Kini Mao ang Adlaw sa Kaluwasan!
“Tan-awa! Karon mao na ang panahon nga ilabinang dalawaton. Tan-awa! Karon mao na ang adlaw sa kaluwasan.”—2 CORINTO 6:2.
1. Unsay gikinahanglan aron makabaton ug inuyonang baroganan uban sa Diyos ug kang Kristo?
SI Jehova nagtakda ug usa ka adlaw sa paghukom alang sa katawhan. (Buhat 17:31) Aron mahimo kining usa ka adlaw sa kaluwasan alang kanato, nagkinahanglan kita ug inuyonang baroganan uban kaniya ug sa iyang tinudlong Maghuhukom, si Jesu-Kristo. (Juan 5:22) Ang maong baroganan nagkinahanglag panggawi nga kaharmonya sa Pulong sa Diyos ug pagtuo nga nagtukmod kanato sa pagtabang sa uban nga mahimong tinuod nga mga tinun-an ni Jesus.
2. Nganong ang kalibotan sa katawhan nahimulag sa Diyos?
2 Tungod sa napanunod nga sala, ang kalibotan sa katawhan nahimulag sa Diyos. (Roma 5:12; Efeso 4:17, 18) Busa, kadtong atong gisangyawan makabaton lamang ug kaluwasan kon sila mapasig-uli ngadto kaniya. Gitin-aw kini ni apostol Pablo sa dihang nagsulat sa mga Kristohanon sa Corinto. Susihon nato ang 2 Corinto 5:10–6:10 aron masabtan kon unsay giingon ni Pablo mahitungod sa paghukom, kapasig-ulian ngadto sa Diyos, ug kaluwasan.
“Kami Padayon nga Nangombinser sa mga Tawo”
3. Sa unsang paagi si Pablo “padayon nga nangombinser sa mga tawo,” ug nganong kinahanglan natong buhaton kini karon?
3 Gilangkit ni Pablo ang paghukom sa pagsangyaw sa dihang siya misulat: “Kinahanglan nga kitang tanan mapadayag atubangan sa lingkoranan-sa-paghukom sa Kristo, aron ang matag usa makadawat sa iyang ganti alang sa mga butang nga nabuhat pinaagi sa lawas, sumala sa mga butang nga iyang gibuhat, kini man maayo o ngil-ad. Busa, kay nahibalo man sa pagkahadlok sa Ginoo, kami padayon nga nangombinser sa mga tawo.” (2 Corinto 5:10, 11) Ang apostol ‘nagpadayon sa pagpangombinser sa mga tawo’ pinaagi sa pagsangyaw sa maayong balita. Komosta kita? Sanglit nag-atubang kita sa kataposan niining daotang sistema sa mga butang, kinahanglang buhaton nato ang atong maarangan sa pagkombinser sa uban sa paghimog mga lakang nga gikinahanglan sa pagbaton sa paborableng paghukom ni Jesus ug sa pag-uyon sa Tuboran sa kaluwasan, si Jehova nga Diyos.
4, 5. (a) Nganong dili kita angayng manghambog mahitungod sa atong mga kalamposan diha sa pag-alagad kang Jehova? (b) Sa unsang paagi si Pablo nanghambog “alang sa Diyos”?
