Ang Hinatag-sa-Diyos nga Kagawasan Nagahatag Kalipay

“Ang kalipay ni Jehova maoy inyong kusog.”​—NEHEMIAS 8:10.

 1. Unsa ang kalipay, ug nganong kadtong nagpahinungod sa Diyos nakasinati niana?

SI Jehova nagapuno ug kalipay sa kasingkasing sa iyang katawhan. Kining kahimtanga sa dakong kalipay o kasadya maoy resulta sa pagkadawat o pagpaabot sa maayo. Ang mga katawhan nga napahinungod sa Diyos makasinati sa maong pagbati tungod kay ang kalipay maoy usa ka bunga sa iyang balaang espiritu, o aktibong gahom. (Galacia 5:22, 23) Busa bisan kon modangat kanato ang masakit nga mga pagsulay, kita mahimong malipayon ingong mga alagad ni Jehova, kinsa gitultolan sa iyang espiritu.

 2. Nganong ang mga Hudiyo nagmaya sa linaing okasyon sa adlaw ni Esdras?

² Sa usa ka linaing okasyon sa ikalimang siglo W.K.P., ang mga Hudiyo migamit sa ilang hinatag-sa-Diyos nga kagawasan sa pagsaulog ug usa ka malipayong Piyesta sa mga Balongbalong sa Jerusalem. Human gibasa ug gipatin-aw ni Esdras ug sa ubang mga Levihanon ang Kasugoan ngadto kanila, “ang katawhan namauli aron sa pagkaon ug sa pag-inom ug sa pagpadala ug mga bahin ug nanagmaya, tungod kay sila nakasabot sa mga pulong nga gipahayag ngadto kanila.”​—Nehemias 8:5-12.

Ang Kalipay ni Jehova Maoy Atong Kusog

 3. Ubos sa unsang mga kahimtang “ang kalipay ni Jehova” mahimong atong kusog?

³ Sa panahon niadtong piyestaha, ang mga Hudiyo nakasabot sa kamatinud-anon sa mga pulong: “Ang kalipay ni Jehova maoy inyong kusog.” (Nehemias 8:10) Kini nga kalipay mao usab ang atong kusog kon kita mobarog nga malig-on alang sa hinatag-sa-Diyos nga kagawasan ingong napahinungod, bawtismadong mga Saksi ni Jehova. Ang pipila kanato ang nakasinati sa pagdihog sa balaang espiritu ug sa pagkasinagop ngadto sa pamilya sa Diyos ingong langitnong isigkamanununod uban ni Kristo. (Roma 8:15-23) Ang kinabag-an kanato karong adlawa dunay kalaoman sa kinabuhi sa paraiso sa yuta. (Lucas 23:43) Angay gayod nga magmalipayon kita!

 4. Nganong ang mga Kristohanon makaarang sa pag-antos sa mga kasakitan ug paglutos?

⁴ Bisan tuod kita may kahibulongang mga palaabuton, dili sayon ang pag-antos sa mga kasakitan ug paglutos. Maantos nato kana, hinoon, tungod kay ang Diyos nagahatag kanato sa iyang balaang espiritu. Uban niana kita may kalipay ug ang pagtuo nga walay makakuha gikan kanato sa atong paglaom o sa gugma sa Diyos. Dugang pa, kita makaseguro nga si Jehova mahimong atong kusog basta atong higugmaon siya uban sa atong bug-os kasingkasing, kalag, kusog, ug hunahuna.​—Lucas 10:27.

 5. Asa nato makaplagan ang mga hinungdan sa pagkalipay?

⁵ Ang katawhan ni Jehova nagatagamtam sa dagayang mga panalangin ug may daghang katarongan sa pagmaya. Ang pipila ka hinungdan sa kalipay gisugyot diha sa sulat ni Pablo ngadto sa mga taga Galacia. Ang uban gipahayag sa ubang bahin sa Kasulatan. Madasig ang atong mga espiritu sa pagpalandong sa maong malipayong mga panalangin.

