Ang Kaluwasan Iya ni Jehova
“Ang matuod nga Diyos alang kanato maoy usa ka Diyos sa mga buhat sa pagluwas.”—SALMO 68:20.
1, 2. (a) Nganong makaingon kita nga si Jehova mao ang Tuboran sa kaluwasan? (b) Unsaon nimo pagsaysay ang Proverbio 21:31?
SI Jehova mao ang Mangluluwas sa mga tawo nga nahigugma kaniya. (Isaias 43:11) Ang bantogang hari sa Israel nga si Haring David nahibalo niini gikan sa personal nga kasinatian, ug siya bug-os-kasingkasing nga miawit: “Ang kaluwasan iya ni Jehova.” (Salmo 3:8) Si propetang Jonas migamit sa mao gihapong mga pulonga sa mainitong pag-ampo samtang diha sa tiyan sa dakong isda.—Jonas 2:9.
2 Ang anak ni David nga si Solomon nahibalo usab nga si Jehova mao ang Tuboran sa kaluwasan, kay siya miingon: “Ang kabayo giandam alang sa adlaw sa gubat, apan ang kaluwasan iya ni Jehova.” (Proverbio 21:31) Sa karaang Tungang Sidlakan, ang baka nagguyod sa daro, ang mga asno nagpas-an ug mga luwan, ang mga tawo nagsakay sa mga mula, ug ang mga kabayo gigamit sa pakiggubat. Apan, una pa mosulod ang mga Israelinhon sa Yutang Saad ang Diyos nagsugo nga ang ilang umaabot nga hari “dili gayod magapadaghan ug mga kabayo alang sa iyang kaugalingon.” (Deuteronomio 17:16) Ang mga kabayo sa gubat dili kinahanglanon tungod kay si Jehova magaluwas sa iyang katawhan.
3. Unsang mga pangutana ang takos natong konsiderahon?
3 Ang Soberanong Ginoong Jehova maoy “usa ka Diyos sa mga buhat sa pagluwas.” (Salmo 68:20) Pagkamakapadasig nga hunahuna! Apan unsang “mga buhat sa pagluwas” ang gihimo ni Jehova? Ug kinsay iyang giluwas?
Si Jehova Nagaluwas sa mga Matul-id
4. Giunsa nato pagkahibalo nga si Jehova nagaluwas sa diyosnong mga tawo?
4 Kadtong tanan nga nagasubay sa matul-id nga dalan ingong dedikadong mga alagad sa Diyos makabaton ug kahupayan sa mga pulong ni apostol Pedro: “Si Jehova mahibalo kon unsaon sa pagpahigawas sa katawhan nga may diyosnong pagkamahinalaron gikan sa pagsulay, apan sa pagtagana sa katawhang dili-matarong alang sa adlaw sa paghukom aron pamutlon.” Sa pagpamatuod niining puntoha, si Pedro miingon nga ang Diyos “wala magpugong sa pagsilot sa usa ka karaang kalibotan, apan mitipig kang Noe, usa ka magwawali sa pagkamatarong, nga hilwas uban sa pito pa dihang nagpadangat siya ug lunop sa usa ka kalibotan sa dili-diyosnong katawhan.”—2 Pedro 2:5, 9.
