentil. (Buhat 15:14) Gitawag ni Pedro kini nga “kaliwatan nga pinili, ang kahugpongan sa harianong mga saserdote, ang nasod nga balaan, ang katawhan alang sa linain nga kabtangan.” (1 Pedro 2:9) Kining “nasod nga balaan” gilangkoban sa espirituwal nga mga anak sa Mas Dakong Abraham, si Jehova, ang Maghihimo ug Magtutuman sa Abrahamikong pakigsaad. Busa, sila sa samang panahon mao ang “mga anak” sa samag-asawa langitnong organisasyon ni Jehova, nga gihulagwayan ni Sarah, nga asawa ni Abraham. Dili-malikayan, ang bag-ong pakigsaad sa Mas Dakong Abraham naglantaw sa langitnong organisasyon ingong inahan sa gisaad nga “binhi,” nga gilarawanan ni Isaac.
“Ubang mga Karnero” Lakip sa Usa ka Panon
5 Kanang bag-ong pakigsaad nagkinahanglan ug aktibong mga ministro dinhi sa yuta, ug ang mga sakop sa dinihogang nanghibilin nag-alagad ingong kuwalipikadong “mga ministro sa bag-ong pakigsaad” nga mipuli sa daang pakigsaad sa Moisesnong Kasugoan. (2 Corinto 3:6) Sila dili mga klero nga ministro sulod sa ginatos ka relihiyosong mga sekta sa Kakristiyanohan, ang inilang bahin sa modernong-adlawng Babilonyang Bantogan. Sila namati sa masugoong panawag sa Pinadayag 18:4 ug migula nianang kalibotang imperyo sa bakak nga relihiyon.
6 Ang gidaghanon sa mga ministro nianang bag-ong pakigsaad limitado sa 144,000. (Pinadayag 7:1-8; 14:1-5) Busa miabot ang panahon dihang ang Maayong Magbalantay mibali sa iyang pagtagad saylo pa sa mga ministro sa bag-ong pakigsaad. Nakitang daan kini sa Pangulong Ministro ni Jehova ug nagpunting kanila dihang siya miingon, diha sa Juan 10:16, nga siya adunay “ubang mga karnero,” nga dili sakop sa “gamayng panon” sa 144,000.—Lucas 12:32.
7 Bisan ug dili sakop ang “ubang nga karnero” sa “gamayng panon,” sila mahimong mga ministro sa Diyos, usab, apan dili mga ministro sa bag-ong pakigsaad. Ug ang kamatuoran nga kadtong “ubang mga karnero” mahimong “usa ka panon” uban sa nanghibilin niadtong “mga ministro sa bag-ong pakigsaad” nagpaila ug usa ka dakong butang. Unsa? Kini: Sa dili pa himayaon sa langitnong Gingharian, ang nanghibilin mismo nagapakig-uban sa “ubang mga karnero” dinhi sa yuta. Niining paagiha ang nanghibilin sa espirituwal nga kaliwat ni Abraham magsugod sa pagpanalangin sa tanang mga pamilya ug mga kansoran sa dili pa “ang gubat sa dakong adlaw sa Diyos nga Labing Makagagahom” sa Armageddon ug sa dili pa magsugod ang Milenyo.—Galacia 3:29; Pinadayag 16:14, 16.
8 Mao gayod kini ang nahitabo ilabina sukad sa 1935. Sukad niadto, milyonmilyon sa “ubang mga karnero” nakig-uban sa tinagpulo ka libong mga kongregasyon sa mga Saksi ni Jehova sa tibuok yuta ug nagpahinungod sa ilang kaugalingon sa Labing Labawng Magbalantay, si Jehova nga Diyos. Busa sila gidawat ngadto sa “usa ka panon” sa Maayong Magbalantay, si Jesu-Kristo.
9 Ang kamatuoran ba nga ang Tigpataliwala sa bag-ong pakigsaad, nga sukad niadto, nagpadako sa iyang pagtagad nga nagalakip usab sa “ubang mga karnero” nagkahulogan nga ang ministeryo sa bag-ong pakigsaad natapos sa 1935? Dili, kay aduna gihapoy nanghibiling mga ministro sa bag-ong pakigsaad dinhi sa yuta, ug kinahanglang taposon nila kanang ministeryoha.
