Tawhanong Kahuyangan Magtuboy sa Gahom ni Jehova

“Ang tanan naghunahuna nga ako malipayon ug bibohong bug-os-panahong ministro. Ako kanunayng motabang sa uban sa ilang mga problema. Hinunoa, sa samang panahon akong gibati nga ako nagkaluya sa kahiladman. Ang gubot nga mga hunahuna ug kagul-anan sa hunahuna nagdaot kanako. Misugod ako pagbating nahilain gikan sa katawhan. Buot ko lamang nga magpuyo sa balay nga maghigda. Sa daghang bulan, ako mihangyo kang Jehova nga itugot nga ako mamatay.”—Vanessa.

SAMA sa kahimtang nga gihisgotan sa ibabaw, dahomon gayod usahay nga ang mga alagad ni Jehova mobati sa mga epekto sa pagkinabuhi niining “makuyaw nga mga panahong lisod sagubangon.” (2 Timoteo 3:1) Ang uban mahimo pa ganing masulub-on. (Filipos 2:​25-27) Kon magdugay, ang kaguol makahikaw kanato sa atong kusog, kay ang Bibliya nag-ingon: “Ikaw ba nagpakita nga naluya sa adlaw sa kasakitan? Ang imong kusog diriyot ra.” (Proverbio 24:10) Oo, kon maluya kita, kita nagkinahanglag kusog​—tingali bisan sa gitawag ni apostol Pablo ug “gahom nga labaw sa kasarangan.”​—2 Corinto 4:7.

Si Jehova nga Diyos mao ang tinubdan sa way-kinutobang kusog. Dayag kini sa dihang susihon nato ang iyang kalalangan. (Roma 1:20) Tagda, pananglitan, ang adlaw. Ang yuta magsikop sa mapinadayonong agos sa mga 240 trilyong kabalyos gikan sa adlaw. Bisan pa niana, kining numeroha naghawas lamang sa mga katunga sa usa ka bahin sa bilyon sa produksiyon sa enerhiya sa adlaw. Ug ang adlaw gamay kon itandi sa mga bituon nga nailhang super nga mga higante. Apil kanila mao ang Rigel, usa ka bituon sa konstelasyong Orion nga 50 ka beses nga mas dako kay sa atong adlaw ug mopagulag 150,000 ka pilong enerhiya!

Ang Maglalalang nianang langitnong mga planeta kinahanglang adunay “dagayang dinamikong enerhiya.” (Isaias 40:​26; Salmo 8:​3, 4) Tinuoray, si propetang Isaias miingon nga si Jehova “dili kapoyon o maluya.” Ug ang Diyos andam nga magpakig-ambit sa iyang kusog kang bisan kinsa, tungod sa tawhanong kahuyangan, mobati nga sila gikapoyan. (Isaias 40:​28, 29) Kon giunsa niya paghimo kini gihulagway sa kahimtang sa Kristohanong apostol Pablo.

Pagsagubang sa mga Pagsulay

Gisultihan ni Pablo ang mga taga-Corinto bahin sa usa ka kakulian nga kinahanglang iyang antoson. Gitawag niya kinig ‘usa ka tunok sa unod.’ (2 Corinto 12:7) Ang maong “tunok” mahimong usa ka suliran sa panglawas, tingali nadaot nga panan-aw. (Galacia 4:​15; 6:11) O tingali si Pablo nagtumong sa mini nga mga apostol ug ubang mga samokan nga naglalis sa iyang pagkaapostol ug buluhaton. (2 Corinto 11:​5, 6, 12-15; Galacia 1:​6-9; 5:12) Bisan kon unsa man kadto, ang maong “tunok sa unod” nakapaguol pag-ayo kang Pablo, ug siya balikbalik nga nag-ampo nga kana wagtangon unta.​—2 Corinto 12:8.

Bisan pa niana, wala itugot ni Jehova ang hangyo ni Pablo. Sa kapulihay, iyang giingnan si Pablo: “Ang akong dili-takos nga kalulot igo na alang kanimo.” (2 Corinto 12:9) Unsay gipasabot ni Jehova niini? Aw, kon atong tagdon ang nangaging binuhatan ni Pablo sa paglutos sa mga Kristohanon, maoy pinaagi lamang sa dili-takos nga kalulot nga siya gayod nakabatog usa ka relasyon uban sa Diyos​—labi na ang pag-alagad ingong apostol!a (Itandi ang Zacarias 2:​8; Pinadayag 16:​5, 6.) Si Jehova mahimong nagsulti kang Pablo nga ang pribilehiyo sa pagkatinun-an “igo na.” Kana dili na duyogan ug milagrosong pagwagtang sa personal nga mga suliran sa kinabuhi. Sa pagkatinuod, ang pipila ka kalisdanan mahimong motungha pa ingong resulta sa nadugang nga mga pribilehiyo. (2 Corinto 11:​24-27; 2 Timoteo 3:12) Sa bisan unsa mang paagi, kinahanglang antoson na lamang ni Pablo ang iyang “tunok sa unod.”

