“Iwakli Usab Nato ang Tanang Kabug-at”

“Ako naguol kaayo ug nawad-ag kadasig,” mulo pa ni Mary. Naghisgot sa lulan sa Kristohanong mga kaakohan, kining Kristohanong babaye midugang: “Nakita ko ang mga higala nga gikapoy. Gibati ko usab ang kakapoy ug kalisod. Palihog tabangi ako nga makasabot kon ngano.”

GIBATI mo ba usab nga ikaw naglisod, gikapoy na kaayo aron igong makaatiman sa imong teokratikanhong mga kaakohan? Mopatim-aw ba usahay nga ang Kristohanong ministeryo usa ka mabug-at nga lulan, dili-madala nga palas-anon? Daghang matinumanong mga Kristohanon nakasinatig mga yugto sa pagkawala sa kadasig, kay kita kanunay man nga gilibotan sa makapaluyang mga puwersa nga makawala sa atong kalipay. Ang pagkahimong matuod nga Kristohanon karong adlawa maoy tinuod gayod nga usa ka hagit. Busa, usahay bation sa pipila nga ang Kristohanong ministeryo maoy usa ka mabug-at nga lulan.

Pagpangita sa Hinungdan

Gipatin-aw sa Kasulatan nga si Jehova wala magbutang ug dili makataronganong mga obligasyon kanato. Si apostol Juan miingon nga ang “mga kasugoan sa Diyos dili mabug-at.” (1 Juan 5:3) Si Jesus miingon usab sa iyang mga tinun-an: “Isangon ninyo ang akong yugo diha kaninyo ug pagtuon kamo gikan kanako, kay ako malumog-kinaiya ug mapaubsanon sa kasingkasing, ug kamo makakaplag kapahulayan sa inyong mga kalag. Kay masayon ang akong yugo ug ang akong lulan magaan.” (Mateo 11:29, 30) Tin-aw dili kabubut-on ni Jehova nga bation nato ang sobrang kabug-at o nabug-atan sa atong pag-alagad kaniya.

Nan, nganong nalantaw man sa usa ka matinumanong Kristohanon ang iyang Kristohanong kaakohan ingong usa ka mabug-at nga lulan? Tingali, daghang butang ang nalangkit. Matikdi kining mga pulonga ni apostol Pablo: “Iwakli usab nato ang tanang kabug-at . . . , ug dalaganon ta nga malahutayon ang lumba nga gibutang sa atong atubangan.” (Hebreohanon 12:1) Ang mga pulong ni Pablo nagpaila nga ang usa ka Kristohanon usahay magbutang ug wala kinahanglanang lulan sa iyang kaugalingon. Kini wala magpasabot nga nalangkit ang seryosong mga sala. Apan ang usa ka Kristohanon mahimong masayop sa paghukom nga grabeng makakomplikar sa iyang kinabuhi, naghimo niining malisod kaayo alang kaniya sa pagdalagan sa lumba nga gibutang sa atubangan kanato.

Usa ka Timbang nga Panglantaw sa Materyal nga mga Butang

Tagda, pananglitan, ang bahin sa sekular nga trabaho. Sa daghang kayutaan, ang kahimtang sa ekonomiya nagpahimo sa usa ka Kristohanon nga walay kapilian gawas sa pagtrabaho sa hatag-as nga mga oras. Kasagaran, hinunoa, ang mga tawo nagatrabaho aron lamang moasenso o makabatog mga kabtangan. Pinaagi sa pagtimbangtimbang pag-usab sa ilang aktuwal nga mga panginahanglan, nakita sa pipila ka mga Kristohanon nga maalamon ang paghimog mga kausaban sa ilang kahimtang sa panarbaho. Kini mao ang kahimtang ni Debbie ug sa iyang bana, kinsa maoy mga Saksi ni Jehova. Siya miingon: “Ang among kahimtang sa panalapi nausab, ug wala nay tinuod nga panginahanglan nga ako mopadayon pa sa bug-os panahong pagtrabaho. Apan malisod nga hunongon kadto.” Sa ulahi iyang gibati ang kabug-at sa pagbatog daghang trabaho. Siya miingon: “Ang Sabado mao lamang ang libre kong adlaw aron mabuhat ko ang buluhaton sa balay. Sagad dili ako gustong mogawas sa kanataran. Lain ang akong gibati tungod niana, ug gitulisok ako sa akong tanlag, apan gusto ko ang akong trabaho! Sa kataposan, giatubang ko ang kamatuoran. Dihay usa lamang ka solusyon. Mihunong ako sa akong trabaho.” Sa tinuod, ang maong dakong kausaban tingali dili posible sa uban. Apan, ang maampingong pagsusi sa imong iskedyul sa buluhaton mopadayag sa panginahanglan alang sa pila ka mga kausaban.

