‘Padayon sa Paglakaw nga Nahiusa Kang Kristo’

“Busa, maingon nga inyong gidawat si Kristo Jesus nga Ginoo, padayon sa paglakaw nga nahiusa kaniya.”​—COLOSAS 2:6.

1, 2. (a) Sa unsang paagi ang Bibliya nagbatbat sa kinabuhi ni Enoc sa matinumanong pag-alagad kang Jehova? (b) Sa unsang paagi gitabangan kita ni Jehova nga molakaw uban kaniya, ingon sa gipakita sa Colosas 2:6, 7?

NAKAKITA ka na ba sukad ug usa ka gamayng batang lalaki nga naglakaw kauban sa iyang amahan? Ang bata mosundog sa matag lihok sa iyang amahan, nga makita sa iyang nawong ang pagdayeg; ang amahan moagak kaniya, nga madayag sa iyang kaugalingong nawong ang gugma ug pag-uyon. Sa kahaom, si Jehova naggamit sa mao gayong kahubitan sa pagbatbat sa usa ka kinabuhi sa matinumanong pag-alagad kaniya. Pananglitan, ang Pulong sa Diyos nag-ingon nga ang matinumanong tawo nga si Enoc “nagpadayon sa paglakaw uban sa [matuod] nga Diyos.”​—Genesis 5:24; 6:9.

² Maingon nga ang mahunahunaong amahan moagak sa iyang bata pang anak nga lalaki sa paglakaw uban kaniya, si Jehova naghatag kanato sa kinamaayohang tabang nga maarangan. Gipadala niya ang iyang bugtong Anak sa yuta. Sa matag lakang sa iyang tibuok-kinabuhi nga paglakaw dinhi sa yuta, si Jesu-Kristo hingpit nga nagbanaag sa iyang langitnong Amahan. (Juan 14:9, 10; Hebreohanon 1:3) Busa aron makalakaw uban sa Diyos, kinahanglang molakaw kita uban kang Jesus. Si apostol Pablo misulat: “Busa, maingon nga inyong gidawat si Kristo Jesus nga Ginoo, padayon sa paglakaw nga nahiusa kaniya, nga pinagamot ug ginatukod diha kaniya ug ginalig-on diha sa pagtuo, ingon sa pagkatudlo kaninyo, nga manag-awas sa pagtuo diha sa pagpasalamat.”​—Colosas 2:6, 7.

 3. Sumala sa Colosas 2:6, 7, nganong makaingon kita nga labaw pa ang nalangkit sa paglakaw nga nahiusa kang Kristo kay sa pagpabawtismo lamang?

³ Tungod kay buot nilang molakaw nga nahiusa kang Kristo, nga naningkamot sa pagsunod sa iyang hingpit nga mga lakang, ang matinud-anog-kasingkasing nga mga estudyante sa Bibliya nabawtismohan. (Lucas 3:21; Hebreohanon 10:7-9) Sa tibuok kalibotan, sa 1997 lamang, kapin sa 375,000 ang mihimo niining hinungdanong lakang​—nag-aberids ug kapin sa 1,000 matag adlaw. Kulbahinam kining maong pag-uswag! Bisan pa niana, ang mga pulong ni Pablo nga nasulat sa Colosas 2:6, 7 nagpakita nga labaw pa ang nalangkit sa paglakaw nga nahiusa kang Kristo kay sa pagpabawtismo lamang. Ang Gregong berbo nga gihubad ug “padayon sa paglakaw” naghubit sa usa ka lihok nga kinahanglang walay hunong, nagapadayon. Dugang pa, midugang si Pablo nga ang paglakaw uban kang Kristo naglangkit sa upat ka butang: gipagamot diha kang Kristo, ginatukod diha kaniya, ginalig-on diha sa pagtuo, ug manag-awas sa pagpasalamat. Konsiderahon nato ang matag prase ug susihon nato kon sa unsang paagi kini makatabang kanato sa pagpadayon sa paglakaw nga nahiusa kang Kristo.

Ikaw ba ‘Gipagamot Diha Kang Kristo’?