5. Ubos sa unsang mga kahimtang nga si Noe nag-alagad ingong “usa ka magwawali sa pagkamatarong”?
5 Handurawa ang imong kaugalingon taliwala sa mga kahimtang sa adlaw ni Noe. Ang nagmateryalisar nga mga demonyo dinhi sa yuta. Ang mga anak niining masinupakong mga manulonda nagtratar sa mga tawo sa mabangis nga paagi, ug ‘ang yuta napuno sa kapintasan.’ (Genesis 6:1-12) Bisan pa niana, si Noe wala mobiya sa pag-alagad kang Jehova tungod sa panghulga. Hinunoa, siya maoy “usa ka magwawali sa pagkamatarong.” Siya ug ang iyang pamilya nagtukod ug arka, nga wala gayod magduhaduha nga ang pagkadaotan mawagtang sa ilang panahon. Ang pagtuo ni Noe naghukom sa maong kalibotan. (Hebreohanon 11:7) Ang presenteng-adlawng mga kahimtang katumbas niadtong sa adlaw ni Noe, nga nagtimaan niini ingong kataposang mga adlaw niining daotang sistema sa mga butang. (Mateo 24:37-39; 2 Timoteo 3:1-5) Nan, sama kang Noe magmatinumanon ka ba ingong magwawali sa pagkamatarong nga magaalagad duyog sa katawhan sa Diyos samtang imong gipaabot ang kaluwasan ni Jehova?
6. Giunsa pagpamatuod sa 2 Pedro 2:7, 8 nga si Jehova nagaluwas sa mga matul-id?
6 Si Pedro nagtagana ug dugang pamatuod nga si Jehova nagaluwas sa mga matul-id. Ang apostol nag-ingon: ‘[Ang Diyos] nagpahigawas sa matarong nga si Lot, kinsa nasákit pag-ayo gumikan sa pagpatuyang sa mga masupilon-balaod nga katawhan diha sa malaw-ayng panggawi—kay ang maong matarong nga tawo gumikan sa iyang nakita ug nadungog samtang nagpuyo taliwala kanila sa adlaw-adlaw nagsakit sa iyang matarong nga kalag tungod sa ilang malinapasong mga buhat.’ (2 Pedro 2:7, 8; Genesis 19:1-29) Ang seksuwal nga imoralidad nahimong paagi sa kinabuhi sa minilyon niining kataposang mga adlaw. Sama kang Lot, ikaw ba ‘nasakit pag-ayo gumikan sa pagpatuyang diha sa malaw-ayng panggawi’ sa bahin sa daghan kaayo karon? Kon ikaw nasakit, ug kon ikaw nagabuhat sa pagkamatarong, basin mahilakip ka niadtong luwason ni Jehova kon taposon na kining daotang sistema.
Si Jehova Nagaluwas sa Iyang Katawhan Gikan sa mga Tigdaogdaog
7. Sa unsang paagi ang mga pakiglabot ni Jehova sa mga Israelinhon sa Ehipto nagpamatuod nga siya nagapahigawas sa iyang katawhan gikan sa pagdaogdaog?
7 Samtang ania pa kining daang sistema, ang mga alagad ni Jehova makasinati ug paglutos ug pagdaogdaog sa kaaway. Apan sila makasalig nga si Jehova magpahigawas kanila, kay nakaluwas na siya sa iyang dinaogdaog nga katawhan kaniadto. Ibutang ta nga ikaw usa ka Israelinhon nga nag-antos sa pagdaogdaog sa mga kamot sa mga Ehiptohanon sa adlaw ni Moises. (Exodo 1:1-14; 6:8) Gihampak sa Diyos ang Ehipto ug sunodsunod nga hampak. (Exodo 8:5–10:29) Sa dihang ang makamatay nga ikanapulong hampak mikalas sa kinabuhi sa mga panganay sa Ehipto, gitugotan ni Paraon ang Israel sa paglakaw apan sa ulahi nagpalihok sa iyang kasundalohan ug migukod kanila. Apan, sa wala madugay siya ug ang iyang mga tawo nalaglag sa Pulang Dagat. (Exodo 14:23-28) Duyog kang Moises ug sa tibuok Israel niining awita: “Si Jehova maoy tawo sa panggubatan. Si Jehova mao ang iyang ngalan. Ang mga karo ni Paraon ug ang iyang militaryong puwersa iyang giunlod ngadto sa dagat, ug ang pinili sa iyang mga manggugubat nangalumos sa Pulang Dagat. Ang nagbul-og nga katubigan mitabon kanila; nangaunlod sila ngadto sa kahiladman ingon sa usa ka bato.” (Exodo 15:3-5) Ang susamang katalagman nagpaabot sa tanang tigdaogdaog sa katawhan sa Diyos niining kataposang mga adlaw.
