Si Jehova Makahimo Kanimo nga Gamhanan
“Siya nagahatag ug gahom ngadto sa gikapoy; ug kaniya nga walay kabaskog nagadugang siya ug dagayang kusog.”—ISAIAS 40:29.
1, 2. Unsa ang pipila ka ebidensiya sa dagayang gahom ni Jehova?
SI Jehova maoy usa ka Diyos nga “dagaya sa gahom.” Atong makita ang ebidensiya sa “walay kataposang gahom ug pagka-Diyos” sa Diyos diha sa pagkakatingalahan sa iyang pisikal nga kalalangan. Kadtong nagadumili sa pag-ila niini nga ebidensiya sa iyang pagka-Maglalalang walay-ikapangatarongan.—Salmo 147:5; Roma 1:19, 20.
2 Ang gahom ni Jehova labaw pang madayag sa dihang tukion sa mga siyentipiko ang halayong uniberso, uban sa dili-maisip nga mga galaksiya niini nga ang gilay-on moabot ug gatosan ka minilyong light-years. Sa mangitngit apan masanag nga kagabhion, hangda ang kalangitan ug tan-awa kon dili ba nimo bation ang gibati sa salmista: “Sa magtan-aw ako sa imong kalangitan, sa mga buhat sa imong mga tudlo, ang bulan ug ang mga bituon nga imong giandam, unsa ba ang tawo nga mamatay nga naghunahuna ka man kaniya, ug ang anak sa tawong yutan-on nga nagtagad ka man kaniya?” (Salmo 8:3, 4) Ug giatiman pag-ayo ni Jehova ang tawo, kita nga mga tawo! Iyang gitagan-an ang unang lalaki ug babaye ug usa ka matahom nga yutan-ong pinuy-anan. Bisan ang yuta niini adunay gahom—sa pagpatubog talamnon, nga nagahatag ug sustansiyado, dili-mahugaw nga pagkaon. Ang mga tawo ug mga hayop nagakuhag pisikal nga gahom gikan niining klaro nga ebidensiya sa gahom sa Diyos.—Genesis 1:12; 4:12; 1 Samuel 28:22.
3. Gawas sa pisikal nga mga butang sa uniberso, unsa pa ang nagpadayag sa gahom sa Diyos?
3 Gawas pa sa katahom sa kalangitan ug sa makapalipayng katanoman ug kahayopan sa yuta, ilang ginapasundayag kanato ang gahom sa Diyos. Si apostol Pablo misulat: “Ang iyang dili-makita nga mga hiyas tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo, bisan gani ang iyang dayong gahom ug pagka-Diyos.” (Roma 1:20) Apan adunay laing ebidensiya sa iyang gahom nga takos sa atong pagtagad ug pagpabili. ‘Unsa,’ tingali mahibulong ka, ‘ang labaw nga nagapasundayag sa gahom sa Diyos kay sa uniberso?’ Ang tubag mao si Jesu-Kristo. Sa pagkamatuod, ubos sa pagdasig si apostol Pablo nag-ingon nga ang gilansang nga Kristo mao “ang gahom sa Diyos ug ang kaalam sa Diyos.” (1 Corinto 1:24) ‘Ngano man?’ tingali mangutana ka, ‘Ug unsay kalabotan niana sa akong kinabuhi karon?’
Gahom Pinaagi sa Iyang Anak
4. Sa unsang paagi ang gahom sa Diyos gipakita may kalabotan sa iyang Anak?
4 Ang gahom sa Diyos unang gipasundayag sa dihang iyang gilalang ang iyang bugtong nga Anak, nga gilalang sumala sa iyang dagway. Kini nga espiritu nga Anak nag-alagad kang Jehova ingong “batid nga magbubuhat” pinaagi sa paggamit sa dagayang gahom sa Diyos sa paglalang sa tanang ubang mga butang. (Proverbio 8:22, 30) Si Pablo misulat ngadto sa Kristohanong mga igsoon sa Colosas: “Pinaagi kaniya gilalang ang tanang ubang butang sa langit ug sa yuta, ang mga butang nga makita ug ang mga butang nga dili-makita . . . Ang tanang ubang butang nalalang pinaagi kaniya ug alang kaniya.”—Colosas 1:15, 16.
