“Sa Husto Nagagamit sa Pulong sa Kamatuoran”

ANG Pulong sa Diyos maoy tipiganan sa mga prinsipyo nga hinungdanon alang sa malamposong kinabuhi. Makatabang kini sa usa ka ministro sa pagtudlo, sa pagbadlong, ug sa pagtul-id. (2 Timoteo 3:16, 17) Hinunoa, aron makabenepisyo sa bug-os niining gihatag sa Diyos nga giya, kinahanglang sundon nato ang tambag ni apostol Pablo kang Timoteo: “Buhata ang kutob sa imong maarangan nga ikapakita ang imong kaugalingon nga inuyonan sa Diyos, usa ka mamumuo nga walay angay ikaulaw, nga sa husto nagagamit sa pulong sa kamatuoran.”​—2 Timoteo 2:15.

Ang Pulong sa Diyos gipakasama, apil sa ubang mga butang, ngadto sa masustansiyang gatas, gahi nga pagkaon, makaparepresko ug makahinlo nga tubig, usa ka salamin, ug usa ka mahait nga espada. Ang pagsabot kon unsay gipasabot niining mga terminoha makatabang sa usa ka ministro sa paggamit sa Bibliya sa mahanasong paagi.

Pag-apod-apod sa Gatas sa Pulong sa Diyos

Ang gatas maoy pagkaon nga gikinahanglan sa bag-ong nahimugso nga mga masuso. Samtang magtubo ang masuso, ang gahi nga pagkaon sa inanay nga paagi isagol sa diyeta niini, apan sa sinugdan, kini makahilis lamang sa gatas. Sa daghang bahin, kadtong may diyutayng kasayoran mahitungod sa Pulong sa Diyos gipakasama sa mga masuso. Kon kaha ang usa ka tawo bag-ong interesado sa Pulong sa Diyos o dugay nang sinati niini, kon aduna lamang siyay paninugdang kahibalo sa ginaingon sa Bibliya, siya usa ka espirituwal nga masuso ug nanginahanglag sayon-hilison nga pagkaon​—espirituwal nga “gatas.” Dili pa siya makahilis ug “gahing pagkaon,” ang halalom nga mga butang sa Pulong sa Diyos.​—Hebreohanon 5:12.

Mao kini ang kahimtang sa bag-ong napormang kongregasyon sa Corinto sa dihang gisulatan sila ni Pablo: “Gipainom ko kamog gatas, dili nianang kan-onon, kay kamo wala pay igong kalig-on.” (1 Corinto 3:2) Kinahanglang makakat-on una ang mga taga-Corinto sa “paninugdan nga mga butang sa sagradong mga kapahayagan sa Diyos.” (Hebreohanon 5:12) Sa ang-ang sa ilang pag-uswag, dili sila arang makahilis sa “halalom nga mga butang sa Diyos.”​—1 Corinto 2:10.

Sama kang Pablo, ang Kristohanong mga ministro karon nagpasundayag sa ilang kahangawa alang sa espirituwal nga mga masuso pinaagi sa paghatag kanila ug “gatas,” nga mao, pinaagi sa pagtabang kanila aron lig-on nga makapanukad diha sa paninugdang Kristohanong doktrina. Ilang gidasig ang maong mga bag-ohan o mga dili-hamtong aron ‘ugmaron ang pagpangandoy sa walay-sambog nga gatas nga iya sa pulong.’ (1 Pedro 2:2) Gipakita ni apostol Pablo nga iyang nasabtan ang linaing pagtagad nga gikinahanglan sa mga bag-ohan sa dihang siya nagsulat: “Ang matag usa nga nagaambit sa gatas maoy dili-sinati sa pulong sa pagkamatarong, kay siya usa man ka bata.” (Hebreohanon 5:13) Pailob, konsiderasyon, pagsabot, ug kalumo maoy gikinahanglan sa mga ministro sa Diyos samtang sila nakig-ambit sa putling gatas sa Pulong uban sa mga bag-ohan ug mga walay-kasinatian pinaagi sa mga pagtuon sa Bibliya sa balay ug diha sa kongregasyon.