 4. Unsay kahulogan sa pagkahimong ‘gipagamot diha kang Kristo’?

⁴ Una, si Pablo misulat, kinahanglang kita ‘gipagamot diha kang Kristo.’ (Itandi ang Mateo 13:20, 21.) Sa unsang paagi ang usa ka tawo maningkamot nga mahimong gipagamot diha kang Kristo? Aw, ang mga gamot sa usa ka tanom dili makita, apan kini hinungdanon sa tanom​—kini naghatag niana ug kalig-on ug nagtagana nianag pagkaon. Sa susama, ang panig-ingnan ug pagtulon-an ni Kristo nag-apektar una kanato nga dili makita, nga matisok diha sa atong mga hunahuna ug mga kasingkasing. Dinha kini nagpahimsog ug nagpalig-on kanato. Sa dihang tugotan nato kana nga momando sa atong panghunahuna, sa atong mga lihok, ug sa atong mga desisyon, kita mapalihok sa pagpahinungod sa atong mga kinabuhi kang Jehova.​—1 Pedro 2:21.

 5. Sa unsang paagi nato ‘maugmad ang pangandoy’ alang sa espirituwal nga pagkaon?

⁵ Gipabilhan ni Jesus ang kahibalo gikan sa Diyos. Gipakasama gani niya kini sa pagkaon. (Mateo 4:4) Aw, sa iyang Wali sa Bukid, mikutlo siyag 21 ka beses gikan sa walo ka lainlaing mga basahon sa Hebreohanong Kasulatan. Aron masundog ang iyang panig-ingnan, kinahanglang buhaton nato ang gitambag ni Pedro​—“ugmara ang pagpangandoy” alang sa espirituwal nga pagkaon “sama sa bag-o pang nahimugso nga mga bata.” (1 Pedro 2:2) Sa dihang ang bag-o pang nahimugso nga bata mangandoy ug pagkaon, tin-awng ipahibalo niya ang iyang hilabihang pangandoy. Kon kita sa pagkakaron wala mobatig ingon niana bahin sa espirituwal nga pagkaon, ang mga pulong ni Pedro nagdasig kanato nga ‘ugmaron’ ang maong pangandoy. Sa unsang paagi? Ang prinsipyo nga makaplagan sa Salmo 34:8 makatabang: “Sulayi ug tan-awa nga si Jehova maayo.” Kon kita regular nga ‘mosulay’ sa Pulong ni Jehova, ang Bibliya, tingali magbasa ug usa ka bahin niana kada adlaw, makita nato nga kana makapalig-on sa espirituwal ug makaayo. Ngadtongadto, ang atong pangandoy alang niana mosamot.

 6. Nganong hinungdanon ang pagpamalandong sa atong gibasa?

⁶ Bisan pa niana, hinungdanon ang paghilis pag-ayo sa pagkaon sa dihang ato kanang gikaon. Busa kinahanglan kitang mamalandong sa atong gibasa. (Salmo 77:11, 12) Pananglitan, samtang atong gibasa ang librong Ang Labing Bantogang Tawo nga Nabuhi Sukad, ang matag kapitulo mahimong labi pang mapuslanon kanato kon kita mohunong ug mosukna sa atong kaugalingon: ‘Unsang bahina sa personalidad ni Kristo ang akong nakita niining maong asoy, ug sa unsang paagi masundog nako kana sa akong kaugalingong kinabuhi?’ Ang pagpamalandong nianang paagiha motabang kanato sa pagpadapat sa atong nakat-onan. Unya, sa dihang mohimog desisyon, mahimong suknaon nato ang atong kaugalingon kon unsay lagmit buhaton ni Jesus. Kon kita mohimo sa atong desisyon sumala niana, kita naghatag ug pamatuod nga tinuod nga gipagamot diha kang Kristo.

 7. Unsay angay natong panglantaw sa gahing espirituwal nga pagkaon?

⁷ Giawhag usab kita ni Pablo nga mokaon ug “gahi nga pagkaon,” ang laglom nga mga kamatuoran sa Pulong sa Diyos. (Hebreohanon 5:14) Ang pagbasa sa tibuok Bibliya mahimong maoy atong unang tumong niining bahina. Unya anaay mas tinong mga ulohan sa pagtuon, sama sa halad lukat ni Kristo, ang lainlaing mga pakigtugon nga gihimo ni Jehova uban sa iyang katawhan, o ang pipila ka matagnaong mga mensahe diha sa Bibliya. Adunay daghang materyal nga motabang kanato sa pagkaon ug paghilis sa maong gahing espirituwal nga pagkaon. Unsay tumong sa pagbaton nianang kahibaloa? Kini maoy, dili sa paghatag kanatog rason nga manghambog, kondili sa pagpalig-on sa atong gugma kang Jehova ug pagpasuod kanato ngadto kaniya. (1 Corinto 8:1; Santiago 4:8) Kon kita mahinamong mokuha niini nga kahibalo, mopadapat niana sa atong kaugalingon, ug mogamit niana sa pagtabang sa uban, kita sa pagkatinuod nagsundog kang Kristo. Kini motabang kanato nga mahimong tukmang gipagamot diha kaniya.