5-7. (a) Sa miagi, sa unsang paagi ang mga tawo nalangkit sa mga pagpasundayag sa gahom sa Diyos? (b) Unsa pay katarongan sa pagtuo nga ang gahom sa Diyos makita diha sa kahimtang sa mga Kristohanon karong adlawa?
5 Kita maoy bahin sa ‘mga butang nga gilalang dinhi sa yuta.’ Busa ang gahom ba sa Diyos mapaabot kanatong mga tawhanon? Buweno, sa tanang mga pakiglabot sa Diyos uban sa mga tawong dili-hingpit, si Jehova sa pipila ka higayon naghatag ug dugang gahom sa iyang mga alagad aron matuman ang iyang katuyoan. Si Moises nahibalo nga, sa katibuk-an, ang mga tawong dili-hingpit mabuhi sa 70 o 80 ka tuig. (Salmo 90:10) Unsay ikasulti bahin kang Moises mismo? Naabot niya ang edad nga 120 ka tuig, bisan pa ang “iyang mga mata wala mohanap, ug ang iyang kusog wala magluya.” (Deuteronomio 34:7) Samtang wala kana magpasabot nga makaarang ang Diyos sa paglugway sa kinabuhi sa matag usa sa iyang mga alagad o makapabilin nga kusgan gihapon, kini nagpamatuod nga si Jehova makahatag sa mga tawo ug gahom.
6 Dugang nga pamatuod sa katakos sa Diyos sa paghatag ug gahom sa mga lalaki ug mga babaye mao ang iyang gihimo sa asawa ni Abraham. “Si Sara mismo nakadawat ug gahom nga magsamkon ug binhi, bisan sa dihang siya lapas na sa kinutoban sa edad, sanglit gitamod man niya nga kasaligan siya kinsa misaad.” O palandonga kon sa unsang paagi gihatagag gahom sa Diyos ang mga maghuhukom ug uban pa sa Israel: “Si Gideon, Barak, Samson, Jepte, David ingon man kang Samuel ug sa ubang mga propeta, kinsa . . . gikan sa maluya nga kahimtang nahimong gamhanan.”—Hebreohanon 11:11, 32-34.
7 Kining gahoma mahimong molihok usab diha kanato. Aw, kita karon dili makapaabot ug anak pinaagi sa usa ka milagro, o kita dili mahimong makapakita ug kusog sama kang Samson. Apan kita mahimong gamhanan, sama sa gihisgotan ni Pablo ngadto sa kasarangang mga tawo sa Colosas. Oo, si Pablo misulat ngadto sa mga lalaki, mga babaye, ug kabataan, sama sa atong makita diha sa mga kongregasyon karong adlawa, ug siya miingon nga sila “ginahimong gamhanan uban sa bug-os nga gahom.”—Colosas 1:11.
8, 9. Sa unang siglo, sa unsang paagi ang gahom ni Jehova gipasundayag maylabot sa mga tawong sama kanato?
8 Sa panahon sa ministeryo ni Jesus sa yuta, gipatin-aw ni Jehova nga ang iyang gahom naglihok pinaagi sa iyang Anak. Pananglitan, sa dihang ang panon sa mga tawo nagpanon ngadto kang Jesus sa Capernaum, “diha ang gahom ni Jehova aron siya maghimog pagpang-ayo.”—Lucas 5:17.
9 Human sa iyang pagkabanhaw, gipasaligan ni Jesus ang iyang mga sumusunod nga sila ‘magadawat ug gahom sa dihang ang balaang espiritu moabot nganha kanila.’ (Buhat 1:8) Pagkatinuod niini! Usa ka historyano mitaho bahin sa mga hitabo pipila ka adlaw human sa Pentekostes sa 33 K.P.: “Uban ang dakong gahom ang mga apostol padayong mihatag sa pagsaksi mahitungod sa pagkabanhaw sa Ginoong Jesus.” (Buhat 4:33) Si Pablo mismo maoy usa nga gihimong gamhanan alang sa buluhaton nga gisugo kaniya sa Diyos nga pagabuhaton. Human nga siya nakabig ug naulian sa panan-aw, siya “padayong nakabatog gahom nga labi pa gayod ug nagpakutaw sa mga Judio nga nagpuyo sa Damasco samtang lohikanhon niyang gipamatud-an nga kini mao ang Kristo.”—Buhat 9:22.