Pabilhi ang Hinatag-sa-Diyos nga Kagawasan

 6. Nganong giawhag ni Pablo ang mga Kristohanon sa Galacia sa pagbarog nga malig-on?

⁶ Ingong mga Kristohanon, kita may malipayong panalangin sa usa ka madawat nga baroganan uban sa Diyos. Sanglit si Kristo nagpahigawas sa iyang mga sumusunod gikan sa Moisesnong Kasugoan, ang mga taga Galacia giaghat sa pagbarog nga malig-on ug dili magpabilin diha nianang “yugo sa pagkaulipon.” Komusta naman kita? Kon kita naningkamot aron ipahayag nga matarong pinaagi sa pagbantay sa Kasugoan, kita mabulag gikan ni Kristo. Inabagan sa espiritu sa Diyos, hinoon, kita nagapaabot sa gilaomang pagkamatarong mga mosangpot gikan sa pagtuo nga nagalihok pinaagi sa gugma, dili gikan sa pisikal nga sirkunsisyon o ubang mga buhat sa Kasugoan.​—Galacia 5:1-6.

 7. Sa unsang paagi nato lantawon ang balaang pag-alagad kang Jehova?

⁷ Usa ka panalangin nga gamiton nato ang hinatag-sa-Diyos nga kagawasan sa “pag-alagad kang Jehova uban ang kalipay.” (Salmo 100:2) Sa pagkamatuod, dili gayod masukod nga pribiliheyo ang paghatag ug balaang pag-alagad kang “Jehova nga Diyos, ang Labing Gamhanan,” ug mismong “Hari sa walay kataposan”! (Pinadayag 15:3) Kon ugaling madaog ka sa imong ubos nga pagtamod-sa-kaugalingon, hayan makatabang ang pag-amgo nga ginapaduol ka sa Diyos ngadto kaniya pinaagi ni Jesu-Kristo ug naghatag kanimo ug bahin sa “balaang buluhaton sa maayong balita sa Diyos.” (Roma 15:16; Juan 6:44; 14:6) Pagkadakong mga katarongan sa pagkalipay ug pagpasalamat sa Diyos!

 8. Mahitungod sa Babilonyang Bantogan, unsang hinungdan sa kalipay ang nabatonan sa katawhan sa Diyos?

⁸ Laing hinungdan alang sa kalipay mao ang atong hinatag-sa-Diyos nga kagawasan gikan sa Babilonyang Bantogan, ang empiryo sa bakak nga relihiyon sa kalibotan. (Pinadayag 18:2, 4, 5) Bisan tuod kining relihiyosong bigaon sa mahulagwayon “nagalingkod ibabaw sa daghang katubigan,” nga nagkahulogan sa “katawhan ug mga panon ug kanasoran ug mga pinulongan,” siya wala maglingkod sa ibabaw, o sa relihiyoso nagaimpluwensiya ug nagamando, sa mga alagad ni Jehova. (Pinadayag 17:1, 15) Kita nagakalipay sa kahibulongang kahayag sa Diyos, samtang ang mga tigpaluyo sa Babilonyang Bantogan anaa sa espirituwal nga kangitngit. (1 Pedro 2:9) Oo, mahimong lisod sabton ang pipila ka “halalom nga mga butang sa Diyos.” (1 Corinto 2:10) Apan ang mga pag-ampo alang sa kaalam ug tabang pinaagi sa balaang espiritu moabag kanato sa pagkasabot sa Kasulatanhong kamatuoran nga magpahigawas sa espirituwal sa mga taghupot niini.​—Juan 8:31, 32; Santiago 1:5-8.

 9. Aron matagamtaman nato ang panalangin sa padayong kagawasan gikan sa relihiyosong kasaypanan, unsay angay natong buhaton?