Ikaw ba ‘Ginatukod Diha Kang Kristo’?

 8. Unsay buot ipasabot sa pagkahimong ‘natukod diha kang Kristo’?

⁸ Alang sa sunod nga bahin sa paglakaw nga nahiusa kang Kristo, si Pablo mibalhin dayon gikan sa usa ka tataw nga hulagway ngadto sa lain​—gikan nianang sa usa ka tanom ngadto nianang sa usa ka bilding. Sa dihang maghunahuna kita sa usa ka bilding nga ginatukod, dili kita maghunahuna lamang sa pundasyon kondili usab sa tinukod nga mobarog nga dayag kaayo, pinaagi sa hilabihang paghago. Sa susama, kinahanglang maghago kita pag-ayo aron sa pag-ugmad sa mga hiyas ug mga batasan nga sama kang Kristo. Ang maong paghago dili kay dili-mamatikdan, ingon sa gisulat ni Pablo kang Timoteo: ‘Tugoting ang imong pag-uswag madayag sa tanang tawo.’ (1 Timoteo 4:15; Mateo 5:16) Unsa ang pipila ka Kristohanong mga kalihokan nga magpalig-on kanato?

 9. (a) Aron masundog si Kristo diha sa atong ministeryo, unsa ang pipila ka praktikal nga mga tumong nga mahimong atong ibutang? (b) Unsaon nato pagkahibalo nga buot ni Jehova nga malipay kita diha sa atong ministeryo?

⁹ Gitudlo kita ni Jesus nga magsangyaw ug magtudlo sa maayong balita. (Mateo 24:14; 28:19, 20) Nagpakita siya ug hingpit nga panig-ingnan, nga maisogon ug epektibong nagsangyaw. Siyempre, dili gayod kita makahimog sama kaniya ka maayo. Bisan pa niana, si apostol Pedro nagbutang niining maong tumong alang kanato: “Balaana ang Kristo ingong Ginoo diha sa inyong mga kasingkasing, nga sa kanunay andam sa paghimo ug depensa atubangan sa tanan nga mangayo kaninyo ug katarongan sa paglaom nga anaa kaninyo, apan magabuhat sa ingon uban ang kalumo sa buot ug halawom nga pagtahod.” (1 Pedro 3:15) Kon wala nimo batia nga ikaw “kanunay andam sa paghimo ug depensa,” ayaw wad-a ang imong paglaom. Pagbutang ug makataronganong mga tumong nga motabang kanimo nga inanayng mouswag ngadto sa maong sukdanan. Ang abanteng pagpangandam mopaarang kanimo sa paglainlain sa imong presentasyon o paglakip ug usa o duha ka kasulatan. Mahimong magbutang ka ug mga tumong nga makapahimutang ug dugang literatura sa Bibliya, makahimog dugang balikduaw, o makasugod ug usa ka pagtuon sa Bibliya. Ang pasiugda kinahanglang dili diha lamang sa gidaghanon​—sama sa gidaghanon sa mga oras, napahimutang, o mga pagtuon​—kondili sa kalidad. Ang pagbutang ug makataronganong mga tumong ug pagpaningkamot aron sa pagkab-ot niana makatabang kanato nga malipay sa paghatag sa atong kaugalingon diha sa ministeryo. Mao kanay gusto ni Jehova​—nga kita moalagad kaniya “uban ang pagmaya.”​—Salmo 100:2; itandi ang 2 Corinto 9:7.

10. Unsa ang pipila ka Kristohanong mga buluhaton nga kinahanglan natong himoon, ug sa unsang paagi makatabang kini kanato?