4 Apan, kon gipanalanginan sa Diyos ang atong ministeryo kinahanglang dili kita manghambog. Sa Corinto ang uban nagmapasigarbohon sa ilang kaugalingon o sa ubang mga tawo, sa ingon nagpahinabog mga pagkabahinbahin diha sa kongregasyon. (1 Corinto 1:10-13; 3:3, 4) Nagpasabot niining kahimtanga, si Pablo misulat: “Wala kami magarekomendar pag-usab sa among kaugalingon nganha kaninyo, kundili nagahatag kaninyog pangaghat aron manghambog mahitungod kanamo, aron nga kamo adunay tubag alang kanila nga nagapanghambog labot sa panggawas nga panagway apan dili labot sa kasingkasing. Kay kon wala kami sa maayong panghunahuna, kadto maoy alang sa Diyos; kon kami mabuot sa panghunahuna, kini maoy alang kaninyo.” (2 Corinto 5:12, 13) Ang mga mapahitas-on dili interesado sa panaghiusa ug espirituwal nga kaayohan sa kongregasyon. Buot nilang manghambog sa panggawas nga panagway inay tabangan ang mga isigkamagtutuo sa pag-ugmad ug maayong mga kasingkasing atubangan sa Diyos. Busa, gibadlong ni Pablo ang kongregasyon ug sa ulahi miingon: “Siya nga nagapanghambog, papanghamboga siya diha kang Jehova.”—2 Corinto 10:17.
5 Wala ba manghambog mismo si Pablo? Ang uban tingali naghunahunag ingon niana tungod sa iyang giingon mahitungod sa pagkaapostol. Apan kinahanglan siyang manghambog “alang sa Diyos.” Nanghambog siya mahitungod sa iyang mga pamatuod ingong apostol, aron ang mga taga-Corinto dili mobiya kang Jehova. Gihimo kini ni Pablo aron mahibalik sila ngadto sa Diyos tungod kay ang bakak nga mga apostol nagpatipas kanila sa sayop nga direksiyon. (2 Corinto 11:16-21; 12:11, 12, 19-21; 13:10) Bisan pa niana, si Pablo wala maningkamot kanunay sa pagpadayeg sa tanan sa iyang mga kalamposan.—Proverbio 21:4.
Ang Gugma ba ni Kristo Nagtukmod Kanimo?
6. Sa unsang paagi ang gugma ni Kristo mag-apektar kanato?
6 Ingong matuod nga apostol, gitudloan ni Pablo ang uban mahitungod sa halad lukat ni Jesus. Kini may epekto sa kinabuhi ni Pablo, tungod kay siya misulat: “Ang gugma nga iya sa Kristo nagatukmod kanamo, tungod kay mao kini ang among gikahukom, nga ang usa ka tawo namatay alang sa tanan; busa, namatay diay ang tanan; ug siya namatay alang sa tanan aron sila nga nagakinabuhi magkinabuhi dili na alang sa ilang kaugalingon, kundili alang kaniya kinsa namatay alang kanila ug gibangon.” (2 Corinto 5:14, 15) Pagkadakong gugma ang gipakita ni Jesus sa paghatag sa iyang kinabuhi alang kanato! Tino nga angay kanang mahimong panukmod nga puwersa diha sa atong kinabuhi. Ang pagkamapasalamaton kang Jesus tungod sa paghatag niya sa iyang kinabuhi alang kanato kinahanglang magtukmod kanato sa masibotong kalihokan sa pagmantala sa maayong balita sa kaluwasan nga gitagana ni Jehova pinaagi sa iyang hinigugmang Anak. (Juan 3:16; itandi ang Salmo 96:2.) “Ang gugma nga iya sa Kristo” nagatukmod ba kanimo sa pagpakig-ambit nga masiboton sa buluhatong pagsangyaw sa Gingharian ug paghimog tinun-an?—Mateo 28:19, 20.
