Epafras-“Usa ka Matinumanong Ministro ni Kristo”
KINSAY nagtukod sa Kristohanong mga kongregasyon sa Corinto, Efeso, ug Filipos? Tingali ikaw dili magpanuko sa pagtubag: ‘Si Pablo, ang “apostol sa mga nasod.”’ (Roma 11:13) Ikaw tingali husto.
Apan, kinsay nagtukod sa mga kongregasyon sa Colosas, Hierapolis, ug Laodicea? Bisag dili kita segurado, tingali siya mao ang usa ka tawo nga ginganlag Epafras. Bisan pa niana, buot ka tingaling masayod ug dugang bahin niini nga ebanghelisador, sanglit siya gitawag ug “usa ka kasaligang ministro sa Kristo.”—Colosas 1:7.
Ebanghelisador sa Walog sa Lycus
Ang ngalang Epafras maoy pinamubo sa Epafrodito. Apan dili nato pakasaypon si Epafras nga si Epafrodito nga taga-Filipos. Si Epafras maoy taga-Colosas, usa sa tulo ka sentro sa Kristohanong mga kongregasyon sa walog sa Subang Lycus, sa Asia Minor. Ang Colosas nahimutang 18 kilometros lamang gikan sa Laodicea ug 19 kilometros gikan sa Hierapolis, sa karaang rehiyon sa Phrygia.
Walay tin-awng gisulti ang Bibliya kon sa unsang paagi nakaabot ang maayong balita sa Gingharian sa Diyos sa Phrygia. Apan, ang mga taga-Phrygia didto sa Jerusalem sa adlaw sa Pentecostes sa 33 K.P., tingali ang pipila kanila maoy gikan sa Colosas. (Buhat 2:1, 5, 10) Sa panahon sa ministeryo ni Pablo sa Efeso (mga 52-55 K.P.), ang gihatag nga pamatuod nianang lugara maoy kusganon ug epektibo kaayo nga dili lamang ang mga taga-Efeso kondili usab ang “tanang nagapuyo sa distrito sa Asia nakadungog sa pulong sa Ginoo, mga Judio ug mga Griego.” (Buhat 19:10) Maorag si Pablo wala makasangyaw sa maayong balita sa tibuok Walog sa Lycus, sanglit daghan nga nahimong mga Kristohanon niana nga rehiyon wala makakita kaniya.—Colosas 2:1.
Sumala kang Pablo, ang usa nga nagtudlo sa mga taga-Colosas bahin sa “dili-takos nga kalulot sa Diyos diha sa kamatuoran” mao si Epafras. Ang kamatuoran nga si Pablo nagtawag niining isigkamagbubuhat nga “usa ka kasaligang ministro sa Kristo alang kanato” nagpakita nga si Epafras maoy usa ka aktibong ebanghelisador sa maong dapit.—Colosas 1:6, 7.
Si apostol Pablo ug ang ebanghelisador nga si Epafras may dakong kahingawa sa espirituwal nga kaayohan sa ilang mga isigkamagtutuo sa Walog sa Lycus. Ingong “apostol sa mga nasod,” si Pablo nalipay gayod nga makadawat ug balita sa ilang pag-uswag. Kadto maoy gikan gayod kang Epafras nga si Pablo nakadungog bahin sa espirituwal nga kahimtang sa mga taga-Colosas.—Colosas 1:4, 8.
Taho ni Epafras
Giatubang sa mga taga-Colosas ang mga problema nga may igong kabug-at nga giawhag si Epafras nga mohimog hataas nga biyahe ngadto sa Roma alang sa tinong katuyoan sa pagpakighisgot niining mga butanga uban kang Pablo. Ang detalyadong taho nga gihimo ni Epafras dayag nga maoy nagtukmod kang Pablo sa pagsulat ug duha ka sulat ngadto niadtong mga igsoon nga dili niya kaila. Ang usa mao ang sulat sa mga taga-Colosas. Ang laing sulat, nga dayag wala matipigi, gipadala ngadto sa mga taga-Laodicea. (Colosas 4:16) Makataronganon ang paghunahuna nga ang mga kaundan sa maong mga sulat gituyo sa pagsanong sa mga panginahanglan niadtong mga Kristohanon ingon sa nasabtan ni Epafras. Unsang mga panginahanglan ang iyang nakita? Ug unsay gibutyag niini kanato bahin sa iyang personalidad?