Paggamit sa Gahing Pagkaon sa Pulong sa Diyos

Aron motubo ngadto sa kaluwasan, ang usa ka Kristohanon nagkinahanglan ug labaw pa kay sa “gatas.” Sa dihang ang pangunang mga kamatuoran sa Bibliya tin-aw nga nasabtan ug gidawat, andam na siya nga mobalhin ngadto sa ‘gahing pagkaon nga ilaha sa hamtong nga mga tawo.’ (Hebreohanon 5:14) Sa unsang paagi mahimo niya kini? Kasagaran, pinaagi sa usa ka regular nga rutina sa personal nga pagtuon ug pagpakig-uban diha sa Kristohanong mga panagkatigom. Ang maong maayong mga batasan makatabang sa paghimo sa usa ka Kristohanon nga lig-on sa espirituwal, hamtong, ug epektibo diha sa ministeryo. (2 Pedro 1:8) Dili nato angay kalimtan nga ingong dugang sa kahibalo, ang pagbuhat sa kabubut-on ni Jehova maglangkob usab sa espirituwal nga pagkaon.​—Juan 4:34.

Karon, ang “kasaligan ug mabuot nga ulipon” gitudlo sa pag-abiyo sa mga alagad sa Diyos sa pagkaon sa nahaigong panahon ug pagtabang kanila sa pagsabot “sa daghang lainlaing kaalam sa Diyos.” Si Jehova, pinaagi sa iyang espiritu, nagapadayag sa halalom Kasulatanhong mga kamatuoran pinaagi niining maunongong ulipon, nga matinumanong nagpatik sa espirituwal nga “pagkaon sa hustong panahon.” (Mateo 24:45-47; Efeso 3:10, 11; itandi ang Pinadayag 1:1, 2.) Ang matag indibiduwal nga Kristohanon maoy responsable sa pagpahimulos sa bug-os sa maong gipatik nga mga tagana.​—Pinadayag 1:3.

Siyempre pa, ang pipila ka butang diha sa Bibliya maoy “malisod sabton,” bisan sa hamtong nga mga Kristohanon. (2 Pedro 3:16) Adunay makalibog nga mga panultihon, mga propesiya, ug mga ilustrasyon nga nagkinahanglag daghang pagtuon ug pagpamalandong. Busa, ang personal nga pagtuon naglakip sa pag-utingkay diha sa Pulong sa Diyos. (Proverbio 1:5, 6; 2:1-5) Ang mga ansiano ilabinang adunay responsabilidad niining bahina sa dihang sila nagatudlo sa kongregasyon. Kon kaha nagdumala sa Pagtuon sa Libro sa Kongregasyon o sa Pagtuon sa Bantayanang Torre, paghatag ug mga pakigpulong, o pag-alagad diha sa ubang paagi sa pagpanudlo, kinahanglang sinati sa bug-os ang mga ansiano sa ilang materyal ug andam sa paghatag ug pagtagad sa ilang “arte sa pagpanudlo” samtang ilang gipaambit ang magahing espirituwal nga pagkaon sa kongregasyon.​—2 Timoteo 4:2.

Tubig nga Magaparepresko ug Magahinlo

Giingnan ni Jesus ang usa ka babayeng Samaritanhon sa atabay nga hatagan niya siya ug ilimnon nga mahimo diha kaniya nga “usa ka tuboran sa tubig nga nagasugwak aron mohatag ug kinabuhing walay-kataposan.” (Juan 4:13, 14; 17:3) Kining nagahatag-kinabuhi nga tubig naglakip sa tanang tagana sa Diyos alang sa pagbaton sa kinabuhi pinaagi sa Kordero sa Diyos, ug kining mga taganaha gipatin-aw diha sa Bibliya. Ingong mga indibiduwal nga giuhaw alang nianang maong “tubig,” atong gidawat ang pagdapit nga gihatag sa espiritu ug sa pangasaw-onon sa Kristo nga ‘mokuha sa tubig sa kinabuhi nga libre.’ (Pinadayag 22:17) Ang pag-inom niining maong tubig nagkahulogan ug kinabuhing walay kataposan.