⁹ Kita nagatagamtam sa panalangin sa padayong kagawasan gikan sa relihiyosong kasaypanan, apan sa paghupot nianang kagawasana, kinahanglan atong isalikway ang apostasiya. Ang mga taga Galacia nagadalagan ug maayo sa Kristohanong lumba, apan ang pipila nagababag kanila sa pagsugot sa kamatuoran. Ang maong daotang mga panghaylo wala magagikan sa Diyos ug kinahanglang suklan. Sama nga ang diyutayng lebadura makapatubo sa tibuok minasa, ang mini nga mga magtutudlo o ang kiling sa apostasiya makadaot sa tibuok kongregasyon. Buot ni Pablo nga ang tanang tigpaluyo sa sirkunsisyon nga nagatinguha sa pagdaot sa pagtuo sa mga taga-Galacia dili lamang sirkunsidahan kondili sila kinahanglang magpakapon. Pagkabug-at nga pinulongan! Apan kinahanglan ingon niana kita ka lig-on sa pagsalikway sa apostasiya kon buot natong maampingan ang atong hinatag-sa-Diyos nga kagawasan gikan sa relihiyosong kasaypanan.​—Galacia 5:7-12.

Mag-inalagaray sa Usag-usa Diha sa Gugma

10. Unsay atong responsabilidad ingong bahin sa atong Kristohanong panag-igsoonay?

¹⁰ Ang hinatag-sa-Diyos nga kagawasan nakadala kanato ngadto sa pagpakig-uban sa mahigugmaong panagsoonay, apan kita kinahanglang maningkamot sa atong bahin sa pagpakitag gugma. Ang mga taga Galacia dili angay mogamit sa ilang kagawasan sa “pagtagbaw sa lawas” o pasangil alang sa dili-mahigugmaong kahakog. Sila kinahanglang mag-inalagaray sa usag-usa uban sa gugma ingong motibo. (Levitico 19:18; Juan 13:35) Kita usab kinahanglan molikay sa paglinibakay ug pagdumot nga mosangpot sa atong paglaglaganay sa usag usa. Tinuod, kini dili mahitabo kon kita magpakita sa inigsoong gugma.​—Galacia 5:13-15.

11. Sa unsang paagi kita mahimong usa ka panalangin alang sa uban, ug sa unsang paagi kita ilang panalanginan?

¹¹ Pinaagi sa paggamit sa atong hinatag-sa-Diyos nga kagawasan uyon sa pagtultol sa espiritu sa Diyos, kita mopakita ug gugma ug mahimong panalangin ngadto sa uban. Angayang batasanon ang pagtugot sa atong mga kaugalingon nga pagagamhan ug pagatultolan sa balaang espiritu. Sa ingon kita dili mokiling sa dili-mahigugmaon nga pagtagbaw sa atong makasasalang unod nga “maoy kasupak sa espiritu sa tinguha niini.” Kon kita ginatultolan sa espiritu sa Diyos, buhaton nato kon unsa ang mahigugmaon dili tungod kay ang mga balaod kinahanglang sundon ug nagasilot sa mga malapason. Pananglitan, ang gugma​—dili lang balaod—​mopugong nato sa pagdaot sa dungog sa uban. (Levitico 19:16) Ang gugma motukmod nato sa pagsulti ug paglihok diha sa malulutong mga paagi. Tungod kay gipasundayag nato ang bunga sa espiritu nga gugma, ang uban mopanalangin nato, o mosultig maayo bahin kanato. (Proverbio 10:6) Dugang pa, ang pagpakig-uban kanato mahimong usa ka panalangin alang kanila.​—Galacia 5:16-18.