Ang sulat ngadto sa mga taga-Colosas daw nagpaila nga si Epafras nabalaka nga ang mga Kristohanon sa Colosas nameligro sa paganong mga pilosopiya nga naglangkit sa higpit nga pagkinabuhi, espiritismo, ug idolatrosong patuotuo. Dugang pa, ang Hudiyohanong pagtulon-an nga nagdili sa mga pagkaon ug nagbantay sa tinong mga adlaw mahimong nakaimpluwensiya sa pipila ka membro sa kongregasyon.—Colosas 2:4, 8, 16, 20-23.
Ang kamatuoran nga si Pablo nagsulat bahin niining mga ulohana nagpakita kanato kon unsa ka alerto ug sensitibo si Epafras sa mga panginahanglan sa iyang kaubang mga Kristohanon. Gipakita niya ang mahigugmaong kabalaka alang sa ilang espirituwal nga kaayohan, nga mahunahunaon sa mga kapeligrohan sa palibot nga ilang gipuy-an. Si Epafras nangayog tambag kang Pablo, ug kini nagpakita nga siya mapainubsanon. Tingali gibati niya nga siya nagkinahanglan nga makadawat ug tambag gikan sa usa nga may labawng kasinatian. Sa bisan unsang kahimtang, si Epafras milihok nga maalamon.—Proverbio 15:22.
Usa ka Tawo nga Nagpabili sa Pag-ampo
Sa konklusyon sa sulat nga iyang gipadala sa mga Kristohanon sa Colosas, si Pablo nag-ingon: “Si Epafras, nga gikan sa inyong taliwala, usa ka ulipon ni Kristo Jesus, nagapadala kaninyo sa iyang mga pangomosta, nga kanunay nagapanglimbasog sa iyang kaugalingon alang kaninyo diha sa iyang mga pag-ampo, aron kamo sa kataposan makabarog nga kompleto ug may hugot nga pagtuo sa bug-os nga kabubut-on sa Diyos. Ako sa pagkatinuod nagapanaksi bahin kaniya nga siya nagabutang sa iyang kaugalingon sa dakong pagpaningkamot alang kaninyo ug kanilang atua sa Laodicea ug kanilang atua sa Hierapolis.”—Colosas 4:12, 13.
Oo, bisag siya maoy “isigkabihag” ni Pablo sa Roma, si Epafras naghunahuna bahin sa iyang minahal nga mga igsoon sa Colosas, Laodicea, ug Hierapolis ug nag-ampo alang kanila. (Filemon 23) Sa literal, ‘siya nanlimbasog’ alang kanila diha sa pag-ampo. Sumala sa eskolar nga si D. Edmond Hiebert, ang Gregong termino nga gigamit dinhi nagpaila sa “usa ka mabudlayon ug hagong kalihokan,” butang nga susama sa “labihang kasakit” sa hunahuna nga nasinati ni Jesu-Kristo samtang siya nag-ampo sa tanaman sa Getsemane. (Lucas 22:44) Si Epafras mainitong nagtinguha nga ang iyang espirituwal nga mga igsoong lalaki ug babaye makabatog kalig-on ug bug-os Kristohanong pagkahamtong. Pagkadakong panalangin gayod alang sa mga kongregasyon ang maong mahunahunaon sa espirituwal nga igsoon!
Sanglit si Epafras gitawag nga usa ka “hinigugmang isigkaulipon,” walay duhaduha nga siya gimahal mismo sa mga isigka-Kristohanon. (Colosas 1:7) Kon motugot ang mga sirkumstansiya, ang tanang membro sa kongregasyon angayng bukas nga magpakitag pagkamainiton ug gugma. Pananglitan, ang pagtagad ikahatag sa pagtabang sa masakiton, sa mga edaran, o ubang may linaing mga panginahanglan. Tingali adunay nagkalainlaing mga kaakohan sa pag-atiman diha sa kongregasyon, o tingali posible ang pag-amot sa teokratikanhong mga proyekto sa pagpanukod.
Ang pag-ampo alang sa uban, ingon sa gibuhat ni Epafras, maoy usa ka matang sa sagradong pag-alagad nga mabuhat sa tanan. Ang maong mga pag-ampo mahimong maglakip sa mga pulong sa kabalaka alang sa mga magsisimba ni Jehova nga nagaatubang sa nagkalainlaing mga kapeligrohan o mga kalisod sa espirituwal o pisikal nga kinaiyahan. Pinaagi sa atong pagpaningkamot nga kusganon niining paagiha, kita mahisama kang Epafras. Ang matag usa kanato adunay pribilehiyo ug kalipay sa pagpamatuod nga mahimong usa ka “hinigugmang isigkaulipon” diha sa panimalay sa matinumanong mga alagad ni Jehova.