Kanus-a ba Gayod Moabot ang Dumalayong Pakigdait?

“ANG gubat maoy usa sa mga butang nga kanunay sa kasaysayan, ug kini wala mokunhod bisan pa sa sibilisasyon o demokrasiya,” misulat si Will ug Ariel Durant sa ilang librong The Lesson of History. “Ang pakigdait dili-malig-on, nga mapatunhay lamang pinaagi sa pagdawat sa pagkalabaw o panagsama sa gahom.”

Tinuod, bisan sa dagkong mga paningkamot, ang dumalayong pakigdait nakaipsot sa katawhan. Ngano? Ang katarongan mao nga ang hinungdan sa gubat mas lawom kay sa politikanhon, teritoryohanon, o katilingbanong mga pakigbisyog nga atong makita sa gawas. Ang mga Durant miingon: “Ang mga hinungdan sa gubat maoy sama sa mga hinungdan sa pag-indigay taliwala sa mga indibiduwal: pagkamaakop-akopon, palaaway, ug garbo; ang tinguha alang sa pagkaon, yuta, mga materyal, mga sugnod, pagkagamhanan.”

Hinunoa, ang Bibliya sa linaing paagi nagpaila sa hinungdan sa panagbingkil ug gubat tali sa mga indibiduwal ug sa mas dinagkong mga gubat. Atong mabasa: “Unsa may nakaingon sa inyong mga gubat ug unsa may nakaingon sa inyong mga panag-away? Dili ba mao man ang inyong lawasnong mga pangibog nga nagkasumpaki sa sulod ninyo? Buot kamo manag-iyag mga butang, apan dili ninyo kini mabatonan. Kamo nagpadayon sa pagpamatay ug pagpangibog, apan dili ninyo kini maangkon. Kamo nagpadayon sa pagpakig-away ug pagpakiggubat.”​—Santiago 4:1, 2.

Nan, ang isyu, sa laktod mao: Aron maabot ang pakigdait, kinahanglan natong wagtangon dili lamang ang mga simtoma​—mga gubat, pag-alsa, kudeta, rebolusyon​—kondili usab ang gamot nga mga hinungdan​—katahap, kahakog, kaligutgot, panag-away​—diha sa tanang tawo. Kini kinahanglang pulihan ug mga lihok nga mohaom sa dili-mahakogong mga hiyas sama sa gugma, kalulot, pagsalig, ug pagkamahinatagon. Aduna bay usa nga naglungtad nga may katakos sa pagpalampos niini? Kon kini nahasalig sa dili-hingpit, mamatay nga mga tawo, ang tubag mao gayoy wala. Apan adunay usa alang kang kinsa kini dili malisod kaayo. Kini siya mao ang Usa nga adunay tubag sa pangutana: Kanus-a ba gayod moabot ang pakigdait?

Ang Usa nga Makahatag Kalinaw

Sa mga 28 ka siglo kanhi, si propetang Isaias gidasig sa pagpahayag: “Kay alang kanato ang usa ka bata natawo, alang kanato ang usa ka anak nga lalaki gihatag; ug ang harianong pagmando igatungtong sa iyang abaga. Ug ang iyang ngalan pagatawgong Kahibulongang Magtatambag, Diyos nga Makagagahom, Amahan nga Walay Kataposan, Prinsipe sa Pakigdait. Sa kauswagan sa iyang harianong pagmando ug sa pakigdait walay kataposan.”​—Isaias 9:6, 7.

Ang ilhanan niining usa nga mohatag pakigdait nga walay kataposan sa ulahi nadayag nga walay lain kondili si Jesu-Kristo, ang “Anak sa Labing Hataas.” (Lucas 1:30-33; Mateo 1:18-23) Apan nganong kining usa molampos samtang ang tanang ubang mga prinsipe ug magmamando napakyas? Kinahanglang matikdan, una sa tanan, nga ang gisaad nga “anak” dili magpabiling walay-mahimo nga masuso hangtod sa hangtod, nga maoy paghulagway tingali kaniya sa pipila. Hinunoa, iyang ipasundayag ang “harianong pagmando” ingong “Prinsipe sa Pakigdait,” alang sa walay-kataposang panalangin sa katawhan.