8, 9. Gikan sa basahon sa Maghuhukom, paghatag ug pananglitan nga nagpamatuod nga si Jehova nagaluwas sa iyang katawhan gikan sa mga tigdaogdaog.
8 Sulod sa katuigan human mosulod ang mga Israelinhon sa Yutang Saad, ang mga maghuhukom nagpatuman ug hustisya taliwala kanila. Ang mga tawo usahay nag-antos ubos sa pagdaogdaog sa mga langyaw, bisan pa niana gigamit sa Diyos ang matinumanong mga maghuhukom sa pagpahigawas kanila. Bisan tuod kita tingali sa susama ‘magaagulo tungod sa mga tigdaogdaog ug niadtong nanagsakit kanato,’ si Jehova magaluwas usab kanato ingong iyang maunongong mga alagad. (Maghuhukom 2:16-18; 3:9, 15) Sa pagkatinuod, ang basahon sa Bibliya sa Maghuhukom naghatag kanato ug pasalig niini ug sa mas dakong kaluwasan nga itagana sa Diyos pinaagi sa iyang tinudlo nga Maghuhukom, si Jesu-Kristo.
9 Mobalik kita ngadto sa mga adlaw ni Maghuhukom Barak. Tungod sa bakak nga pagsimba ug dili pag-uyon sa Diyos, ang mga Israelinhon nakasinati ug 20 ka tuig nga mapintas nga pagmando sa Canaanhong Haring Jabin. Si Sisera mao ang pangulo sa dakong panon sa Canaanhong panon sa kasundalohan. Apan, ‘walay makitang taming, ni bangkaw, taliwala sa kap-atan ka libo sa Israel,’ bisan tuod ang nasod mokabat tingalig mga upat ka milyon. (Maghuhukom 5:6-8) Ang mga Israelinhon mahinulsolong mituaw ngadto kang Jehova. Sumala sa gisugo sa Diyos pinaagi sa manalagnang si Debora, si Barak nagtigom ug 10,000 ka lalaki ibabaw sa Bukid sa Tabor, ug gipatigom ni Jehova ang kaaway sa walog ubos sa habog nga Tabor. Nagdahunog latas sa patag ug sa uga nga suba sa Cison miabot ang dakong panon sa kasundalohan ni Sisera ug ang 900 ka karong iggugubat. Apan tungod sa makusog nga ulan gilunopan ang Cison sa tubig sa baha. Samtang si Barak ug ang iyang mga tawo milugsong sa Bukid sa Tabor nga wala mamatikdi tungod sa bagyo, nasaksihan nila ang kalaglagan nga gipahinabo sa gipahungaw nga kasuko ni Jehova. Ang mga tawo ni Barak mitigbas sa nangalisang, nangalagiwng mga Canaanhon, ug walay nakaikyas. Pagkadakong pasidaan alang sa mga tigdaogdaog kanato nga nangahas sa pagpakig-away batok sa Diyos!—Maghuhukom 4:3-16; 5:19-22.
10. Nganong makaseguro kita nga ang Diyos magaluwas sa iyang presenteng-adlawng mga alagad gikan sa tanan nilang mga tigdaogdaog?
10 Si Jehova magaluwas sa iyang presenteng-adlawng mga alagad gikan sa tanan nilang madaogdaogong mga kaaway, maingon nga iyang giluwas ang mahinadlokon-sa-Diyos nga Israel sa panahon sa kapeligrohan. (Isaias 43:3; Jeremias 14:8) Gipahigawas sa Diyos si David “gikan sa kamot sa tanan niyang kaaway.” (2 Samuel 22:1-3) Busa bisan pag gidaogdaog kita o gilutos ingong katawhan ni Jehova, magmaisogon kita, kay ang iyang Mesiyanikong Hari magpahigawas kanato gikan sa pagdaogdaog. Oo, “ang mga kalag sa mga kabos iyang pagaluwason. Gikan sa pagdaogdaog ug gikan sa kapintasan iyang pagaluwason ang ilang kalag.” (Salmo 72:13, 14) Kanang maong kaluwasan haduol na gayod.