Hinuon, dili gayod ingong sa kaway-kasingkasing si Jehova nagbiya kang Pablo. Hinunoa, siya miingon kaniya: “Ang akong gahom ginahimong hingpit diha sa kaluyahon.” (2 Corinto 12:9) Oo, si Jehova mahigugmaong nagtagana kang Pablo sa kusog aron masagubang ang iyang situwasyon. Sa ingon, ang “tunok sa unod” ni Pablo nahimong usa ka mapadapat nga leksiyon. Kadto nagtudlo kaniya nga mosalig sa kusog ni Jehova inay sa iyang kaugalingon. Dayag nga si Pablo nakakat-on gayod sa maong leksiyon, tungod kay sulod sa pipila ka tuig sa ulahi siya misulat ngadto sa mga taga-Filipos: “Akong nakat-onan, sa unsa man nga kahimtang ako, nga magpaigo-sa-kaugalingon. Sa tanang butang ako adunay kusog tungod kaniya nga nagahatag ug gahom kanako.”​—Filipos 4:​11, 13.

Komosta ka ba? Nag-antos ka ba sa usa ka matang sa “tunok sa unod,” tingali usa ka sakit o kahimtang sa kinabuhi nga nagpahinabo kanimog dakong kabalaka? Kon mao, magkalipay. Bisan tuod si Jehova dili tingali milagrosong magwagtang sa kakulian, siya makahatag kanimo sa kaalam ug kalig-on aron sagubangon kana samtang magpadayon ka sa pag-una sa intereses sa Gingharian diha sa kinabuhi.​—Mateo 6:33.

Kon ang sakit o pagkatigulang mobalda kanimo sa paghimo sa labing dako sumala sa imong gusto diha sa Kristohanong buluhaton, ayawg wad-a ang paglaom. Inay isipon ang imong pagsulay ingong naglimite sa imong pag-alagad kang Jehova, isipa kana ingong higayon sa pagpauswag sa imong pagsalig kaniya. Hinumdomi, usab, nga ang bili sa usa ka Kristohanon pagasukdon, dili sa gidak-on sa iyang buluhaton, kondili sa iyang pagtuo ug giladmon sa gugma. (Itandi ang Marcos 12:​41-44.) Ang paghigugma kang Jehova uban sa tibuok nimong kalag nagkahulogang imo siyang alagaron kutob sa imong maarangan​—dili sa lain.​—Mateo 22:​37; Galacia 6:​4, 5.

Kon ang imong “tunok sa unod” naglangkit sa makapaguol nga kahimtang sa kinabuhi, sama sa pagkamatay sa usa ka minahal, sunda ang tambag sa Bibliya: “Itugyan ang imong palas-anon kang Jehova mismo, ug siya magsapnay kanimo. Dili gayod niya itugot nga ang matarong matarog.” (Salmo 55:22) Usa ka Kristohanong babaye nga ginganlag Sylvia naghimo niini. Sa pila ra ka tuig, siya namatyan sa iyang bana human sa 50 ka tuig nga panagtiayon ug sa siyam ka lain pang membro sa pamilya​—lakip ang duha ka batang apo. “Kon dili pa tungod kang Jehova,” matod ni Sylvia, “dili mapugngan ang akong pagbangotan. Apan ako nahupayan pag-ayo tungod sa pag-ampo. Ginahimo ko ang halos way-bugtong pagpakigsulti kang Jehova. Nasayod ako nga siya naghatag kanako sa kusog sa pagsagubang niini.”

Pagkamakapalig-on ang pagkasayod nga “ang Diyos sa tanang paghupay” makahatag niadtong nagbangotan sa kusog aron moantos! (2 Corinto 1:​3; 1 Tesalonica 4:13) Sa pag-ila niini, makasabot kita sa panghinapos ni Pablo bahin niana. Siya misulat: “Ako nagakalipay sa kaluyahon, sa mga pag-insulto, sa mga higayon sa panginahanglan, sa mga paglutos ug mga kalisdanan, tungod kang Kristo. Kay sa dihang ako maluya, niana ako gamhanan.”​—2 Corinto 12:10.

Pagsagubang sa mga Pagkadili-hingpit

Kitang tanan nakapanunod sa pagkadili-hingpit gikan sa una natong tawhanong mga ginikanan. (Roma 5:12) Ingong resulta, kita nagapakigbugno batok sa mga tinguha sa nahulog nga unod. Pagkamakaguol gayod ang pagdiskobreng ang mga taras sa “daang pagkatawo” labaw pang kusog nga mohawid kanato kay sa atong gihunahuna! (Efeso 4:​22-24) Nianang mga panahona mahimong mobati kita sama sa gibati ni apostol Pablo, kinsa misulat: “Ako nahimuot gayod sa balaod sa Diyos sumala sa akong pagkatawo sa sulod, apan akong nakita sa akong mga sangkap ang laing balaod nga nagapakigbugno batok sa balaod sa akong kaisipan ug nagadala kanakong bihag ngadto sa balaod sa sala nga ania sa akong mga sangkap.”​—Roma 7:​22, 23.

