Suportahi ang Inyong Kongregasyon

Sa tibuok kalibotan, minilyon ang malipayong nagsimba kang Jehova diha sa linibo ka kongregasyon. Mapasalamaton sila sa instruksiyon ug giya nga ilang madawat, ug madasigon nilang gisuportahan ang kongregasyon sa daghang paagi. Mao pod ba nay imong gibati sa inyong kongregasyon?

1. Sa unsang paagi nimo magamit ang imong panahon ug kusog sa pagsuportar sa kongregasyon?

Kitang tanan makatabang sa kongregasyon. Pananglitan, naa bay tigulang o nanginahanglag tabang sa inyong kongregasyon? Matabangan ba nimo sila aron makatambong silag tigom? O matabangan ba nimo sila sa ubang praktikal nga paagi, sama sa pagpamalit o sa mga buluhaton sa balay? (Basaha ang Santiago 1:27.) Puwede pod tang moboluntaryo sa paghinlo ug pagmentinar sa atong Kingdom Hall. Ato ning himoon dili tungod kay gipugos ta. Ang atong gugma sa Diyos ug sa atong mga igsoon magpalihok nato nga ‘kinabubut-ong itanyag ang atong kaugalingon.’—Salmo 110:3.

Naa pay laing mga paagi nga ang bawtismadong mga Saksi makasuportar sa kongregasyon. Ang mga brader nga nakakab-ot sa mga kuwalipikasyon sa Bibliya makaalagad ingong ministeryal nga alagad ug, sa ulahi, ingong ansiyano. Ang mga brader ug sister madasigong makasuportar sa buluhatong pagsangyaw pinaagi sa pag-alagad ingong payunir. Ang ubang Saksi makasuportar pinaagi sa pagtabang sa pagtukod ug mga dapit sa pagsimba o sa pagbalhin sa kongregasyon nga nanginahanglag tabang.

2. Sa unsang paagi nato magamit ang atong materyal nga mga butang sa pagsuportar sa kongregasyon?

Atong ‘mapasidunggan si Jehova pinaagi sa atong bililhong mga butang.’ (Proverbio 3:9) Giisip natong pribilehiyo ang paghatag ug kuwarta ug uban pang butang sa pagsuportar sa kongregasyon ug sa tibuok kalibotang pagsangyaw. (Basaha ang 2 Corinto 9:7.) Ang atong mga donasyon gigamit pod sa paghatag ug hinabang. Daghan ang regular nga ‘naggahin’ ug kuwarta aron ihatag ingong donasyon. (Basaha ang 1 Corinto 16:2.) Makahatag tag donasyon diha sa mga contribution box sa atong mga dapit sa pagsimba o diha sa donate.jw.org. Gihatagan ta ni Jehova ug kahigayonan nga ipakita ang atong gugma kaniya pinaagi sa atong paggamit sa atong materyal nga mga butang.

TUN-IG DUGANG

3. Magamit nato ang atong materyal nga mga butang

Gihigugma ni Jehova ang nagahatag nga malipayon, ug mao pod nay pagbati ni Jesus. Pananglitan, gidayeg ni Jesus ang kabos nga babayeng balo sa iyang paningkamot nga mohatag ug donasyon. Basaha ang Lucas 21:1-4, ug dayon hisgoti kini nga mga pangutana:

• Kinahanglan ba nga dako ang atong donasyon aron malipay si Jehova?

• Unsay bation ni Jehova ug ni Jesus sa atong kinasingkasing nga donasyon?

Aron imong mahibaloan kon giunsa paggamit ang atong mga donasyon, i-play ang VIDEO. Dayon hisgoti ang mosunod nga pangutana:

VIDEO: “Gasa Alang Kang Jehova” (4:47)

• Sa unsang paagi nakabenepisyo ang mga kongregasyon sa tibuok kalibotan sa atong mga donasyon?