7. Unsay buot ipasabot sa “wala nay tawong ginaila sumala sa unod”?
7 Pinaagi sa paggamit sa ilang kinabuhi sa paagi nga nagpakitag pagkamapasalamaton sa kon unsay nahimo ni Kristo alang kanila, ang mga dinihogan ‘wala magkinabuhi alang sa ilang kaugalingon, kondili alang kaniya.’ “Tungod niana,” matod ni Pablo, “sukad karon kami wala nay tawong ginaila sumala sa unod. Bisan kon among nailhan si Kristo sumala sa unod, sa tino kami wala na karon magaila kaniya sa ingon.” (2 Corinto 5:16) Kinahanglang dili lantawon sa mga Kristohanon ang katawhan sa unodnong paagi, tingali nagpalabi sa mga Hudiyo kay sa mga Hentil o sa mga dato kay sa mga kabos. Ang mga dinihogan “wala nay tawong ginaila sumala sa unod,” kay ang ilang espirituwal nga relasyon uban sa mga isigkamagtutuo ang hinungdanon. Kadtong ‘nakaila kang Kristo sumala sa unod’ dili lamang ang mga tawo nga literal nga nakakita kang Jesus samtang dinhi siya sa yuta. Bisan pag ang ubang naglaom sa Mesiyas nag-isip kanhi kang Kristo ingong tawo lamang, dili na nila siya isipon nga ingon. Gihatag niya ang iyang lawas ingong lukat ug gibanhaw ingong nagahatag-kinabuhi nga espiritu. Ang uban nga gibanhaw ngadto sa langitnong kinabuhi magtugyan sa ilang unodnong mga lawas nga dili gayod makakita kang Jesu-Kristo sa unod.—1 Corinto 15:45, 50; 2 Corinto 5:1-5.
8. Sa unsang paagi ang mga indibiduwal nahimong “nahiusa kang Kristo”?
8 Namulong gihapon ngadto sa mga dinihogan, si Pablo midugang: “Kon si bisan kinsa nahiusa kang Kristo, siya usa ka bag-ong linalang; ang daang mga butang mitaliwan na, tan-awa! mitungha na ang bag-ong mga butang.” (2 Corinto 5:17) Ang pagkahimong “nahiusa kang Kristo” nagkahulogag pagtagamtam ug panaghiusa uban kaniya. (Juan 17:21) Kining maong relasyon milungtad alang sa maong tawo sa dihang gidani siya ni Jehova ngadto sa iyang Anak ug nag-anak sa maong tawo pinaagi sa balaang espiritu. Ingong inanak-sa-espiritu nga anak sa Diyos, siya maoy “usa ka bag-ong linalang” nga dunay paglaom nga makig-ambit uban kang Kristo sa langitnong Gingharian. (Juan 3:3-8; 6:44; Galacia 4:6, 7) Ang maong dinihogang mga Kristohanon gihatagan ug dakong pribilehiyo sa pag-alagad.
‘Mapasig-uli Ngadto sa Diyos’
9. Unsay gihimo sa Diyos aron maposible ang kapasig-ulian ngadto kaniya?
9 Gipaboran gayod ni Jehova ang “bag-ong linalang”! Miingon si Pablo: ‘Ang tanang butang gikan sa Diyos, kinsa nagpasig-uli kanamo ngadto sa iyang kaugalingon pinaagi kang Kristo ug mihatag kanamo sa ministeryo sa kapasig-ulian, nga mao, nga ang Diyos pinaagi ni Kristo nagpasig-uli sa usa ka kalibotan ngadto sa iyang kaugalingon, nga wala magaisip ngadto kanila sa ilang mga kalapasan, ug iyang gitugyan ang pulong sa pagpasig-uli nganhi kanamo.’ (2 Corinto 5:18, 19) Ang tawo nahimulag sa Diyos sukad nakasala si Adan. Apan si Jehova mahigugmaong mihimog unang lakang sa pag-abli sa dalan sa kapasig-ulian pinaagi sa halad ni Jesus.—Roma 5:6-12.