10. Sa unsang paagi ang gahom nga gikan sa Diyos nakatabang sa kahimtang ni Pablo?
10 Siyempre si Pablo nagkinahanglan gayod ug dugang gahom, kon atong palandongon ang espirituwal ug mental nga kusog nga gikinahanglan aron mahimo ang tulo ka misyonaryong panaw nga lakbayon ang libolibo ka milya. Iyang giantos usab ang tanang matang sa mga kalisod, gilahutay ang mga pagkabilanggo ug nag-atubang sa pagkamartir. Sa unsang paagi? Siya mitubag: “Ang Ginoo mibarog haduol kanako ug mituga ug gahom kanako, aron nga pinaagi kanako ang pagwali bug-os nga mahimo.”—2 Timoteo 4:6-8, 17; 2 Corinto 11:23-27.
11. Mahitungod sa gahom sa Diyos, unsang paglaom ang gihisgotan ni Pablo alang sa iyang kaubang mga alagad sa Colosas?
11 Nan, dili ikahibulong nga si Pablo, sa dihang nagsulat ngadto sa iyang “mga igsoon nga nahiusa kang Kristo” sa Colosas, nagpasalig kanila nga sila ‘himoong gamhanan uban sa bug-os nga gahom kutob sa sukod sa mahimayaong gahom [ni Jehova] aron makaagwanta sa bug-os ug magmataas-ug-pailob uban ang kangaya.’ (Colosas 1:2, 11) Bisan pag kadtong mga pulonga gitumong alang lamang sa dinihogang mga Kristohanon, ang tanan nga nagasunod sa tunob ni Jesus makabaton ug dakong kaayohan gikan sa gisulat ni Pablo.
Gihimong Gamhanan sa Colosas
12, 13. Unsa ang kahimtang sa sulat ngadto sa mga taga-Colosas, ug unsa malagmit ang pagsanong niana?
12 Ang kongregasyon sa Colosas, nga nahimutang sa lalawigan sa Roma sa Asia, tingali naporma pinaagi sa pagwali sa matinumanong Kristohanon nga ginganlag Epafras. Mopatim-aw nga sa dihang nadunggan niya nga nabilanggo si Pablo sa Roma sa mga 58 K.P., mihukom si Epafras sa pagduaw sa apostol ug sa pagdasig kaniya pinaagi sa maayong taho bahin sa gugma ug kalig-on sa iyang mga igsoon sa Colosas. Tingalig giasoy usab ni Epafras ang kasaligang report bahin sa pipila ka problema sa kongregasyon sa Colosas nga kinahanglang tul-iron. Tungod niini, naaghat si Pablo sa pagpadalag sulat sa pagdasig ug tambag sa kongregasyon. Ikaw usab makakuhag igong pagdasig gikan sa kapitulo 1 sa maong sulat, kay gipadayag niini kon sa unsang paagi si Jehova magahatag ug gahom sa iyang mga alagad.
13 Imong mahanduraw kon unsay gibati sa mga igsoong lalaki ug babaye sa Colosas sa dihang gihubit sila ni Pablo ingong “kasaligang mga igsoon nga nahiusa kang Kristo.” Sila takos sa pagdayeg tungod sa ilang ‘gugma alang sa tanang mga balaan’ ug sa ‘pagpamunga sa maayong balita’ sukad sa panahon nga sila nangahimong mga Kristohanon! Kini bang samang mga pahayag mahimong ikaingon bahin sa atong kongregasyon, bahin sa tagsatagsa kanato?—Colosas 1:2-8.
14. Unsa ang tinguha ni Pablo may kalabotan sa mga taga-Colosas?
14 Si Pablo natandog kaayo sa taho nga iyang nadawat nga iyang gisultihan ang mga taga-Colosas nga siya wala mohunong sa pag-ampo alang kanila ug nangaliyupo nga sila “mapuno sa tukmang kahibalo sa kabubut-on [sa Diyos] diha sa tanang kaalam ug espirituwal nga panabot, aron magalakaw nga takos kang Jehova.” Siya nag-ampo nga sila “magpadayon nga magapamunga sa tanang maayong buhat ug magalambo diha sa tukmang kahibalo sa Diyos, nga ginahimong gamhanan uban sa bug-os nga gahom kutob sa sukod sa iyang mahimayaong gahom aron makaagwanta sa bug-os ug magmataas-ug-pailob uban ang kangaya.”—Colosas 1:9-11.