¹⁰ Aduna usab ing mga buluhaton nga atong ginahimo diha sa kongregasyon nga magtukod kanato diha kang Kristo. Ang labing hinungdanon mao kanang pagpakitag gugma alang sa usag usa, tungod kay mao kini ang timailhan sa matuod nga mga Kristohanon. (Juan 13:34, 35) Samtang nagtuon pa kita, daghan kanato ang nasuod pag-ayo sa atong magtutudlo, nga kinaiyanhon lamang. Apan, kita ba karon makasunod sa tambag ni Pablo nga “magpasangkad” pinaagi sa pag-ilaila sa uban diha sa kongregasyon? (2 Corinto 6:13) Ang mga ansiyano usab nagkinahanglan sa atong gugma ug apresasyon. Pinaagi sa pagkooperar uban kanila, pagpangayo ug pagdawat sa ilang Kasulatanhong tambag, mapasayon nato pag-ayo ang ilang hago nga buluhaton. (Hebreohanon 13:17) Sa samang panahon, makaamot kini ngadto sa atong pagkanatukod diha kang Kristo.

11. Unsang realistikanhong panglantaw sa bawtismo ang angay natong batonan?

¹¹ Ang bawtismo maoy kulbahinam nga okasyon! Bisan pa niana, dili nato dahomon nga ang matag yugto sa atong kinabuhi human niana maoy sama ka kulbahinam. Ang dakong bahin sa atong pagkahimong ginatukod diha kang Kristo naglangkit sa ‘paglakaw nga mahusay sa samang naandan nga paagi.’ (Filipos 3:16) Wala kana magpasabot ug usa ka laay, puol nga estilo sa kinabuhi. Kana yanong nagkahulogan nga mopadayon sa paglakaw nga dili motipas​—sa laing pagkasulti, pagtukod ug maayong espirituwal nga mga batasan ug nagtuman niana adlaw-adlaw, tuigtuig. Hinumdomi, “siya nga nakalahutay hangtod sa kataposan mao ang maluwas.”​—Mateo 24:13.

Ikaw ba “Ginalig-on Diha sa Pagtuo”?

12. Unsay kahulogan sa pagkahimong “ginalig-on diha sa pagtuo”?

¹² Sa iyang ikatulong prase nga naghubit sa atong paglakaw nga nahiusa kang Kristo, giawhag kita ni Pablo nga mahimong “ginalig-on diha sa pagtuo.” Ang usa ka hubad mabasa, “gikompirmar maylabot sa pagtuo,” kay ang Gregong pulong nga gigamit ni Pablo mahimong magkahulogan ug “pagkompirmar, paggarantiya, ug paghimong dili-mausab sa legal nga paagi.” Samtang mouswag ang atong kahibalo, gihatagan kita ug dugang mga rason sa pagsabot nga ang atong pagtuo kang Jehova nga Diyos maayong pagkasukad ug, sa pagkatinuod, legal nga natukod. Ang resulta mao ang pag-uswag sa atong kalig-on. Mag-anam ka lisod alang sa kalibotan ni Satanas sa paghaylo kanato. Magpahinumdom kini kanato sa tambag ni Pablo nga ‘mouswag ngadto sa pagkahamtong.’ (Hebreohanon 6:1) Ang pagkahamtong ug kalig-on mag-uban.

13, 14. (a) Ang unang-siglong mga Kristohanon sa Colosas nag-atubang sa unsang mga kapeligrohan sa ilang kalig-on? (b) Unsay lagmit nga nakapabalaka kang apostol Pablo?

¹³ Ang unang-siglong mga Kristohanon sa Colosas nag-atubang ug mga kapeligrohan sa ilang kalig-on. Nagpasidaan si Pablo: “Pagbantay kamo: basin ug adunay modagit kaninyo pinaagi sa pilosopiya ug walay-pulos nga panglimbong sumala sa mga tradisyon sa mga tawo, sumala sa paninugdang mga butang sa kalibotan ug dili sumala kang Kristo.” (Colosas 2:8) Dili buot ni Pablo nga ang mga taga-Colosas, nga nahimong mga sakop sa “gingharian sa Anak sa gugma [sa Diyos],” madala, mapahilayo gikan sa ilang bulahang espirituwal nga kahimtang. (Colosas 1:13) Gipahisalaag sa unsang paagi? Gipunting ni Pablo ang “pilosopiya,” ang bugtong higayon nga makita kining pulonga diha sa Bibliya. Naghisgot ba siya bahin sa Gregong mga pilosopo, sama kang Plato ug Socrates? Bisan tuod kini nagpameligro sa matuod nga mga Kristohanon, niadtong mga adlawa, ang pulong “pilosopiya” adunay mas sangkad nga gamit. Kini kasagarang nagtumong sa daghang grupo ug pundok sa mga tawo nga samag mga hunahuna​—bisan relihiyosong mga pundok. Pananglitan, ang unang-siglong mga Hudiyo sama kang Josephus ug Philo nagtawag sa ilang kaugalingong relihiyon nga usa ka pilosopiya​—tingali aron mosamot ang kamadanihon niini.