10. Ngadto kang kinsa gipiyal ni Jehova ang ministeryo sa kapasig-ulian, ug unsay ilang gihimo aron sa pagtuman niini?
10 Si Jehova nagpiyal sa ministeryo sa kapasig-ulian ngadto sa mga dinihogan, busa si apostol Pablo nakaingon: ‘Busa kami mga embahador kapuli kang Kristo, nga daw ang Diyos matinuorong nagahangyo pinaagi kanamo. Ingong mga kapuli kang Kristo kami nangamuyo: “Mapasig-uli kamo ngadto sa Diyos.”’ (2 Corinto 5:20) Sa karaang kapanahonan, ang mga embahador gipadala ilabina sa mga yugto nga may kabingkilan aron sa pagsusi kon malikayan ba ang pakiggubat. (Lucas 14:31, 32) Sanglit ang makasasalang kalibotan sa katawhan nahimulag sa Diyos, gipadala niya ang iyang dinihogang mga embahador aron sa pagpahibalo sa katawhan sa iyang mga kondisyon alang sa kapasig-ulian. Ingong mga kapuli ni Kristo, ang mga dinihogan nangamuyo: ‘Mapasig-uli kamo ngadto sa Diyos.’ Kining maong pangaliyupo maoy maluluy-ong awhag nga makigdait sa Diyos ug dawaton ang kaluwasan nga iyang gipaposible pinaagi kang Kristo.
11. Pinaagi sa pagtuo sa lukat, kinsa ang sa kataposan makabaton ug matarong nga baroganan atubangan sa Diyos?
11 Ang tanang tawo nga nagpasundayag ug pagtuo sa lukat mahimong mapasig-uli ngadto sa Diyos. (Juan 3:36) Si Pablo miingon: “Ang usa [si Jesus] kinsa wala makailag sala iyang [Jehova] gihimo nga sala alang kanato, aron kita mahimong pagkamatarong sa Diyos pinaagi kaniya.” (2 Corinto 5:21) Ang hingpit nga tawong si Jesus mao ang halad sa sala alang sa tanang kaliwat ni Adan nga napahigawas gikan sa napanunod nga kasal-anan. Nahimo silang “pagkamatarong sa Diyos” pinaagi kang Jesus. Kining maong pagkamatarong, o matarong nga baroganan atubangan sa Diyos, unang mahitabo sa 144,000 ka kaubang mga manununod ni Kristo. Sulod sa iyang Usa ka Libo ka Tuig nga Pagmando, ang matarong nga baroganan ingong hingpit nga mga tawo mahitabo sa yutan-ong mga anak sa Walay-Kataposang Amahan, si Jesu-Kristo. Bayawon niya sila ngadto sa usa ka matarong nga baroganan sa kahingpitan aron sila mahimong magmatinumanon ngadto sa Diyos ug makadawat sa gasa nga walay-kataposang kinabuhi.—Isaias 9:6; Pinadayag 14:1; 20:4-6, 11-15.
“Ang Panahon nga Ilabinang Dalawaton”
12. Unsang hinungdanong ministeryo ang ginatuman sa mga embahador ug mga pinadala ni Jehova?
12 Aron maluwas, kinahanglang molihok kita nga kaharmonya sa mga pulong ni Pablo: “Nga nagabuhat duyog kaniya [kang Jehova], kami usab matinuorong nagahangyo kaninyo nga dili dawaton ang dili-takos nga kalulot sa Diyos ug sipyaton ang katuyoan niini. Kay siya nagaingon: ‘Sa usa ka panahong dalawaton ikaw akong gidungog, ug sa usa ka adlaw sa kaluwasan ikaw akong gitabangan.’ Tan-awa! Karon mao na ang panahon nga ilabinang dalawaton. Tan-awa! Karon mao na ang adlaw sa kaluwasan.” (2 Corinto 6:1, 2) Ang dinihogang mga embahador ni Jehova ug ang iyang mga pinadala, ang “ubang mga karnero,” dili modawat sa dili-takos nga kalulot sa Amahan ug unya sipyaton ang katuyoan niini. (Juan 10:16) Pinaagi sa ilang matul-id nga panggawi ug masibotong ministeryo niining “panahong dalawaton,” sila nagtinguha sa pabor sa Diyos ug nagpahibalo sa mga molupyo sa yuta nga kini mao “ang adlaw sa kaluwasan.”