Ang Diyos Nagaluwas Niadtong Nagasalig Kaniya
11. Unsang pananglitan sa pagsalig kang Jehova ang gitagana sa batan-ong si David?
11 Aron makita ang kaluwasan ni Jehova, kinahanglang maisogon kitang mosalig kaniya. Si David nagpasundayag ug maisogong pagsalig sa Diyos sa dihang migula siya aron sa pagpakig-away sa higanteng si Goliat. Handurawa kadtong nagbuntaog nga Pilistihanon nga nagtindog atubangan sa batan-ong si David, kinsa misinggit: “Ikaw mianhi kanako uban sa usa ka espada ug uban sa usa ka bangkaw ug uban sa usa ka salapang, apan ako mianhi kanimo uban sa ngalan ni Jehova sa mga panon, ang Diyos sa panon sa kasundalohan sa Israel, kinsa imong gitamay. Niining adlawa si Jehova magatugyan kanimo sa akong kamot, ug ako magabunal kanimo ug magalunggo sa imong ulo gikan kanimo; ug igahatag ko gayod ang mga minatay sa panon sa mga Pilistihanon niining adlawa ngadto sa mga langgam sa kalangitan ug sa ihalas nga mga mananap sa yuta; ug ang katawhan sa tibuok yuta mahibalo nga dunay usa ka Diyos sa Israel. Ug kining tibuok katilingban mahibalo nga dili pinaagi sa espada ni sa bangkaw nga si Jehova magaluwas, tungod kay iya ni Jehova ang gubat.” Sa wala madugay si Goliat namatay, ug dako ang kapildihan sa mga Pilistihanon. Tin-aw, si Jehova nagluwas sa iyang katawhan.—1 Samuel 17:45-54.
12. Nganong makatabang tingali ang paghinumdom sa gamhanang tawo ni David nga si Eleazar?
12 Sa dihang nag-atubang sa mga maglulutos, hayan kinahanglang kita “magmaisogon” ug mas bug-os pang mosalig sa Diyos. (Isaias 46:8-13; Proverbio 3:5, 6) Matikdi kining hitaboa sa usa ka dapit nga ginganlag Pas-dammim. Ang Israel nangalagiw gikan sa atubangan sa kasundalohan sa Pilistihanon. Apan ang kahadlok wala magpaluya kang Eleazar, usa sa tulo ka talagsaong gamhanang mga tawo ni David. Siya mitindog sa usa ka umahan sa sebada ug nag-inusarang mitigbas sa mga Pilistihanon pinaagi sa espada. Busa ‘giluwas ni Jehova ang Israel uban sa usa ka dakong kaluwasan.’ (1 Cronicas 11:12-14; 2 Samuel 23:9, 10) Walay magdahom nga kita moparot sa usa ka militaryong puwersa nga mag-inusara lamang. Bisan pa niana, kita usahay mag-inusara ug pit-oson sa mga kaaway. Kita ba mainampoong mosalig kang Jehova, ang Diyos sa mga buhat sa pagluwas? Pangayoon ba nato ang iyang tabang aron malikayan nga itugyan ang atong kaubang mga magtutuo sa mga maglulutos?