Nagkalahi nga Bunga

12. Unsa ang pipila ka panalangin ang nalangkit sa paglikay sa makasasalang “mga buhat sa unod”?

¹² Daghang mga panalangin nalangkit sa atong hinatag-sa-Diyos nga kagawasan maoy resulta sa paglikay sa makasasalang “mga buhat sa unod.” Ingong katawhan sa Diyos, kita, sa linangkob, makalikay sa tuman nga kagul-anan tungod kay kita wala magabuhat ug pakighilawas, kahugawan, ug haluag nga paggawi. Tungod sa paglikay sa idolatriya, kita may kalipay nga maoy mosangpot sa pagpahimuot kang Jehova nianang bahina. (1 Juan 5:21) Sanglit kita wala magbuhat ug espiritismo, kita nahigawas sa pagkontrolar sa mga demonyo. Ang atong Kristohanong panagsoonay wala madaot tungod sa mga pagdumot, panag-away, pangabugho, silaob sa kasuko, panaglalisay, pagbahinbahin, pundokpundok, ug kasina. Ug ang atong kalipay dili mawala diha sa pag-inom-inom ug hudyaka. Si Pablo nagpasidaan nga silang nagabatasan sa mga buhat sa unod dili makapanunod sa Gingharian sa Diyos. Hinunoa, kay gipatalinghogan man nato ang iyang mga pulong, kita makapabilin diha sa malipayong paglaom sa Gingharian.​—Galacia 5:19-21.

13. Ang balaang espiritu ni Jehova nagapamungag unsang mga bunga?

¹³ Ang hinatag-sa-Diyos nga kagawasan nagahatag kanato ug kalipay tungod kay ang mga Kristohanon nagapasundayag sa bunga sa espiritu ni Jehova. Gikan sa mga pulong ni Pablo ngadto sa mga taga Galacia, sayon rang makit-an nga ang mga buhat sa makasasalang unod maoy samag mga tunok kon itandi sa maayong mga bunga sa espiritu nga gugma, kalipay, pakigdait, hataas-nga-pailob, kalulot, kaayo, pagtuo, kaaghop, ug pagpugong-sa-kaugalingon nga natisok diha sa diyosnong mga kasingkasing. Determinadong magkinabuhi nga sukwahi sa mga kailibgon sa makasasalang unod, buot nato nga matultolan sa espiritu sa Diyos ug sa pagkinabuhi pinaagi niana. Ang espiritu nagahimo kanato nga mapainubsanon ug makigdaiton, dili “magarbohon, mag-indigay sa usag usa, magsinahay sa usag usa.” Dili ikahibulong nga usa ka kalipay ang pagpakig-uban niadtong nagapasundayag sa bunga sa espiritu!​—Galacia 5:22-26.

Laing mga Katarongan alang sa Kalipay

14. Unsang hinagiban ang gikinahanglan nato sa atong pakig-away batok sa daotan espirituhanong mga gahom?

¹⁴ Nalangkit sa atong hinatag-sa-Diyos espirituwal nga kagawasan mao ang panalangin sa panalipod batok kang Satanas ug sa mga demonyo. Aron molampos sa atong pakig-away batok sa daotang esprituhanong mga gahom, kinahanglan kita mosul-ob “sa tibuok hinagiban sa Diyos.” Gikinahanglan nato ang bakos sa kamatuoran ug ang kotamaya sa pagkamatarong. Ang atong mga tiil kinahanglang masapinan sa maayong balita sa pakigdait. Gikinahanglan, usab, ang dakong kalasag sa pagtuo, nga maoy gamiton sa pagpalong sa nagasigang udyong sa daotan. Kinahanglang atong isul-ob ang salukot sa kaluwasan ug gamiton ang “espada sa espiritu,” ang Pulong sa Diyos. Kita usab kinahanglan “magpadayon sa pag-ampo sa tanang panahon pinaagi sa espiritu.” (Efeso 6:11-18) Kon atong isul-ob ang espirituwal nga hinagiban ug isalikway ang demonismo, kita mahimong maisogon ug mangayaon.​—Itandi ang Buhat 19:18-20.

15. Unsang malipayong panalangin ang atong maangkon tungod sa atong paggawi sa atong kaugalingon nga uyon sa Pulong sa Diyos?