Gihimong Gamhanan Usab Karong Adlawa
15. Sa unsang paagi kita makapasundayag sa samang tinamdan ingon sa gipabanaag sa gisulat ni Pablo ngadto sa mga taga-Colosas?
15 Pagkamaayong panig-ingnan ang gihatag ni Pablo alang kanato! Ang atong mga igsoon sa tibuok yuta nagkinahanglan sa atong mga pag-ampo nga ilang maantos ug maampingan ang ilang kalipay bisan pa sa ilang mga pag-antos. Sama kang Pablo, kinahanglang magmaespisipiko kita sa atong mga pag-ampo sa dihang makaabot kanato ang balita nga ang mga igsoon sa laing kongregasyon, o sa laing nasod naglisod. Tingalig ang usa ka duol nga kongregasyon naapektohan sa kadaot sa kinaiyahan o ubang espirituwal nga kalisod. O tingalig ang mga Kristohanon nagaantos diha sa usa ka yuta nga gihampak sa sibil nga gubat o pinatyanay batok sa lainlaing mga tribo. Diha sa pag-ampo kinahanglang mohangyo kita sa Diyos nga tabangan ang atong mga igsoon “sa paglakaw nga takos kang Jehova,” sa pagpadayon sa pagpamunga sa bunga sa Gingharian samtang sila nagaantos, ug sa pagpalambo sa kahibalo. Niining paagiha ang mga alagad sa Diyos makadawat sa gahom sa iyang espiritu, nga ‘himoong gamhanan uban sa bug-os nga gahom.’ Ikaw makatino nga ang imong Amahan makadungog ug mosanong.—1 Juan 5:14, 15.
16, 17. (a) Sama sa gisulat ni Pablo, alang sa unsa nga kita magmapasalamaton? (b) Sa unsang diwa ang katawhan sa Diyos napahigawas ug napasaylo?
16 Si Pablo misulat nga ang mga taga-Colosas angayng ‘magpasalamat sa Amahan kinsa naghimo kanilang angayan alang sa pagpakigbahin sa panulundon sa mga balaan diha sa kahayag.’ Magpasalamat usab kita sa atong langitnong Amahan sa atong dapit diha sa iyang kahikayan, sa langit man o sa yutan-ong dapit sa iyang Gingharian. Sa unsang paagi gihimo sa Diyos ang mga tawong dili-hingpit nga takos gikan sa iyang panan-aw? Si Pablo misulat ngadto sa iyang dinihogang mga igsoon: “Siya nagpahigawas kanato gikan sa awtoridad sa kangitngit ug nagbalhin kanato ngadto sa gingharian sa Anak sa iyang gugma, nga pinaagi kaniya atong nabatonan ang kapagawasan pinaagig lukat, ang kapasayloan sa atong mga sala.”—Colosas 1:12-14.
17 Bisan unsa pay atong paglaom, langitnon man o yutan-on, atong pasalamatan ang Diyos sa adlaw-adlaw alang sa atong kaluwasan gikan niining daotang sistema sa kangitngit, nga nakab-ot pinaagi sa atong pagtuo sa bililhong tagana sa halad lukat sa pinalanggang Anak ni Jehova. (Mateo 20:28) Ang dinihogan-sa-espiritu nga mga Kristohanon nakabaton ug kaayohan gikan sa lukat nga aplikado kanila sa linain nga paagi aron sila ‘mabalhin ngadto sa gingharian sa Anak sa gugma sa Diyos.’ (Lucas 22:20, 29, 30) Apan ang “ubang mga karnero” usab nakabaton ug kaayohan gikan sa lukat bisan karon. (Juan 10:16) Sila makadawat sa kapasayloan sa Diyos aron maangkon ang usa ka matarong nga baroganan atubangan kaniya ingong iyang mga higala. Sila adunay dakong bahin sa pagsangyaw sa “maayong balita sa gingharian” niining panahon sa kataposan. (Mateo 24:14) Dugang pa niana, sila adunay katingalahang paglaom sa pagkahimong bug-os nga matarong ug hingpit sa lawas, sa kataposan sa Milenyal nga Pagmando ni Kristo. Samtang basahon nimo ang paghubit sa Pinadayag 7:13-17, malagmit mouyon ka gayod nga kini maoy pamatuod sa pagkahimong giluwas ug gipanalanginan.