Aduna pay dugang bahin sa pagmando ni Jesus. Ingong “Kahibulongang Magtatambag,” nga adunay talagsaong pagpanabot sa tawhanong kinaiyahan ug may labaw kaayo nga katakos, iyang matagad ang kinapusoran sa malisod nga mga suliran ug busa masulbad ang tunokon nga mga suliran nga maoy giatubang ug nagpakyas sa mga magmamando sa kalibotan karon. (Mateo 7:28, 29; Marcos 12:13-17; Lucas 11:14-20) Unya, ingong “Diyos nga Makagagahom,” ang binanhaw samag-Diyos nga usa, si Jesu-Kristo, nga karon naentrono na sa langit ingong Mesiyanikong Hari, molihok alang sa pakigdait pinaagig pagsobli sa dakong sukod sa iya nang nabuhat dinhi sa yuta​—pag-ayo niadtong dunay dili-matambalan nga sakit, pagtaganag pagkaon ug ilimnon alang sa mga tawo, bisan ngani sa pagkontrolar sa klima. (Mateo 14:14-21; Marcos 4:36-39; Lucas 17:11-14; Juan 2:1-11) Ingong “Amahan nga Walay Kataposan,” si Jesus adunay gahom aron buhion pag-usab ang mga nangamatay ug hatagag kinabuhing dayon. Ug siya mismo mabuhi sa walay kataposan, busa mapaneguro nga ang iyang pagmando ug ang pakigdait wala gayoy kataposan.​—Mateo 20:28; Juan 11:25, 26; Roma 6:9.

Nasangkapan sa ingon, tin-aw nga si Jesu-Kristo mao ang may katakos sa pag-atiman sa lalom nga pagkagamot nga mga hinungdan sa gubat ug panagbangi. Dili lang kay magpatungha siyag kasabotan o plano alang sa ginaingong makigdaitong pag-inagaray sa kanasoran, aron lang bungkagon sa laing ­gubat. Hinunoa, iyang wagtangon ang tanang pagka­dili-angay sa politika, sa ­teritoryo, katilingban, ug ekonomiya pinaagi pagdala sa tanang katawhan ubos sa usa ka pagmando, nianang iya sa Mesiyanikong Gingharian. Pinaagi sa pagpanguna sa tanang katawhan sa pagsimba sa bugtong matuod nga Diyos, si Jehova, iyang paphaon ang sagad nagpaluyong hinungdan sa gubat​—bakak nga relihiyon. Walay duhaduha nga si Jesu-Kristo, ang Prinsipe sa Pakigdait, molampos niining tanan. Ang pangutana mao, Kanus-a?

Mga Hitabo nga Nagatultol Ngadto sa Dumalayong Pakigdait

Human sa iyang pagkabanhaw ug pagkayab ngadto sa langit sa 33 K.P., kinahanglang hulaton ni Jesus ang tinudlong panahon alang sa iyang paglihok. Kini maoy sumala sa mando ni Jehova: “‘Lumingkod ka sa akong tuo nga kamot hangtod ibutang ko ang imong mga kaaway nga tumbanan sa imong mga tiil.’ Ang baras sa imong kalig-on igapadala ni Jehova gikan sa Sion, nga magaingon: ‘Maghari ka taliwala sa imong mga kaaway.’” (Salmo 110:1, 2; Lucas 22:69; Efeso 1:20; Hebreohanon 10:12, 13) Kanus-a man kana mahitabo? Sa kapin sa 70 ka tuig, ang mga Saksi ni Jehova nagamantala sa tibuok kalibotan sa maayong balita nga si Jesu-Kristo nagsugod na sa pagmando diha sa Gingharian sa Diyos sa langit sa tuig 1914.a

Apan basin ikaw moingon, ‘Wala may pakigdait sukad sa 1914. Sa kasukwahi, ang mga kahimtang misamot hinoon sukad niadto.’ Husto ka gayod. Kini nagpamatuod nga nagakahitabo ang mga hitabo sumala gayod sa tagna. Ang Bibliya nagsulti kanato nga sa panahong “ang gingharian sa kalibotan nahimong gingharian sa atong Ginoo ug sa iyang Kristo, . . . ang kanasoran nangapungot.” (Pinadayag 11:15, 18) Inay magpasakop sa pagmando ni Jehova nga Diyos ug sa iyang Prinsipe sa Pakigdait, ang kanasoran midasdas hinoon ngadto sa usa ka sinalimoang nga pagginubatay alang sa pagmando sa tibuok kalibotan ug mipahayag sa ilang kasuko ilabina batok sa mga Kristohanon nga nagapamatuod bahin sa natukod nga Gingharian sa Diyos.

Ang basahon sa Pinadayag nagbutyag usab nga sa dihang si Jesu-Kristo nakabaton na sa Gingharianong kagahom, siya gilayon milihok sa pagpalagpot kang Satanas ug sa iyang mga demonyo gikan sa langit: “Karon nahiabot na ang kaluwasan ug ang gahom ug ang gingharian sa atong Diyos ug ang pagbulot-an sa iyang Kristo, kay gikatambog na ang magsusumbong batok sa atong kaigsoonan, nga nagsumbong kanila adlaw ug gabii sa atubangan sa atong Diyos!” Unsay sangpotanan? Ang asoy nagpadayon: “Tungod niini paglipay O kalangitan, ug kamo nga nanagpuyo niini! Apan alaot o yuta ug dagat, kay diha kaninyo nahilusad ang yawa nga puno sa dakong kapungot, sanglit nasayod man siya nga hamubo na lamang ang iyang panahon.”​—Pinadayag 12:10, 12.