13. Unsa ang pangunang punto sa Isaias 49:8, ug sa unsang paagi kini unang natuman?
13 Gikutlo ni Pablo ang Isaias 49:8, nga mabasa: “Mao kini ang giingon ni Jehova: ‘Sa panahon sa maayong kabubut-on ako nagatubag kanimo, ug sa adlaw sa kaluwasan ako nagatabang kanimo; ug ako padayong nagabantay kanimo aron ikaw akong ihatag nga usa ka pakigtugon alang sa katawhan, sa pagpasig-uli sa yuta, sa paghimo kanila nga magapanunod sa biniyaang mga kabilin.’” Kining tagnaa unang natuman sa dihang ang katawhan sa Israel gipahigawas gikan sa pagkabinihag sa Babilonya ug sa ulahi mibalik sa ilang biniyaang yutang natawhan.—Isaias 49:3, 9.
14. Sa unsang paagi ang Isaias 49:8 natuman sa kaso ni Jesus?
14 Sa dugang katumanan sa tagna ni Isaias, gihatag ni Jehova ang iyang “alagad” nga si Jesus ingong ‘usa ka suga sa mga nasod, aron ang kaluwasan [sa Diyos] modangat sa kinatumyan sa yuta.’ (Isaias 49:6, 8; itandi ang Isaias 42:1-4, 6, 7; Mateo 12:18-21.) Ang “panahon sa maayong kabubut-on,” o “panahong dalawaton,” dayag nga gipadapat ngadto kang Jesus samtang dinhi siya sa yuta. Siya nag-ampo, ug ang Diyos ‘mitubag’ kaniya. Napamatud-an kadto nga “adlaw sa kaluwasan” alang kang Jesus tungod kay gihuptan niya ang hingpit nga integridad ug sa ingon “nahimong responsable alang sa walay-kataposang kaluwasan niadtong tanan nga nagasugot kaniya.”—Hebreohanon 5:7, 9; Juan 12:27, 28.
15. Sukad kanus-a nga ang espirituwal nga mga Israelinhon naningkamot nga mahimong angayan sa dili-takos nga kalulot sa Diyos, ug uban sa unsang tumong?
15 Gipadapat ni Pablo ang Isaias 49:8 sa dinihogang mga Kristohanon, nga nangaliyupo kanila nga ‘dili sipyaton ang katuyoan sa dili-takos nga kalulot sa Diyos’ pinaagi sa pagkapakyas sa pagtinguha sa iyang maayong kabubut-on sulod sa “panahong dalawaton” ug sa “adlaw sa kaluwasan” nga iyang gitagana. Si Pablo midugang: “Tan-awa! Karon mao na ang panahon nga ilabinang dalawaton. Tan-awa! Karon mao na ang adlaw sa kaluwasan.” (2 Corinto 6:2) Sukad sa Pentekostes 33 K.P., ang espirituwal nga mga Israelinhon naningkamot nga mahimong angayan sa dili-takos nga kalulot sa Diyos aron ang “panahon nga dalawaton” mahimong “adlaw sa kaluwasan” alang kanila.
‘Pagrekomendar sa Atong Kaugalingon Ingong mga Ministro sa Diyos’
16. Ubos sa unsang masulayong mga kahimtang nga girekomendar ni Pablo ang iyang kaugalingon ingong ministro sa Diyos?
16 Ang pipila ka tawo nga nakig-uban sa kongregasyon sa Corinto wala magpamatuod nga angayan sa dili-takos nga kalulot sa Diyos. Ilang gipasipalahan si Pablo sa paningkamot nga daoton ang iyang apostolikong awtoridad, bisan tuod gilikayan niyang “magahatag ug unsa mang hinungdan sa pagkapandol.” Tino nga girekomendar niya ang iyang kaugalingon ingong ministro sa Diyos “pinaagi sa daghang pag-agwanta, sa mga kasakitan, sa mga pagkananginahanglan, sa mga kalisdanan, sa mga pagbunal, sa mga pagpriso, sa mga kasamok, sa mga kahago, sa mga gabiing walay-tulog, sa mga panahong walay pagkaon.” (2 Corinto 6:3-5) Sa ulahi, nangatarongan si Pablo nga kon ang iyang mga kaaway maoy mga ministro, siya “usa nga mas labaw pa” tungod sa pag-antos sa mas daghang pagkabilanggo, mga pagbunal, kapeligrohan, ug paghikaw.—2 Corinto 11:23-27.