¹⁵ Mabatonan nato ang kalipay tungod kay ang atong paggawi nahiuyon sa Pulong sa Diyos, ug kita nahigawas sa pagtulisok sa tanlag nga nagahampak sa daghang makasasala. Kita ‘maningkamot gayod kanunay sa paghupot ug kaisipan nga dili makasala sa Diyos ug sa mga tawo.’ (Buhat 24:16) Busa, kita dili kinahanglang mahadlok sa diyosnong panimalos nga modangat sa mga nagtuyo, dili-mahinulsolong mga makasasala. (Mateo 12:22-32; Hebreohanon 10:26-31) Pinaagi sa pagpadapat sa tambag sa Proverbio 3:21-26, kita nakadangat sa pagsabot sa katumanan niadtong mga pulonga: “Bantayi ang praktikal nga kaalam ug ang katakos sa paghunahuna, ug sila mahimong kinabuhi alang sa imong kalag ug dayandayan sa imong liog. Sa ingon ikaw magalakaw sa imong dalan nga may kasegurohan, ug gani ang imong tiil dili mahapangdol. Sa dihang ikaw mohigda dili ka malisang; ug ikaw sa tino mohigda, ug ang imong katulog matam-is. Ikaw walay angay kahadlokan sa bisan unsang kalit makalilisang nga butang, ni sa pagkalaglag sa mga daotan, tungod kay kini modangat. Kay si Jehova sa pagkamatuod maoy imong pagsalig, ug siya magabantay sa imong tiil nga dili hidakpan.”

16. Sa unsang paagi ang pag-ampo usa ka hinungdan alang sa kalipay, ug unsang papel ang gidula sa espiritu ni Jehova niining bahina?

¹⁶ Laing hinungdan sa kalipay mao ang atong hinatag-sa-Diyos nga kagawasan sa pagduol kang Jehova diha sa pag-ampo uban sa pasalig nga kita pagadunggon. Oo, ang atong mga pag-ampo ginatubag tungod kay kita dunay matinahurong “kahadlok ni Jehova.” (Proverbio 1:7) Dugang pa, kita ginatabangan sa pagpabilin sa atong mga kaugalingon diha sa gugma sa Diyos pinaagi sa “pag-ampo pinaagi sa balaang espiritu.” (Judas 20, 21) Kini atong mahimo pinaagi sa pagpadayag ug usa ka kahimtang sa kasingkasing nga dalawaton ni Jehova ug pinaagi sa pag-ampo ubos sa impluwensiya sa espiritu alang sa mga butang nga uyon sa iyang kabubut-on ug iyang Pulong, nga nagpakita kanato kon unsaon sa pag-ampo ug unsay hangyoon nianang pag-ampoa. (1 Juan 5:13-15) Kon kita tuman nga ginasulayan ug dili mahibalo kon unsay iampo, ‘ang espiritu moduyog uban sa tabang alang sa atong mga kahuyangan, nga mangaliyupo alang kanato uban sa mga pag-agulo nga dili malitok.’ Ang Diyos magatubag sa maong mga pag-ampo. (Roma 8:26,27) Kita magaampo alang sa balaang espiritu ug tugotan kini sa pagpamunga diha kanato sa maong mga bunga nga sa partikular gikinahanglan sa pag-atubang sa usa ka pagsulay. (Lucas 11:13) Kita usab makadugang sa atong kalipay kon kita mainampoon ug makugihong magtuon sa dinasig-sa-espiritu nga Pulong sa Diyos ug sa Kristohanong mga publikasyon nga giandam ubos sa paggiya sa espiritu.

Panalanginan sa Presente-Kanunay nga Tabang

17. Sa unsang paagi ang mga kasinatian ni Moises ug ang mga pulong ni David nagpakita nga si Jehova nagauban sa Iyang katawhan?