Si Jehova Nagaluwas sa mga Tighupot ug Integridad
13. Nganong lisod ang paghupot ug integridad ngadto sa Diyos diha sa napulo-ka-tribong gingharian sa Israel?
13 Aron masinati ang kaluwasan ni Jehova, kinahanglang huptan nato ang atong integridad ngadto kaniya bisan unsa pay mahitabo. Ang katawhan sa Diyos sa karaang kapanahonan nakasinati ug lainlaing mga pagsulay. Hunahunaa kon unsa untay imong giatubang kon nakapuyo ka pa sa napulo-ka-tribong gingharian sa Israel. Ang kabangis ni Rehoboam nagtukmod sa napulo ka tribo sa paghunong sa ilang pagpaluyo kaniya ug sa pagtukod sa amihanang gingharian sa Israel. (2 Cronicas 10:16, 17; 11:13, 14) Sa daghang hari niini, si Jehu mao ang kinamaayohan, apan bisan siya ‘wala maglakat sa balaod ni Jehova uban sa tibuok niyang kasingkasing.’ (2 Hari 10:30, 31) Bisan pa niana, ang napulo-ka-tribong gingharian may mga tighupot sa integridad. (1 Hari 19:18) Sila nagpasundayag ug pagtuo sa Diyos, ug siya nagauban kanila. Bisan pa sa mga pagsulay sa imong pagtuo, gihuptan ba nimo ang integridad ngadto kang Jehova?
14. Unsang pagluwas ang gihimo ni Jehova sa mga adlaw ni Haring Ezekias, ug unsay mitultol ngadto sa pagparot sa Babilonya sa Juda?
14 Ang kaylap nga dili-pagpanumbaling sa Balaod sa Diyos mitultol sa kalamidad alang sa gingharian sa Israel. Sa dihang ang mga Asiryanhon nagparot niana sa 740 W.K.P., ang mga indibiduwal gikan sa napulo ka tribo niini sa walay duhaduha mikalagiw ngadto sa duha-ka-tribong gingharian sa Juda, diin makasimba sila kang Jehova sa iyang templo. Upat sa 19 ka hari sa Juda sa laray ni David—si Asa, Jehosapat, Ezekias, ug Josias—maoy talagsaon sa ilang debosyon ngadto sa Diyos. Sa mga adlaw sa naghupot-ug-integridad nga si Ezekias, ang mga Asiryanhon misulong sa Juda uban ang dakong panon sa kasundalohan. Sa pagtubag sa mga pangamuyo ni Ezekias, gigamit sa Diyos ang usa lamang ka manulonda sa pagpatay sa 185,000 ka Asiryanhon sa usa ka gabii, sa ingon nagluwas sa Iyang mga magsisimba! (Isaias 37:36-38) Sa ulahi, ang kapakyasan sa katawhan sa pagtuman sa Balaod ug sa pagpamati sa mga pasidaan sa mga manalagna sa Diyos misangpot sa pagparot sa Babilonya sa Juda ug sa kalaglagan sa kaulohan niini, ang Jerusalem, ug sa templo sa 607 W.K.P.
15. Nganong ang paglahutay gikinahanglan sa Hudiyong mga binihag sa Babilonya, ug sa unsang paagi si Jehova sa kataposan nagpahinabog pagpahigawas?
15 Ang paglahutay gikinahanglan sa Hudiyong mga binihag aron mahuptan ang integridad ngadto sa Diyos samtang nabihag sa Babilonya sulod sa mga 70 ka masulub-ong katuigan. (Salmo 137:1-6) Usa ka talagsaong tighupot ug integridad mao ang manalagnang si Daniel. (Daniel 1:1-7; 9:1-3) Handurawa ang iyang kalipay sa dihang ang sugo sa Persianong Haring Ciro gipatuman sa 537 W.K.P., nga nagtugot sa mga Hudiyo sa pagbalik sa Juda aron sa pagtukod pag-usab sa templo! (Esdras 1:1-4) Si Daniel ug ang uban milahutay sulod sa katuigan, apan sa kataposan nakita nila ang pagkapukan sa Babilonya ug ang pagpahigawas sa katawhan ni Jehova. Angay kining motabang kanato sa pagpasundayag ug pagkamalahutayon samtang nagpaabot kita sa kalaglagan sa “Dakong Babilonya,” ang tibuok-kalibotang imperyo sa bakak nga relihiyon.—Pinadayag 18:1-5.