10 Karon, ang nanghibilin sa “gamayng panon” ug ang nagkadaghang “dakong panon” sa “ubang mga karnero” sa Maayong Magbalantay nakapahimulos sa ministeryo sa uban nga nag-una kanila, sama kang apostol Pablo. Sa pagtuman sa iyang ministeryo sa bag-ong pakigsaad sa matinumanon hangtod sa iyang kamatayon sa Roma sa wala pa malaglag ang Jerusalem sa 70 K.P., si Pablo gidasig sa pagsulat ug 14 sa 27 ka basahon sa Kristohanon Gregong Kasulatan. Pagkadako sa pasalamat sa matinumanong nanghibilin ug sa “dakong panon” sa “ubang mga karnero” nga ang matinumanong mga tawo sa unang siglo, sama kang apostol Pablo ug sa pito pa ka magsusulat sa Kristohanon Gregong Kasulatan, nagtuman sa ilang ministeryo sa bag-ong pakigsaad hangtod sa kataposan sa ilang yutan-ong mga kinabuhi! Ug sa atong panahon, milyonmilyon sa “ubang mga karnero” nakapahimulos na gikan sa ministeryo sa bag-ong pakigsaad, nga gihimo pinaagi sa dinihogang nanghibilin ilalom sa Tigpataliwala, si Jesu-Kristo. Ang “Prinsipe sa Pakigdait” karon mibali sa iyang pagtagad ngadto niining minahal nga “ubang mga karnero,” nga diin kusog kaayo ang pagtubo sa gidaghanon.
11 Apan, hapit nang matapos ang panahon! Ang bag-ong pakigsaad naglihok sulod na sa 1,935 ka tuig, nga labaw ug 407 ka tuig kay sa pakigsaad sa Moisesnong Kasugoan nga mipuli niini, ug ang gidaghanon sa mga ministro sa pakigsaad nagkadiyutay samtang ang mga sakop niini nangahanaw sa talan-awon sa yuta diha sa kamatayon. Apan ang mga nanghibilin karon niadtong mga ministro nagapadayon sa pag-alagad ingong “matinumanon ug maalamong ulipon” nga gitudlo sa Agalon, si Jesu-Kristo, “ibabaw sa tanan niyang katigayonan.”—Mateo 24:45-47.
Pagtanyag sa Imbitasyon: “Umari Ka!”
12 Unsa ka mahigugmaong pag-alagad ang gihatag sa mga ministro sa bag-ong pakigsaad! Pananglitan, diha sa Pinadayag 22:17 atong mabasa: “Ang espiritu ug ang pangasaw-onon nagaingon: ‘Umari ka!’ Ug siya nga nagapatalinghog paingna: ‘Umari ka!’ Ug giuhaw paingna umari ka; ang may tinguha paimna sa walay bayad nga tubig nga nagahatag kinabuhi.” Ang “pangasaw-onon” nga matang, uban sa aktibong gahom ni Jehova, kun espiritu, nagatanyag nianang imbitasyona ngadto niadtong anaa sa gawas sa bag-ong pakigsaad. Gitanyag ang imbitasyon, dili ngadto sa mga patay na karon diha sa handumanang mga lubnganan nga pagapanalanginan ug pagkabanhaw gikan sa mga patay, kondili sa mga tawo karon nga buhi, nga nameligro nga malaglag sa Armageddon apan adunay mapatalinghogong mga dalunggan.
13 Dili kay walay kapuslanan kining mahigugmaong imbitasyon nga gitanyag ngadto sa tibuok-kalibotan ilabina sukad sa 1935. Kapin sa tulo ka milyon ang misanong na sa malulutong imbitasyong umari ka ug uminom. Sama niadtong mapabilhong mipatalinghog, sila masinundanong nagapahayag sa minilyon pang giuhaw sa walay-kataposang kinabuhi sa paraisong yuta, “Umari ka!” Apan ang panahon sa pagtanyag niining malulutong imbitasyon sa “ubang mga karnero” limitado. Tapos sa kapin sa tunga sa siglo nga pagtanyag, ang panahong nahibilin alang niini karon mubo na lang kaayo, samtang ang gubat sa Diyos sa Armageddon mahulgaong nanganawkanaw “niini nga kaliwatan” sa katawhan.—Mateo 24:34.