¹⁷ Pinaagi sa paggamit sa atong hinatag-sa-Diyos nga kagawasan sa hustong paagi, kita malipay sa pagkahibalo nga si Jehova magauban kanato. Sa dihang ang dili maayong mga kahimtang mipahinabo kang Moises sa pagbiya sa Ehipto, pinaagi sa pagtuo “siya nagpadayong malig-on ingon nga nagatan-aw sa Usa nga dili-makita.” (Hebreohanon 11:27) Si Moises wala maglakaw nga nag-inusara; siya nahibalo nga si Jehova nagauban kaniya. Sa susama, ang mga anak lalaki ni Core nanag-awit: “Ang Diyos mao ang atong dalangpanan ug kalig-on, usa ka tabang nga makaplagan dayon sa panahon sa kalisdanan. Maoy hinungdan nga kita dili mahadlok, bisan pag ang yuta pagaalid-an ug bisan pag ang mga bukid matumpag ngadto sa kahiladman sa lapad nga kadagatan; bisan pag modaguok ang katubigan niini ug mobulabula, bisan pag ang kabukiran matay-og sa kagahob niini.” (Salmo 46:1-3) Kon ikaw may samang pagtuo sa Diyos, dili ka gayud niya pagabiyaan. Matud ni David: “Kon ugaling ako pagabiyaan sa akong amahan ug inahan, bisan pa si Jehova magadawat kanako.” (Salmo 27:10) Pagkadakong kalipay ang pagkahibalo nga ang Diyos nagatagad gayod sa iyang mga alagad!​—1 Pedro 5:6, 7.

18. Nganong kadtong nakabaton sa kalipay ni Jehova may hinatag-sa-Diyos nga kagawasan gikan sa hilabihang kabalaka?

¹⁸ Sanglit nakahupot sa kalipay ni Jehova, atong nabatonan ang hinatag-sa-Diyos nga kagawasan gikan sa hilabihang kabalaka. “Ayaw kamo pagkabalaka mahitungod sa bisan unsang butang,” matud ni Pablo, “hinunoa sa tanang butang ipahibalo ninyo sa Diyos ang inyong mga hangyo pinaagi sa pag-ampo ug sa pagpangamuyo uban ang pagpasalamat; ug ang kalinaw sa Diyos nga lapaw sa tanang pagpanabot magabantay sa inyong mga kasingkasing ug sa inyong mga hunahuna diha kang Kristo Jesus.” (Filipos 4:6, 7) Ang kalinaw sa Diyos maoy dili-ikatanding kakalma bisan sa labing masulayong mga kahimtang. Pinaagi niana ang atong mga kasingkasing magpabiling malinawon​—usa ka butang nga makaayo kanato sa espirituwal, emosyonal, ug pisikal. (Proverbio 14:30) Kini makatabang usab kanato nga makahupot ug katimbang sa hunahuna, kay nahibalo man kita nga walay butang nga ginatugotan sa Diyos ang makahatag kanatog dumalayong kadaot. (Mateo 10:28) Kining kalinawa nga misangpot gikan sa suod nga relasyon uban sa Diyos pinaagi ni Kristo atoa tungod kay kita nagpahinungod kang Jehova ug nagpasakop sa pagtultol sa iyang espiritu, nga nagapamunga sa maong mga bunga sama sa kalipay ug pakigdait.

19. Ang paghupot sa atong mga kasingkasing nga nakasentro sa unsa makatabang kanato nga magmalipayon?

¹⁹ Ang paghupot sa atong mga kasingkasing nga nakasentro sa atong hinatag-sa-Diyos nga kagawasan ug sa paglaom sa Gingharian motabang kanato nga mahimong malipayon. Pananglitan, usahay kita wala kaayoy mahimo labot sa dili-maayong panglawas, apan kita makaampo alang sa kaalam ug kalig-on sa pagsagubang niini ug hayan makakaplag ug kahupayan sa paghunahuna mahitungod sa espirituwal nga kahimsog nga ato karong ginatagamtam ug ang pisikal nga pagkaayo nga mahitabo ubos sa pagmando sa Gingharian. (Salmo 41:1-3; Isaias 33:24) Bisan tuod antoson nato ang kakulangan karong adlawa, wala na unyay kanihit sa mga kinahanglanon sa kinabuhi diha sa Paraiso sa yuta nga haduol na. (Salmo 72:14, 16; Isaias 65:21-23) Oo, ang atong langitnong Amahan magatagana kanato karon ug sa kataposan magabug-os sa atong kalipay.​—Salmo 145:14-21.