¹⁴ Ang pipila ka pilosopiya nga lagmit nagpabalaka kang Pablo maoy relihiyoso ang matang. Sa ulahi sa mao gihapong kapitulo sa iyang sulat ngadto sa mga taga-Colosas, iyang giingnan kadtong nagtudlo, “Ayaw pagkupot, ni pagtilaw, ni paghikap,” sa ingon nagtumong sa mga bahin sa Moisesnong Kasugoan nga gitapos sa kamatayon ni Kristo. (Roma 10:4) Lakip sa paganong mga pilosopiya, ang mga impluwensiya nagalihok nga nagpameligro sa espirituwalidad sa kongregasyon. (Colosas 2:20-22) Nagpasidaan si Pablo batok sa pilosopiya nga maoy bahin sa “paninugdang mga butang sa kalibotan.” Ang maong bakak nga pagtulon-an naggikan sa tawo.

15. Unsaon nato paglikay nga mahaylo sa dili-kasulatanhong panghunahuna nga sagad natong maatubang?

¹⁵ Ang pagpasiugda sa tawhanong mga ideya ug panghunahuna nga dili lig-ong gipasukad sa Pulong sa Diyos magpameligro sa Kristohanong kalig-on. Kita karon kinahanglang magmabinantayon sa maong mga kapeligrohan. Nag-awhag si apostol Juan: “Mga hinigugma, ayaw ninyo tuohi ang matag inspiradong pahayag, hinunoa sulayi ang mga inspiradong pahayag aron masuta kon kini ba sila nagagikan sa Diyos.” (1 Juan 4:1) Busa kon ang usa ka kauban sa tunghaan mosulay sa pagdani kanimo nga ang pagkinabuhi sumala sa mga sukdanan sa Bibliya maoy kinaraan, o kon ang usa ka silingan mosulay sa pag-impluwensiya kanimo sa pagsagop sa usa ka materyalistikanhong tinamdan, o kon ang usa ka kauban sa trabaho inanayng magpit-os kanimo sa pagsupak sa imong binansay sa Bibliya nga tanlag, o bisan kon ang usa ka kaubang magtutuo mosultig hinawayon, negatibong mga komento bahin sa uban diha sa kongregasyon nga pinasikad sa iyang kaugalingong hunahuna, ayawg tuohi dayon ang ilang giingon. Wagtanga ang dili kaharmonya sa Pulong sa Diyos. Samtang buhaton nato kana, mahuptan nato ang atong kalig-on samtang kita maglakaw nga nahiusa kang Kristo.

“Manag-awas sa Pagtuo Diha sa Pagpasalamat”

16. Unsa ang ikaupat nga bahin sa paglakaw nga nahiusa kang Kristo, ug unsang pangutana ang atong ikasukna?

¹⁶ Ang ikaupat nga bahin sa paglakaw nga nahiusa kang Kristo nga gihisgotan ni Pablo mao nga kita “manag-awas sa pagtuo diha sa pagpasalamat.” (Colosas 2:7) Ang pulong “manag-awas” magpahinumdom sa usa ka suba nga miawas sa mga tampi niini. Kini nagsugyot nga alang kanatong mga Kristohanon, ang atong pagpasalamat kinahanglang mapinadayonon o usa ka nabatasang butang. Ang matag usa kanato maayong mangutana, ‘Ako ba mapasalamaton?’

17. (a) Nganong ikaingon man nga kitang tanan daghag nabatonan nga takos pasalamatan, bisan sa malisod nga kapanahonan? (b) Unsa ang pipila ka gasa gikan kang Jehova nga gibati nimong ilabinang mapasalamaton niana?