18. Unsang kapasig-ulian ang gihisgotan sa Colosas nga ginatapos gihapon sa Diyos?
18 Ang sulat ni Pablo nagtabang kanato sa pagkaamgo kon unsa ka dako sa atong utang sa labing bantogang tawo nga nabuhi sukad. Unsay nahimo sa Diyos pinaagi kang Kristo? “[Kadto] maoy sa pagpahiuli pag-usab nganha sa iyang kaugalingon ang tanang ubang butang pinaagi sa pagpakigdait pinaagi sa dugo nga giula niya sa sakitanang estaka, sila mga butang man diha sa yuta o mga butang sa kalangitan.” Ang katuyoan sa Diyos mao ang pagdala ug balik sa tanang kalalangan ngadto sa bug-os nga panaghiusa uban kaniya, sama sa kahimtang niini sa wala pa ang pag-alsa sa Eden. Ang Usa nga maoy gigamit sa paglalang sa tanang butang mao gihapon ang Usa karon nga gigamit sa pagtuman niini nga kapasig-ulian.—Colosas 1:20.
Gihimong Gamhanan Alang sa Unsang Katuyoan?
19, 20. Nahasandig sa unsa ang atong pagkahimong balaan ug pagkawalay-lama?
19 Ang mga kaakohan modangat kanato kinsa napasig-uli na sa Diyos. Kita kas-a makasasala ug nahimulag sa Diyos. Apan karon, kay nagtuo sa halad ni Jesus ug uban sa atong mga hunahuna nga wala na magalihok sa mga butang nga daotan, kita sa paninugdan nagabarog diha sa “balaan ug walay-lama” nga kahimtang, “walay ikasumbong atubangan [sa Diyos].” (Colosas 1:21, 22) Hunahunaa lang, sama nga wala ikaulaw sa Diyos kadtong matinumanong mga saksi sa karaang panahon, sa ingon dili kita niya ikaulaw, nga pagatawgon ingon nga atong Diyos. (Hebreohanon 11:16) Karong adlawa, walay usa ang makaakusar kanato nga sayop nga nagadala sa iyang mahimayaong ngalan, ni nga kita mahadlok sa pagpadayag nianang ngalana ngadto sa kinatumyang mga bahin sa yuta!
20 Bisan pa matikdi ang pasidaan ni Pablo nga gidugang diha sa Colosas 1:23: “Basta, gayod, nga kamo magapadayon diha sa pagtuo, nga gitukod ibabaw sa patukoranan ug malig-on ug wala mapahilayo gikan sa paglaom nianang maayong balita nga inyong nadungog, ug nga gikawali diha sa tibuok kalalangan ilalom sa langit.” Dako kaayo ang nasandig diha sa atong pagpabiling matinumanon kang Jehova, sa pagsunod sa mga tunob sa iyang pinalanggang Anak. Si Jehova ug si Jesus daghan kaayog nahimo alang kanato! Hinaot nga kita magpakitag gugma alang kanila pinaagi sa pagsunod sa tambag ni Pablo.
21. Nganong kita adunay dakong katarongan sa pagkalipay karong adlawa?
21 Nalipay gayod seguro ang mga Kristohanon sa Colosas sa pagkadungog nga ‘ang maayong balita nga ilang nadungog’ “gikawali [na] diha sa tibuok kalalangan ilalom sa langit.” Karong adlawa labi pang makapalipay ang pagkadungog sa sukod sa pagkawali sa maayong balita sa Gingharian pinaagi sa kapin sa upat ug tunga ka milyong mga Saksi diha sa kapin sa 230 ka kayutaan. Gani, tuigtuig halos 300,000 gikan sa tanang kayutaan ang nangapasig-uli ngadto sa Diyos!—Mateo 24:14; 28:19, 20.
22. Bisag kita nagaantos, unsay mahimong buhaton alang kanato sa Diyos?
22 Bisag si Pablo napriso sa bilanggoan sa panahon nga iyang gisulat ang sulat ngadto sa mga taga-Colosas, siya wala maguol sa iyang kahimtang sa bisan unsang paagi. Hinunoa, siya miingon: “Nagamaya ako karon sa akong mga pag-antos alang kaninyo.” Si Pablo nahibalo nga kadto maoy sa “pag-agwanta sa bug-os ug magmataas-ug-pailob uban ang kangaya.” (Colosas 1:11, 24) Apan siya nahibalo nga wala niya kini mahimo sa iyang kaugalingong kusog. Gihimo siya nga gamhanan ni Jehova! Sama usab karong adlawa. Wala mawala sa libolibong mga Saksi nga nabilanggo ug gilutos ang ilang kalipay sa pag-alagad kang Jehova. Hinunoa, sila nakadangat sa pagpabili sa pagkatinuod sa pulong sa Diyos nga makita diha sa Isaias 40:29-31: “Siya nagahatag ug gahom ngadto sa gikapoy . . . Kadtong nagahulat kang Jehova magabag-o sa ilang kusog.”