Dugang pa, ang Bibliya naghatag sa moral ug espirituwal nga mga sukdanan alang sa matuod nga mga Kristohanon. Samtang atong gipadapat kining maong gipahaluna sa Diyos nga mga sukdanan, kita gihinloan sa Pulong ni Jehova, “gilabhan nga hinlo” sa tanang mga buhat nga gidumtan ni Jehova nga Diyos. (1 Corinto 6:9-11) Tungod niining maong katarongan, ang dala nga kamatuoran niining maong dinasig nga Pulong gitawag ug ‘tubig pangkaligo.’ (Efeso 5:26) Kon dili nato tugotan ang kamatuoran sa Diyos sa paghinlo kanato niining paagiha, ang atong pagsimba dili dalawaton kaniya.

Makaiikag, ang mga ansiano nga ‘nagagamit sa husto sa pulong sa kamatuoran’ gipakasama usab sa tubig. Si Isaias nag-ingon nga sila maoy “nahisama sa mga sapa sa tubig sa usa ka dapit nga mamala.” (Isaias 32:1, 2) Ang mahigugmaong mga ansiano nagtuman niining maong kahubitan sa dihang ilang duawon ang ilang mga igsoon ingong espirituwal nga mga magbalantay, nga gigamit ang makaparepreskong Pulong sa Diyos aron ipaambit ang makapalig-on, makapahupay, espirituwal nga impormasyon nga magapabaskog ug magapalig-on.​—Itandi ang Mateo 11:28, 29.a

Ang mga membro sa kongregasyon maikagong nagapaabot sa mga pagduaw sa mga ansiano. “Nasayod ako kon daw unsa ka makapahupay ang mga ansiano, ug nalipay gayod ako nga si Jehova naghimo niining maong tagana,” matod ni Bonnie. Si Lynda, usa ka walay-banang inahan, nagsulat: “Pinaagi sa Kasulatanhong pagdasig, ang mga ansiano nagtabang kanako sa pagsagubang. Sila namati ug nagpakitag kahangawa.” Si Michael miingon: “Gipabati nila kanako nga ako bahin sa usa ka nagamahal nga organisasyon.” “Ang mga pagduaw sa mga ansiano nakatabang kanako sa pagbuntog sa mga yugto sa hilabihang depresyon,” matod sa lain. Ang makapalig-on sa espirituwal nga pagduaw sa usa ka ansiano nahisama sa usa ka mabugnaw, makaparepreskong ilimnon. Ang mga karnerohon nahupayan samtang ang mahigugmaong mga ansiano motabang kanila nga makasabot kon sa unsang paagi ang Kasulatanhong mga prinsipyo mahimong ipadapat sa ilang kahimtang.​—Roma 1:11, 12; Santiago 5:14.

Gamita ang Pulong sa Diyos Ingong Usa ka Salamin

Sa dihang mokaon ang indibiduwal ug gahing pagkaon, ang tuyo dili lamang aron malamian sa lasa niini. Hinunoa, siya nagdahom nga makakuhag sustansiya nga mohatag ug kusog kaniya sa paglihok. Kon siya usa ka bata, dahomon niya nga ang pagkaon motabang sa iyang pagdako ug mahimong usa ka hamtong. Susama kini sa espirituwal nga pagkaon. Ang personal nga pagtuon sa Bibliya mahimong makalilipay, apan dili lamang kana ang katarongan alang niana. Ang espirituwal nga pagkaon kinahanglang mag-usab kanato. Motabang kini kanato sa pag-ila ug sa pagpatunghag mga bunga sa espiritu ug motabang kanato sa pagsul-ob sa “bag-ong pagkatawo, nga pinaagi sa tukmang kahibalo ginahimong bag-o sumala sa larawan sa Usa kinsa milalang niini.” (Colosas 3:10; Galacia 5:22-24) Ang espirituwal nga pagkaon nagatabang usab kanato nga motubo sa pagkahamtong, nga maghimo kanatong labi pang makapadapat sa Kasulatanhong mga prinsipyo diha sa pag-atubang sa atong mga suliran ug sa pagtabang sa uban nga maatubang ang ilang mga suliran.