Si Jehova Kanunayng Nagaluwas sa Iyang Katawhan
16. Unsang pagluwas ang gipahinabo sa Diyos sa mga adlaw ni Rayna Ester?
16 Si Jehova kanunayng nagaluwas sa iyang katawhan sa dihang matinuohon sila sa iyang ngalan. (1 Samuel 12:22; Isaias 43:10-12) Hunahunaa ra ang mga adlaw ni Rayna Ester—sa ikalimang siglo W.K.P. Si Haring Asuero (Xerxes I) nagtudlo kang Haman ingong primer ministro. Naglagot sa pagdumili ni Mardokeo nga Hudiyo sa pagyukbo kaniya, si Haman naglaraw sa paglaglag kaniya ug sa tanang Hudiyo sa Persianhong Imperyo. Siya naghubit kanila ingong mga tiglapas sa balaod, midugang ug panghaylo nga panalapi, ug gitugotan sa paggamit sa singsing sa hari sa pagtimaan sa usa ka dokumento nga nagsugo sa pagpuo kanila. Si Ester maisogong nagbutyag sa iyang Hudiyonhong kagikan ngadto sa hari ug nagyagyag sa mabunoong laraw ni Haman. Sa wala madugay si Haman nagbitay sa mao gihapong estaka nga iyang giandam alang sa pagpatay kang Mardokeo. Si Mardokeo gihimong primer ministro, uban sa awtorisasyon nga nagtugot sa mga Hudiyo sa pagpanalipod sa ilang kaugalingon. Nagmadaogon gayod sila ibabaw sa ilang mga kaaway. (Ester 3:1–9:19) Kining hitaboa angayng magpalig-on sa atong pagtuo nga si Jehova mohimo ug mga buhat sa pagluwas alang sa iyang masinugtanong presenteng-adlawng mga alagad.
17. Sa unsang paagi ang pagkamasinugtanon nagdula ug papel diha sa pagpahigawas sa unang-siglong Hudiyong mga Kristohanon nga nagpuyo sa Judea?
17 Ang laing rason kon nganong nagaluwas ang Diyos sa iyang katawhan mao nga sila nagsugot kaniya ug sa iyang Anak. Handurawa nga usa ka sa unang-siglong Hudiyong mga tinun-an ni Jesus. Giingnan niya sila: “Inigkakita ninyo sa Jerusalem nga malibotan sa nagkampong kasundalohan, nan hibaloi nga ang paghimong awaaw niya haduol na. Nan silang anaa sa Judea pakalagiwa na ngadto sa kabukiran.” (Lucas 21:20-22) Milabay ang katuigan, ug ikaw nahibulong kon kanus-a matuman kining mga pulonga. Unya nahitabo ang pag-alsa sa mga Hudiyo sa 66 K.P. Ang Romanong kasundalohan ubos ni Cestius Gallus milikos sa Jerusalem ug midasdas hangtod sa mga kuta sa templo. Sa kalit lang, ang mga Romano misibog nga walay dayag nga rason. Unsay buhaton sa Hudiyong mga Kristohanon? Sa iyang Ecclesiastical History (Basahon III, kapitulo V, 3), si Eusebius miingon nga sila nangalagiw gikan sa Jerusalem ug Judea. Naluwas sila tungod kay sila misunod sa matagnaong pasidaan ni Jesus. Ikaw ba ingon ka andam sa pagtuman sa Kasulatanhong giya nga gitagana pinaagi sa ‘matinumanong tinugyanan’ nga gitudlo ibabaw sa tanang “gipanag-iya” ni Jesus?—Lucas 12:42-44.
Kaluwasan Ngadto sa Walay-Kataposang Kinabuhi
18, 19. (a) Unsang kaluwasan ang gipaposible sa kamatayon ni Jesus, ug alang kang kinsa? (b) Unsay determinadong buhaton ni apostol Pablo?