14 Busa, karon, salamat kang Jehova nga siya nagtaganag may katakos nga Tigpataliwala nga malamposong nakatuman sa katuyoan sa bag-ong pakigsaad ug sa pagpatunghag 144,000 ka katawhan, alang sa Iyang ngalan! Himaya, usab, ngadto kang Jehova nga ang iyang Tigpataliwala ingong Maayong Magbalantay nagaagak na sa nagkadaghang minilyong “ubang mga karnero” ngadto sa “usa ka panon,” nga niini sila nakatagamtam na sa yutan-ong mga kaayohan nga nagaagos ngadto sa katawhan gikan sa bag-ong pakigsaad!
[Mga Pangutana nga Pagatun-an]
1. Nganong ang mga Hudiyo karon dili makalimod nga ang Moisesnong pakigsaad nga gihimo sa ilang mga kagikan natapos?
2. Sa unsang paagi gipadayag sa kataposan ang pangutana mahitungod sa kon kinsa ang Tigpataliwala sa bag-ong pakigsaad?
3. Unsang ubang katungdanan sa Diyos ang gihuptan ni Jesus-Kristo, ug pinaagi ba kadto sa linya sa kaliwat?
4. (a) Unsang matanga sa “Israel” ang gisaaran ni Jehova ug bag-ong pakigsaad, ug ngano? (b) Kadtong giagak ngadto sa bag-ong pakigsaad nahimong mga anak sa unsang mga ginikanan?
5. Unsay gikinahanglan sa bag-ong pakigsaad dinhi sa yuta?
6. (a) Ang gidaghanon sa mga ministro sa bag-ong pakigsaad limitado sa pila? (b) Sa unsang paagi nahibalo kita nga ang Maayong Magbalantay mobali sa iyang pagtagad ngadto niadtong anaa sa gawas sa bag-ong pakigsaad?
7. (a) Nganong ang mga sakop sa “ubang mga karnero” nga matang dili mga ministro sa bag-ong pakigsaad? (b) Sa unsang paagi ang nanghibilin niadtong sakop sa bag-ong pakigsaad nahimong panalangin sa mga pamilya ug kanasoran sa yuta?
8. Kanus-a mibali sa pagtagad ang Maayong Magbalantay ngadto niadtong anaa sa gawas sa bag-ong pakigsaad, ug unsang pangunang lakang ang gihimo niining “ubang mga karnero”?
9. Nagkahulogan ba ang pagdako sa pagtagad sa Tigpataliwala sa bag-ong pakigsaad nga ang ministeryo sa bag-ong pakigsaad natapos dinhi sa yuta?
10. Kinsa karon ang nakapahimulos gikan sa ministeryo sa bag-ong pakigsaad sumala sa nahimo sa walo ka magsusulat sa Kristohanon Gregong Kasulatan?
11. (a) Kanus-a nagsugod sa paglihok ang bag-ong pakigsaad, ug unsay gipakita niini? (b) Unsang kaakohan nga nag-alagad ang nanghibilin sa mga ministro sa bag-ong pakigsaad karon?
12. Sumala sa Pinadayag 22:17, unsang imbitasyon sa “pangasaw-onon” nga matang ang gitanyag, ug ngadto kang kinsa?
13. (a) Nahimo bang walay kapuslanan ang imbitasyon nga gitanyag sa “pangasaw-onon” nga matang? Ipatin-aw. (b) Unsay gihimo niadtong midawat sa imbitasyon sa pagsunod sa Pinadayag 22:17? (c) Unsay kahimtang bahin sa panahong nahibilin alang sa pagtanyag sa imbitasyon?
14. Alang sa unsa nga atong pasalamatan ug himayaon si Jehova?