Usa ka Pangataposang Ilhanan

Kini nagahatag kanatog pagsabot kon nganong wala makapatunghag pakigdait ang mga nasod bisan pa sa tanan nilang mga paningkamot. Ang dakong kapungot sa Yawa, nga napabanaag diha sa kaugalingong kapungot sa mga nasod, nagpagubot ug nagpasamok sa kalibotan nga walay sama sukad sa tawhanong kasaysayan. Kanus-a man kining tanan matapos? Ang Bibliya naghatag ug hinungdanong timailhan: “Sa diha nga ang mga tawo magakanayon: ‘Kalinaw ug kasegurohan!’ sa kalit moabot kanila ang pagkalaglag.”​—1 Tesalonica 5:3.

Imo bang gipabilhan ang kahulogan niining pasidaana? Ang mga hitabo sa kalibotan nga detalyado natong gihisgotan sa nag-unang artikulo nagpakita nga ang mga magmamando ug daghang mga tawo nagahisgot mahitungod sa pakigdait ug nagapaningkamot nga makab-ot kini nga wala pa mahimo sukad masukad. Ang uban mibati nga inigkatapos sa Bugnawng Gubat, ang hulga sa nukleyar nga gubat usa na unya ka butang sa nangagi. Oo, daghan ang gipanulti sa mga nasod mahitungod sa kalinaw ug kasegurohan. Apan nagapadulong ba gayod ang ­kahimtang sa kalibotan nianang direksiyona? Hinumdomi, nag-ingon si Jesus mahitungod sa mga tawo nga nagakinabuhi sa kaulahiang mga adlaw, nga nagsugod sa 1914: “Sa pagkatinuod magaingon ako kaninyo nga sa dili pa mahanaw kining kaliwatana, kining tanang mga butanga magakahitabo gayod.” (Mateo 24:34) Oo, ang pakigdait moabot gayod niining kaliwatana apan dili pinaagi sa mga paningkamot sa mga kanasoran. Ang lig-ong pagkatukod, matul-id, ug matarong nga pakigdait nga gisaad ni Jehova nga Diyos moabot pinaagi lamang sa nagasingabot nga pagmando sa iyang Prinsipe sa Pakigdait, si Jesu-Kristo.​—Isaias 9:7.

Kon ikaw nangandoy nga makita ang adlaw sa dihang ang pakigdait tinuod gayod nga moabot ug makatagamtam niini uban sa imong mga minahal, nan tutok sa Prinsipe sa Pakigdait ug ibutang pag-ayo sa imong hunahuna ang iyang mapasaligong mga pulong: “Nan, panagtukaw kamo, sa tanang panahon mag-ampo nga unta makabaton kamog kalig-on aron sa pag-ikyas gikan niining tanang mga butanga nga magakahitabo, ug sa pagbarog sa atubangan sa Anak sa tawo.”​—Lucas 21:36.

[Footnote]

[Kahon sa panid 6]

GIHUBIT ANG PAKIGDAIT

Ang kadaghanang tawo karon nagaisip sa pakigdait ingong pagkawalay gubat o panagbangi. Kini, hinunoa, maoy hiktin ra kaayo nga kahubitan sa maong pulong. Sa panahon sa Bibliya, ang pulong “pakigdait” (Hebreohanon, sha·lohmʹ) o ang panultihong “Makabaton ka untag pakigdait!” gigamit ingong komung porma sa pangomosta. (Maghuhukom 19:20; Daniel 10:19; Juan 20:19, 21, 26) Tin-aw, kini wala magtumong sa pagkawalay gubat lamang. Matikdi kon unsay gisulti sa basahong The Concept of Peace mahitungod niining puntoha: “Kon ang pulong shalom maoy gamiton alang sa pakigdait, ang hunahuna niadtong unang migamit niini mao ang usa ka kahimtang sa kalibotan o sa tawhanong katilingban nga niini nagalungtad ang pagkabug-os, paghiusa, pagkatibuok, pagkatugob. . . . Kon adunay pakigdait, ang katibuk-an ug ang kinahanglanong mga bahin niini nakaabot na sa ilang kinadak-an ug kimaayohang ang-ang sa paglungtad.” Sa dihang ipatungha sa Diyos ang pakigdait, ang mga tawo dili kay “dili na makakat-on pa mahitungod sa gubat” kondili ang ‘matag usa magalingkod ilalom sa kahong kahoyng igira ug igos.’—Miqueas 4:3, 4.

[Hulagway sa panid 7]

Ang pagkawalay pakigdait dulot nga gibati sukad sa Gubat Kalibotan I