Hayan dunay ubang mga paagi sa pagpagaan sa imong kaugalingon sa wala kinahanglanang mga palas-anon. Komosta ang pagpakunhod sa kasubsob sa atong pagbiyahe aron sa paglingawlingaw, sa mga kalihokan sa mga dula, o ubang mga kalingawan​—lakip na ang panahong gigugol sa pagtan-awg telebisyon? Ug bisan human nga makab-ot ang gitinguhang katimbang niining mga bahina, ang kanunay nga pagpasibo hayan kinahanglanon aron maampingan ang maong katimbang.

Hinungdanon ang Pagkamakataronganon

Ang pagkamakataronganon sa maong mga butang motabang kanato sa pagpaangay sa bag-ong mga sirkumstansiya dihang kini motungha. Sa ingon, atong maampingan ang positibong panglantaw sa atong ministeryo.​—Efeso 5:15-17; Filipos 4:5.

Nakaplagan mo ba ang imong kaugalingon nga nabug-atan sa pag-abay sa ginahimo sa uban diha sa pag-alagad sa Diyos? Kini usab makadugang sa kabalaka ug kaluya sa imong kinabuhi. Samtang ang maayong mga panig-ingnan sa uban sa tino modasig kanimo nga mobuhat ug dugang pa, ang pagkamakataronganon motabang kanimo sa pagbutang ug realistikanhong mga tumong nga nahiuyon sa imong kaugalingong mga kahimtang ug mga katakos. Ang Kasulatan nag-ingon kanato: “Ang tagsatagsa angay magsusi sa iyang kaugalingong binuhatan, ug unya may katarongan siyang malipay, sa walay pagtandi niini sa nabuhat sa uban. Kay ang matag usa magapas-an sa iyang kaugalingon lulan.”​—Galacia 6:4, 5.

Ang lokal nga mga kostumbre ug mga tradisyon makadugang usab sa atong mga palas-anon. Sa mga adlaw ni Jesus ang mga tawo gikapoy na sa pagpaningkamot sa pagtuman sa daghang relihiyosong mga lagda ug mga tradisyon nga gitukod sa mga tawo. Karong adlawa, ang katawhan ni Jehova nahigawas na gikan sa bakak nga mga tradisyon sa relihiyon. (Itandi ang Juan 8:32.) Sa gihapon, ang usa ka Kristohanon mahimong sa hilabihan magkapuliki uban sa lokal nga mga kustombre. Pananglitan, usahay ang mga okasyon sama sa kasal gilibotan sa daghan kaayong maluhong mga kustombre. Kini nga mga kustombre hayan dili man daotan, ug tingali kini talagsaon ug makaiikag. Apan, ang mga Kristohanon tingalig walay panahon o salapi aron sundon kining tanang mga butanga, ug ang pagpaningkamot sa pagkab-ot niini makadugang ug laing wala kinahanglanang mga kabug-at.

Palandonga kon unsay nahitabo sa dihang si Jesus miduaw sa usa ka babaye nga ginganlag Marta. Imbes bus-os pahimuslan ang iyang balaang kaalam, “si Marta . . . nagkapuliki sa pag-atiman sa daghang buluhaton.” Siya nabug-atan uban sa daghang gikalingahan. (Lucas 10:40) Apan malulotong misugyot si Jesus nga maghikay lang siyag yanong pagkaon aron makabatog kaayohan gikan sa iyang pagtulon-an. (Lucas 10:41, 42) Kini maayong nagailustrar nga ang maayong pagpanghukom ug pagkamakataronganon makatabang kanimo sa pagkab-ot sa hustong katimbang sa imong Kristohanong ministeryo.​—Santiago 3:17.

Ang maayong paghukom gikinahanglan usab sa pagpili sa imong mga kauban. Ang Proverbio 27:3 nagpasidaan: “Ang gibug-aton sa bato ug balas​—kon itandi sa kasamok nga ipahinabo sa usa ka buang mabug-at pa kay sa duha.” Tino, ang imong suod nga mga kauban adunay kusganong impluwensiya sa imong paagi sa panghunahuna. Ang padayong pakig-uban niadtong kinsa himantayon ug hinawayon sa uban diha sa kongregasyon makapugas ug binhi sa pagkaluya sa buot ug negatibong mga panghunahuna diha nimo. (1 Corinto 15:33) Kon imong namatikdan nga kini ang suliran, ang pipila ka maalamong mga kausaban sa imong panag-uban mopagaan sa imong lulan.