Sa unsang paagi kita makaingon nga ang Bibliya adunay ingon niana nga epekto kanato? Atong gamiton ang Bibliya ingong usa ka salamin. Si Santiago nag-ingon: “Magmahimo kamong magbubuhat sa pulong, ug dili tigpaminaw lamang . . . Kon ang usa tigpaminaw sa pulong, ug dili usa ka magbubuhat, kini siya sama sa usa ka tawo nga nagatan-aw sa iyang kinaiyanhong nawong diha sa salamin. Kay nagatan-aw siya sa iyang kaugalingon, ug siya molakaw ug dihadiha makalimot kon unsang matanga siya nga tawo. Apan siya nga nagasud-ong pag-ayo sa hingpit nga balaod nga iya sa kagawasan ug kinsa nagapadayon diha niana, kini nga tawo, tungod kay siya nahimong, dili usa ka malimtanong tigpaminaw, kundili usa ka magbubuhat sa buluhaton, magmalipayon sa iyang pagbuhat niini.”​—Santiago 1:22-25.

Kita “nagasud-ong” sa Pulong sa Diyos sa dihang gisusi nato kini pag-ayo ug gitandi ang atong kaugalingon sa kon unsay angay nga mamao kita sumala sa mga sukdanan sa Diyos. Sa pagbuhat niini, mahimo kitang “magbubuhat sa pulong, ug dili tigpaminaw lamang.” Ang Bibliya adunay maayong epekto kanato.

Ang Pulong sa Diyos Ingong Usa ka Espada

Sa kataposan, gitabangan kita ni apostol Pablo nga makita kon sa unsang paagi nato gamiton ang Pulong sa Diyos ingong usa ka espada. Sa dihang nagpasidaan kanato batok sa “mga kagamhanan, batok sa mga awtoridad, batok sa mga magmamando sa kalibotan niini nga kangitngit, batok sa tuman-kadaotang mga puwersa nga espirituhanon diha sa langitnong mga dapit,” giawhag niya kita nga ‘dawaton . . . ang espada sa espiritu, nga mao, ang pulong sa Diyos.’ (Efeso 6:12, 17) Ang Pulong sa Diyos mahinungdanong hinagiban nga atong magamit sa pagwagtang sa bisan unsang mga ideya nga gibangon batok sa kahibalo sa Diyos.​—2 Corinto 10:3-5.

Sa walay duhaduha, “ang pulong sa Diyos buhi ug gamhanang nagalihok.” (Hebreohanon 4:12) Si Jehova nagapahayag sa katawhan pinaagi sa mga panid sa iyang dinasig nga Pulong. Gamita kanag maayo sa pagtudlo sa uban ug sa pagyagyag sa bakak nga mga doktrina. Gamita kana sa imong kaugalingon aron dasigon, lig-onon, represkohon, hupayon, palihokon, ug pabaskogon sa espirituwal ang uban. Ug hinaot nga si Jehova “magsangkap kaninyo sa matag maayong butang aron sa pagbuhat sa iyang kabubut-on,” aron kanunay nimong mabuhat kon unsay “makapahimuot pag-ayo sa iyang panan-aw.”​—Hebreohanon 13:21.

[Footnote]

[Hulagway sa panid 31]

Ang mga ansiano nagadasig sa uban, nga “sa husto nagagamit sa pulong sa kamatuoran”