¹⁷ Sa pagkatinuod, kitang tanan adunay daghang rason nga moawas sa mga pasalamat ngadto kang Jehova matag adlaw. Bisan sa kinalisdang mga panahon, aduna tingaliy pipila ka yanong mga butang nga magtagana ug mga yugto sa kahupayan. Ang usa ka higala magpakitag empatiya. Ang usa ka minahal mohikap nga mapasaligon. Ang igong pagpahulay sa gabii makapapiskay. Ang usa ka lamiang pagkaon makatagbaw sa kagutom. Ang honi sa langgam, katawa sa usa ka bata, hayag asul nga langit, makarepreskong huyohoy​—kining tanan ug daghan pa mahimong matagamtam nato sa usa ka adlaw. Sayon ra kaayo nga pakamenoson ang maong mga gasa. Dili ba kanang tanan takos sa salamat? Kining tanan naggikan kang Jehova, ang Tuboran sa “matag maayong gasa ug matag hingpit nga hatag.” (Santiago 1:17) Ug gihatagan kita niya ug mga gasa nga naghimo niining gamay ra​—pananglitan, ang kinabuhi mismo. (Salmo 36:9) Dugang pa, gihatagan niya kita ug kahigayonan nga mabuhi sa walay kataposan. Aron makatagana niining gasaha, si Jehova naghimo sa kinalabwang halad pinaagi sa pagpadala sa iyang bugtong Anak, “ang usa nga iyang ilabinang gikahimut-an.”​—Proverbio 8:30; Juan 3:16.

18. Unsaon nato pagpakita mismo nga kita mapasalamaton kang Jehova?

¹⁸ Nan, pagkatinuod gayod sa mga pulong sa salmista: “Maayong maghatag ug mga pasalamat kang Jehova.” (Salmo 92:1) Sa susama, gipahinumdoman ni Pablo ang mga Kristohanon sa Tesalonica: “May kalabotan sa tanang butang pagpasalamat.” (1 Tesalonica 5:18; Efeso 5:20; Colosas 3:15) Ang matag usa kanato mahimong modesisyon nga magmapasalamaton pa. Ang atong mga pag-ampo dili kinahanglang malangkoban lamang sa mga pangamuyo ngadto sa Diyos mahitungod sa atong mga panginahanglan. Kini maayo man kon tukma. Apan handurawa nga duna kay higala nga makigsulti lamang kanimo kon duna siyay gikinahanglan gikan kanimo! Busa nganong dili moampo kang Jehova sa pagpasalamat ug pagdayeg lamang kaniya? Makapahimuot gayod kaniya ang maong mga pag-ampo sa dihang makita niya kining dili-mapasalamatong kalibotan! Ang segundaryong benepisyo mao nga ang maong mga pag-ampo mahimong motabang kanato sa pagtunong sa pagtagad diha sa positibong mga bahin sa kinabuhi, nga magpahinumdom kanato kon unsa kita ka bulahan.

19. Sa unsang paagi ang pinulongan ni Pablo sa Colosas 2:6, 7 nagsugyot nga kitang tanan mahimong magpadayon sa pagpauswag sa paglakaw uban kang Kristo?

¹⁹ Dili ba dayag nga daghan kaayong maalamong giya ang makuha gikan sa usa ka teksto sa Pulong sa Diyos? Ang tambag ni Pablo sa pagpadayon sa paglakaw uban kang Kristo maoy usa ka butang nga angayng sundon sa matag usa kanato. Nan magmadeterminado kita nga mahimong ‘gipagamot diha kang Kristo,’ “ginatukod diha kaniya,” “ginalig-on diha sa pagtuo,” ug ‘manag-awas sa pagpasalamat.’ Ang maong tambag ilabinang hinungdanon niadtong bag-ong nabawtismohan. Apan mapadapat kana kanatong tanan. Hunahunaa kon sa unsang paagi ang punoang gamot motidlom ug motidlom pa ug kon sa unsang paagi ang usa ka bilding nga gitukod motaas ug motaas pa. Busa ang atong paglakaw uban kang Kristo dili gayod matapos. Adunay daghang kahigayonan nga mouswag. Si Jehova motabang kanato ug magpanalangin kanato, kay buot niyang kita magapadayon sa paglakaw uban kaniya ug uban sa iyang hinigugmang Anak sa walay kataposan.

Unsaon Nimo Pagtubag?

◻ Unsay nalangkit sa paglakaw nga nahiusa kang Kristo?

◻ Unsay kahulogan sa pagkahimong ‘gipagamot diha kang Kristo’?

◻ Sa unsang paagi kita mahimong ‘ginatukod diha kang Kristo’?

◻ Nganong hinungdanon kaayo nga mahimong “ginalig-on diha sa pagtuo”?

◻ Unsay atong mga katarongan nga ‘moawas uban sa pasalamat’?

[Hulagway sa panid 10]

Ang mga gamot sa usa ka kahoy dili tingali makita, apan kini nagtagana nianag pagkaon ug lig-ong nagpatisok niana