23, 24. Unsang sagradong tinago ang gihisgotan sa Colosas 1:26?
23 Ang ministeryo sa maayong balita nga nagasentro kang Kristo bililhon kaayo kang Pablo. Buot niya nga apresyahon sa uban ang bili sa papel ni Kristo sa katuyoan sa Diyos, busa iyang gihubit kini ingon nga “ang sagradong tinago nga natagoan sukad sa miaging mga sistema sa mga butang ug sa miaging mga kaliwatan.” Hinunoa kadto dili magpadayon nga tinago. Si Pablo midugang: “Karon kini gipadayag na ngadto sa iyang mga balaan.” (Colosas 1:26) Sa dihang mitungha ang rebelyon sa Eden, si Jehova misaad ug maayong mga butang sa umaabot, nga nagtagna nga ‘ang binhi sa babaye magasamad sa ulo sa bitin.’ (Genesis 3:15) Unsay kahulogan niini? Sa daghang kaliwatan, sa daghang kasiglohan, kini nagpabiling misteryo. Unya miabot si Jesus, ug siya “naghatag ug kahayag nganha sa kinabuhi ug sa pagkadili-madunot pinaagi sa maayong balita.”—2 Timoteo 1:10.
24 Oo, ang “sagradong tinago” nahasentro kang Kristo ug sa Mesiyanikong Gingharian. Gihisgotan ni Pablo “ang mga butang sa mga langit,” nga nagpunting niadtong kinsa makigbahin sa pagmando sa Gingharian uban ni Kristo. Kini sila mahimong kasangkapan sa pagpatunghag dili-matukib nga mga panalangin ngadto sa tanang “mga butang dinhi sa yuta,” ngadto niadtong kinsa magatagamtam ug usa ka walay-kataposang paraiso dinhi. Imong makita kon unsa ka angay, niadtong panahona, ang paghisgot ni Pablo sa “mahimayaong mga bahandi niining sagradong tinago.”—Colosas 1:20, 27.
25. Sama sa gipakita sa Colosas 1:29, unsa ang angay natong tinamdan karong adlawa?
25 Si Pablo maikagong nagpaabot sa iyang dapit diha sa Gingharian. Apan siya nahibalo nga kini dili maoy usa ka butang diin siya yanong maglingkod lamang ug magpaabot. “Ako sa pagkatinuod nagahago, nga nanlimbasog sa akong kaugalingon sumala sa pagpalihok niya ug kini nagalihok dinhi kanako nga may gahom.” (Colosas 1:29) Matikdi nga si Jehova, pinaagi ni Kristo, naghimo kang Pablo nga gamhanan aron matuman ang usa ka nagaluwas-ug-kinabuhi nga ministeryo. Si Jehova makahimo ug sama alang kanato karong adlawa. Apan angay natong pangutan-on ang atong kaugalingon, ‘Ako ba adunay espiritu sa pag-ebanghelyo nga akong nabatonan sa akong unang pagkakat-on sa kamatuoran?’ Unsay imong tubag? Unsay makatabang sa matag usa kanato aron makapadayon sa ‘paghago ug manlimbasog sa atong kaugalingon sumala sa pagpalihok sa gahom ni Jehova’? Hisgotan sa sunod artikulo kining butanga mismo.
Nakatimaan Ka Ba?
◻ Nganong kita makatino nga si Jehova makapasundayag sa iyang gahom alang sa mga tawo?
◻ Unsa ang kahimtang sa mga pulong ni Pablo diha sa Colosas kapitulo 1?
◻ Sa unsang paagi ginatuman sa Diyos ang kapasig-ulian nga gihisgotan diha sa Colosas 1:20?
◻ Pinaagi sa iyang gahom, unsay mahimo ni Jehova pinaagi kanato?
[Mapa/Hulagway sa panid 8]
(Alang sa aktuwal nga pagkahan-ay, tan-awa ang publikasyon)
COLOSAS