Pabilhi ang Imong Hinatag-sa-Diyos nga Kagawasan

20. Sumala sa Salmo 100:1-5, sa unsang paagi angay natong itanyag ang atong kaugalingon sa atubangan ni Jehova?

²⁰ Ingong katawhan ni Jehova, siyempre pabilhan gayod nato ang hinatag-sa-Diyos nga kagawasan nga nagahatag kanato ug kalipay ug daghan kaayong mga panalangin. Dili ikahibulong ang Salmo 100:1-5 nagaaghat kanato sa pagduol ngadto sa presensiya sa Diyos “uban ang usa ka malipayong singgit.” Si Jehova nagapanag-iya kanato ug nagaatiman kanato ingong usa ka mahigugmaong Magbalantay. Oo, “kita iyang katawhan ug ang mga karnero sa iyang sibsibanan.” Ang iyang Pagkamaglalalang ug halangdong mga hiyas nagatagana kanato ug mga panukmod aron pagsulod sa mga sawang sa iyang sangtuwaryo uban ang pagdayeg ug pagpasalamat. Kita mapalihok sa “paghimaya sa iyang ngalan,” sa pagsultig maayo bahin kang Jehova nga Diyos. Dugang pa, kita sa kanunay makasalig sa iyang mahigugmaong-kalulot, o mahangawaong pagtagad, alang kanato. “Gikan sa usa ka kaliwatan ngadto sa laing kaliwatan” si Jehova matinumanon, malig-on sa pagpakita ug gugma niadtong nagatuman sa iyang kabubut-on.

21. Unsang pagdasig ang ginahatag sa unang isyu niining magasina, ug unsay angay natong buhaton mahitungod sa hinatag-sa-Diyos nga kagawasan?

²¹ Ingong mga tawong dili-hingpit, kita karon dili makalingkawas sa tanang mga pagsulay. Uban sa langitnong tabang, hinunoa, kita mahimong maisogon ug malipayong mga Saksi ni Jehova. Hinungdanon gayod niining bahina kining mga pulonga nga makita diha sa unang isyu niining basahona (Hulyo 1879): “Magmaisogon . . . akong Kristohanong igsoong lalaki o babaye, nga nagapangita uban sa hagong tikang sa pagdagan sa hiktin nga dalan. Ayaw panumbalinga ang malisod nga dalan; kini gibalaan ug gihimong sagrado pinaagi sa balaang mga tiil sa Agalon. Isipa ang matag tunok nga usa ka bulak; matag hait nga bato nga usa ka milyahan, nga nagapaduol kanimo sa tumong sa unahan. . . . Itutok kanunay ang imong mata sa ganti.” Ang minilyon karon nga nagaalagad kang Jehova nagatutok sa ilang mga mata sa ganti ug may daghang katarongan alang sa kaisog ug kalipay. Uban kanila, barog nga malig-on alang sa hinatag-sa-Diyos nga kagawasan. Ayawg kawanga ang katuyoan niini, ug hinaot ang kalipay ni Jehova sa kanunay mahimong imong kusog.

Unsaon Nimo Pagtubag?

◻ Sa unsang paagi “ang kalipay ni Jehova” mahimong atong kusog?

◻ Sa relihiyosong pagkasulti, unsang mga panalangin ang nahatag sa hinatag-sa-Diyos nga kagawasan diha sa katawhan ni Jehova?

◻ Nganong mag-inalagaray sa usag-usa diha sa gugma?

◻ Unsa ang pipila ka panalangin nga nalangkit sa hinatag-sa-Diyos nga kagawasan?

◻ Sa unsang paagi ang katawhan sa Diyos magpabiling malipayon?

[Hulagway sa panid 23]

“Isipa ang matag tunok nga usa ka bulak; matag hait nga bato nga usa ka milyahan, nga nagapaduol kanimo sa tumong sa unahan”