Paglakaw nga Makasaranganon Uban sa Diyos

Sa Miqueas 6:8, atong makaplagan kining makapukaw sa hunahunang pangutana: “Unsa ba ang gikinahanglan ni Jehova kanimo kondili . . . ang paglakaw nga makasaranganon uban sa imong Diyos?” Ang pagkamakasaranganon gihubit ingong kaamgohan sa mga limitasyon sa usa. Kadtong wala makaila sa ilang mga limitasyon madaog tungod sa daghan kaayong mga alatubangon. Kini nahitabo uban sa hamtong nga mga Kristohanon, bisan mga magtatan-aw, nga misangpot sa pagkawala sa kadasig, kaluya sa buot, ug pagkawala sa kalipay. Si Kenneth, usa ka Kristohanong ansiano, miangkon: “Gibati ko ang hilabihang kaguol, ug ako miingon, ‘dili ako motugot nga mahitabo kini kanako.’ Busa gilimitihan ko ang akong mga alatubangon ug gitagad ang buluhaton nga akong maarangan lamang.”

Bisan ang mapaubsanong manalagnang si Moises naglisod sa pag-ila sa iyang kaugalingong mga limitasyon. Busa si Jetro, ang iyang ugangan nga lalaki, nagpaamgo kang Moises labot sa kadako sa buluhaton nga iyang gisulayan sa pagpas-an. “Unsa ba kini nga ginabuhat mo sa katawhan?” nangutana si Jetro. “Ang imong gibuhat dili-husto. Maugtas ka . . . kay kining buluhatona bug-at ra kaayo alang kanimo. Dili ka makahimo niini nga mag-inusara. . . . Apan pagpili gikan sa katawhan ug mga lalaking may-katakos, . . . ug ang matag dagkong mga kaso pagadalhon nganha kanimo, apan ang tanang ginagmay nga kaso sila ray mohusay ingong mga maghuhukom. Niining paagiha mahimong sayon ang imong buluhaton, kay sila may mopas-an sa lulan alang kanimo.” Dihadiha si Moises misugod sa pagtudlo sa pipila sa iyang mga buluhaton ngadto sa uban, busa nahupayan siya gikan sa nagakabug-at nga lulan.​—Exodo 18:13-26.

Sa laing okasyon si Moises miingon kang Jehova: “Dili ako makadumala nga mag-inusara niining tibuok nga katawhan, kay bug-at ra kaayo sila alang kanako.” Usab, ang tubag mao ang pagtudlo ug katungdanan sa uban. Tingalig kini usab ang solusyon sa imong kahimtang kon imong gibating nabug-atan ka sa daghan kaayong alatubangon.​—Numeros 11:14-17.

Si Jehova Motabang Kanato sa Pagpas-an sa Lulan

Si Jesus miingon nga masayon ang iyang yugo ug ang iyang lulan magaan apan dili kay walay kabug-at. Ang yugo nga gidapit ni Jesus nga atong pas-anon dili maoy yugo sa pagkatapolan. Kini maoy yugo sa bug-os nga pagpahinungod ngadto sa Diyos ingong usa ka tinun-an ni Jesu-Kristo. Busa, ang usa ka sukod sa kabug-at o kalisod moabot sa pagkahimong tinuod nga Kristohanon. (Mateo 16:24-26; 19:16-29; Lucas 13:24) Samtang nagakagrabe ang mga kahimtang sa kalibotan, ang mga kalisod mosamot. Apan, kita adunay katarongan nga magmapositibo sa atong panglantaw tungod kay ang pagdapit ni Jesus nagpasabot nga ang uban magpailalom sa iyang yugo uban kaniya ug nga siya motabang kanila.a Busa, basta mosunod kita sa pagtultol ni Kristo, ang atong lulan magpabiling mapas-an tungod kay siya motabang kanato.

Ang Diyos nagatagad sa mga tawong nahigugma kaniya, ug siya nagabantay sa mga kasingkasing ug mga gahom sa panghunahuna sa tanan kinsa nagatugyan sa ilang palas-anon diha kaniya. (Salmo 55:22; Filipos 4:6, 7; 1 Pedro 5:6, 7) “Dalayegon si Jehova, nga adlaw-adlawng nagapas-an sa atong lulan, ang matuod nga Diyos sa atong Kaluwasan,” miingon ang salmista. (Salmo 68:19) Oo, makasalig ka nga ang Diyos sa adlaw-adlaw mopas-an usab sa lulan alang kanimo kon iwakli mo ang tanang kabug-at ug dalaganon nga malahutayon ang lumba nga gibutang sa atubangan kanimo.

[Footnote]

[Hulagway sa panid 24]

Ang maalamong mga ansiano andam nga motudlo sa pipila ka buluhaton ug ipakig-ambit ang lulan