Dinhi, usab, kita makapahimulos usab sa gahom gikan ni Jehova. Sa dihang makigbisog sa usa ka personal nga kahuyangan, ayaw gayod ug hunong sa pagdangop kaniya diha sa pag-ampo, nga matim-osong mangayo sa iyang kapasayloan bisan kon kapila ka moduol kaniya bahin sa samang suliran. Tungod sa iyang dili-takos nga kalulot, si Jehova, kinsa “nagtulotimbang sa mga kasingkasing” ug makakita sa giladmon sa imong kasinsero, mohatag kanimog nahinloang konsensiya. (Proverbio 21:2) Pinaagi sa iyang balaang espiritu, si Jehova makatagana kanimo sa kusog aron ipadayon ang pagpakigbugno sa unodnong mga kahuyangan.​—Lucas 11:13.

Gikinahanglan usab nato ang kusog gikan ni Jehova sa dihang makiglabot sa mga pagkadili-hingpit sa uban. Pananglitan, ang usa ka isigka-Kristohanon mahimong makigsulti kanato “nga dili mahunahunaon nga samag pinaagi sa mga duslak sa usa ka espada.” (Proverbio 12:18) Kini mahimong makapasakit pag-ayo kanato, ilabina kon kini naggikan sa usa nga gibati nato nga angay untang dili mohimo niana. Kita mahimong mapikal pag-ayo. Ang pipila migamit gani sa maong mga sala ingong katarongan sa pagbiya ni Jehova​—ang labing dakong sayop!

Bisan pa niana, ang timbang nga tinamdan motabang kanato sa pag-isip sa mga kahuyangan sa uban sa tukmang paagi. Kita dili makadahom ug kahingpitan gikan sa di-hingpit nga mga tawo. “Walay tawo nga dili makasala,” nagpahinumdom kanato ang makinaadmanong tawo nga si Solomon. (1 Hari 8:46) Si Arthur, usa ka dinihogang Kristohanon nga maunongong nag-alagad kang Jehova sulod sa mga pito ka dekada, mipahayag: “Ang mga kahuyangan sa isigkaalagad magmugna alang kanato ug usa ka dapit alang sa integridad, nga magsulay sa atong Kristohanong kasibot. Kon tugotan natong ang isulti o buhaton sa mga tawo kanato mobalda sa atong pag-alagad kang Jehova, kita nagaalagad ug mga tawo. Gawas pa, ang atong mga igsoon nahigugma gayod usab kang Jehova. Kon pangitaon nato ang maayo diha kanila, sa dili madugay atong makita nga sila dili man gayod daotan.”

Ang Gahom sa Pagsangyaw

Una pa mosaka sa langit, giingnan ni Jesus ang iyang mga tinun-an: “Kamo magadawat ug gahom sa dihang ang balaang espiritu moabot nganha kaninyo, ug kamo mahimong mga saksi nako sa Jerusalem ug sa tibuok Judea ug Samaria ug ngadto sa kinalay-ang dapit sa yuta.”​—Buhat 1:8.

Ingong katumanan sa mga pulong ni Jesus, kining buluhatona karon ginahimo sa mga Saksi ni Jehova diha sa 233 ka nasod sa tibuok yuta. Kon tingbon, sila nagagugol ug kapin sa usa ka bilyong oras kada tuig sa pagtabang sa uban nga mahidangat sa kahibalo kang Jehova. Dili kanunayng sayon ang paghimo niining buluhatona. Diha sa pipila ka kayutaan ang buluhaton sa pagsangyaw sa Gingharian gidili o pinig-otan. Tagda, usab, kon kinsay nagabuhat sa buluhaton​—mahuyang, di-hingpit nga mga tawo, nga ang matag usa kanila adunay iyang kaugalingong bahin sa mga suliran ug mga kabalaka. Apan ang buluhaton nagpadayon, ug ingong resulta, sa miaging tulo ka tuig, kapig usa ka milyong tawo ang nagpahinungod sa ilang mga kinabuhi kang Jehova ug nagpasimbolo sa ilang pagpahinungod pinaagig bawtismo sa tubig. (Mateo 28:​18-20) Tinuoray, kining buluhatona ginahimo pinaagi lamang sa kusog sa Diyos. Si Jehova miingon pinaagi sa propetang si Zacarias: “Dili pinaagi sa militaryong kusog, ni sa gahom, kondili pinaagi sa akong espiritu.”​—Zacarias 4:6.

Kon ikaw usa ka magmamantala sa maayong balita, ikaw adunay bahin​—bisan daw unsa ka gamay​—sa maong talagsaong kahimoan. Bisan pa sa ‘mga tunok’ nga kinahanglang imong antoson, makasalig ka nga si Jehova dili malimot sa ‘imong buluhaton ug sa gugma nga imong gipakita alang sa iyang ngalan.’ (Hebreohanon 6:10) Busa magpadayon sa pagsalig sa Tinubdan sa tanang dinamikong enerhiya alang sa suportar. Hinumdomi, sa kusog lamang ni Jehova nga kita makaantos; ang iyang gahom ginahingpit tungod sa atong mga kahuyangan.

[Footnote]

[Hulagway sa panid 26]

Ang buluhatong pagsangyaw ginahimo pinaagi lamang sa gahom ni Jehova