17. (a) Pinaagi sa pagpasundayag sa unsang mga hiyas nga kita makarekomendar sa atong kaugalingon ingong mga ministro sa Diyos? (b) Unsa ang “mga hinagiban sa pagkamatarong”?
17 Sama kang Pablo ug sa iyang kaubanan, kita makarekomendar sa atong kaugalingon ingong mga ministro sa Diyos. Sa unsang paagi? Pinaagi “sa kalunsay,” o kaputli, ug pinaagi sa paglihok nga kaharmonya sa tukmang kahibalo sa Bibliya. Kita makarekomendar sa atong kaugalingon pinaagi “sa taas-nga-pailob,” nga mapailobong nagaagwanta sa sayop o paghagit, ug pinaagi “sa kalulot” samtang nagahimo kita ug matinabangong mga butang alang sa uban. Dugang pa, makarekomendar kita sa atong kaugalingon ingong mga ministro sa Diyos pinaagi sa pagdawat sa giya sa iyang espiritu, pagpasundayag “sa gugmang walay pagkasalingkapaw,” pagsulti nga maminatud-on, ug pagsalig kaniya alang sa gahom sa pagtuman sa ministeryo. Makaiikag, gipamatud-an usab ni Pablo ang iyang pagkaministro “pinaagi sa mga hinagiban sa pagkamatarong sa tuong kamot ug sa wala.” Sa karaang pakiggubat, ang tuong kamot kasagarang nagkupot sa espada samtang ang wala naghawid sa kalasag. Sa espirituwal nga pagpakiggubat batok sa bakak nga mga magtutudlo, si Pablo wala mogamit ug mga hinagiban sa makasasalang unod—panglimbong, lansis, panikas. (2 Corinto 6:6, 7; 11:12-14; Proverbio 3:32) Gigamit niya ang matarong nga “mga hinagiban,” o mga paagi, aron sa pagpadayon sa matuod nga pagsimba. Mao man usab kita.
18. Kon kita mga ministro sa Diyos, sa unsang paagi kita magagawi?
18 Kon kita mga ministro sa Diyos, mogawi kita sama kang Pablo ug sa iyang mga isigkamagbubuhat. Molihok kita ingong mga Kristohanon gitahod man o wala. Ang daotang mga taho mahitungod kanato dili mopahunong sa atong buluhatong pagsangyaw, ni mahimo kitang mapahitas-on kon gikataho nga paborable. Mosulti kita sa tinuod ug mahimong makaangkon ug pagkainila tungod sa diyosnong mga buhat. Sa dihang nag-ungaw sa kamatayon ilalom sa pag-atake sa kaaway, kita mosalig kang Jehova. Ug kita modawat ug disiplina uban ang pagkamapasalamaton.—2 Corinto 6:8, 9.
19. Sa unsang paagi maposible ang ‘pagpadato sa daghan’ sa espirituwal nga paagi?
19 Nagtapos sa iyang panaghisgot bahin sa ministeryo sa kapasig-ulian, gihisgotan ni Pablo ang iyang kaugalingon ug ang iyang kaubanan “ingong nagasubo apan nagamaya gayod, ingong kabos apan nagapadato sa daghan, ingong walay gipanag-iya apan nagapanag-iya sa tanang butang.” (2 Corinto 6:10) Bisan tuod kadtong maong mga ministro dunay katarongan nga masubo tungod sa ilang mga kasakit, sila may kangaya sa kahiladman. Sila kabos sa materyal, apan sila ‘nagpadato sa daghan’ sa espirituwal nga paagi. Sa pagkatinuod, sila ‘nanag-iya sa tanang butang’ tungod kay ang ilang pagtuo nagdala kanila ug espirituwal nga bahandi—bisan ang kalaoman nga mahimong langitnong mga anak sa Diyos. Ug sila dunay tugob ug malipayong kinabuhi ingong Kristohanong mga ministro. (Buhat 20:35) Sama kanila, kita ‘makapadato sa daghan’ pinaagi sa pagpakig-ambit sa ministeryo sa kapasig-ulian sa pagkakaron—niining adlaw sa kaluwasan!