18 Ang pagpamati sa pasidaan ni Jesus nagluwas sa kinabuhi sa Hudiyong mga Kristohanon sa Judea. Apan ang kamatayon ni Jesus naghimong posible sa kaluwasan ngadto sa kinabuhing dayon alang sa “tanang matang sa mga tawo.” (1 Timoteo 4:10) Ang panginahanglan sa tawo sa lukat mitungha sa dihang nakasala si Adan, sa ingon nawad-an sa iyang kinabuhi ug nagbaligya sa tawhanong rasa ngadto sa pagkaulipon sa sala ug kamatayon. (Roma 5:12-19) Ang gihalad nga mga mananap ubos sa Moisesnong Balaod maoy minantinil lamang nga pagtabon sa sala. (Hebreohanon 10:1-4) Sanglit si Jesus walay tawhanong amahan ug ang balaang espiritu sa Diyos dayag nga ‘naglandong’ kang Maria sukad sa iyang pagpanamkon hangtod sa pagkahimugso ni Jesus, siya natawo nga wala makapanunod sa sala o pagkadili-hingpit. (Lucas 1:35; Juan 1:29; 1 Pedro 1:18, 19) Sa dihang namatay si Jesus ingong hingpit nga tighupot sa integridad, iyang gitanyag ang iyang hingpit nga kinabuhi aron sa pagpalit-pag-usab ug pagpagawas sa tawo. (Hebreohanon 2:14, 15) Sa ingon si Kristo “mihatag sa iyang kaugalingon nga usa ka katugbang nga lukat alang sa tanan.” (1 Timoteo 2:5, 6) Dili ang tanan makapahimulos niining maong tagana alang sa kaluwasan, apan ang Diyos nag-uyon sa kapadapatan sa mga benepisyo niini niadtong kinsa modawat niini diha sa pagtuo.
19 Pinaagi sa paghatag sa bili sa iyang halad lukat ngadto sa Diyos sa langit, gipalit-pag-usab ni Kristo ang kaliwat ni Adan. (Hebreohanon 9:24) Sa ingon si Jesus nakabaton ug Pangasaw-onon, nga gilangkoban sa iyang 144,000 ka dinihogang mga sumusunod nga gibanhaw ngadto sa langitnong kinabuhi. (Efeso 5:25-27; Pinadayag 14:3, 4; 21:9) Nahimo usab siyang “Walay-Kataposang Amahan” niadtong nagadawat sa iyang halad ug nagadawat ug walay-kataposang yutan-ong kinabuhi. (Isaias 9:6, 7; 1 Juan 2:1, 2) Pagkamahigugmaong kahikayan! Ang pagpabili ni Pablo niana dayag diha sa iyang ikaduhang dinasig nga sulat ngadto sa mga Kristohanon sa Corinto, ingon sa ipakita sa sunod nga artikulo. Sa pagkatinuod, si Pablo determinado nga dili tugotan ang bisan unsa nga mopugong kaniya sa pagtabang sa mga tawo nga makapahimulos sa kahibulongang tagana ni Jehova alang sa kaluwasan ngadto sa walay-kataposang kinabuhi.
Unsaon Nimong Pagtubag?
◻ Unsay Kasulatanhong pamatuod nga ang Diyos nagaluwas sa iyang matul-id nga katawhan?
◻ Giunsa nato pagkahibalo nga si Jehova nagaluwas niadtong nagasalig kaniya ug naghupot sa ilang integridad?
◻ Unsang tagana ang gihimo sa Diyos alang sa kaluwasan ngadto sa walay-kataposang kinabuhi?
[Hulagway sa panid 12]
Si David misalig kang Jehova, ang “Diyos sa mga buhat sa pagluwas.” Ikaw ba?
[Hulagway sa panid 15]
Si Jehova kanunayng nagaluwas sa iyang katawhan, ingon sa iyang gipamatud-an sa adlaw ni Rayna Ester