4. Makatabang ta pinaagi sa pagboluntaryo

Sa panahon sa Bibliya, ang mga magsisimba ni Jehova naningkamot pag-ayo sa pagmentinar sa ilang mga dapit sa pagsimba. Gawas nga naghatag silag kuwarta, naa pa silay laing gihimo. Basaha ang 2 Cronicas 34:9-11, ug dayon hisgoti kini nga pangutana:

• Unsay gihimo sa matag Israelinhon aron motabang sa pag-atiman sa balay, o dapit sa pagsimba, ni Jehova?

Aron imong makita kon giunsa pagsundog sa mga Saksi ni Jehova ang maong ehemplo sa Bibliya, i-play ang VIDEO. Dayon hisgoti ang mosunod nga mga pangutana:

VIDEO: Pag-atiman sa Atong mga Dapit sa Pagsimba (3:31)

• Nganong importante nga ang atong Kingdom Hall pirmeng hinlo ug maayong pagkamentinar?

• Unsa ang mga paagi nga makatabang ka?

5. Ang mga brader makapangab-ot ug dugang responsibilidad

Ang Kasulatan nagdasig sa Kristohanong mga lalaki nga himoon ang tanan nilang maarangan sa pagpangab-ot ug responsibilidad aron ilang masuportahan ang kongregasyon. Ingong pananglitan, i-play ang VIDEO. Dayon tubaga ang mosunod nga pangutana:

VIDEO: Mga Brader—Pangab-ot ug Maayong Buhat (5:19)

• Sa video, unsay gihimo ni Ryan aron mas masuportahan pa niya ang kongregasyon?

Gihisgotan sa Bibliya ang mga kuwalipikasyon para sa mga brader nga mag-alagad ingong ministeryal nga alagad ug ansiyano. Basaha ang 1 Timoteo 3:1-13, ug dayon hisgoti kini nga mga pangutana:

• Unsay angayng makita diha sa mga brader nga nangab-ot sa pagkahimong ministeryal nga alagad ug ansiyano?

• Unsay angayng makita diha sa ilang pamilya?—Tan-awa ang bersikulo 4 ug 11.

• Dihang ang mga brader maningkamot sa pagkab-ot niini nga mga kuwalipikasyon, sa unsang paagi makabenepisyo ang tanan diha sa kongregasyon?

SUMARYO

Giapresyar pag-ayo ni Jehova ang atong paningkamot sa paggamit sa atong panahon, kusog, ug materyal nga mga butang sa pagsuportar sa kongregasyon.

Review

• Unsaon nato paggamit ang atong panahon ug kusog sa pagsuportar sa kongregasyon?

• Unsaon nato paggamit ang atong materyal nga mga butang sa pagsuportar sa kongregasyon?

• Sa unsang mga paagi gusto nimong suportahan ang kongregasyon?

SUSIHA

Sayra kon nganong ang Diyos wala na magsugo nga maghatag ug ikapulo ang iyang mga magsisimba.

“Unsay Giingon sa Bibliya Bahin sa Ikapulo?” (Web article)

Ang Bibliya naghatag ug pipila ka buluhaton ngadto sa bawtismadong mga lalaki. Pero komosta man kon bawtismadong babaye ang kinahanglang mohimo niini?

“Apresyaha ang Kahikayan sa Pagkaulo Diha sa Kongregasyon” (Ang Bantayanang Torre, Pebrero 2021)

Tan-awa ang pipila sa maisogong mga Saksi nga naghimog dagkong sakripisyo aron mahatod ang mga publikasyon ngadto sa mga igsoon.

Paghatod ug mga Literatura sa Bibliya sa Congo (4:25)

Sayra kon sa unsang paagi ang atong pagsuportar sa atong buluhaton lahi kaayo kay nianang sa ubang relihiyon.

“Sa Unsang Paagi Gisuportahan sa Pinansiyal ang Buluhaton sa mga Saksi ni Jehova?” (Web article)