Salig sa Pagluwas ni Jehova
20. (a) Unsay tim-os nga tinguha ni Pablo, ug nganong walay panahon nga usikan? (b) Unsay nagtimaan sa adlaw sa kaluwasan nga niana kita nagkinabuhi karon?
20 Sa dihang gisulat ni Pablo ang iyang ikaduhang sulat ngadto sa mga taga-Corinto sa mga 55 K.P., mga 15 ka tuig lamang ang nagpabilin alang sa Hudiyong sistema sa mga butang. Ang apostol tim-os nga nagtinguha nga ang mga Hudiyo ug mga Hentil mapasig-uli ngadto sa Diyos pinaagi kang Kristo. Kadto maoy adlaw sa kaluwasan, ug walay panahon nga usikan. Aw, ania na kita sa katumbas nga konklusyon sa sistema sa mga butang sukad sa 1914. Ang tibuok-globong buluhaton sa pagsangyaw sa Gingharian nga ginahimo karon nagtimaan niini ingong adlaw sa kaluwasan.
21. (a) Unsang tinuig nga teksto ang napili alang sa 1999? (b) Unsay angay natong pagahimoon niining adlaw sa kaluwasan?
21 Ang katawhan sa tanang nasod kinahanglang makadungog mahitungod sa tagana sa Diyos alang sa kaluwasan pinaagi kang Jesu-Kristo. Wala nay panahon sa paglangaylangay. Si Pablo misulat: “Tan-awa! Karon mao na ang adlaw sa kaluwasan.” Kanang mga pulonga sa 2 Corinto 6:2 mao unya ang 1999 nga tinuig nga teksto sa mga Saksi ni Jehova. Pagkahaom gayod, kay kita nag-atubang ug usa ka hitabo nga mas grabe kay sa kalaglagan sa Jerusalem ug sa templo niini! Sa unahan lamang anaa ang kataposan niining tibuok nga sistema sa mga butang, nga naglangkit sa tanan dinhi sa yuta. Karon—dili ugma—mao na ang panahon sa paglihok. Kon kita nagtuo nga ang kaluwasan iya ni Jehova, kon kita nahigugma kaniya, ug kon kita nagpabili sa kinabuhing dayon, dili nato sipyaton ang katuyoan sa dili-takos nga kalulot sa Diyos. Uban sa kinasingkasing nga tinguha sa pagpasidungog kang Jehova, atong pamatud-an pinaagi sa pulong ug buhat nga seryoso kita sa dihang mopatugbaw kita: “Tan-awa! Karon mao na ang adlaw sa kaluwasan.”
Unsaon Nimo Pagtubag?
◻ Nganong ang kapasig-ulian uban sa Diyos hinungdanon kaayo?
◻ Kinsa ang mga embahador ug mga pinadala nga nakig-ambit sa ministeryo sa kapasig-ulian?
◻ Sa unsang paagi ikarekomendar nato ang atong kaugalingon ingong mga ministro sa Diyos?
◻ Unsay kahulogan sa 1999 nga tinuig nga teksto sa mga Saksi ni Jehova alang kanimo?
[Mga hulagway sa panid 17]
Sama kang Pablo, ikaw ba masibotong nagasangyaw ug nagatabang sa uban nga mapasig-uli ngadto sa Diyos?
Tinipong Bansa
Pransiya
Côte d’Ivoire
[Hulagway sa panid 18]
Niining adlaw sa kaluwasan, ikaw ba nahilakip sa mga panon nga napasig-uli ngadto kang Jehova nga Diyos?